بداية الرواية

رواية قمر خالد -14

رواية قمر خالد - غرام

رواية قمر خالد -14

التفتت: بس خالد .. ماله داعي تجذب . انا عرفت الصج .. خلاص لاتجذب علي لا تمثل ما له داعي تطيب خاطر ربيبه سبع سامعني خلاااص
خالد انصدم قُمر كانت تصرخ من قلب .. ما تصدق انه يحبها ..
خالد: قُمر تكفين .. لاتقولين جذي
قُمر قامت عنه: ماقول شنو.. بعد تبي تجذب علي.. بعد تبي تزيد من التمثيليه.. الحين عرفت.. المزاج الزفت بميلان والاكتئاب بروما.. وطيحه المستشفى.. كله علشانها.. وانا الغبيه (تمسك ويها من الطرفين) إللى قعدت اعابلك وادعي لك بالصحه وابجي عليك والوم نفسي لاني انا اللي متعتبك برفضي لك صج غبيه صج غبيه شلون طلعت غبيه جذي شلون.
وردت قُمر تبجي بصوت عالي وحرقه قلب وخالد منزل راسه للارض ما يقدر يتكلم ولا يحبس دموعه ولا شي من اللي بيقوله يمكن يرد قُمر الاوليه.. شالحل يا ربي .. شسوي ..
تكمل قُمر: مااقدر اصدق اني يوم من الايام فكرت بطيبه تجاهك.. مااقدر اضبط نفسي لين افكر اني احبك.. انا مستحيل احب انسان مثلك.. مستحيل اصدق ان اقدس شي بحياتي الحب إللي كنت اكنه في خاطري للشخص اللي يمكن يقبل انه يحبني وهبته لك وانت..(تسكت قُمر وتكمل نوحها (
خالد قام لها: لا قُمر لاتقولين جذي.. قُمر والله العظيم انا احبج
قُمر تتحرك عنه: روح بعيد عني.. روح لها.. وينها الحين.. لا يكون تركتها بالشارع وين مااهي واقفه.. خلصت التمثيليه .. (تفكر بعيون حايرة) ولا طلعه اليوم كانت مخطط لها من زمااان عشان تقول لي او تفهمني اني مجرد شي انغصبت عليه.. شي ماتبيه شي ثقيل على قلبك.
تنهار قُمر وتقعد على الارض واهي تبجي بصوت عالي ..
خالد راح حذالها: قُمر حرام تقولين جذي.. انا ما فكرت جذي.. والله يا قُمر صدقيني انا احبج
قُمر واهي تبجي: ماتحبني .. انت تحبها .. كنت تتصل فيها وتقول لها انك تبيها واني ثقل على حياتك.
خالد : قُمر تكفين والله تجذب عليج ما قلت لها جذي
قُمر تلتفت له: لاتجذب علي .. انا عرفت كل شي .. ذاك اليوم اول ما وصلنا اتصلت اهي مو؟
خالد: ............
قُمر بصوت عالي: مووووووو؟
خالد: ايه
قُمر تبجي: واليوم قبل لا نطلع كنت تتفق وياها على المكان اللي بنطلع فيه عشان اتيي وتقول اللي قالته مووووو ؟
خالد واهو يبجي: لا والله قُمر انتي تتوهمين هالشي
قُمر: لا تحلف باسم الله انت اتفقت وياها على كل شي.. فينيسيا والجندولا والمطعم ودفتر الخواطر.. (تذكرت دفتر الخواطر) دفتري مشاعري كلها تخلصت منها وخليتني اعتمد عليك وانت ماتبيني ..
