بداية

رواية شرع ربي ولا اعتراض -108 البارت الاخير

رواية شرع ربي ولا اعتراض - غرام

رواية شرع ربي ولا اعتراض -108

فهد/ليش تسالين؟
سارة/لاني ابي اشوفها واتطمن عليها....دقيت لها بجوالها اكثر من مرة ماشالته..
فهد/جوالها هنا بالشقة ماشالته معها....
سارة/وحشتنا كثير البيت موحلو بدونها...
فهد/اكيد....
سارة/بابا انت متضايق علشانها موهنا صح,,,عرفتك من كثر ها السجاير اللي تدخنها يوم كانت خالتي نجود هنا ماكنت تدخن ابدا واللحين ماتترك السيجارة؟
فهد ناظر بسيجارته وكانه تذكر نجود ورماها جنبه بقهر....
كم يوم ماشافها ولاسمع صوتها..ولاهو قادر يروح الدمام يسال عنها..خايف من أي ردة فعل تسويها نجود,,,,,,
نجود/نور البيت يالبنى هانم...
لبنى/منور بوجودك يالغلا...
هيا/نجود وينه فهد لسه بجدة مارجع..
نجود/شكله بيطول القضية اللي عنده يبيلها تفكير عميق قبل اتخاذ أي قرار....ماعلينا..
لبنى/والله غريبة تاركته يروح بروحه مالزقتي حالك فيه؟
نجود/شسوي قلت شوفة لبنى بنت عمي تسوى الدنيا عندي,,,,
لبنى/شكرا.....
نجود بجدية/لبنى متى راح تسوين العملية,,,,,,
لبنى بعصبية/أي عملية؟
نجود/لبنى وش فيك....الشي بسيط ومايستدعي نرفزتك...عملية تجميل بسيط...
لبنى بعصبية وهي تناظر بيدينها الملفوفين/ماراح اسويها...ماني بحاجتها يانجود..
نجود/ليش العناد عاد يالبنى انتي كذا قاعدة تعذبين نفسك بنفسك,,,
لبنى/خليهم للذكرى....علشان ماانسى اني عشت بمكان وسخ بيوم من الايام ولاافكر انسى بعد!!
نجود/لبنى انتي تبين تثبتين لنفسك شنو بالضبط؟
لبنى/ولاشي...
نجود/محد بيجبرك تنسين اللي صار وتسامحين ابوك ها الشي متروك للايام واللي ممكن تسويه بس انك تعدمين نفسك بها الطريقة وانتي توك بعمر الورد فهذا قمة الجنون...يابنت الناس احمدي ربك حرق في يدينك وعمليته بسيطة ماهو بمكان ثاني وتارك تشوه...يالبنى انتي ماتروحين وتشوفين الناس ومصايبها قولي الحمد الله بس على النعمة ...لو تعرفين ماريا يالبنى كان والله تبكين ليل نهار وماتنامين الليل عليها....انتي عاقلة يالبنى عاقلة..
ابو علي من وراهم/أي فهميها يانجود وقولي لها ها الشي عجزت وانا اقنعها بالعملية من اول يوم دخلت فيه المستشفى,,,,
قولي لها ها الشي وقولي لها بعد تفكر بالرجال الاجودي اللي ماينعاب والله اني اشهد انه عن عشرة رجال ..
نجود/اشوف في اسرار بين ابو علي وبين لبنى..قولوا قولوا منو هذا الفارس الشجاع اللي جاي على حصان ابيض..
لبنى بخجل/عبدالعزيز..
نجود/اها..يعني حبيب القلب اللي اخذتيه عليه قتلة ذاك اليوم...متى رجع خطبك مرة ثانية...
ابو علي/خطبها مني....وانا عن نفسي قلت له موافق وخذها بلامهر بعد يالنشمي بس الراي لها بالاخير,,,
لبنى/عمي ممااقدر..
نجود/يبى ماعليك منها عطها قتلة ثانية وذبحة وهي بتوافق...
لبنى/نجود عبد العزيز تزوج وزوجته مالها شغل ينحط على راسها شريكة وهي انسانة طيبة ..حرام والله حرام..
نجود/أي بس اذا هو يبيك....
لبنى/مااقدر يانجود ماابي اخرب بينها وبينه..
نجود/طيب انتظروا شوي لاترتبطوا اللحين لين تمضي فترة على زواجهم... وبعدين اذا هي بتتفهم ها الشي بتريح علينا وعليها...وهو بعد لازم ياخذ وقت ويفهمها عن علاقتكم قبل..وتكونين انتي مقتنعة انها تكون صديقة موشريكة يالبنى..
لبنى/انا ماراح اعتبرها عدوة يانجود وانتي تعرفين مااضر احد,,,
نجود/معناته موافقة ...يالله مبروك مقدما حتى اشعار اخر,,,,,
على الكورنيش,,,,,
جواهر/اعطيك مليون ريال اذا قلتي لي ان بندر مو قريب منا؟
نجود وهي تتلفت حوالينها/ياربي مايكون موجود وتتورطين بالمليون,,,,
جواهر/لاتتعبين نفسك ياقلبي موجود..اعرفه..وين مااروح يكون وراي وكاْنه يحرسني,,,,
نجود/للامانة ماغيرتي رايك...
جواهر بثقة/لاطبعا......الخيانة جرح مايتداوى يانجود..حتى لو ظل بقلبي لااخر يوم بالعمر,,,,بس مايعني ان احنا نجتمع من جديد ولا اني اصرح له بمشاعر حبي واخليه يعرف ها الشي,,,
نجود/ومصعب...
جواهر/عسى الله يوفقه...لاهو ولاغيره بياخذون مكانة بندر عندي ولاراح اقدر اوفي لهم,,,,تفكيري بيكون في بندر وبس,,,,وبعدين هو تفهم ها الشي وطلعنا منها بابتسامة رضا....عسى الله يوفقه ان شاءالله....وش صار على اخته..
نجود/اخر علمي كان بفهد يوم يتصل على محمد علشان ينزل وهو بيخطب له فوزية بنفسه علشان لايحرجه ...ويخليه يرجع من جديد يخطبها بعد اللس معه من امها..
جواهر/هاذي طبعا كانت فكرتك..
نجود/أي...انا ماكان غرضي محمد وانه ماينجرح من جديد انا قصدي انه ام مصعب اللي تنكسر اذا فهد خطب فوزية لمحمد وبنتها موافقة وزوجها موافق...علشان تعرف ان الله حق.....بس يمكن انه نزل اللحين,,,,
جواهر/مادقيتي له...
نجود/ولاهو اتصل حتى.....
جواهر/امممممم..نجود شوفي كاهو بندر يمشي قبالنا......
نجود/ها الاناني..تصوري حتى ماكلف على حاله واتصل على لبنى وتحمد لها بالسلامة,,,,
جواهر/وها الشي قاهرني فيه...لاعبير ولالبنى ولاحتى امه بعد يدري عنها من راحت بيت خاله....بيجيه يوم ويدري ان الله حق وبيتغير حتى لو طال ها اليوم.....
مر شاب كان يحوس بجواله وهو حاط اغنية لااليسا والصوت عالي مرة وسرحت نجود معها لبعيد,,,,
لليوم اللي كانوا فيه سهرانين ذاك اليوم بشقتهم بالدمام,,,
كان فهد يتفرج على التلفزيون ونجود جايبة صحن فيه شوية فاكهة وحطته قبالهم على الطاولة,,,,
نجود/واللي يعافيك ترى شلت العربية والجزيرة انا مالي خلق وجع راس..
فهد/وش تبين نحط,,,
نجود/حط لنا اغنية ولاشي فرايحي كذا كله اخبار وقتل وهم..يااخي وش ها السهرة اللي تسد النفس,,,,
فهد قام يغير بالمحطات وطلعت حفلة لااليسا وتركها..
نجود/فهد....وش رايك منهي اللي تعتبر صوتها احلى,,هيفاء وهبي ولااليسا...
فهد بثقة/نجود السبيعي....
نجود وهي تاكل عنب/قول الصدق انا مااسخر..
فهد/يبى هذا طرب تعبان وين ايام الفن الاصيل..
نجود/تكفى فهد عاد قال لي طرب اصيل انا ترى القديمين مالي خلقهم ابدا...يعني محمد عبده ماعنده غير ثلاث اغاني بس..الاماكن ولنا الله ومهما يقولون ومساء الخير ومذهلة..
فهد/شاطرة مرة بالحساب هذولا بس ثلاث؟؟؟
نجود/يعني باقي اغانيه ترفع الضغط بصراحة ماهي حلوة....
فهد/اقول اسكتي بس لاتفضحينا قالت يرفع الضغط وهذولا اللي صوتهم حلو..
نجود/ياسلااام كل واحد ورايه انا عندي صوت اليسا يجنن تحس فيه صدق خامة تنسمع مو مثل غيرها...بس انا اللي فعلا فعلا اعتبرها ملكة الطرب نوال الكويتية ..تعجبني كل اغانيها القديمة والجديدة احس فيها ملكة مميزة ماهي عند غيرها...تحس انها تغني بفن وارهاف وحس ماله أي مثيل..فعلا تحس بالشي وانك متفاعل معه.....
رجعت لدنيا الواقع مع صوت المسج اللي صول لجواهر وقامت تقراه,,
جواهر/اقول نجود ودي بثوبك الاحمر اللي شريتيه ومالبستيه,,
نجود/اوووف مالي خلق اروح الشقة ابدا؟؟
جواهر/تكفين ودي اغير جو ودي البسه ونتجمع الليلة سوا انا وانتي ولبنى وعبير...
نجود/قومي خل نروح تدرين فيني مو طايقة ادخلها بدونه..
جواهر/ :يالله قومي.... بنزلك عند شقتك وبمر اخذ لنا صحن مقبلات علشان نسد جوعنا شوي..
نجود وهي تقوم وبندر يناظرهم/ولاتنسين الشاي....
جواهر/طيب...
هنوف بعتب/ليش كذبت عليّ ياناصر؟
ناصر/كنت ابي اتاكد انتي ولاغيرك..رعم ان احساسي كان تسع وتسعين يقول انتي,,,
هنوف/والله ان قلبي وقع تحت رجلي منق لت لي خطبت ياناصر وحسيت اني بموت..
ناصر/كان المفروض نسويها من زمان وكنت ابي نجود ويوم قرت الرسايل اكدت لي ها الشي وهي اللي دزت لك المسج من جوال نورة بعد ماضمنا جيتكم من الاحساء وان البيت مافيه احد وكلهم راحوا للبنى..
هنوف/استفردتوا فيني انت واختك لكن هين....
ناصر/ليش ماقلتيها ياهنوف صراحة,,
هنوف/كنت متوقعتك تفهمها وهي طايرة بس مادريت عنك لوح؟
ناصر فتح عيونه/اللحين تحبيني وتحبيني وبالنهاية لوح؟
هنوف وهي مادة لها كاس عصير/هذا غزل بنات الثانوي حبيبي..
ناصر/شنو هذا هنوف لاهو معروف كولا ولاهو معروف....شنو ذا..
هنوف/شربات الفرح ياخويا............
شرب ناصر شوي وبعدها قام يكح كح/وش ذا يالمجنونة؟
هنوف ببراْة/فيمتو...
ناصر/هذا فيمتو...
هنوف/أي بس بدون تخفيف علشان الفرحة تصير قوية وثقيلة مثله..
ناصر/ياربي يساعدني عليك شكلي صدق بروح فيها منك...احاف بكرة ارجع البيت وتحطين لي رز بدون ماتسوينه ولا لحم بدون ماتطبخينه؟
هنوف/تصدق عجبتني الفكرة وشكلي بطبقها بالمستقبل..
ناصر/هنوف شدي حيلك خلصي بسرعة ورانا عرس..ولاناوية تتعمقين بثانوي لين اشيب..
هنوف/والله الصدق الصدق مالي نية اكمل دراستي وابي اظل قربك وش باخذ انا من الشهادة ماتقولي؟؟
ناصر/بعد!!!حتى دراسة مو ناوية تكملين؟؟؟
نجود وهي تفتح باب الشقة /والله لو مو علشان خاطرك ياجواهر ماجيت,,,,
ماابي ادخل ها المكان,,,,
دخلت ولقته واقف قدامها وربطت الامور في بعض المسج اللي وصل جواهر وسالفة الثوب هذا معناته انه هو اللي داق عليها وطالب منها ها الشي....
نجود بلامبالاة/في شي...
فهد/نجود...
نجود/جاية اخذ غرض وبمشي...
تقرب منها ومسكها من كتوفها وقال بعمق،اشتقت لك؟
نجود بدون ماتناظره/بس انا مااشتقت لك....
فهد تنهد بقوة/عارف اني غلطت وتسرعت بس..يانجود انتي عارفة انتي شنو بقلب فهد وكيف ان فهد مايتنازل عنك,,,,
نجود/لامو عارفة وانت عطيتني خيارين وانا اخترت..
فهد/نجود لاتقولين ها الحكي...
نجود/وش تبيني اقول عاد,,,,
فهد/حبيبتي....انا مقدر اعيش بدونك..
نجود بثقة/وانا مو متخلية عن اللي ببطني يافهد حتى لو كنت انت الثمن المقابل؟
فهد/ومن قال انك بتتخلين عنه؟
نجود تنهدت..
ضمها فهد لصدره بقوة وكانه يعوض غيابها اللي مضى عن حياته وقال بهمس/بس تراني ابيه ولد يانجود زين...
نجود بعناد وهي تضمه بقوة اكبر/بجيب بنت..
فهد/أي زين بس خليها تشبهك طيب...

عبير/يمكن انت تعتبره عيب ياعلي بس بيني وبينك هو الشي الوحيد اللي خلاني اوافق على الموضوع؟
علي/ليش؟
عبير/مدري....كنت شايلة هم حمود وماابي ارتبط باي رجال بالعالم واجيب منه عيال ويغير معاملته ويفرق بينه وبين عياله اللي من صلبه....
علي/عبير انا حتى لو كنت قادر اجيب عيال تاْكدي اني ماراح افرق بينهم وبين حمود لانه بيظل بعيوني صدقيني..
عبير/ابيك توعدني ياعلي...
علي/وعد ياعبير وعد..راح تعيشين معي اميرة وماراح اجرحك ابدا وبتكونين بعيوني,,,,
عبير/لاياعلي ابيك توعدني انك تحط حمود بعيونك وماتغلط عليه ابدا تراه يتيم ياعلي وبذمتي..
علي/وهذا كلام عاد ياعبير....بعيوني يالغالية بعيوني وبدون ماتوصيني بعد,,,,
بندر/جواهر ممكن لحظة...
لفت له جواهر وهي جاية بيت بو علي تتحمد للبنى بالسلامة بعد ماسوت العملية ورجعت بيت عمها...
جواهر بحة/في شي..
بندر/ابي اتكلم معك..
جواهر/مااعتقد ان في أي شي ممكن نتكلم فيه مع بعض..
بندر بالم/في ياجواهر في...حبي لك اكبر من أي شي...لازم نتكلم بها السالفة ياجواهر لازم,,,
جواهر/بندر...شلون لبنى اللحين؟
بندر بارتباك/ها...انا اكلمك عن حبي لك اللي وصلني للجنون وانتي تساليني عن لبنى كيف بس ياجواهر؟
جواهر/كل يوم يمر قاعدة اكتشف فيك شي جديد يابندر ماكنت اشوفه وانا عامية نفسي بحبك,,بس الحمد الله الغمامة اللي على عيني زالت وصرت اشوف كل شي واضح مثل الشمس....وخيانتك كات اول شي شفتها...تلتها لامبالاتك ولااهتمامك باهلك والناس اللي حوالينك واللي يحبونك واللي مافيه خير
حق اهله يابندر عمره ماكان يكون فيه خير لااي احد,,,,انا يابندر خلاص شلتك من بالي شلتك ,,ماعدت افكر فيك ولاراح افكر بعد يابندر...روح عسى ربي يوفقك بغيري ان شاءالله,,,,,
بندر باعتراض/بس ياجواهر...انا احبك وها الخيانة اللي انتي تتكلمين عنها..
قاطعته باشارة من يدها/بندر,,لاتحاول تكذب عليّ!
اذا كان الكذب مسموح في شرعك عيب في شرعي,,
وانا لايمكن اتنازل او ارفع كفي واهزه!!
عزيز النفس لايمكن بكلمة يفقد العزة,,,
عتابك ماياْثر بي وغرورك زادني عزة,,
لعلمك بس لااكثر عزيز النفس عمر الريح ماتهزه؟؟
مرت الشهور سريعة على كل الابطال اللي عشنا معهم..ومحمد رجع بعد كم يوم وراح فهد وخطب له فوزية بنفسه وبوسط بيته وكان معه ابو مصعب ومصعب وفوزية وام مصعب انكسر باسها من ها الموقف خصوصا ان مصعب بعد مافهم ان جواهر ماراح تكون من نصيبه طلب من فوزية تدور له بنت حلال بسيطة بحياتها ومالها ولا العالم اللي امه عايشة فيه بس علشان يثبت لها ان الله حق مثل ماقالها بيوم اللي رفضت محمد,,,,
نجلاء بعد تركت سوالفها مع نجود لانها خسرت حتى عيالها اللي انضموا تحت جناح نجود وتربيتها الجديدة,,,اصلا البيت كله صار يمشي بامر من نجود اللي غيرت كل انظمة النوم والاكل والطلعة ودخلت لهم اشياء جديدة بحياتهم وماحبت تخسر وجودها بها البيت بعد وضلت بعيد عن كل شي والقهر ماكلها بس دايم تردد شرعك اللهم ولااعتراض..القعدة مثل الغريبة بها البيت ولاحمل لقب مطلقة والطلعة منه,,,,
مشاري ولمياء رجعوا اصفى من قبل خصوصا وان بنت مثل القمر شرفتهم من جديد وعاشوا حياتهم بدون التفاتة لااي احد,,,
جواهر بعدت بندر عن حياتها بس ماقدرت تشيله من قلبها وهي اللي حبته بصدق بيوم من الايام ورفضت كل عروض الزواج اللي جت لها ومن كل صوب لانها كانت مؤمنة ان حب بندر بقلبها ماراح يتبدل ابدا حتى لو جرحها اكبر جرح بحياتها,,,
بندر ...للحين مو قادر يفهم ان جواهر ماتبيه وعنده امل انه ياخذها وانها تسامحه...كانت كل مهمته بالحياة انه يتابعها مثل طيفها وين ماراحت ومايخليها تغيب عن عينه ابدا..كان يمشي كل يوم معها مثل ظلها وهي تمشي على الكورنيش بدون ماتبين له أي التفاتة انها فرحانة انه بعد يتابعها,,,بس متضايقة من حياته اللي صارت بطالية لاوظيفة ولااصحاب ولااي شي قعدة بيت وملاحق جواهر وبس!!!
منال طبعا رجعت من امريكا هي وتركي بعد ماخلص من دراسته وابتدت حياتهم الفعلية هنا بالسعودية بعد ماعاشوا سنة غربة كاملة مع بعض وكل واحد شايل الثاني هناك ...وقرروا يبدون حياتهم ويكللونها بعيال يغيرون لهم طريقهم,,,
علي وعبير..اثبت لها انه المحب الوفي اللي ماراح يقصر عليها ابدا بعواطفه ومابخل عليها لاهي ولاحمود باي شي خصوصا وان حمود تعلق فيه يوم عاشوا مع بعض كثير وها الشي ريح عبير لانه علي كان صادق بمشاعره..صحيح كانت بالبداية حاطة يدها على قلبها بس مع الايام تطمنت لان علي فعلا تغير وتناست بطيبتها كل شي وفتحت صفحة جديدة,,,
هنوف وناصر قول وفعل..ماتبي تكمل دراسة وطلعت من المدرسة رغم محاولات ناصر العديدة بانه يقنعها تكمل ولو منازل بس هي عيت وهي اللي تنتظر ناصر من زمان,,,,
وتزوجوا وماخلت حياتهم من مقالبها اللي كانت شبه مجنته يوم يرجع من الدوام ويلاقيها حاطة له المكرونة بدون طبخ تقوله جرب الاكل كذا يمكن يعجبك!!!
ويوم تكوي ثيابه وتحرقهم بحجة ان المكوة خربانة مو ذنبها!!
بس كانت تحبه حييل وكان هو يبادلها نفس الشعور,,,
لبنى وعبد العزيز واصراره عليها خلاه يتمسك فيها رغم رفضها علشان زوجته لاتنظلم,,بس قدر يقنعها ان هاذي فرصة لهم ماراح تتكرر ابدا وانهم لازم يستغلونها وحكى لزوجته عن علاقته بلبنى واتفق معها انه يتزوجها بالبداية بدون مايخبر اهله علشانها وبعدين وبعد مرور الوقت يعلن زواجه,,
واتفق هو ولبنى على الزواج بموافقة ابو علي ومباركته وهو اللي كان شاري عبدالعزيز,,
ولبنى لليوم ماتكلم ابوها ولا لها نية تكلمه بعد بعكس عبير اللي طيبها غلبها..بس لبنى كانت حياتها مع مسفر بذاكرتها كل ماحاولت ترجع تكلمه وتغير رايها,,,,,,
في مستشفى سعد التخصصي بالخبر,,,
وبالجناح الملكي..
كانت تبتسم للي حوالينها رغم التعب,,
كانت ام ناصر جنبها وفهد واقف فوق راسها وهو يسالها كل شوي اذا كانت تبي شي وسارة ولمى وفيصل متخانقين على الضيف الجديد اللي جايهم وجواهر بتدوخ من كثر وقفتها وهي تنتظر دورها,,
سارة/نجود شوفيهم انا الكبيرة ماخلوني امسكه كثير,,,
فهد/والله حرام عليكم خلوه يرتاح شوي من جيتوا وانتوا قالبين عيشته؟
ام ناصر/خليهم يابو فيصل خليهم يتعودون عليه ويتعود عليهم من اللحين لاتحاول تحط بينهم حواجز,,
فهد باعتراض/أي بس مو كذا ياخالتي بيذبحونه..
لمى/صار دوري..انت اكثر واحد مسكته يافيصل؟
فيصل باعتراض وهو ماسك طلال الصغير بقوة /لا..هو ولد ولازم انا اللي امسكه اكثر علشاني مثله؟؟
نجود بتعب/اقول ...ترى محد غيري تعب وهو يولد خلني اشوف فيه شمخ صغيرون بذبحكم كلكم,,,
سارة/اذا بكى انا بعطيه حليبه لاني الكبيرة انتوا ماتعرفون,,,,
جواهر/انا ابي افهم متى انا بشيله,,
فيصل باعتراض/هذا مو اخوك,,,,
جواهر/هذا ولدي..حبيبي فديته...بعين يكفي اني انا اللي مسميته طلال...
فهد/عقبال مانشوف عيالك ياجواهر..
جواهر ابتسمت/كل مابغيت تشوف عيالي شوف عيالك تراهم مثل ماصاروا من نجود قطعة منها صاروا بالنسبة لي انا بعد قطعة مني وتعلقت فيهم اناا بعد,,
لمى راحت عند جواهر اللي كانت تموت عليها/ابي امسكه شوي مايصير عند فيصل طول الوقت واحنا بنرجع البيت ومامسكناه,,,
جواهر/جواهر شالت طلال من فيصل رغم اعتراضه/خلاص يالله اقلب وجهك صار دورنا انا ولمى..واذا بتعترض روح اعترض بعيد..
فيصل/صبري بس يجي خالي ناصر اذا ماعلمته,,,
نجود/فهد...
فهد/لبيه...
نجود بهمس/تحبني...
فهد/مااتوقع شكلي بحب الهدية اللي جبتيها...
نجود/بالله!!
فهد/تصدقين مستحي اروح اشيله من عندهم واحمله انا !!!
نجود وهي تكلم جواهر/جيبيه ياجواهر...ترى فهد ماشافه...
سارة ولمى وفيصل بصوت واحد/مو لازم يشوفه اهم شي احنا نشوفه,,,,نجود وهي تناظر بفهد/خلاص بعد شرعك اللهم ولااعتراض!!
فهد بهمس/بيني وبينك ضمنا ان مايغير علينا في ناس بتشيله طول الوقت!!!!!!
اخر همسة,,,,هي ارواح تسبح في فضاء الواقع وتمتزج ببعض الخيال الواسع لكنها تبقى حقيقية,,,
شخصيات ظلت بمخيلتنا لفترة طويلة عاصرنا احزانها والامها وافراحها وشجونها وسعادتها,,,
لكن يبقى دائما هناك اعتراض على انها ليست موجودة بمجتمعنا المثالي ولكنها بالحقيقة تعيش بيننا وندركها ونراها مراى العين,,,,
احبتي اتمنى انكم قراْتم معي روايتي المتواضعة (شرعك اللهم ولااعتراض)ولم تتمللوا منها ومن شخصياتها مع خالص شكري وتقديري لمتابعتكم الدائمة لي ,,,
وانتظروني قريبا في(قساة اضعفهم الحب)ولاتحرموني من روعة تواجدكم الذي دائما وابدا يعطيني الامل والتفاؤل,,,
اختكم المحبة لكم,,ملح الحياة,,,,
رِمْشْ الْغَ‘ـلآ
تعليقات
    حجم الخط
    +
    16
    -
    تباعد السطور
    +
    2
    -