رواية قمر خالد -19
منايات: هلا والله بقُمر
قُمر مستعجبه: هلا بمنايات هلا
منايات: كويس ما نسيتييني
قُمر: وانا اقدر انساج
توايهن البنات بكل محبه وكانهن ارفيجات من زمان
قُمر: والله صدفه حلوة
منايات : أي والله .. شخبارك يالغاليه
قُمر: ابخير الحمد لله .. وانتي شخبارج
منايات تتنهد: الحياه مستمرة وياي .. مع غياب الغاليه
قُمر: الله يرحمها
منايات : ويرحم الجميع .. الا قوليلي .. شخبارك .. للحين بايطاليا؟
قُمر: ايه .. بعد يومين بنرد الكويت.. وانتي
منايات: كنت برجع السعوديه قبل اسبوع .. بس لاقيت صحابي واقنعوني اني ابقى اكثر .. اتسلى وارد السعوديه ..
قُمر: خسارة .. لمتى بتظلين هني
منايات: باكر راح ارد السعوديه .. تخيلي الحظ
قُمر: أي والله .. بس رب صدفه خير من الف ميعاد
منايات: بالفعل.. تتسوقين؟
قُمر تبتسم: ايه والله اخر الشروة حق اللي نسيناهم ..
منايات: واللهي ان كان على التشري انا خلاص اعلنت افلاسي غاليه حيل روما
قُمر: اييه والله هههههههههه انتي هني لحالج؟
منايات: لا والله وياي صحابي.. كاهم هناك
تاشر منايات على مجموعه بنات وقُمر تطالع.. وانصدمت.. ندى ويا البنات.. وامبين ان ندى لاحظت قُمر.. واهي الثانيه انصدمت بعد.. جاسم يه لعند قُمر بس شاف بنت واقفه يمها لذا بعد شوي عنها بس لاحظ ان قُمر شوي مصدومه.. قعد يطالع اللي تطالعه وشاف.. ندى هني.. يا ساتر.. شناويه هالبنت.. ندى اول ما شافت قُمر رد الحقد وياها.. وراحت لعندها.. قُمر تطالعها واهي تبي تشرد بس ما قدرت
اول ما وصلت ندى لعند منايات: اعرفك يا قُمر على صحبتي الغاليه .. ندى.
قُمر تطالع منايات.. صاحبتج الغاليه.. اكثر انسانه اكرهها بحياتي تطلع اغلى ارفيجه لج ..تمت قُمر تطالعها بنظرة عدم تصديق
ندى وكانها ما تعرف قُمر : قوة قُمر.. شخبارج
قُمر:................. ابخير
منايات: ندى مثلك كويتيه .. بس تعيش بلندن ويا امها .. صدفه حلوة
قُمر بالم فظيع: يا مكثرها.. عن اذنج منايات لازم اخليج اللحين مستعيله
ندى تتلفت تشوف ان كان خالد وياها ولا لاء .. ماكان خالد . كان واحد يشابه خالد شوي بس ما تذكرت من اهو..
منايات: يالله قُمر .. ان نزلت الكويت ان شالله اعمل لك تلفون .. عندك خط ..
قُمر: .... انتي عطيني رقمج وانا اللي بدق عليج ..
منايات: كويس
منايات قعدت تكتب رقمها لقُمر اللي ما شالت عيونها عن ندى اللي من حقارتها قامت تكلم قُمر
ندى: سياحه قُمر؟
قُمر بخوف: ..... أي
ندى: بروحج ولا ويا الاهل
منايات: ويا زوجها .. صح؟
قُمر:......... أي صح
ندى تاشر على جاسم: هاذا زوجج
قُمر حست بحقارتها .. من صجها ما تعرف من زوجي: لا .. مو زوجي
منايات: هاك الرقم .. ولا تحرميني من صوتك ..
قُمر: ان شالله .. اخليكن اللحين.. عن جد فرصه حلوة منايات..
منايات: ايه والله .. باي قُمر
قُمر واهي تاخذ اغراضها: باي..
راحت عنهن قُمر واهي تحس بالموت وتبي تبجي .. مسكها جاسم اللي كمل حسابه وظل ينتظرها
قُمر بهمس لعمها: طلعني من هني .
جاسم مر على ندى وطالعها بنظرة احتقار..جاسم دخل قُمر وظل اهو برع.. فرصه وسنحت له انه يكلم التعبانه ندى ويوقفها عند حدها.. قُمر مااعترضت على اللي يبيه عمها بالعكس راحت ويا غويليرمو وظل جاسم مكانه .. دخل المحل وراح لعند ندى
جاسم بكل غرور: ممكن كلمه اختي لو سمحتي
ندى التفتت له وشافت النظرة...: sure why not
راحت ندى ويا جاسم وخلت منايات والبنات مصدومات من حركتها .. طلع جاسم ويا ندى وراح لعند كوفي شوب جريب .. وقعدوا ..
جاسم: على مااظن عندج فكرة انا شنو ابي اقول لج ..
ندى واهي تبتسم ابتسامه خبيثة: وتدري شنو رأي بالموضوع
جاسم حس بمدى حقارتها : يا انسه ..اخلاقج مو اخلاق بنت محترمه مربيه تربيه سنعة من قبل اهلها .. انج تلاحقين واحد متزوج كان مستعد انه يوفر لج الحياه اللي انتي يمكن ما تتصورينها باحلامج وانتي بنفسج رفضتي هذا الشي
ندى تقاطعه: مرة ثانيه للموضوع نفسه
ويقاطعها جاسم واهو يكمل: لانج مو من مستوى انج تكونين زوجه لبن ظاحي
ندى تمت تطالعه بنظرة كلها شر: مو من مستواي.. انت اكيد جاسم .. مو؟
جاسم بغرور عمره ما حس فيه: بالنسبه لج .. جاسم بن ظاحي .. يا ندى.
ندى تذكرت كلم خالد عنه وشلون جاسم مغرور ومعتد بنفسه من جذي بدت تفكر بكلامها قبل لا تقوله
ندى: اهي كلمه وحده ماكو غيرها .. khalid is mine ومو بنت ظاحي اللي بتقدر تاخذه مني
جاسم يبتسم: انتي ما عرفتي قُمر للحين
ندى: قُمر اللي ماعرفت ندى للحين .. انا نسفتها بفينيسيا .. وما باجي علي الا التشطيبات وقُمر خلاص تنتهي
جاسم حس بالكره تجاهها: انتي وايد شايفه في حالج
قامت ندى: انا بنت وتحب واحد من اربع سنين رافجته على الحلوة والمرة .. مو بنت تافهه مثل بنت اخوك اللي اتيي وتفرج امبيناتنا .. عن اذنك
جاسم ظل مكانه وردت له ندى مرة ثانيه: أي ووصل رساله لخالد .. الكويت ولا ايطاليا.. انا راح اكون معاه .. بكل خطوة... bye
راحت ندى لكن كلامها ظل مكانه باذن جاسم.. ما تحرك ولا قال ولا كلمه.. لو قام لها جان طرقها بذاك الطراق اللي بينعش حياتها.. بس اهو صبر نفسه ولبس قناع البرود.. صج انك عمي يا خالد يوم حبيت هالحيه اللي اسمها ندى.. لكن وين عني يا بنت امج .. انت ماخليتج تكرهين حياتج .. انتي بس جربي تدخلين حياه قُمر مرة ثانيه.. ما تلومين الا نفسج ..
قُمر ردت البيت واهي تعبانه حيل من شوفه ندى.. هزتها.. صج انها قويه.. وتمتلك قوة عجيبه ..يمكن من جذي خالد حبها.. لانها تبين قويه للناس.. قعدت على الكرسي واهي تسند راسها.. واول ما سكرت عيونها نزلت دموعها المحبوسه.. لمت حالها على الكرسي واهي تبجي بهدوء .. تحس بقله الحيله لانها بنت .. بنت صغيرة .. ما تقد تجابه مرة مثل ندى .. قاسيه وما عندها قلب وتقدر تحطمها بنظرة..
طلع خالد من المطبخ واهو يضحك ويا زينه وشاف قُمر قاعده واهي مغمضه عيونها .. راح لعندها واهو مستغرب
خالد بنعومه: قُمر ؟؟
قُمر انتبهت له: شصاير..
خالد : ما صاير شي سلامتج .. شفيج ..
قُمر تطالع خالد وتتذكر ندى وقامت عنه: ما صاير شي
راحت على الدري واهي تبجي من خاطر
زينه: شوفيها ستي ..
خالد واهو حاير: ماادري..
راح وراها ... وصل الصاله وقُمر صكت باب دارها .. راح لعندها يطقه
خالد: قُمر .. علامج قُمر ..
قُمر من ورى الباب: مافيني شي ... روح عني ... مافيني شي
كان صوتها حزين وكله بجي ..
خالد حط يده على الباب وما سكت: قُمر .. علامج .. ما يصير مافيج شي .. انتي ما تبجين على شي تافه.. يالله قُمر فجي الباب
قُمر استغربت منه .. ماابيك تدخل : ماابي اشوفك .. ولا ابي اتكلم وياك .. فاهم
خالد احتار زود .. اشفيها بعد .. ما بغى انها شوي تنسى زعلها بوجود جاسم وكاهي ردت مثل قبل
خالد: قُمر حبيبتي .. علامج
جاسم من وراه: خالد.. تعال هني
التفت له خالد وراح لعنده: علامها قُمر ..
جاسم : تعال وياي تحت وبقول لك
نزلوا الشباب تحت وقُمر بدارها.. فصخت عباتها والشيله وانسدحت على السرير واهي تبجي ..تحس بالكابه تسري فيها من كل طرف.. وتحس بالضعف.. وايد تغيرت.. صارت اهي والحزن نفس الشي.. كله تبجي والتفكير ذابحها.. كثر التفكير عطب حياتها.. وسكتت شوي ورقدت ...
خالد : علامها قُمر
جاسم واهو يقعد: خالد .. قُمر شافت ندى اليوم بالمحل ..
انصدم خالد .. ندى للحين هني : منووووووو
جاسم: ندى ما غيرها .. قُمر شافت بنت تعرفها بالمحل والبنت طلعت ارفيجه ندى
خالد: أي بنت ...
جاسم: ماادري كانه اسمها منايات..ماتعرفها؟
قعد خالد يتذكر الاسم .. ما يعرف وحده اسمها منايات من ارفيجات ندى .. يعرف شيماء والعنقاء وريم ولانا بس ما يعرف منايات: مااعرفها ..
جاسم: الحقيرة ندى يات حذالها وقعدت تتحداها وتكلمها وقُمر فقدت اعصابها ورديتها البيت.. من جذي اهي تعبانه وايد
خالد بدى فكه يتقرطع من الحمق: صج انها ........ وين شفتوها؟
جاسم: كانت بسنتر الديالوجي ..
خالد: قوم وياي .. اذا للحين هناك اوريها
جاسم: ماله داعي انا كلمتها ... وبدت مصرة على اللي براسها
خالد : وشنو اللي براسها؟
جاسم: انها تردك لها
خالد فقد اعصابه وصرخ: تخسي اهي واللي يابوها بنت الجلاب.. هيئتها ما تهزبت من ريال قبل..
جاسم يبتسم باستهزاء: اللي يشوفك يقول انك ما تحبها من اربع سنين
خالد يهدى: انا صج حبيتها.. حبيتها بعمى يا جاسم.. ما ادري شلون يعني فكرت اني اوجه لها أي نوع من المشاعر.. ماكانت جذي.. كانت هاديه وناعمه ولو ان فيها بعض الميول الحقيرة بس كانت عاديه ... لها عيوبها ولها ميزاتها .. شاللي غيرها
جاسم: الحب ..
خالد: انا هذا اللي قاهرني.. لو انا اللي رافضها يعني ببرر لها موقفها.. بس اهي اللي ارفضت اللي كنت بقدمه لها.. يعني مالها حق ترد لي مرة ثانيه
جاسم: والله انا احس البنت مو سويه .. ولا يفوتك بعد تقول لك انها راح تلحقك بكل مكان تروحه .. وياك وياك
خالد: هااااه .. خلني اشوفها بس .. والله بنسى اني مربى واني انسان عاقل وبطيح فيها طيحه
جاسم: ههههههههههههههههههههههههه الله يهداك يا خالد ..
خالد: لا يا جاسم .. ندى طافت حدها .. ولازم اوقفها انا .. قبل لا تتغلغل في حياتي اكثر.. لذا بنجدم الرحله وبنرد الكويت باجر
جاسم باحباط : مو يوم الخميس ؟
خالد: لا .. بنرد باجر .. انا وانت وقُمر
جاسم: وليش انا بعد
خالد: لاني مااوثق فيك.. بتعفس الديره على راسنا بيوم واحد.. ماادري شلون صبرت سبوعين
جاسم: اااااااااااااه .. من مالك قلبي وسلطان روحي
خالد : اووووووووووووووه نسيت ... ال احم اللولو
جاسم: ااااااااااخ .. احس ان الغوص رد مرة ثانيه بالكويت.. واني مثل البحار اللي ماله بحر وماله نصيب باللولو الزين
خالد: لا تقول جذي.. انت قدها وقدود بومحمد .. والله نسيت انك بن ظاحي
جاسم بنظرة سينمائيه: لا وانا عمك ما نسيت .. واول ما نرد الكويت.. بكلم ام خليل .. ومن بعد ليلتين ملجتي قايمه ..