قامت عنه تبي تجرحه بس ما تقدر.. اهو صج يبجي وياها بس مو معناته انه مجروح.. تبي تجرحه بالصميم وما فكرت الا بليله امس
قُمر: حتى ليله امس انت اتفقت وياها مووووو
خالد وقف على طوله من الصدمه: جااااااااااااااااااب
وكفخ قُمر كفخه طيرت مخها وطيحتها على الارض.. خالد تدارك نفسه.. شسوى.. ضرب قُمر.. خالد ضرب قُمر.. ضربها بكل قوته وبكل قهره وبكل غضب..قُمر ظلت على الارض تتلوى وخالد واقف مكانه يرتجف.. يحس بجبده تتلوع من الالم ..الم غريب يتدافع فيه.. لوعه عجيبه تسري في دمه وجسمه ما حس فيها الا يوم كانو بروما يبي يروح لقُمر لكن الدوخه خذته واهو ييترنح بالمشي.. سم بالرحمن على نفسه وحاول يتناسى الالم ..
خالد راح لعند قُمر: قُمر .. انا اسف قُمر .. قُمر سامحيني الغاليه سامحيني ..
قُمر قومت نفسها بقوة.. كف خالد طيحها بقوة بس بين لها انها جرحته بالصميم وحتى انها بدت تلوم نفسها على استهزائها به ..قومت قُمر نفسها بس ما حطت عينها بعين خالد.. سمعت صوته واهو يبجي بس ما ردت عليه ..
قُمر بهدوء: اطلع بره..
خالد ما رد عليها واحتفظ باللي بقى له من كرامه وطلع من الغرفه.. الحمد لله انها نست سالفه السفر.. بس كانت يده تحرقه.. الكف اللي عطاها اياه وايد قوي كان.. حس انه ناقص رجوله لان صفع بنت رقيقه مثل قُمر.. اهي ما كانت بوعيها يوم قالت اللي قالته.. بس بعد مو من حقي اني اصفعها ..
قبل لا يطلع من الحجرة التفت لقُمر: انا اسف قُمر .. اسف
قُمر صكرت عيونها وخلت دموعها تنهمر بهدوء.. اول ما طلع خالد التفتت للباب.. وكانت تصرخ في بالها.. لا تروح ..محتاجه لك خالد .. لاتروح.. وقعدت على الارض تكمل نوح وبجي على حظها التعس ..
خالد ظل واقف عند باب الغرفه.. الم قلبه ولوعه جبده واعصابه اللي تلفت من السالفه كانوا باتجاه وروحه المجروحه من كلام قُمر باتجاه ثاني.. كان يطالع يده ..يحس نفسه مجرم.. وتفجرفيه غضب مخيف خلاه يرتجف من راسه لقدمه وما قدر يهدي هالغضب الا بضربه قويه على الطوفه مرة ومرتين وثلاث ليما فقد الاحساس بيده وحسها انكسرت بس ما تالم.. حمل نفسه وراح داره ورمى نفسه على السرير.. خلاص.. الحلم الجميل انتهى ..والمستقبل اللي ما انولد مات.. والحب اللي بقلبه انقلب الى الام واحزان فوق احزانه القديمه.. من صج خالد تمنى الموت هاذي الليله.. تمناه رحمه لنفسه التعبانه وكرامته المجروحه ..

الجزء الثامن
الفصل الأول

اول يوم من بعد الصدمه.. البيت للحين بحاله من الهدوء الحزين .. خالد راقد بكل تعب بداره وقُمر بعد.. ما رقد الا بويه الفجر صلى ورقد.. قُمر ظلت مكانها تعبت من البجي وظلت ساكته..الاف الامنيات اللي تمنتها تبخرت بالهوا.. خدعها خالد ..وجذب عليها من دون أي سبب.. ليش سوى لها جذي.. كل الانصياع للاوامر والموافقه على الغرف المنفصله بس لان الوضع كان يناسبه.. اكرهه.. اكرهه من كل اعماق قلبي.. والله يا خالد بحرق قلبك مثل ما حرقت قلبي.. راح اعيشك بالمر مثل ما مررت حياتي واخليك تحس بالوحده مع وجودي وياك..
خالد اوتعى من الرقاد واهو لابس ثيابه ..يده كانت متورمه حيل وتعوره راح الحمام غسل ويهه وحط راسه تحت الماي عشان يخف عليه الصداع.. كره ايطاليا وكره اليوم اللي ياه ايطاليا.. ماكان يقدر يحب شي بهالدنيا غير قُمر.. حرام يا قدري اني بعد مااحب قُمر اهي تكرهني.. يا ربي ساعدني ياربي.. والله مااصبر على الحياه من دونها.. مااصبر..طلع من الحمام وبدل ثيابه وعورته يده وايد وحس انها مكسورة وظل حاملها عند خصره.. لبس له ثياب مريحه وطلع من الدار.. شاف كل شي مرتب ومعدل ولا كانه امس ساحه حرب..
راح عند غرفه قُمر.. وقف عند الباب يخاف يطرق على الباب.. خلى الباب عنه ونزل للطابق التحتي ..دخل غرفه التشميس وقعد.. يحس بالتعب وكانه حامل الدنيا على راسه.. يده تعوره ومعدته بعد تتلوى عليه من امس.. قعد يدخن بقو ليما خلص القوطي كله.. وظل قاعد مكانه ليما ياته الخدامه الثانيه انابيلا اللبنانيه الاصل
انابيلأ: good morning sir do you want to eat?
خالد: no anabila I don`t feel like eating.. Did Mrs gomar come down?
انابيلا: no sir I went to check on her and she dimissed me
خالد: ااااااااااه الله المستعان thanx anabila
انابيلا: حازرين استاز ..
راحت انابيلا عنه وظل يالس مكانه.. اليوم بيكمل رحلتهم لايطاليا وبالليل بيرد روما ومنها يردون الكويت.. خلاص خلص شهر العسل وانتهى كل شي.. مستحيل يظل هني اكثر وندى موجوده.. اهي راح تهدم كل اللي ظل بينه وبين قُمر عشان تشفي غليلها ..حمايه لقُمر لازم يرد الكويت اليوم او باجر
قُمر طلعت من الحمام بعد شاور طويل.. تحس بالالم بكل جزء بجسمها.. قعدت يم الدريسر المكسور تطالع ويهها.. خدها اليسار متورم حيل من كف خالد.. لكن مالامته ابد.. اهي جرحته وهذا يزاها.. بس حست انه انتصار على خالد.. ما تقدر تفكر شلون انقلبت مشاعرها بهذا العنف وهاذي العدائيه تجاهه.. ماتبي تفكر انها حبته ولا وجهت له أي نوع من المشاعر او العواطف..لبست جلابيه يديده اول مرة تلبسها كان لونها بدم الغزال شيفوت ومن تحتها حرير اسود والجلابيه كانت فنانه.. لمت شعرها الطويل كامل وطلعت من الدار.. توها بتنزل تحت ولاحظت نظافه المكان.. شسوت فيهم امس لعوزتهم من الزين .. طالعت دار خالد وكان الباب مفتوح.. راحت بشويش عند الغرفه.. طلت عليها ما لقت احد ..تنهدت والتفتت تنزل تحت الا خالد جدامها.. انتفضت بالبدايه ولكن ردت هادئه.. خالد بقق عيونه على وسعهن من شكل قُمر.. شسوه فيها.. ليش شوه جمالها بغبائه وعماه اشكثر هو حقير وقليل اصل يطق بنت عمه..
خالد بخجل: صباح الخير..
قُمر تطالع يده المتورمه: .... صباح النور
خالد تحمد الله لانها ردت عليه: شخبارج ..
قُمر بسخريه: اشتتوقع.. احس بانتعاش عمري ما حسيت فيه من قبل...
خالد حس باستهزائها بس بعد: دوم ان شالله مو يوم ..
قُمر راحت عنه.. وقفها بصوته: قُمر..
قُمر دق قلبها .. تكرهه شكثر تكرهه: نعم؟
خالد: زهبي اغراضج .. بنرد روما الليله وعلى باجر ان شالله احنا بالكويت
قُمر اكتئبت..انتهى الحلم.. وانتهت الاماني.. واهلا وسهلا بالاحزان: انزين..
راحت عن خالد واهي تحبس دموعها.. خالد ظل واقف مكانه.. ودخل داره.. حمل بوكه ولبس ساعته وطلع
نزل تحت نادى على انابيلا قال لها جم كلمه وراحت عنه وتوجه لباب البيت عشان يطلع.. كل هذا صار جدام قُمر اللي وقفته قبل لا يطلع من البيت
خالد باهتمام: لبيه؟
قُمر: وين رايح
خالد: بروح المستشفى
قُمر: ليش
خالد: تعورت يدي امس وبروح اشوف شصار فيها شما صار وبعدين بروح اشتري تذاكر عشان اليوم وبرد.
قُمر: اهااا
خالد: يالله مع السلامه ..
ما ردت عليه وحز بقلبه وطلع.. طول الدرب واهو يتلوى من معدته.. علامه بطنه يعوره جذي.. كله من قله الاكل ..وقعد يدخن ويدخن ليما وصلوا المستشفى.. بالفعل اللي بيده طلع كسر.. جبروها وحطوها بحماله ..
قُمر كانت تمشي بالبيت.. تدخل صاله التشميس وتطلع منها تروح عند المسبح وتمشي بالحديقه ولا تقدر تبعد ندى وخالد عن بالها.. كل ما تتذكر الكلام اللي قالته ندى تحس بالموت.. شلون قدر يخدعها.. اول شي ماكان مهتم لكن بروما ..ويوم طلعتهم.. ليش ما كان صادق وياها من البدايه.. شنو اللي بيستفيد منه اذا جذب عليها بهاذا الوقت.. يبي يبين انه حن وعطف عليها باخر الايام عشان تكون رايته بيضه.. حقير.. بس احبه.. ليش احبه ما ادري.. مستحيل احب انسان حقير مثله.. ممثل بارع.. خله يولي بستين الف داهيه يوم اللي نرد الكويت بطلب منه الطلاق.. اطلب الطلاق.. وعمي.. ابوي.. هلي وناسي كلهم.. شراح يقولون.. شراح يفسرون هالتصرف مني ..بس محد يدري ان علاقته تعدلت وياي ويمكن محد يسال.. بس اهم متوقعين شي ثاني.. مو مستعده اني اضحي بنفسي الف الف مرة عشانهم.. انا خلاص.. مااقدر اضحي بنفسي اكثر.. والكل لازم يزهب نفسه لانفصالي عن خالد
===========بالكويت وين محد يدري بشي.. العشق كان لاعب لعبته.. وسيمه اللي خبت عن الكل علاقتها بطلال اخو قُمر وجاسم اللي كل يوم عماله يدوب في هوى لولوة.. مريم اللي بتنخطب لولد عمها المرحوم عبد العزيز وبعد عشان يردون العلاقات لبعضها.. بالرغم من رفض مريم للزواج الا ان كثر الكلام والحنه على راسها اقنعتها بالزواج وتسليم امرها لله.. صبحه بنت عبدالعزيز انخطبت لعبيد اللي بغى يحرق الديرة على راسهم بزواج قُمر من خالد وكترضيه له انخطبت له بنت خاله اللي تعتبر من احلى بنات العايله.. ومروة على حالها اهي ونوفه.. الكل يحاول يتقرب منهن بس الخوف من خليفه اخوهن وابوهن يمنع الكل من التكلم عليهن ..
في بيت انيسه خالتهن كانت قاعده ويا بناتها نورة وشيخه ومروة المتزوجه
ام ناصر: اييه والله وحشوني بنات اختي ام خليفه
نورة: أي والله يمه وحشتني نوفو وايد ..
ام ناصر: والله فشيله ما رحنا لهم حتى نبارك لزواج ربيبه سبع
شيخه: يا ترى شلون استوت قُمر .. اكيد قُمر
نورة بحلم: أي والله ..انتي شوفي زوجوها لمن .. لخالد العرب ههههههههههه
مروة: ايييه والله تذكرن نروح هناك على امل نشوفه واخر شي طلع مسافر لندن
شيخه: بس الزين يستاهل الزين
مروة بطرف عينها: شقصدج
نورة تطالع شيخه واهي تضحك: هااا.. ولا شي اختي حياتي مااقصد شي هوو لاتشبينها علي
مروة : ادري فيج تتغشمرين على مشاري
شيخه: اووووه يا مروة محد يتغشمر عليه الا انتي والله محد ملاحظ كونه خال
نورة تضحك وام ناصربعد الا مروة: والله فيج خير دوري لج ريال حلاته ..
شيخه: انا بنت بدرالمصباح ادور لي على ريل .. هو خلصوا .. أللي يبيني ايي لعند بيكب ابوي هههههههههههه
نورة: أي والله بيكب ابوي هههههههههههههههه
ودخل عليهن سبع العايله ناصر: يا بعد عمري ضحكات الحلوات..
ام ناصر: هلا والله حبيبي هلا بالغالي
ناصر يحب راس امه: هلا بالغاليه دامه الله ظلج ولا يحرمنا منج
ام ناصر: وياك يالغالي
نورة: يا عيني .. انا بعرف الامهات ليش يموتن على ولادهن ولا يعبرن بناتهن
ام ناصر: ذلفي والله كلكن من فوادي بس ناصر اهو الريال الوحيد بالعايله سندي من بعد ابوه الله يخليه
شيخه ونورة ومروة يدعين: يا رب .
ام ناصر: ناصر وليدي ابيك تفضي نفسك يوم الخميس عشان بننزل الجهرا بيت خالتك ام خليفه
ناصر بنظرة شك: ابوي يدري؟
ام ناصر: ماعليك من ابوك انا اكلمه ..
ناصر: ان شالله يمه بس يمكن يتاجل لليمعه لان فرس بيوصل لي يا اليوم يالاربعاء ..
نورة: ياااااااه انت ما تمل من الفروس كل يوم فرس
ناصر: والله الفروس احسن من ويهج يا اليحه
نورة بغرور تطالع اخوها وشيخه تون عليها .. هههههيو .. مسكينه نورو .. يالله يالله بنروح الجهرا بروح ازهب اغراضي
ام ناصر: وانتي عويش بتيين ويانا
مروة: لا يمه مشاري عنده دورة وابي ايلس وياه اونسه
شيخه: شتونسين فيه .. اهو بروحه ظلامه بتخافين عووشوو صدقيني
مروة: انتي ماتيوزين ويا الكلام
ام ناصر: يووووووووه شيخو بسج عاد عيب عليج (تكلم مروة) على راحتج حبيبتي ريلج اولى
شيخه تضحك: والله انا ماادري انتوا شعاجبكم فيه .. خال يا ناس لا يكون بس انا اللي اشوفه خال.
ناصر من دون اهتمام لاخته: يالله يمه اترخص منج بروح عند الربع .. قام ناصر وزقر على نورة
برع عندالباب
نورة بعتاب: شتبي مني
ناصر: الله اختي .. مالج نفس تكلمين اخوج .
نورة: تغشمر علي وحاربني جدام شيخوه الدعله
ناصر: تاكل تبن شيخوه اتي حذالج والمثل يقول ولا تلقي على السفيه جوابا..
نورة: هاذا اهو ..
ناصر: خلاص صافيه لبن سمعيني نورو .. ابيج تتصلين اليوم بنوفه بنت خالتج وتقولين لها اننا بنيي لهم
نورة بمرح: هااا بدينا بالمواعد
ناصر: جبي زين والله انها وحشتني من اخر مرة كلمتها صكت التلفون بويهي وما كلمتني من بعدها
نورة: وانت من صجك تكلمها بالتلفون صج قلت الخيرة يا ولد بدر ..
ناصر: تكفين نورو عصبن عني بتينني البنت بموت فيها ولا اهي حاسه فيني
نورة بخبث: تحبها..
ناصر يسند نفسه بيده على الطوفه: واكثر من ما تتصورين
نورة: انزين حبيبي تامر امر اليوم اتصل فيها ..
ناصر: يعلني مااخلى منج يا بعد روح بابوه هههههههههههه
نورو: يعلك العافيه ما ظل الا بابوه وشيخو من لها بعدين
ناصر: ههههههههه وانتي الصاجه
راح ناصرعن نورة وعلى وقت المغرب اتصلت في نوفه
نوفه: هلااااااااا بهل النزهه شخباركم شلونكم وينكم قاطعينا
نورة: هلا فيج يا بعد قلبي وحشتيني حيل نوفو
نوفه: ما بين وينكم بعرس قُمر ولا نسيتو غلاها ربيبه سبع
نورة: انتي تعرفين ابوي ومخاصمه ويا ابو خليل ..
نوفه: ايييييه معلينا يالغاليه ابو ناصرومعروف بطبايعه بس هديه خالتي الله يخليها ولا احلى قُمر بتستخف عليها
نورة: الا شخبارها
نوفه: عال العال للحين بايطاليا ويا روميوها ههههههههههه
نورة: الله يهنيها ان شالله .. أقلج .. لج سلام حار مغلف بدقات القلب ومعطر بجوري الحب هههههههههه
نوفه عرفت قصدها شنو: والله ما نبي سلامه وخله يولي ولا يجابلني سامعتني خبريه شقردي..
نورة: هههههههههه نوفو حرام عليج نصور يموت عليج وهو موصيني اخبرج اننا بنييكم بزيارة يوم الخميس
نوفه: حلللللللللللفي هاذي الساعه المباركه بس الشقردي لا تييبونه وياكم
نورة: لا حبيبتي اهو الاصل ولاابوي لو نموت وما يقطنا عيل احنه شنو اللي عطلنا بعرس قُمر مو اهو
نوفه: اييييييييييه تنور الجهرا بييتكم يالغاليه ..
نورة: النور نوري ههههههههههه ولا انتي ناسيه ههههههههههههه
نوفه: هههههه لا والله ما نسينا ومرة وحده نورو بنعرفج على بنت عمنا مريم حليلها اتينن تستخفين من الضحك وياها ..
نورة: يصير خير يالغاليه اللحين بخليج تامريني بشي
نوفه: ذكر الله ياطويله العمر
نورة: هههههههههههه مسافرة انا
نوفه: مافيها شي الغاليه
نورة: لا اله الا الله يالله مع السلامه
نوفه: الله يسلمج
سكرت نورة عن نوفه ونزلت تحت شافت ناصر وخبرته واهو طلع من اول ما سمع الكلام وراح يتصل في نوفه.. نوفه شافت رقمه وسوت ريجكت للرقم.. سكرت جهازها ونزلت تحت ويا خواتها ..ناصر تسكرت الدنيا بعيونه وقعد يدز صور ومسجات ليما تعب ورد داخل ..
نوفه ويا امها وخواتها
نوفه: يمه خالتي ام ناصر بتيينا يوم الخميس ان شالله
ام خليفه تهلل ويها: حياها الله زارتنا البركه والله وحشتني خويتي ام ناصر
مروة : لا يكون بس بتييب وياها بناتها والله مااشتهيهن
نوفه: انتي منو تحبين بالله عليج غير روحج
مروة : احب امي الغاليه العزيزة
ام خليفه: ايييييييه شوفوا شتبي مني هالشقرديه ويايه تتلزق
مروة : افا عليج يمه انا اتلزق اصلا انا احبج يمه .. من زماااااااااان يالله يمه مده يدج 100 دينار
ام خليفه: حشى عليج مرووو مو توني ماعطتج 50 قبل يومين
مروة : يمه ما يكوفون وانتي تدرين الجامعه على الابواب..
ام خليفه: امري لله والله ماادري وين تصرفين هالفلوس
مروة : بالحلال يمه بالحلال
في دار طلال
طلال: ههههههههههه حياتي بسج عاد ذبحتيني من الضحك
وسيمه: سلامه عمرك حبيبي ماتشوف شر اذبحك انا شنو بنت اللحام
طلال: ماادري علامج مزوده البطاريه حبتين اليوم
وسيمه : من الحب حبيبي من الحب .. تصدق قمت اتكلم بروحي لين مااكون وياك
طلال: حاسبي على عمرج حياتي تراج غاليه ما تنفعيني بينونج
وسيمه بدلال: اهون عليك تقول لي جذي
طلال: والله اللي خالقني محد علقني فيج الا خبالج ولا منو بهالزمن يحب وحده اسمها وسيمه
وسيمه: انت حياتي انت.. احبك طلول
طلال: الله يا حياتي احبج اكثر عنج بمليون مرة انتي عمري وانتي حياتي وانتي غناتي وابوي
وسيمه: الله الله الله كل هاذول فيني وانا اقول من وين لي الكيلوات اليداد..
طلال: خخخخخخخ من حبي لج الغاليه ..
وسيمه: بس عاد بسك مغازل وقول لي . شخبار قمور
طلال: والله بخير.. كلمتها قبل سبوع وكانت بخير تسلم على الكل
وسيمه : الله يسلمها .. حبيبي الوحش اخوي شكله وصل بسكر عنك
طلال: اوووووووووف انتي اخوج هاذا ما بيموت
وسيمه: سلامه عمره حرام عليك تحرق قلب امي
طلال: والله محد بيذبحه غيري عندي شوزة بسيارتي شرايج اروح اقنصه اليوم
وسيمه: طالع هاذا تبي تدخل سجن يعني فيه خله ما يستاهل .. يوم اللي بنتزوج ما بيقدر يتكلم لي
طلال: ااااااااااه وسوم حياتي متى بس متى.. متى ادخل الكليه واتزوجج وافتك وانييب من بعدها عبادي حبيبي يلعب ويا الضب والفار والتيوس
وسيمه: يعع عليك هاذا تفكيرك صج مسطح
طلال:هههههههههههه سطحي حبيبتي سطحي
وسيمه: never care يالله حبيبي باي
طلال: خهههههههههههههه باي حياتي
في بيت سبع بن ضاحي جاسم كان قاعد يتسمع اغاني يوسف المطرف وبالتحديد اغنيه كشفو سر الهوى.. صار له اللحين شهر واهو مو بوعيه وغرقان بحب لولوة.. يبي يكلم ام خليل عنها بس مستحي وينتظر ليما ايي خالد من السفر بس ماكو راحه بلياها.. شلون حبها جذي..اهو صج بسرعه يحب الحلوات بس لولوة ملكت مشاعره كلها.. الله يهنيج يا لولوة بقلبي وروحي ويرزقني الخير بحبج يالغاليه
في بيت بو خليل بن ضاحي ام خليل وحرمه خليل ومريم كانوا يسولفن عن المرحوم عبد العزيز ويتذكرون ايامه
ام خليل بحزن: من مات بو سعود كل شي تغير وكل شي تبدل والقطيعه سادت بين الاخوان والخوات..
وضحه مرت خليل: ايه خالتي وانتي الصاجه بس الحين خالد تزوج قُمر وان شالله بزواج مريم وسعود كل شي بيتغير وبعد لا ننسى ضاري ومطلق والرعبوب حمود واحد لمروة والثاني لنوفه والثالث لولوة ارفيجه قُمر حبابه وحليوة ويا حظنا لو تدخل العايله
ام خليل: وانتي الصاجه حبوبه البنت وتدخل القلب واصيله بعد ولو انهم مو بدوو..
مريم واهي رافعه حواجبها بغرور: اصلا لولوة ما بتتزوج الا عمي جاسم وهاذا قرار نهائي
ام خليل: وانتي من موكلج على هالسالفه لا يكون بس مشتغله خطابه
مريم بحرقه قلب: لو خطابه جان خطبت لروحي مو قبلت بهالزواج اللي حيا الله مني والدرب
ام خليل: هاذا ولد المرحوم الغالي مو أي واحد وان شالله من بتلقين احسن منه
مريم: أي واحد .. ألا اهو ..
ام خليل: يالله عاد لاتقلبينها لنا فلم هندي..
مريم: انزين انزين .. بس عمي جاسم ما بياخذ الا لولوة.
وضحه: والله مادري يا مريم بس عمج هالايام مختفي عن عيوننا ..
مريم: احم احم .. الغايب عذره معاه
بدخله خليل: الله الله وانا اقول منو اللي اييب طاريي اثاريها حبيب قلب اخوها
مريم بدلع: ايه والله منو غيري يعني
يتبع ,,,,
👇👇👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -