رواية مهلا ياقدر -29

رواية مهلا ياقدر -29

خلاص ماعاد فيني ارد لأني خايفه من صوتي يفضحني ..
بعدني عنه شويه وناظر بوجهي وابتسم قال : ديومه تبغينا نسافر
: متى
: في العيد
: اوكي
: احبك ياديمه والله احبك ومااقدر اعيش بدونك
: مهند اسكت
: طيب بسكت ياعمر مهند انتي
كنت بلحظات كأنها حلم .. كان مهند وهو يحضني يغسل قلبي من همومه ، ينسيني كل المشاكل اللي كانت بيني وبينه ، الحين واثقة انه صادق .. ايوه واثقة مهند يحبني والكل قال لي انه يحبني من زمان ..
كنت اذوب بحضنه لحد ماسمعت الأذان قلت بهمس : مادخنت ولا شربت شاهي شوي تصدع وانا السبب .!
قال وهو لسه مغمض عيونه : ماني مصدع لأني الحين فوق السحاب
بعدني شوي عنه ويدينه لافها حول ظهري قال : قهر انا برمضان
: ههههههههههه احسن اختبار

: اذا هو اختبار والله اني ناجح وبامتياز ولا فيه رجال يصبر صبري خاصه ان اللي عنده وحده زي ديمه .

: ههههههههههههه خلاص ذكرني اعطيك الشهادة

: متى بتعطيني اياها ؟

: متى ماتحب هههه

:ههههه اليوم بعد التراويح وشهادة من نوع ثاني

خبطته على كتفه :ههههه ذكرني اعطيك اياه على انغام عمتك نورة وفاطمه

ضحك بصوت عالي : هههههه الله يسامح ابوي بس .. لكن ماعلينا لامن نورة ولا فاطمة ولا احد بالدنيا ..

ناظرني وكمل : صح ولا لا ؟

: انا بالنسبة لي محد همني غيرك انت .

: الله يصبرني بس .. خلاص هانت عليّ ياديوم عرفت نقطة ضعفك

: هههه خلاص سيبني بقوم اصلي

تركني مهند وانا قمت محرجة منه ..

رحت صليت وشفته قام توضا وراح للمسجد ... كنت مبسوطه ونسيت اللي صار بيني وبينه قبل كم يوم .. خلاص سامحته لأنه يحبني ويعشقني ولازم اسعده ..!

صحيت الساعه اربعه العصر ونزلت عند البنات حصلت ريم توها صاحيه وخالتي بالمطبخ .. بعد شوي جات سميرة ونزلت رانيا كلنا قعدنا نشتغل ... صحيح الشغالات سون كل شي بس انا سويت العصاير وسويت السلطات .. وخالتي سوت كذا صنف شوربة .. سوت جريش ومرقوق تقول عشان الناس هنا ..

كنت اشتغل وانا احسني طايرة من الفرح وادعي بقلبي :ياربي لاتنغص علي … ياربي لاتكدر علي .. ياربي لاتغير علينا .. ياربي استر علينا وفكني من شرور الحاسدين ..

سميرة : ديمه اشوف المزاج اليوم عالي من رجعة الحبيب

التفتت خالتي علينا لأنها تدري اني زعلانة من مهند وانا ابتسمت لخالتي قلت : خالتي ولدك هذا قاعد يلعب علي مخليني على كيفه

خالتي بفرح باين عليها : ههههه الله يسعدكم يمه والله اني اذا شفتكم مستانسين اني ارتاح واذا شفت بالخواطر شي ماتهنا لي عيشه

: الله يريح بالك يالغالية

كنت مرة مبسوطة وقمت سويت لمهند عصير طبقات علمتني عليه جدتي اميرة كنت اسويه لخالي ناصر باستمرار ويموت عليه ..

حطيته بكاس كبير وغطيته وحطيته بالثلاجه ..بعد المغرب كنا على السفرة خالتي الجوهرة واختها مزون ونورة عمة مهند ومنيرة اختها وسميرة وريم وفاطمة كنت جالسة بين خالتي ام مهند وسميرة كأني ابغاهم يحموني من فاطمة و أمها ..

افطرنا اول فطور كان على السفرة قهوة وشاهي و تمر وزبادي وفول و هذا اهم طبق على سفرة اهل جده ومكه برمضان ..ومعصوب وفته .. ومعجنات فطاير وسمبوسة ولقمة القاضي وبيتزا .. وعصاير

اكلت انا شوية وقمت بروح اصلي .. رن جوالي اللي كنت حاطته على مكتبة التلفزيون بالصالة .. كان رقم غريب طنشته ودق مرة ثانيه قلت ارد اذا احد يزعج بعطيه مهند ..

فتحت الخط وسكت

: الو .. ديوم

: اووو هلا حبيبي …. كان عناد اخوي

: هلا والله ديوم وينك ماتتصلين

: زعلانة منك لاتكلمني .. اجل شهرين ماتتصل علي .

: والله عمتي دايماً تقول انك تتصلين تدوريني ومااكون بالبيت .. اعذريني ديمة انا من المدرسة للشركة ثم المصنع ثم ارجع للبيت اذاكر وانام

: حبيب قلبي اهم شي اذا انت بخير خلاص

: يعني سماح

: سماح ياروح ديمه .. اسمع حبيبي بروح اصلي وبرجع ادق عليك باخذ كل اخبارك اوكي . لأني مشتاقة لك كثير .

: اوكي يالله استناك وترى هذا رقمي

بعد ماقفلت من عناد لقيت فاطمة وراي وحاطة يدينها على خصرها وتبتسم ابتسامه غريبة كأنها مسوية شي وفرحانه فيه .. بس طنشتها ورحت من عندها بسرعه ماابغى احتك معاها وتصير مشكله اخاف بيدها موية نار ولا مشرط ولا شي تشوهني فيه .. وانا بصراحة صرت اخاف منها ..

شميت ريحة دخان عند باب قسم الحريم وتأكدت ان هذا مهند .. رحت اخذت كاس العصير ورحت عنده .. كان جالس على السيارة من قدام ويدخن وهو مرة مسرح اول ماشافني ابتسم لي ..

قلت وانا ابتسم : مهند هذا عصير سبيشل للناس السبيشل ,, احم احم ترى هذا تخصصي ..

:ههههههه اجل تخصصك هاتيه هاتيه والله لو بس تحطين اصبعك فيه ليصير سبيشل ..

اول ماذاق العصير قال : فعلاً سبيشل الحين هذا تعرفين تسوينه وتخلين الشغالة تسوي لي كل يوم عصير ماينبلع ..

:مممممممممممممممم مااسويه الا للناس اللي احبهم

ضحك مهند وقرب مني قال : اجل انا منهم ؟

: ممممممممممممممممم استنى خلني اتأكد اووووه مهند بروح اصلي يالله ارجع للمجلس.. فيه حريم هنا ..!

فهم مهند اني اقصد فاطمة قال : ههههه طيب انتبهي لنفسك المرة اللي راحت شاهي واليوم الله يستر

: الله يستر ترى مرة خايفه لاتخوفني .

: لاتخافين بس لاتقربين مهنم .

: اوكي يالله بروح اصلي

:تقبل الله ياعمري

: منا ومنك

****

دخلت البيت ورحت لمجلس الحريم صليت ورجعت قلت بدق على عنااد بس كان الجو ازعاج ومافيني اطلع فوق .. وقفت عند المدخل حق باب الفيلا من عند قسم الحريم .. جلست على تحفة على شكل كرسي ودقيت على آخر رقم دق علي وعلى طول رد علي عنااد ..

: هلا حبيبي

: هلاديوم والله اني مشتاق لك

: لو مشتاق لي تجي تشوفني

: بزورك اليوم ولا بكرة

: انت هنا بجده

: ايوه جيت مع خالك ماجد افطرنا عند خالك ناصر وخرجنا خالك يبي له اغراض وابوي عبدالوهاب موصينا بأشياء للمصنع بنحملها بدري ونرسلها عليه

: الله يوفقكم ياعمري .. اش رايك تمر علي الليلة

: والله مستحي من مهند واهله

: حبيبي والله عادي بعدين مهند يخرج احيانا لاصحابه انت تعال عندي وعادي تدخل الجناح حقي .. ولا المجلس ..

ما كملت كلمتي الا فيه صراخ وراي ويدين قويه شالتني من الأرض .. اعرف الصوت وصاحبه بس اشكالهم كانت غريبة .. كنت بين يدين مهند وعيونه حمرا كأن فيها دم .. وهو يرتعش وجبينه كله عرق وشعره نازل على وجهه .. كان يصارخ بكلام مافهمت منه الا هذا حبيب القلب .. هذا اللي مكاني وبتجيبينه لبيتي ياديمه .. وقال كلام كثير مافهمت منه شي .. صفعني بكف وثاني وثالث . …. فيه وجه يناظرني وهو يضحك وراه وكأنها اخيراً حققت انتصار ونجحت بتفوق ..كانت فاطمه متكتفة بيدينها وضحكتها تبين انها هي اللي جابت مهند ..…..ماكان فيه وقت اتكلم ولاكنت اقدر ارد كنت ابغى احد ينجدني يساعدني مهند فاقد اعصابه ويضربني بقوة وقسوة مسك شعري بيده اليسار وقعد يضرب فيني ورماني على الجدار وحسيت ان جبيني انفجر من قوة الضربه.. اخذ الجوال اللي طاح من يدي و دق على آخر رقم قال : يابن الكلب كيف تتجرأ ووووو …………. سكت مهند وجلست متهاوي على الأرض .. ها…؟ مين …؟ عناااد ..؟ آآآآآآآه … عناد .. عنااد .. عناااااد .. هذا انت ..الله يلعن ابليس ..

شفته زي الحلم وهو يجلس على الأرض ويرمي الجوال من يده .. التفت لي وانا احسني اتهاوى .. جرى بسرعه عندي وكأنه يمثل مشهد تمثيلي مؤثر فيه دم ودموووع وتهمة وبراءة .. اخذني بين يدينه وحطني على صدره .. وهو يلعن ابليس وفاطمة وساعتها ...

سمعت صراخ قوي جاي من ورى .. وانا في حضن مهند احس ان راسي بينفجر .. ورانيا ورى مهند تصرخ وتلعن وتسب وتتكلم على فاطمه ومهند .. بعدها سمعت صوت فاطمة تصرخ ماادري شو اللي صار بالضبط ..

كنت اسمع الأصوات وكأني في حلم .. عيوني تسكر غصب والصوت يختفي ماعدت قادرة اسمع بس سمعت صوت من بعيييد يصرخ ديمه ديمه ديمه ..

آخر لحظاتي قبل قبل مااغيب عن الدنيا دعيت ربي اني الحق ابوي .. اشوف امي واصير في الجنه مع جدتي عايشة ..

يارب ماارجع هالمرة .. يااارب ابغى الحق اهلي .. ياارب ماابغى اتعب خالي اكثر من كذا ولا اواجه مهند مرة ثانية

صحيت وانا بالمستشفى وكان عنااد عندي وخالي ماجد اللي كان متلثم بشماغه ومايتكلم ..اول ماشافني صحيت جا بسرعه عندي وفك شماغه قال : الحمد لله على سلامتك .. كيفك الحين ؟ تحسين بشي ..؟

انا وين .. اش جابني لهنا ..؟ برضو مستشفى ..؟ تذكرت مهند ،، هيجانه .. صراخه .. فجعني وضربني وانقطع الحبل اللي وثقناه امس خلااااص ....

ياربي ليه انا موجودة بالدنيا للحين .. ليه ماني عند ابوي وامي وجدتي .. ليه رجعت لمهند من جديد وانا حسبتني ودعته للأبد لمن كنت في حضنه .

طالعت بخالي بس ماتكلمت .. ماعندي شي اقوله له ..

قال خالي ماجد: ديمه عناد قال لي على كل شي ويوم دقيت على مهند قال لي انك هنا وجيت وقلت له لااشوفه هنا .. بغيت اتهاوش انا وياه بس مسكت اعصابي في آخر لحظة لأن حاله مايسر . . .

طالعته وعيوني كلها دموع قلت : خالي ناصر لايدري عن شي الله يخليك

تكلم عناد : الا بيدري وحقك مايضيع وراسي يشم الهوا

: اتركوني لوحدي

: ديمه ماراح نتركك واللي تبينه يصير ماعليك من عنااااد ..

سمعنا صوت عند الباب كان مهند وامه وسميرة وريم اللي منهارة واسمع صوتها تبكي تقول بشوفها والله لادخل محد همني .. ورانيا اللي تبكي زي ريم وأكثر .

تكلم خالي ماجد وهو جالس قريب مني : تقدرين تشوفينهم

: ماابغى اشوفه ..!

: ابشري ديوم بس هدي نفسك ولاتنفعلين

خرج خالي ماجد بعدين دخلت علي خالتي هي تبكي وسميرة نفس حالتها بس ريم كانت منهارة .. ورانيا ماقدرت تدخل عندي ..

تكلمت خالتي : سلامات يمه حسبي الله ونعم الوكيل

التفت على الجهه الثانية قلت : الله يسلمك

كنت اصد عنهم خلاص ماابغى شي يذكرني باللي صار ولا بمهند

سميرة جات عند راسي قالت : ديمه صدقيني اللي صار قهرنا كلنا وفاطمة هي السبب قالت لمهند كلام وسحبته بيده تقول اسمعها

كانت دموعي تنزل وانا مااتكلم ولا اناظر فيهم تكلمت خالتي : مهند طرد عمته وبنتها وحلف ان شافهم في البيت ليذبحهم

قالت ريم وهي تبكي : ديمه تكفين سامحي مهند .. مهند بيموت من القهر لأنه ظلمك ..

ماابغى سيرته ياربي خلااص ..

: ممكن تتركوني لوحدي

قامت خالتي وسلمت على راسي قالت : ارتاحي يمه جيت بس ابي اتطمن عليك من البارحة محد نام فينا وعمك كان بيجي بس قال بروح لها لوحدي

راحوا من عندي وانا تركت العنان لهمي ودموعي وقهري ..رجع عندي خالي ماجد وعناد

خالي كان ماسك عناد بيده ويتكلم معاه بجديه وكأنه معصب

عناد : كان خليتني اذبحه هذي ديمه فاهمين وش معنى ديمه

خالي : كلنا منقهرين وكلنا زعلانين منه بس هو معذور .. ياعناد الرجال اذا حس انه زوجته تخونه شي مو سهل زين انه ماذبحها

: بس يعرف اخلاق ديمه ليه يسمح لنفسه انه يشك فيها

: كلنا ندري ان مهند يحب ديمه ويغار عليها بس ماقدر يتروى ويضبط اعصابه لين يتأكد بعدين ديمه الله يهديها ماجابت اسمك وكله حبيبي وعمري هذا اللي جننه

: اسكت بالله يابو ريان اللي قاهرني اني انا السبب .. واني خذلت ابوي الله يرحمه كان يوصيني على ديمه اكثر من عادل وسديم

: اول شي مو انت السبب ثانياً انت رجال وابوك لوشافك بهالنخوة والشهامة كان فرح وافتخرفيك ثالث شي تعال نشوف ديمه واترك عنك الكلام الفاضي

كنت اسمع كل كلامهم وجا خالي عند راسي قال : ناصر ازعجني يقول تعال افطر

: شو تفطر احنا الساعه كم الحين

: احنا الساعه خمسه العصر

: طيب انا بأي مستشفى

: مستشفى فقيه

: الحمد لله

: ماعليك اذا ماتبين شوفه ماراح يجي ولا راح تشوفينه

: خالي اطلب منك طلب

: تامرين موتطلبين

: تسلم ياخالي .. بطلع من المستشفى على سوريا تكفى خالي طلبتك .. !وانهرت ابكي احسني ابغى اهرب لأبعد مكان لأن مهند خلاص بشطبه من حياتي وذكرياتي

: ابشري بس خليني ادور لك حجز قريب

: خالي نناصر

: ماعليك لاتشيلين همه ولايدري الا اذا وصلتي عند جدتك

: بيزعل

: لا لا بقول انك خايفه تزعلينه وانك ماتبينه يفرض عليك شي او يطلب منك شي يخص مهند وانتي ماتبين ترفضين له طلب وتزعلينه ..!

: متى بطلع من المستشفى ..؟

مسح على راسي قال : ديمه انتي عندك انهيار عصبي ولازم تجلسين ثلاثه ايام على الأقل .

: مافيني شي الحين .. تكفى خالي اليوم ولا بكرة احجز لي ماابغى اجلس هنا كثير ... انا تعبانه ومحتاجه ارتاح ..

:الحين ادق على فيصل اخليه يدور لك على حجز بأقرب وقت

اتصل خالي على فيصل زوج لمى هو اللي غالباً يدبر لنا رحلات بسرعه ويوفر لنا مقاعد .

طالعت في عنااد اللي كان ساكت ومتنرفز قلت : عنااد .

: هلا ديمه

ابتسمت له قلت : لاتزعل انت مالك دخل باللي صار لاتلوم نفسك .. ومهند دخل بيني وبينه الشيطان خلاص .. لاتتدخل ياعمري ولا تكلمه بالموضوع ولا تفكر تناقشه لأني مخليتك لأمور اكبر من التفاهات هذي .. انت اخوي وسندي وعزي وريحة ابوي وأقرب الناس لي والحين انت رجال وقد الصعاب …

سكتت شوي بعدين كملت ..: صدقني ياعناد اذا احتجت احد انت اول واحد راح اكلمه وبعد كلامك قبل شوي وعد مني اي شي يصير لي بقولك عليه اول بأول حتى لو ماقلت لأخوالي … تدري ليه ياعناد ..؟

: ليه

: لأني كأني اكلم ابوي وانا اكلمك .. لأنك اخوي والأخو ماينتعوض ومصيري اذا صار لي شي بلجأ لك انت اول الناس .

فز عناد وسلم على راسي قال: ديمه انا احاول اصير رجال واضغط على نفسي واترك كل الأشياء اللي احبها اذا بتنقص من رجولتي كله عشان اثبت لك انتي اول شي اني رجال

: ياعمر اخته وربي اني افتخر فيك واشوفك رجال ونعم فيك ..ضحكت ابغى اغير الجو لأنه طفشان ومعصب كثييير وقلت : ترى سديم وعادل يحتاجونك كمان مو بس انا .

ابتسم لمن شافني وتذكر اخواني قال : لا ابشرك سديم وعادل عندهم عمتي ماتخلي لي فرصة اتدخل تقول انا اللي اربيهم واعلمهم اذا لقيت عليهم شي هذيك الساعه تعال تدخل ..

:ههههههههههههههه الله يخليها لكم .

كنت احاول اسوي نفسي عادية وانا في الحقيقه مطعونة وانزف واداري ..

دخل علي خالي ماجد بعد ربع ساعه قال : يالله اليوم الساعه عشرة رحلتك تبغين تمرين على بيتك تاخذين اغراضك ؟ .

كرهت بيتي وفكرة اني ارجع قلت بسرعه : لابقول لريم تجهز شنطتي بس ماني قايله لاحد انا فين رايحه خلهم يحسبوني اني بروح لخالي

: ولو انه مايجوز تروحين من غير مايصير عن زوجك خبر .. ديمه مهما كان هذا زوجك للحين لاتنسين .. بس ماعليك روحي ارتاحي هناك ولك مني محد يتعرض لك ولا يقول لك شي حتى ناصر ماراح يفتح أي موضوع معك .

الحمد لله رب العالمين ان الله اخذ مني اهلي واعطاني اهل ماراح يكون احن منهم احد علي

الله يخليهم لي ولايحرمني منهم

اتصلت على ريم وأول مافتحت الخط جلست تصرخ : ماني مصدقه .. والله ياديمه اني فرحت لمن شفت رقمك . ياربي لك الحمد

قلت بصوت هادي : هلا ريم كيفك ؟

حسيت ريم تغيرت لهجتها قالت : بخير المهم انتي كيفك ؟

: الحمد لله على كل حال .

: ديمه مهند

: ريييييييييييييييييم اسكتي الله يخليك … انخنق صوتي ابغى ابكي بس هي سكتت

: آسفه ديوم مو قصدي اخليك تبكين

: ابغى منك خدمه

: تامرين

: روحي جهزي جميع اغراضي حطيهم بشنطتين

: ديمه

: ريم اذا ماراح تجهزينها لي بقول لهدى تجي وانتي مايرضيك هدى تصير بموقف زي هذا

: اوكي حاضر ولا يهمك بس اقول لمهند ..

: لا الله يخليك ريم يمكن هذي آخر خدمة اطلبها منك لاترديني

: ابشري ديوم ولا يهمك

: ابيها بعد ساعه او ساعتين بالكثير اوكي

: بتطلعين من المستشفى

: اول ماتجيبين اغراضي راح اخرج على طول تراني استناك .

: اوكي الحين اقوم احضرها

: سامحيني ريم تعبتك معاي بس ماعندي غيرك

: لا لاتقولين كذا احنا مهما كان اخوات .. وانتي مغلوط عليك .. وو

قاطعتها ماابي أي كلام في الموضوع هذا : تسلمين ريوم

: الله يسلمك

قفلت منها وقمت باخذ لي شور واغير جو ..اشوا اني هالمرة كاصار فيني كسووور .. دخلت الحمام وعناد وخالي راحوا يجيبون لي فطور وقالوا انهم بيجون يفطرون عندي واعتذروا من خالي ناصر وتحججوا انهم بعيد يجيبون بضاعه عبدالوهاب ..

شفت وجهي بالمرايه كان الوان وكدمات حتى جبيني فيه جرح وخياطة ..

ياربي كيف اروح لجدتي وشكلي كذا .. اول مرة تشوفني من بعد زواجي ويكون هذا شكلي ..!

ياربي تعينني وتساعدني

استحميت ولبست الجلابيه اللي جيت فيها للمستشفى

جا عندي عناد بالفطور ورجع قال بنجيك بعد ساعه نوديك للمطار قلت اوكي

افطرت ودخلت علي الممرضة قلت لها اني راح اخرج وجلست تخاصم تقول اني تعبانه وعندي انهيار عصبي مش اي كلام ..

قلت لها اني بخرج على مسئوليتي لأني مسافره بعد ساعه بعدها جا عندي الدكتور قال : خلاص تخرجين بس توقعين ويكون على مسئوليتك .. وانا راح اتصل على زوجك يجي ياخذك

: لا لا يادكتور لا تتصل على زوجي .. خالي يجي الحين ويخرجني من هنا

: اوكي اذا جا خليه يجي يوقع .

: اوكي .

خرج من عندي الدكتور ودخلت علي ريم وعمي وراها ومعاهم رانيا اللي ماشفتها هذاك اليوم ماقدرت تدخل وتشوفني ..

سلمت على عمي وريم ورانيا حضنتني كثير وهي تبكي .. قالت : والله ماعاج تدخل بيتنا خلاااص ياديمه .. انا طردتها وضربتها على راسها وخلاص ابوي بدر وعدني ماتدخل البيت .. مسحت دموعها قالت : صح يبه .. قول لديمه ان فاطمه ماراح تقرب منهم خلااااص

هز راسه عني وقال : ابشري باللي تبينه انتي وديمه ماعندنا اغلى منكم

شفت عمي مقهور وباين عليه انه متضايق من شكلي .. قرب مني وسلم على راسي قال : امسحيها بوجهي يابنتي .. مهند مجنون والخبلة قالت له كلام ماينقال وانتي تعرفين من زمان وهي وامها ناويات يفرقن بينكم .. والله يابنتي ماقد شفت مهند عصبي من يوم عرفته الا الايام هذي .. الظاهر ان عنده مشاكل في دوامه وهو مايتحمل عليك وو.. سكت عمي شوي بعدين قال : لوتشوفين حاله الحين مايسر لاعدو ولا صديق ..

قلت بوجع وقهر : عمي جيتك على عيني وراسي بس انا مااقدر اشوف مهند ولا اكلمه ولا حتى اسمع سيرته .. صدقني ياعمي انا ومهند مانصلح نعيش مع بعض .. لا انا اقدر اتحمل اسلوبه وتعامله ولا هو يقدر يرتاح وهو بدا يشك فيني

قاطعني عمي

: يابنتي مهند ماشك فيك بس الشيطان وفاطمه هم اللي وزوه عليك .

: اذا صدق فيني احد ماعاد للثقة مكان ياعمي بحياتنا خلني ابعد عنه فترة لين اوصل لقرار بقناعه . .

نزل راسه وقال : تراه اليوم بغى يدخل عندك بس ماجد رده وستر الله لايتهاوشون .

تكلمت ريم : خلاص ديمه انتي اجلسي عند اهلك فترة لين تهدين صدقيني مهند يحبك ولو مايحبك ماغار بهذا الشكل

: ريم الله يخليك خلاص اذا تعزوني لاتفتحون سيرة مهند عندي

رانيا هي اللي ماقدرت تتكلم ولمن قلت لاتفتحون سيرته انهارت من البكا قالت : حرام عمي مهند يمووت فيك سامحيه .. لاتخلين فاطمه تحقق امنيتها وتفرق بينكم .

ماادري ليه كلمة رانيا هزتني بقووووة .. بس هربت منها بعيييد وماحاولت اوقف عندها عشان مااضعف ..

وقف عمي وسلم علي قال : المعذرة ياديمه مارضيت اللي صار والله ويشهد الله اني مستحي منك ومن اهلك .. وعلى كثر زعلي على اللي صار لك الا ان حال ولدي كاسر قلبي .. بس سامحينا يابنتي مارضيناه ولا بغيناه اللي سواه مهند .

قاطعته لأني شفته منكسر قدامي ومنحرج قلت : عمي انت بمكانة ابوي ومهما صار بتظل مكانتك محفوظة واذا فيه لوم وعتاب مابيلحقك منها شي

: الله يوفقك يابنتي ويستر عليك

: تسلم ياعمي ومشكور على الزيارة

: حق وواجب يابنتي

قامت ريم قالت : فين نحط اغراضك ياديمه

سمعنا صوت خالي ماجد برا : وطلع له عمي سلم عليه سمعت خالي يرحب بعمي اشوا مابين انه زعلان منه وسمعته يقول خلنا ننزل اغراض ديمه بسيارتي وراحوا مع بعض

طالعتني رانيا قالت : لاتخسرين مهند محد يحبك قده وغطت وجهها وطلعت من دون ماارد عليها .. لحقتها ريم بعد ماسلمت علي .. ودخل عندي عنااد

قال : ديمه يالله امشي بنوديك المطار

: عناد لايكون كلمتوا خالي ناصر

جانا صوت خالي ماجد : افا ياديوم ماتثقين بكلامي

: والله اثق فيك بس خايفه خالي ناصر يدري ويردني

: يالله قومي البسي بنلحق نوصلك ونكمل اشغالنا

: يالله انا جاهزة ..

قمت ولبست عبايتي وخالي راح يوقع على خروجي وطلعت معاهم

يتبع ,,,,

👇👇👇

تعديل المقال