خالد : هههههههههههههههههههههه الله عليك يا بو محمد ..
جاسم: اااااااااه على عمري..
الفصل الثاني
-------------بعد يوم بالكويت ..
مريم : اوووووووووف يا نوفو انتي ما بتيين وياي منو بيي وياي بالله عليج
نوفه: هههههههه مريم علامج .. الا عزيمه ما يحتاي انيي
مريم : لا والله .. اقلج بيدخل عشان يشوفني ابي احد يقعد وياي وخبرج مقطوعه من شيره..
نوفه:ههههههههههههههههههههه مريوم شنو مقطوعه من شيرة ويا ويهج .. انزين لا تحاتين بييج بس بييب وياي بنات خالتي
مريم: اكيد .. ولا عاد هاذي شيخه والله انها عجبتي وايد ..
نوفه: اولهن شيخوه .. الا اقلج ..قُمر وخالد متى بيردون؟
مريم: بعد باجر .. وعمي جاسم بعد بيرد بهذاك الوقت
نوفه: عجيبه عمي ليش مسافر
مريم: ماادري خلي قال لي انه مسافر السعوديه وتعرفين خليل ما يقول كلمه وحده من دون ما يتغشمر وما فهمت له كلمه وحده.
نوفه: هههههههههههههههههههه فديته ولد عمي والله حليله .. يالله اخليج الحين بتصلل في خالتي عشان اخبرها ..
مريم: بايات كول ....
سكرت نوفه عن مريم واتصلت في بيت خالتها ..ناصر كان قاعد بالصاله من بعد الغدى ويا ابوه ويسولفون .. رن التلفون ورد على التلفون..
ناصر: الو
نوفه دق قلبها: السلام عليكم ورحمه الله
ناصر : وعليكم السلام والرحمه . نعم.
نوفه: الله ينعم عليك اهني خالتي
ناصر دق قلبه: من وياي؟
نوفه: اشعليك ناد خالتي ..
ناصر: انتي نوفه ؟؟
نوفه تورطت .. صج حمار نصور ليش يسوي جذي: أي اقصد لا انا مروة
ناصر عرفها انها نوفه: هلا والله بمعاليق قلبي
نوفه ماتت من الحيا: هلا فيك ناصر .. شلون عرفتني
ناصر: نبض قلبي زاد علي وقلت اهي اهي .. شخبارج الغاليه
نوفه: بخير.. وانت
ناصر: بخير بسماع صوتج ..
نوفه: وين خالتي ..
ناصر: نظر عيني راقده خالتج .. تبين شي ..
نوفه: لا بس بغيت اخبرها ان قُمر بترد باجر وبنفس الوقت عزيمه ملجه بنت عمي مريم بتصير ونبيكم اتيون وتخلون الفرحه فرحتين ..
ناصر: ما طلبتي يا حياتي .. باجر من الصبح احنه عندكم
نزلت شيخه ومبين عليها صاحيه من الرقاد من كشتها.. شافت ناصر شوي وياكل التلفون
شيخه: خل التلفون لا تاكله شنو خلص اكل البيت..
نوفه: هههههههههه شيخوه هاذي
ناصر باشمئزاز : منو غيرها ام كشه ..
نوفه: انزين خبر خالتي ويالله مع السلامه
ناصر: وين وين .. ما صار تكلمت شي
شيخه : منو اللي متصله.. (تسحب يد ناصر عن السماعه) من انتي؟؟
ناصر يدزها بعيد: ذلفي لا بارج الله فيج .. الو .. الو ... سدت الخط زين جذي
شيخه : ههههههههههههههههههههههههههه وايد زين
ابو ناصر :اوووووش يا بنت
شيخه: بنت.. شنو بنت .. انا بنت.
بو ناصر: والله بصوتج هاذا ما تبينين بنت من ولد
ناصر بعصبيه: انتي ليش جذي رقله ووايد حمارة
شيخه : وايد حمارة .. هيه انت لا اللحين طراق ..
ناصر: جب شيخو والله الا اذبحج اللحين
دزها وشوي راحت لعند ابوها وطاحت على ريله : يوبا طالع هاذا
بوناصر عصب: علامكم انتو الفار والقطو ما تسكتون الناس ظهر تبي ترتاح وانتو ماكو راحه وياكم ..
شيخه ظلت مكانها على ريل ابوها وتمسح عليه: يوبا علامك لا تعصب
بو ناصر دزها اهو الثاني: كله منج انتي يا الرقله ما تستكين اخوج يتكلم بالتلفون وانتي بكشتج تصارخين عليه ..
شيخه: يوبا ... انا ماقصدت بشي والله نصور بعد وايد دلوع ...توجه كلامها لناصر... طالع على من انت .. مو ابوي ابوي ما يتدلع
ناصر: بوريج الدلع اللحين
الا ام ناصر نازله : علامكم يا عيال قالبين البيت فوق تحت ...
بو ناصر: هاذي بنتج المصبنجيه والله انها ما تيوز دوم تتحارب ويا اخوها
شيخه: ها بدر باين تبي تتهاوش وياي
قام لها بو ناصر: بدر بعينج
ما خلته يكمل وراحت حظنته ومسرع ما طفت حمقه بابتسامه واهو يطقها خفيف على راسها: والله انج حمارة .. واحلى حمارة
شيخه : يا بعد عيني يا شيخ المصابيح ياحلو الحمارة بحلج لو كان نصور اللي قايلها شليت بلاعيمه
ناصر يشد شعرها واهو يضحك: ناصر اصغر عيالج
ردت شيخه عن ابوها ولمت اخوها الثاني: يعلني فداك يا روح انيسه والله اني احبك حيل .. ههههههههه ياي شقارة كله رياييل
ناصر يباعدها: سود الله حظج يالباهته تموت على الرياييل
بو ناصر: عيب عليك ناصر اختك لاتقول لها جذي
شيخه: خله يوبا... والله من حقي احب الرياييل ان كنت انت واهو منهم يعلني فداكم يا ربي .. نوفو المتصله؟
ناصر: أي يمه مريم بنت ابراهيم عازمتج على عزيمه ملجتها باجر ومرة وحده رده قُمر من السفر
بو ناصر: بعد بيت بن ظاحي
ام ناصر تتجاهل كلام ريلها: ان شالله باجر من الصبح احنه عندهم
بو ناصر: واللي يقول ماكو؟
ام ناصر: الله يهديك يا بو ناصر لمتى يعني حرام هاذا الرحم واحنه اللي نسويه مخالف لامر الله
بوناصر: انتي ناسيه من بعد ببو سعود شقالوا لنا
ام ناصر: المسامح كريم الله يسامح يا بو ناصر شعبالك انت البشر وصدقني لو ترد لهم بتشوف شي غير عن اللي تتوقعه
بوناصر: انتي تبيين تروحين روحي .. لكن انا ماانسى كلمه ابراهيم ما دام راسي يشم الهوا
شيخه: خشمك براسك يوبا
ناصر ير اخته لفوق: انتي ما تيوزين .. شنسوي فيج يعني ..
نورة اللي كانت تسمع اغنيه عبد الرب ادريس المفضله لها : الحفل : كانت سرحانه واهي ناشرة شعرها القصير على وسادتها واهي سرحانه بفكرها .. تتذكر خليل اخو خالد اللي شافته .. مريم قالت لها انه متزوج ومرته حامل وبتولد بعد جم من شهر .. وايد عجبها .. ما تدري ليش .. مع انه وايد جبير عليها ب13 سنه .. دخل قلبها من دون استئذان.. قعدت تضحك واهي تهز راسها: صج ينيت احب ريال معرس هههههههههههه ..
دخل ناصر دار نورة واهو يشد شعر شيخه
شيخه: خل شعري لا اخلخل ظروسك اللحين
ناصر يضحك: مافيج خير ويا ويهج ياليحه
نورة: ههههههههههه علامكم انتو توم وجيري كله مناجر
شيخه تفج روحها من ناصر وتدزه: ما تشوفين عاشق الغفله اخوج والله ما يصير اقل له كلمه الا وير شعري ..(تدزه) حمار
ناصر : هااا شيخوه ما كفاج
نورة: اووووووووص قولولي .. شصاير..
شيخه تصفق من الوناسه: بنروح بيت خالتي ام خليفه باجر من الصبح
نورة: حلفوووووووووووووووووو اقوم اتصل في نوفو
ناصر قعد على السرير: أي قومي اتصلي فيها
نورة: أي بعد ما تطلع انت ..
ناصر انحبط: افا نورة
شيخه : هههههههههه طاع ويهه هذا هههههههههه انت من صجك ما تستحي انت ما تعرف ان نوفو وايد محترمه وما تحب هالسوالف ويالله اطلع بره خلنا نتفق على الاشياء ويا بنت عمنا
نورة: أي اشياء
شيخه: اوووووص انتي يالله نصور برع
ناصر واهو يطلع: امحق من بنات صج مال فقر
شيخه : يالله out out خلنا ناخذ راحتنا
طلع ناصر وشيخه طبت على نورو: اتصلي في بيت خالتي
نورة: ليش بتصل على رقم نوفو
شيخه : ويهج اتصلي في البيت ...
نورة: وليش بالله
شيخه: هاا.. ولاشي .. بس تكفين اتصلي في البيت
نورو: يا ويلي ويلاه منج انتي يالشيطانه صج من تحت السواهي دواهي .. بس تدرين خلينا نتصل
واتصلت نورة في البيت .. طلال كان بيطلع من البيت عشان يروح الدوام الثاني .. ورن التلفون .. راح يرد عليه ونورة وشيخه يتهاوشون عليه وشيخه خذت التلفون
طلال: الو
شيخه : وخري زين .... الو
طلال استغرب: نعم؟
شيخه تعدل من صوتها : السلام عليكم ورحمه الله
طلال: وعليكم السلام والرحمه خير ..
شيخه: الخير بويهك يا راعي المرسدس
طلال : هههههههه من وياي..
شيخه: افا ... ما عرفتني .. وياك شيخه المصابيح ..
طلال: اوه اوه اوه هلا واللله السموحه يالغاليه ماعرفناج هلا والله بشيخه المصباح
شيخه بغرور: هلا فيك يا بن ظاحي .. شخباركم شعلومكم
طلال: أبخير الحمد لله انتو شخباركم
شيخه: الاهل ابخير ويسلمون عليكم وانا بعد تمام اسال عنكم قاطعينا ما تسالون
طلال: المشاغل زادت بعرس بنت عمي وقُمر بترد باجر بعد بس ان طفتوا عن العقل ما رحتوا عن القلب..
شيخه استخفت من كلام طلال : وانتوا بعد .. يالله طلال مدت يدك
طلال: خهههههههههههههههههه ليش
شيخه: شنو ليش بنييكم باجر ان شالله وبصراحه نبي فلوس البانزين وماجله الطريج
طلال: هههههههههههههههههههه بنت خالتي الله يهديج بس انتو صرفوا اللي عندكم ولين وصلتوا تلاقون اللي تبونه
شيخه: كل شي ؟؟ حتى السنكرز .
طلال: هههههههههههههههههههه ما تنسين شي انتي
شيخه: وين انسى .. ماانسى الظروس الطايحه ولا السنكرز ولا العلوج اللي يتلصق بشعري ..
طلال: هههههههههههههههههههههههههههههههههههه يا شيخه الله يهديج بس المسامح كريم
شيخه: وانا مو كريمه .. انزين لكن انا بطلع كل هذا من عيونك يوم إلى انييكم
طلال: زارتنا البركه والله واوامرج مطاعه ان شالله.. شيخه بغيت استسمح منج على ذيج المرة
شيخه انحرجت واهي تتذكر: ايه زين ذكرتني عشان تزيد الطلبات
طلال: ههههههههههههههههههه الله عليج تامرين امر انتي يالغاليه
شيخه: فديتني هههههههههه يالله .. في وداعه الله
طلال: لا خلج والله وناسه السوالف وياج
شيخه: من قال اصلا الدقيقه ب10 دينار وياك والعداد للحين يشتغل
طلال: بل بل عليج كله حياتج قلوس ..
شيخه: مصباحه موو ان ما فكرت بالفلوس افكر في شنو
طلال: ههههههههههههههههههه وانتي الصاجه يالله بنت الخاله تامرين بشي
شيخه: سلامه راسك يالشيبه
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك