بارت مقترح

رواية الصعود للاسفل -6

رواية الصعود للاسفل - غرام

رواية الصعود للاسفل -6

هزاع:ألو مرحبا لساع ، هلا وغلا حارب ، شو ياييين عندنا اليوم ؟؟... هيه ما تريتوا للغدا ... المهم مب هذا موضوعنا .... شوف حارب ناصر غالي عندي وعمي ولو فطيم غلطت عليه هو جان صدقني ما برضى بس أنها غلطت على حرمته وتودونها لين هناك
طالعته شو يقول هذا غرصته من ايدي وقلت بصوت خفيف : ما غلطت
طالعتني وهو يهز راسه ويبتسم : ماعلي حارب هاي سوالف حريم وصارت بين الحريم ماله داعي نحن ندخل فيها ... أنت على عيني وييتك على عيني بس اسمحولي حرمتي ما بتروح ... أبغي اصلح بينهم بس ليش ما حرمه ناصر هي الي تي
هزيت له راسي موافقه على كلامه : صح ليش هي ما تي
شفته يضحك : خلاص حارب غير هالرمسة ما عندي .. واستسمح من عمي
.... يلا فداعته
طالعني : لو زعلوا عليه أهلج بهواج
فطيم : خلا يزعلون شو تبا بهم
هزيت راسي :الله يعينج الحين لو سرتي مب جان فكيتنا من لسانهم
فطيم:أنا اسير لهاي ولو تموت جدامي ما اعتذر لها
طالعني بمكر :عاد فطيم كل شي وله مقابل في هالدنيا ، صح
رصصت عيني وقلت باستهزاء :ادري ، بتطلب مقابل قول شو تبا
هزاع: ابغي اسافر ، ويا حرمتي دندون جيه يعني سفره خفيفه قبل رمضان
فطيم : هذوه الدرب ربي يحفظك
هزاع : زين ترا انا قلت لو ابويه يعني قال عنج وانتي حامل
فطيم: ما عليك ما بقول لحد أنك مسافر
هزاع :فديتج ويقولون لي كيف عايش وياج تراج ملاك تعرفين شو ملااااااااااك كيف مريحتني أنتي
فطيم: غريبه احيدك تسافر قبل ولادتي ، اذا سافرت الحين موعد ولادتي بتكون هني
هزاع: لاء هالمرة بحضر ولادتج ، المرة الي فاتت سافرت فيها ، هالمرة عندي حل بغلق تلفوني ، عسب مب كل شوي حد يدق ويتصل ويبارك وذا حشا ، بس بتم مشكلة وحدة ، أنتي
فطيم : لا تخاف من صوبي ما ابغي شي
هزاع: لاء أي عندكم اسلم عليج كل يومين
فجيت عيني :شووووووو وليش كل يومين ما يحتاي أنا بقولهم أنك يييييت بس دخيلك فكني
شفته ابتسم براحه وطرشلي بوسه في الهوا ورا ح
طالعته وهو يروح ، خلا يسافر مب مهم عنديه ، المهم أنه سوا الي ابغيه ، وما بعتذر منها ، يالله كيف اكرها هالانسانه مسويه عمرها ملاك وهي من هناك الشيطان بكبره ، عوذ بالله ؟؟؟
الساعه : 4 الظهر
سيارة مبارك
حصة
كيف يهنالك منام
وأنت ظالم في الغرام
بعت حبي يا حرام
من بعد عشرة عمر~~


طالعت ويه مبارك الجامد وشفته كيف راص على السكان شفيه اليوم مب طبيعي
حصة : حبيبي
صد عليه مستغرب :همممم ، فيج شي
حصة : لاء بس اشوفك ساكت
ابتسم لي بحنان : اريحج من صوتي الا تعالي ، بلاه هالدكتور ما عيبني مول
حصة : مافي غيره
فج عينه : يالله مافي غيره ، كيف يعني ماشي حريم أنا ما ابغي دكتور ريال
حصة: هذا الي عنده العلاج لحالتنا
شفته تنهد وسكت مديت ايدي ورصيت على ايده : وين بتوديني
طالعني مستغرب : ليش وين كنت واعدنج
فجيت عيني : بروووووووووووك
مبارك :هههههههههههه ، بنسير نتغدا برع بما أن حضرتج يلستينا عند الدكتور صارلنا 3 ساعات
ابتسمت له : زين ، أصلا ما اشتهي ارد البيت ،أصلا مب يوعانه ما ابغي اكل بس برايه بيلس وياك أنت كل
رن مبايلي في هاللحظة فما رد عليه مبارك طلعت مبايلي من الشنطه وابتسمت : توأم روحي
مبارك : لا اله الا الله
رديت بسرعه : هلا وغلا بغناتي
صد عليه مبارك يطالعني وكأن الوضع مب عايبنه ،
ومب سوء حظي أن نحن عند الاشاره فربع ايده ويلس يطالعني
حصة : هلا فديتج ، بخير الحمدالله شحالج أنتي
توأم روحي : بخير يعلج الخير ، وينج
بعدها فج الثلاجة الي في النص وطلع ماي وياي يشربه
حصة : أنا ويا مبارك ،الا صح أموووون
ما وحالي اكمل الكلمه الا مبارك غص
حصة : بسم الله حبيبي اشفيك
بلع ريجه وطالعني : كح كح ها ماشي ، يلا قريب بنوصل رمسيها خلاف
حصة :موني سمعتيه
آمنه : هيه ريلج هذا ، الله يعينج بس
حصة :هههههههههه حرام عليج
شفت مبارك يطالعني بطرف عينه كنه عرف أني أرمس عنه
آمنه : يلا ارمسج خلاف
حصة : فداعته حبيبتي
آمنه : الله يحفظج
شوي والا بمبارك مبركن السيارة طالعت المكان : مبارك ، يايبنا البحر
ابتسم لي : هيه ، يلا نزلي
حصة : في هالحر
مبارك : هيه شعرفج في الرومنسيه هالايام الرومنسيه ، تقول كلام حلو وأنت تعرق
حصة : ههههههههه دخيلك أنت
فجيت باب السيارة ونزلت : مبارك شو بتاكل هني
مبارك : ما باكل شي ، باكل رمل شالراي
حصة :هههههههههه تسوي خير ، ما قتلي انك تحب الرمل ، جان ما تعبت عمري كل يوم وطبخت ، يبتلك رمل
طالعني بطرف عينه ومسكني من ايدي وسحبني صوبه : اييييييييييييه وين تبا
مبارك : شو وين ابا حرمتي
تمشيت وياه وهو لاوي على جتفي حسيت شوي بخجل صح المكان ما فيه حد ونادر ما تلاقي حد يمشي خاصه أن ظهر وحر بس بعد نحن في مكان مفتوح وممكن أي حد يمر
رحنا صوب البحر ويلسنا على الرمل
شفت مبارك يطالع البحر ، شفتو نظره الانسان المهموم ، هاي كانت نظرته ، بس ليش ؟؟ ما أعرف ؟؟
مبارك : هالبحر بشو يذكرج
ابتسمت وهالمرة تقربت منه ونسيت حياي وحطيت راسي على جتفه : امممممم فيك ، تراك شراته غدار
صد عليه وقال بجديه : أنا مب غدار أنا احبج
استغربت رده فعله الجديه وايد وطالعته مستغربه : امزح وياك حبيبي
ابتسم لي ورد طالع البحر
نظرته غريبه ما فهمتها
مبارك
روح وانساني خلاص
وقول فرقنا القدر~~
ياما دللتلك دلال
واعتبرت أنك مثال ~~
طالعت البحر وأنا مضايج ، ليكون هاي آمنه تلعب على الحبلين ليكون قالت لحصة ، يا ربي مب ممكن تكون هاي ربيعتها آمنه وحصة مطرشتنها تختبرني عيل ليش تقولي غدار بنفس اليوم الي كلمتني فيه آمنه ووافقت تكلمني كل فتره وتاخذ اخباري ، يا ربي ارحمني ما اعرف الي اسويه صح ولا غلط ، يمكن شفقت عليها ، بس الانسان الي بيفكر مجرد تفكير يخرب بيني وبين حصة عادي مب الا احرق قلبه عادي اخد قلبه على الارض وادوسه بالسيارة رايح ياي هاي حصيص هاي الغناه
حطيت راسي على راسها الي متساند على جتفي : حر حصيص
حصة : ههههههه أنت يايبنا
مبارك :يايبنج عسب اقولج كلام حلو عند البحر ، عسب تخقين أن ريلج رومنسي
شلت راسها ويلست جدامي وتربعت : مبارك عاد بليل ايبني وفي قمر والجو شوي حلو ، مب الحين
مبارك :هههههههههههههه ، اوكي بنيلس لين بليل لين ما يطلع القمر عسب اقولج كلام حلو ، شرايج
ابتسمت لي بمتعه وطالعتني : صدق لين بليل ، بنتعب
قلتلها بحماس :أنا ما بتعب
ابتسمت لي بدلع وصدت صوب البحر : آآآآآآآآآآآآه دخيلج كله ولا هالدلع لا تخليني اتهور
حصة : هههههههههههههههههههه
يت حصة وقعدت حذالي
بغيت اصد لها بس سمعت تلفوني يرن لما طلعته من مخباي شفت رقم آمنه
حطيته صامت وحطيته بمخباي
شوي والا وصلني مسج
فتحت المسج
(( لاء والله ليش حطيته صامت ، ولا عشان يالس وياها ، ماعلي البحر وايد حلو وياها ))


طالعت المسج مستغرب يعني هي هني تشوفني تلفت حولي مافي حد غيرنا
رديت طالعت البحر ، لحظة ليكون في وحدة من السيايييير
وهالمسج شو ان شاء الله ، تهديد ، ولا تحاسبني ولا شو ، منو هاي بتخبركم ، ياي تحاسبني على شو على حلالي ، زين ماعيل يا آمنه أنا براويج ، لحظة حصة ما قالت لربيعتها آمنه انا في البحر يعني مب حصة الي مطرشتنها يعني هاي مب ربيعتها ، يعني السالفه الي قالتها صدق هاي تحبني ، حبها برص ان شاء الله
صديت صوب حصيص ، يا ترى أي سيارة هي الحين
تقربت من حصة بسرعه وطبعت بوسه طويله على خدها ، شفت ويه حصة ينكمش
حصة : ايه مبارك ، شو تسوي تخبلت
مبارك : هههههههههه بلاج الا بوسه بريئة
ان شاء الله شافت
لويت على جتف حصيص وابتسمت : خلا العواذل يموتون حصيص
طالعتني حصة مستغربه : مبارك أي عواذل
مبارك : ماعليج
سمعت صوت المسج وابتسمت الصراحة طلعت مني ضحكه خفيفه وخلت حصة تطالعني باستغراب
استانست تأكدت أنها شافت
شليت مبايلي وفتحت المسج
(( لا تخليني انزل اجتلها الحين ))طالعت المسج صراحة حرجت
طرشت مسج لها
(( لو تموتييييييييييييييييييييييييييييييين جان فيج خير ولا في أمج خير انزلي أشوف ))
طالعت حصيص : قومي غناتي شرايج نسبح
حصة :شو أي نسبح ن تباني انزل بالعباه
مبارك : لاء عيل بشو بتنزلين ، شو تتحرين ريلج ، يلا قومي لا تخليني افرج في البحر
حصة : مبارك عاد ، اليوم شفيك تخبلت
مبارك :هيه من زمان متخبل أنا
طالعتها وبحركه سريعه طبعت بوسه على يبهتا وخدها اليمين وخدها اليسار
دزتني حصة من صدري : حوووووووووو بلاك مبارك نحن مب في البيت
مبارك : هههههههههههههههههههههههههه ، حصيص يلا نروح البيت ، بردج بليل
حصة : قلت بتم لين بليل ما يخصني
مبارك : هههههههههههه زين خلاص برايج بنتم ولا تزعلين
مديت ريلي على الرمل يومنا اليوم طويل ، ما نروم نكسر بخاطر الشيخة حصة طلعت مبايلي من مخباي وغلقته ويلست اسولف ويا حصيص وأنا اتأمل الليل يطلع بسرعه عسب تشوف القمر ونرد ؟؟؟؟؟؟؟؟؟؟؟؟؟
بيت ميرة
شمسة
انجلبت الصوب الثاني وأنا اتافف أوووووووف ويا هالنوم الي مجافني اليوم ، معني راده من الدوام هلكانه أبغي ارقد ، الله يسامحك يا سلطان
صديت صوب الساعه الي على الطاولة الي عند الشبريه أووووووف 5 ونص
قمت من الشبريه ورحت اتغسل ،
اممممممممم طالعت ويهي في المنظره وايد اشبه أمي يعني ، لو أن شعري أنا اسود فحمي وشعر أمي مايل للبني الفاتح لكنا توأم ، طبعا مع فارق السن الواضح
نزلت تحت وشفت أمي يالسة تطالع تلفزيون رحت يلست عندها وصبيت لعمري جاي حمر
يلست وحطيت ريل على ريل ، لازم أكون واثقة من عمري لما ارمسها عسب لا تشك
شمسة : أمايه يسلم عليج ريال
صدت صوبي : ريال منو هالريال
شمسة : يارنا
ميرة: يالله مداج تتعرفين على اليران ، بعدين مسوده الويه شو مودنج عند الريال
شمسه : لاء ريال عود شافني ذاك اليوم وسلم عليه وتعرفين سولف شوي تعرفين حركات الشياب
عوت بوزها وطالعتني بطرف عينها : الله يسلمه
طالعتها وأنا اركز على ملامح ويها : يقول يعرفج ، وسلم عليج سلامن كثير ، حتى أول ما شافني تحراني أنتي
صدت لي بدون اهتمام : ومنو هالريال ، ما قال اسمه
ركزت كثر ماتتخيلون ، تعرفون الي سهران طول الليل يذاكر وثاني يوم يقولون هذا امتحانك ما بتعيد السؤال غير مره وحدة كيف يركز ويسمع السؤال بكل حواسه أنا ركزت كل حواسي النظريه والحسيه والسمعيه حتى اللمسيه كانت شغاله وقلت لامي
شمسة: حميد غانم ال....
شفت ويه امي تغير وبلعت ريجها وطالعتني مستغربه : منو قلتي اسمه
عدت الاسم وأنا هالمرة مصدومه كل شكوكي في محلها كان بينهم شي قلت وانا اصد الصوب الثاني بعتب : حميد غانم ال...
شفت أمي طالعتني : وشو وداج عنده ،آخر مرة تروحين صوبه فاهمه
شمسه : ليش وحليله ريال طيب ، بعدين هو ما عنده حد في البيت
ميرة : حرمته بالبيت وما ابغي تعرفج ولا تسمع اسمج ما فيني انا على عوار الراس اخر عمري
انصدمت لاء انصعقت من كلامها : أمايه حرمته ماتت ارتاحي
طالعتني كنها متلومه أول مرة في حياتي أشوف أم جيه متلومه من بنتها ، الا في حياتي ما ظني بشوف ، غريبه ، هاي أمايه ميرة معقوله ، دخيلك يا ربي لا تصدمني في أمي
شمسة : كان خطيبج
ميرة :شوووووووووووو ، لاء ما كان خطيبي
كملت أمي الرمسة : شمسه ، هالسالفه ما ابغيها تنطرى في بيتي فاهمه ، لا هالسالفه ، ولا اسم ولا سيرة هالريال ، واذا فكرتي مجرد تفكير أنج تروحين عنده ، هيه لا تطالعيني جيه أعرفج ، بحش ريولج حش أنتي مب صغيره الحين اعقلي ،
قامت أمي من مكانها راقبتها الفرق بيت امي وهالريال الي هو بوناصر كبير يعني أظن لما كانت أمي 10 يمكن كان هو 25 خلا نحسب 25-10يساوي فرق 15 سنه
نقول عرس بوناصر وهو 15 وياب ولد ولما ولده صار عمره 15 سنه صار عمر بوناصر 30 وعمر امي 15 لما ولده 20 امايه بتكون أكيد 20 يعني قد ولده اذا ولده ابو سلطان من عمر امي اكيد بيكون له ولد من عمري ودام انه عرس قبل امي اكيد ولده بيكون اكبر مني بكم سنه وهو سلطان
يعني جيه السالفه اوكي عمره 35 أمايه 20 أمي قالتلي أول واحد خطبها كانت في العشرينات يعني هو مافي غيره هو 35 وهي 20
هاي السالفه شفتوا شو فايده دراستي الجامعه ادرس محاسبه على الفاضي ، هههههه
ويت شو يضحك أنا توني مستغثه ، خلا افكر شوي شو سالفتهم كانوا يحبون بعض واهلها رفضوه لانه كبير ، ولا لانه متزوج ، ولا هو كان يحبها وهي تشوفه مثل ابوها ، يا ربي راسي مفتر بس تأكدوا دوم الي في بالي يكون صح فثقوا بكلامي توقعاتي صح
تساندت على الكرسي : اممممممممم سلطان ، شو سالفته سلطان ليش عايش ويا يده ، امه وابوه وين عايشين داخل بس ما جد شفت حد ، ولا سمعت حس حد
أنا شكلي يبالي يلسة مطوله ويا امي لو ما رضت ترمس ماشي غير بوناصر وهي بهواها يا ترمس يا بضطر ارضي فضولي بأني اساله ؟؟؟؟؟ تنهدت وطالعت الصاله الي فاضيه مافيها حد ؟؟؟؟الله يعني فضولي وين بيوصلني ؟؟؟
بيت بو ناصر
سلطان
قمت من النوم وأنا أحس عمريه مصدع أووووف الساعه كم ؟؟؟ شفت الساعه الي حذالي
ست ونص ، محاظرتي مب جنها ثمان ونص ايهي قمت وأنا متنرفز لحظة هذيل راحوا ولا بعدهم
تجدمت قبل لا اسوي أي شي وفتحت الباب وقربت صوب الدري سمعت اصوات
شو هذيل ما يحسون ، شو هالزيارة الثجيله وايد طولوا ما يدانون يدي ولا يون الا في الشهر مرة بس يوم يوووووون شو يوديهم اففففف منهم لحظة شمسه
رحت صوب المبايل شفت في مسكول بس لما فتحت شفت من رقم تلفون يدي
شو هالحركات بعد ليش داق ، عسب انزل لهم فاضي هذا بعد
رحت الحمام عزكم الله وتسبحت ، طلعت وأنا انشف ويهي بالفوده رحت مرة ثانيه صوب المبايل على وعسى تكون دقت بهالوقت
بس للأسف مافي شي ، ماعلي يا شمسه تتغلين ونج ، أن ما خليتج ادقين بعدين وتحترقين وتنتظرين أني ارد زود عن الي يالس انتظرج فيه
تنهدت ورحت اغير ثيابي ، منو بيكون تحت الحين عمي حمد وعمي حميد
وحريمهم وعيالهم
بس كأنهم وايييييييييديييييييييييين كأنهم الا اكيييييييد وايديييييييييين عوذ بالله من هالناس ما تستحي ، الزياره ساعه كم تامين هذيل ليكون ناوين يباتون بعد ؟؟؟؟؟؟؟
تعصمت بغترتي وشليت لابتوبي ونزلت تحت
أول ما وصلت الصاله شفت الانظار كلها يت صوبي
سلطان : السلام عليكم
الكل : وعليكم السلاام
رحت صوب يدي وبسته على راسه على الاقل جدامهم
سلمت على عمامي بالمثل
ويلست على القنفه مب خوفن منهم والله ، لكن عسب ما يزيدن بالرمسه عليه ، وخاصه حريمهن ، عسب يشوفني زين لان لو ما كنت زين مع يدي وعمامي يفرحن هالشي وانا اسمحولي ما اعرف اسوي شي افرح فيه حد عسب جيه بكون زين ويا يدي على الاقل جدامهن
يلست على القنفه سمعت يدي : الله يرضى عليك ، بتروح الجامعه
صديت عليه : هيه بروح بعد شوي
حرمه عمي حميد : قومي مويز صبي لولد عمج جاي ولا قهوة
طالعتها باستخفاف هذا بيتنا اظني ، صديت صوب مويز الي يقولون عنها شفتها يالسة عندي
الظاهر أني يلست على القنفه ومب منتبه منو يالس فيها صديت صوبها : ليت تصبين جاي
موزه : ان شاء الله
قامت صبت لي جاي وناولتني وردت مكانها ، استغربت ليش محمره عنبو ليكون تستحي مني
صديت الصوب الثاني وأنا اعوي بوزي
مرت عمي حميد : أي جامعه انت سلطان
طالعتها هاي محد غيرها الفضوليه شو تبا فيني مليون سؤال بتسأل أم المناكر : جامعه الــ؟؟؟؟
طالعتني باستهزاء : هيه
حرمه عمي حميد : حذال جامعتكم موزة :
موزة : هيه امايه
صديت صوب موزة : ليش أي جامعه انتي
موزة : زايد
حرمه عمي حميد : وبعدك هندسة ولا غيرت
قلت وأنا احط الجاي على الطاولة الي جدامي : لا بعدني ادرس هندسة
قمت من مكاني : استرخصكم أنا عيل
بوناصر : زين الله يحفظك
طلعت وانا ابتسم ، بالعاده نفاد ينفدك ، محترم يدي يوم يوووون وهاي الفضوليه شو تبى بي هالقد اساله ، ولا ونه غيرت تخصصي عنبو كل الناس الحين يدرسون هندسه مستكثره عليه ليش ادرس صدق حريم شو تبين انتي ادرس ببيزات يدي مب بيزات ابوج ، ويدي الا فتره وبعدها بيروح و بتحوشون على كل شي ، مستعيله على شو هاي ؟؟ يالله تعيني ؟؟
ابتسمت باستهزاء مستكثره عليه اأمن عمريه بشهاده بعد ، يالله كيف حسودين وما يبولي الخير ، شو هالعالم ؟؟؟


الساعه 7:50 مساءاَ
على البحر
مبارك
حسيت بايد حصيص
سرحت شوي في البحر ، بعد ما رديت من صلاة المغرب الي صليتها في المسيد الي حذال البحر ، والظاهر سرحت وايد مب شوي
حصة : ههههههههههههه مبارك نمت شو
يلست عدل في مكاني بما أني ميلسنها مكان بعيد شوي ما كان فيه ناس وايديدن معن الناس بدوا يون بس الجهه الثانيه والي يمر في حاله محد يصد لحد هالايام يعني لو مب حصيص وياي جان رقدت ومحد قالي ليش راقد ، الا جان يو وقالولي تشوه المنظر العام ؟؟
ابتسمت وشفت حصيص : ساعه كم
حصة : ثمان
صديت صوبها : خافي ربج فيني عنبو
حصة : ما انتبهت انها بدت تظلم
طالعت المكان : هيه والله
صديت للسما وقلت بسرعه : هذووووووه القمر ، حصيص انا أحبج ، يلا قومي نروح البيت
حصة : هههههههههههه مبارك وايد عليك هذا الي قدرت عليه
مبارك : حصة عيزت عنبو من العصر يلا ، سرينا
قمت وشفتها يالسه تطالعني
حصة : يالسين كل هذا وتقولي نروح خلا نتعشا هني
فجيت عيني : لاء والله ، حصيص تعبت طالع من الدوام ويلسه عند الدكتور ويلسه وياج تشوفين القمر ، بعد شوي بيأذن العشا
حصة : هذوه المسيد روح صل شرات العصر والمغرب صليت ورديت
مبارك : العصر والمغرب رديت لان قمرج ما ظهر الحين شفتيه ،
شفتها عوت بوزها وقامت رفعت واحد من حياتي : بعد مب عايبنج حرم مبارك ، يلا يلا
ابتسمت في داخلي على حصيص ، بس وقفت نص الطريج
وصديت صوبها شفتها طالعتني مستغربه
مبارك : شوفي القمر ،انتي أحلى منه
حصة : ههههههه تحاول تقول كلام حلو
ابتسمت لها : شو بلاه كلامي ما يا جدام عينج ميلسنج لين ما تشوفين القمر وقتلج هالكلمتين ، ما بيظهر مني زود في هالمود ، وهالجو أووووف هلاك
ابتسمت لي ومشت ومشيت وياها رايحين البيت صراحة بصلي العشا وبرقد ما اقدر ، تعبت اليوم ، هلكت الا ؟؟؟
بيت بو عبدالرحمن
شما
يلست وأنا حاطه ريل على ريل وجدامي صحن فيه فراخ ومج ( كوب كبير ) متروس بيبسي ، كيف لا تسألون هذا المج مخصصتنه للاشياء البارده
ما حسيت الا بواحد يدفر ريلي بايده ويمشي
شما : حوووووووو عبدالرحمن
عبدالرحمن : مليون مرة اقولج نزلي ريلج ، شو واحد من الشباب انتي
شما : أـووووووووف
كملت الفلم الي اطالعه وأنا ساكته لو رديت بيسوي لي سالفه
شفته يطالعني بتدقيق ، يا ربي بيبدا الحين
عبدالرحمن : مضاربه ويا عواش
ابتسمت وصديت له : أشوفك تسأل عنها
طالعني باستغراب : ما سألت عنها
شما : عيل
عبدالرحمن :اسأل عنج انتي ، ما تروحين بيتهم الحين
طالعته وقتله بتهور : ولا بروح
طالعني مستغرب : ليش
شو اقولك الحين اخ منك يا لساني لازم ترمس :آآآآآآآه ماشي بس دوم أنا الي اسير خلا هي تي
طاللعني باستهزاء : سوالف يهال يعني
طالعته بمكر : ليش ، انا ابغي اضبطك
فج عينه وقالي وهو يسوي عمره متفاجئ : له له ، وليش بشو بتضبطيني
طنشت مصخرته وغمزت له : ويا عواش
شفته طالعني بضيج وقال : شمييييييييم ،أنتي صاحيه
شما : بلاها عواش
عبدالرحمن : أي وحدة الا عواش
طالعته وأنا معقده حياتي : لاء والله
عبدالرحمن : أنا من قبل اشوفها اختي ، والحين بعد ما عرفت انها كانت ترمس واحد مستحيييييييييييييييل
طالعته مستغربه : بس هاي بنت عمك وهي صغيره ومالها ذنب
عبدالرحمن : وانا شو ذنبي اخذ وحدة كانت ترمس
طالعته مستغربه : واذا تزوجت أي وحدة شو يظمن لك أنها ما كانت ترمس
عبدالرحمن : على الاقل ما اعرف انها ترمس ، واذا رمست قبل انا ما كنت اعرف وشي وانتهى ، بس هاي عرفت وجدامي انها ترمس بتم طول عمري بشك بها ، بعدين أنتي كيف تحقينها عليه أنا أخوج
استغربت وايد وضجت بعد من رمسة عبدالرحمن كيف يفكر بعواش ، عواش مب مثل ما متصور
شما : لاء والله
عبدالرحمن : شما البنت ما تباني ولا انا اباها انتي معورة راسج ليش
شما : لا تخاذها ، ما اقولك خذها ، بس ليش تفكر فيها جيه
عبدالرحمن : ما افكر فيها اصلا ، عادي حالها حال أي وحدة
شما : كيف أي وحدة هاي بنت عمك
عبدالرحمن : بنت عمي عندها أخوان أنا ماعلي منها ،أنا علي منج انتي وحصيص وبس
طالعته : شو هالانانيه
عبدالرحمن : وشو يخصه الانانيه بالله عليج
شما : يعني
عبدالرحمن : ما يخصه ، أنتي ما يخصج هاي حياتي انا ما ادخلت بحياتج ، ولا حصة يوم خطبها مبارك ما ادخلت ، هاي الحياة الزوجيه كل واحد ونفسه يعني تخص الشخص الي بيرتبط وبس
شما : ولو حد خطبها بتفرح لها
عبدالرحمن: اكيد هاي بنت عمي ، اكيد بفرح لها
على الاقل شوي حسسني بالراحه انه ما بيدخل ولا بيقولي تزوجي ، وأنه لو حد خطب عواش ما بيقول شي ، بس بعد
ضايجني بكلامه عن عويش ، وسكت عنه ما ابغي يزيد عبدالرحمن دايما يشوف عمره أن هو الصح ما احب ادخل وياه في مناقشات مالها اول من تالي واعور راسي على الفاضي
شليت وقايتي : أنا رايحه بيت عمي
ابتسم لي : مسرع ما حنيتي ، عنبو توج ما بتروحين
ما اقدر ما ابتسم لعبدالرحمن يوم يبتسم لي عبدالرحمن وايد طيب وحنون ويخاف علينا وايد بس بعد يقهر ويا افكاره الغريبه العجيبه الي ما اعرف من وين يهل علي بها
رحت بيت عمي لحظتها نسيت خالد وان ممكن يكون هناك رمسه عبدالرحمن عن عويش خلتني ابغي اروح ، اشوفها ، عويش اعز ربعي في النهايه وبنت عمي ، واختي الي ما يابتها امي يابتها مرت عمي هههههههه
أول ما دخلت بيت عمي شفت البيت فاضي الظاهر طالعين عمي ومرته ، وراشد كالعاده محد نادر ما اشوفه
نسيت لحظتها خالد ولا طرا في بالي ما اعرف ليش
ركبت للدري متوجه لغرفه عواش ولما وصلت لنصه
سمعت صوت من ورا ينادي وقفت مكاني اسمع
: شهااااااااااب
وقفت مكاني منو شهاب ، اوييييه ليكون حد ويشوفني مب ناقصة ، هذا مب صوت خالد
: شهاب شفيك تصنمت
وقفت مكاني بلا هذا خالد
صديت ورا وشفت خالد واقف اخر الدري
وقفت مكاني اطالعه
خالد : بلاك يا ريال ما ترد
طالعته مستغربه شو فيه هذا تخبل
صديت ورا اتأكد اذا في حد وراي بس ما كان في حد
طالعته وأنا مستغربه
خالد : هيه أنت أقصدك أنت تتلفت ادور منو
خيبه ليكون تخبل : خالد أنا شما
خالد : شما ، شهاب كله واحد ولا شرايج بنت عمي
طالعته مستغربه شو يقصد ، لحظة كأني فهمت قصده ؟؟؟؟
ما عرفت شو اقول : أنت ما يخصك
خالد :أنا ما يخصني ، بس عبدالرحمن وابوج يخصهم
طالعته مستغربه صدق نذل ياي يهددني ، بس مافي فايده الحين ، الكره في ملعبه : شوفي حرم خالد
فجيت عيني :شوووووووووووو
خالد: يا حرم خالد ، يا عبدالرحمن وابوج يدرون ؟؟؟؟ اختاري عاد !!!!!!!!
كشفتك وانتهى كل شي
بعد ما تنفع أعذارك ~~


الـــــــــــــــــجزء الثامن

*
!! صدمتني فيك !!
باللي سويته من ثواني ..
{ يعني اش قصدك }
تبي تخليني منك اعاني ..
بيت بو عبدالرحمن
شما
يلست على الشبريه وربعت ريلي ، لين الحين مب مستوعبه الي قاله خالد حسيت برجفه في ايدي بعدها انتقلت الرجفه لكل جسمي ، قاومت دمعه في عيني تبا تنزل بس للأسف نزلت
غمضت عيني وأنا أذكر الموقف
خالد: يا حرم خالد ، يا عبدالرحمن وابوج يدرون ؟؟؟؟ اختاري عاد !!!!!!!!
طالعته مب مستوعبه : بشو يدرون
خالد : بالي فيج ، ما يندرى بويه بس ولا لج سوالف بعد
شما : شو أنت ما تستحي على ويهك شو يالس تقول ، أي سوالف
تجدم مني وطالعني بغضب : شو أي سوالف شوفي فديتج اذا هلج مدمغين وما يدرون تراني عارف كل سوالفكم أنتو البويات فاهمه
ما شفت جدامي لحظتها وركضت من جدامه بس ما وحالي الا بايد تمسكني :
خالد : اليوم شو الخميس ، الخميس الياي ابغي اسمع ردج ، جان ردج لاء نفس اللحظة بخلي عبدالرحمن وابوج يدرون بسوالفج ، وجان ردج هيه أنا بس الي بدري ، قالي باستهزاء : وشوفي عاد لو لاء ، شو بيصير فيج ، ما اظن لو قتلهم زوجوني اياها بياخذون رايج ، يعني في الحالتين بتاخذيني بس الفرق أن بتنفضحين جدام الكل ، عاد أنتي بهواج تبين الكل يعرف ولا حبيب قلبج خالد بس
هد ايدي بعد هالكلام الجارح والتهديد الصريح ، صديت عنه و توجهت لبيتنا وأنا يائسة مصدومه غضبانه كاره عمري كل شي تقدرون تقولون ، ودخلت غرفتي
ياربي شو أسوي لو عبدالرحمن عرف ، شو بيسوي فيني ، معقوله يجتلني ، أكيد ، وأبويه ، شو بيصير فيه ، كيف بستر على عمريه بأني أوافق أخذه بس كيف أخذه ،أخذ خالد خالد الي بسببه تخليت عن أنوثتي بسبب رفضه لحبي ، والحين يباني أوافق عليه ، بعد ما غرست كرهه في قلبي ، بعد ما صار ما يعنيلي ، لاء دخيلكم ، انا حالفه ما أخذه ولو شو ما باخذه ، وبشوف أخرتها وياك يا خالد ، لازم أمسك عليه شي قبل يوم الخميس عسب يوم الخميس أهدده بهالشي بس شو ، شو يا شما ؟ ومن وين بتيبينه هالشي الي بمسكه على خالد من وين ؟؟ لحظة عويش
مافي غير عويش ؟؟
رحت بسرعه صوب مبايلي ودقيت لعواش بنت عمي مثل المينونه :ألو
عواش:هلا وغلا شميم
شما : مب وقته سمعي عواش أي وقت خالد بيطلع من بيتكم دقيلي على طول أبغي أي عندكم ضروري دخيلج
عواش: شو السالفه شميم
شما : سوي الي قتلج عليه
وصكيت التلفون في ويها مب وقتها تسأل، أ رحت الحمام وغسلت ويهي وطالعت ويهي ،أنا ريال ومافي شي بياثر عليه ولين يوم الخميس وايد أشياء بتتغير ، وبنشوف يا خالد ، يا أنا يا أنت .؟.؟ دام تام برع فتره طويله لا حسيب ولا رقيب أكيد له قصة ولا قصتين الا قولي قصص حب يا رب يطلع متزوج وعنده عيال ، يا رب
أوووووووووف كيف أفكر وليش ما قال لاهله ، اذا متزوج ، ليش ؟؟ امممم ماعلي بنشوف آخرتها ؟
وان شاء الله أنا الي بكسب في هالحرب يا خالد أنا مب أنت بنشوف آخرتها وياك
ثاني يوم
الجمعه
بيت ميره


شمسه
يا ربي اليوم ماشي دوام ما بشوف سلطان ، امممممممم ساعه كم الحين
خيبه مسرع ما صارت 3 ونص
وبعدين يعني أبغي اشوفه ، امممم ، رقمه انحفر في راسي بس ما أقدر ، ما أقدر اتصل فيه لو شو ما صار ما بتصل ، أنا بنت ناس وعمري ما فكرت بهالطريقه ، بس هالانسان غير ، هالانسان أحسه وفي ، أحسه برئ ،ما أتوقع أن هالويه يعرف بنات أو يرمس بنات أتوقعه صادق ، حساس ، رومنسي ، يعني مثل ما أبغيه هذا هو فارس أحلامي مافي غيره ، شو أسوي الحين
أسير بيتهم يعني ، يا ربي ارحمني ،،، امممم أمي ما قالتلي سالفتها ويا هالريال بوناصر ، مافي غير اخليه يخطب أمي ويتزوجها ويون يسكنون بيتنا ، عسب أقدر أشوف سلطان ويكون قريب ، لحظة وين سار تفكيري كيف أرضى ،أمايه تتزوج ،أمي أنا ، ويا ريال غير أبويه ، غير الانسان ايل طول عمريه أشوفه ، بس كيف ، كم أقبلها ما أقدر الصراحه ، بس لحظة ما فكرت في شي أمايه مب انسانه مالها احساس ، ليش هالانانيه ايل فينا ، بس منو الي قال أن بوناصر يباها وأنه خاطبنها قبل وأنه كان يحبها

يتبع ,,,,

👇👇👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -