رواية قتلهن الطيش وأحياهن الحب -12
اما هند كانت بالغرفه وتكلم وحده من صديقاتها اللي بالثانويه بجوالها وتضحك وناظرت جوالها حسن يتصل قالت : لحظه ياقلبي معاي خط ارجع اتصل عليك لا خلصت ,,, وردت على حسن طبعا هند عرفت اسمه الحقيقي بعد ما غلط بلسانه : هلا بقلبي والله ياهلا
حسن : كنت تكلمين من؟
هند : وحده من صديقاتي
حسن : ومن هي ؟!
هند: وحده ماتعرفها كانت صديقتي زمان
حسن : اهاااا,, وينك ياقلبي زمان ماتصلتي علي .. تتغلين ؟!
هند : لا والله مااتغلى بس وقتي مررره ضيق .. تعرف بعد وفاه ام نونو وضعنا تلخبط شوي ودايم اكون عندها ومو حلوه هي بهالحاله وانا اكلمك اخاف تتضايق وتحسب اني مو مقدره وضعها
حسن : الله يعينكم .. وش اخبارك ياقلبي
هند : ماشي الحال .. مشتاقه لك ولسواليفك
حسن : والله انا مثلك .. مشتااااااااااق لك بالحيل
هند تنهدت : ايواا وش اخبارك بعد
حسن : وش فيك .. ياقلب حسونه .. صوتك موب عاجبني
هند : آآآآآخ بس شقولك
حسن: قولي ياحياتي فضفضي .. وش فيك ضايق خاطرك .. اشوف بعيونك كلام
دمعت هند : احس الدنيا ضااااايقه فيني .. ومشتاقه لنور ولوجين .. مشتاقه لهم حيل ومشتاقه لجلستهم ..
حسن : ليه توك تقولين دايم انت عند نور
هند : ايه عندها بس ماعدنا مثل اول الاوضاع متأزمه .. وجلستنا صارت ممله
حسن : لا ياقلبي بس هالفتره صدقيني ايامك بترجع مثل اول واحلى بس الحين عشان نور ووضعها ولولو اختباراتها قربت لازم الجو يتغير عليكم
هند ارتاحت شوي : ان شالله يارب نرجع مثل اول
,,,,,,,,,,,,,,,,,,,,,,,,,,,,,
نور وعبدالرحمن وضي وعبدالعزيز بالمستشفى عند ابوهم
نور: هاا بابا كيفك اليوم
سعود يهز راسه وبصوت مو مفهوم بالحيل : الحمدلله
عبدالعزيز : يبه الدكتور قال ان شالله كلها كم اسبوع وان كثرت شهر وبتطلع وتنور بيتك
عبدالرحمن : والحمدلله يبه كل الشغل ماشي تمام بس تطلع من المستشفى بترتاح بالبيت وتابع كل شي وتطمن وانت بمكانك
سعود هز راسه بالايجاب ,, شوي دمعت عينه .. والكل لاحظه
عبدالعزيز : وش فيك يبه بسم الله عليك تحس بشي
سعود يهز راسه بالنفي
عبدالرحمن : طيب تبي شي
وبعد يهز راسه بمعنى لا
محد كان فاهم وش له دمعت عينه .. بس سعود كان يبكي على فراق حنان اللي عاشت معاه كل عمرها وبلمحة بصر فقدها ..
انتهى وقت الزياره وراحوا عياله من عنده للبيت وعبدالرحمن بعد مانزلهم البيت راح لأخوياه بالاستراحه اللي زماان ماشافهم
ماجد جالس بالصاله مع امه وفي فمه كلام موب عارف كيف يبداه
سعاد : آآآخ يالدنيا .. مالها امان .. الله يرحمك ياحنان ويسكن روحك الجنه ,, ودمعت عينها .. كانت اكثر من اخت ..
ماجد : الله يرحمها ويرحم اموت المسلمين .. رحت زرت عمي سعود امس والله حالته تحزن .. من يقول ذاك الرجل بقوته وهيبته يطيح بالفراش
سعاد: الدنيا ياوليدي ماتضمنها .. ولا تضمن نفسك فيها .. ولا تقدر تقول انها دايمه لك
ماجد : صدقتي والله .. يمه شخبار بناتها اللحين .. شلون وضعهم بالبيت
سعاد : الله يالبنات مكسورين كسره جامده ونور ياقلبي على ظهرها حمل وش كبره الله يعينهم ويصبرهم
ماجد : بقولك شي يمه واادري موب وقته بس ودي اقوله عشان يكون عندك خبر
سعاد: خير وش عندك
ماجد : يمه والله انا ودي اخطب نور واتزوجها
سعاد وابتسمت : صدق والله يامجود
ماجد : ايه والله يمه ودي بها
سعاد: طيب ياوليدي شد حيلك واشتغل وكون نفسك شوي ونخطبها لك .. بس مو اللحين
ماجد : ادري مو اللحين .. بس اهم شي تحجزونها لي اخاف تطير من ايدي
سعاد: يسير خير ان شالله ..
نزلت لهم هند بعد ماقفلت من حسن : السلام عليكم .. وراحت جلست
سعاد وماجد : وعليكم السلام ورحمه الله
سعاد : وين الهنوف .. وش جالسه تسوي ؟!
هند وواضح عليها الملل: ماادري ماشفتها
سعاد : مامريتي عليها بالغرفه
هند لأ.. وماسكه جوالها مره تلعب ومره تقرا الرسايل ومره تشوف الصور وتغير النغمات .. وشوي تأففت ورمت الجوال جنبها
ماجد : وش فيك ؟!
هند : ولا شي بس طفشاااااااااااااانه
تناظرها سعاد : وش مطفشك
هند : مليت من البيت والروتين اشتقت للبنات ..
سعاد : قومي شوفيلك شغله تسلي فيها
هند : شغلة وش .. مافي شي اسويه .. وتناظر ماجد : مجود تكفى طلعني من البيت خلنا نلف شوي
ماجد : وين تلفين ؟!
هند : أي مكان بس المهم اطلع
ماجد يناظر الساعه : راح الوقت خليها بكره
هند بتوسل : لا الله يخليك .. طيب اذا مافيك تمشيني ودني عند نور
سعاد : تروجين لها الحين .. ؟!
هند : ايه عادي ماما انت عارفه انها لحالها بالبيت واكيد عبدالرحمن موب موجود وتلقينها هي وضي طفشانين
وترد نظرها لماجد : هاا توصلني لها؟!
ماجد : يالله قومي اجهزي
سعاد : خذي الهنوف معك بس لا تتأخرين لأن عندها مدرسه
هند وهي طالعه الدرج : اوكي
,,,,,,,,,,,,,,,,,,,,,,,,,,,,,,,,,
فهد استلم الجوال حق لوجين وحب يشيك عليه يشوف رجع جديد ولا لأ.. لوجين كانت تحفظ كل شي على الميموري وبكذا كل الملفات اللي بجوالها بتكون موجوده .. فهد كان بالسياره وهدى سرعته اللين وقف على جنب مصدوم من اللي جالس يشوفه بجوال لوجين ومو مصدق ان اخته اللي بنظره صغيره ودلوعه يكون عندها كل هالبلاوي .. دخل على الاستديوا وانصدم صدمه عمره يوم شاف اكثر من صوره لوليد وغير مقاطع الفيديو .. وغير الرسايل اللي تأكد منها يوم شاف الرقم .. وكله كوم والمقطع الاباحي كوم ثاني .. سودت الدنيا بعيونه وصار بركان ثائر بينفجر في اللحظه اللي يشوف فيها لوجين او وليد ... دعس بانزين وفضى الطبلون وبأقصى سرعته توجه للبيت
,,,,,,,,,,,,,,,,,,,,,,,,,,,,,,,,,,,,,,,,,,,,
نور قامت تشيك على البيت وتشوفه نظيف وتمام عشان ابوها قرب يطلع من المستشفى واكيد بيمتلي ضيوف وكانت الخدامه تساعدها ,, نور تحس انها صارت المسؤوله عن كل شي بعد وفاة امها ,, ولازم كل شي يتم على ايدينها وتحت نظرها عشان ترتاح ,, بعد ماخلصت طلعت ومرت على غرفه ضي دقت الباب :
ضي : منو
نور تدخل : انا .. وش جالسه تسوين ياحلوه
ضي : ولا شي جالسه اتفرج على صورنا مع ماما
نور حست بالعبره خنقتها : اهااا طيب مابتقومين ننزل تحت نتعشى نلعب ولا نطلع الحوش شوي .. قطع كلامها رنه الجوال بجيب الجنز اللي لابسته .. طلعته وتشوف الرقم هذي هند : الوو
هند : مرررررررحبااا
نور مبتسمه : هلا والله اهلين .. وينك يالشينه لك كم يوم ماتجين
هند : غثيتك يابنت الحلال .. قلت اخليك بروحك يمكن تبين تستقرين نفسيا
نور: لا والله من جد تتكلمين .. والله اني طفشانه وبعد ضيو طفشانه وجالسين نناظر بعض ونشوف الفروق العشر
هند تضحك : طيب يالله الحين بجيك ومعي الهنوف
نور: والله .. ولا تتريقين
هند : أي والله حتى انا طفشااااااااااااااااااااااااااانه .. وقلت لماجد يجيبني
نور: زين الله يحيك .. الا وش اخباره ؟!
هند : من؟!
نور: ماجد
هند ترفع حاجبها : اهاا ماجد .. ايه بخير الحمدلله
نور: وش فيك تكلمين كذا
هند : لا ولا شي سلامتك .. بس جهزي قهوتك انا الحين بجي .. اليوم لازم نغير جونا الكئيب ونرجع مثل اول .. ولا شرايك
نور: ياليت والله ..
هند : وانا بتصل على لولو يمكن تجي
نور: اوكي .. الله يحيكم
هند : الله يسلمك ..يلا بابي
نور: بايات .. لحظه لحظه هند
هند قبل تقفل : هلا
نور: جيبي معك ايسكريم ماكدونالدز بلييييييز
هند : حاظر من عنوني الحلوين
نور: لا ياواثق ارحمنا
هند : عندك غير هالكلام
نور تضحك : لا
هند : اجل لا يكثر ههههههههههه يلا مع السلامه
نور تقفل وهي تضحك : مع السلامه ... وترد تكلم ضي : اللحين بتجي هند والهنوف
ضي انبسطت : صدق والله
نور: يس يس
ضي: اجل بقوم اغير ملابسي قبل يجون
,,,,,,,,,,,,,,,,,,,,,,,,,,,,,,,,,,,,,
لوجين جالسه بغرفتها واول مره تجلس جلسه جديه على الكتب بما ان الاختبارات على الابواب رن جوالها وكانت هند : هلا والله هنوده
هند : اهلين بالدافوووره .. وش صاير لك بالله احد حاسدك على الاهمال اللي كنتي فيه
لوجين تضحك : الاختبارات قربت ولا تحسبين كل الناس فاضيين مثلك
هند: اهاا . مشاءالله .. اجل خلاص اخليك الحين تذاكرين
لوجين : ليه وش كنتي تبين
هند: والله بروح لنونو وقلت اقولك تجين
لوجين : لاااا خساااره ابي اجي خلوها بكره
هند : لا لا سوووري مااقدر أأجلها لبكره لأن انا بكبري طفشانه
لوجين : يخس يالنذاله
هند: لا موب نذاله بس عشان تدرسين اليوم وبكره انت وهي تعالوا لي
لوجين : اوكي ..ان شالله
هند : يلا كملي يالدافوره هههههههههه
لوجين : انقلعي بس اتخرج وتشوفين شغلك
هند تضحك : من الحين اللين تتخرجين فيها نعيش وفيها نموت.. يلا مع السلامه
لوجين :: ياهلا حبيبتي مع السلامه .. وتقفل منها وتكمل دراسه
,,,,,,,,,,,,,,,,,,,,,,,,,,,,
يتبع...
يتبع الجزء السادس ... للحين مقهوره ..
اما هند تجهزت وراحت على غرفه الهنوف دقت الباب ودخلت : هاا خلصتي
الهنوف : ايه يالله الحين انزل
ونزلت هند ووراها الهنوف .. هند : يالله مجود
ماجد ويقوم ويصلح ثوبه ويلبس شماغه اللي كان راميه على الكنب : يالله مشينا
هند : مع السلامه ماما
سعاد : مع السلامه ولا تتأخرون
ماجد وهند : ان شالله .. وطلعوا ... وهم بالسياره قالت هند : ماجد بالله وقف عند ماكدونالدز بناخذ ايسكريم
ماجد : يوووه ياهند مو بطريقنا
هند : الله يخليك
ماجد : نوقف عند أي بقاله وناخذ أي ايسكريم
هند : لا لا تكفى نونو تحبه وهي اللي طالبتني اجيبه
ماجد ابتسم : اذا كذا نروح له
هند استغربت : توك تقول انه بعيد
ماجد: لو انه بسطح القمر بروح دام نور اللي تبيه
هند : يااااسلاااااااااام يعني لو ماقلت انها هي اللي طالبه مارحت
ماجد : والله لو تحبين رجولي مارحت لك بذيك الزحمه بس لعيون نونو كل شي يهون
هند تشهق: يخس يالنذل انا اختك
ماجد : ايه اختي لارحتي ولا جيتي .. بس نور حبيبتي ههههههههههههههههه
هند : والله اشوف الحال زايد
ماجد يضحك : زايد ولا نهيان
الهنوف تضحك : لا حمدان
كلهم يضحكون ومروا خذا الايسكريم وراحوا على بيت بو عبدالعزيز
,,,,,,,,,,,,,,,,,,,,
.. فهد دخل البيت والعصبيه واضحه عليه شاف امه بالصاله : السلام عليكم
هدى : هلا وعليكم السلام هااا جيـ...
يقاطعها فهد : وين لوجين ؟!
هدى : فوق بغرفتها , وش بغيت منها ؟!
فهد : سلامتك بس بسألها عن غرض لي .. وطلع ركض وفتح الباب من غير مايدقه وقفله وراه
فزت لوجين من فتحت الباب وخافت يوم دخل عليها كذا
لوجين : بسم الله وش فيك
ويقرب منها فهد ويمسكها من شعرها ويتكلم من تحت اسنانه : وش فيني هااه.. وش فيني يالوجين ياختي يامؤدبه يامتربيه .. وشفيني ,, ويقولها بصوت عالي : وش فيني هاااه
صرخت لوجين : ااااااااااه فهد وش فيك
نزلها من السرير وهو ساحبها من بلوزتها : تذاكرين .. اللحين تذاكرين بعد ماخلصتي صياعه ولعب .. وين جوالك ؟ّ
لوجين تبكي : وش صاير ؟!
فهد ويحط صباعه السبابه على فمه : اصصصص ولا كلمه لا اسمع صوتك جيبي الجوال ,, جيبيه بسرعه الشرهه موب عليك على اللي يوثق فيك ويعطيك جوال ياقليله الادب .. من اللي تكلمينه ؟!
لوجين تبكي وتنكر: وش اكلم من تقصد
فهد يطالع فيها والشرار يطير من عيونه : بتتكلمين وتقولين كل شي ولا ادفنك هنا اللحين .. تكلمي
لوجين : مااكلم احد يافهد
فهد : ومن لين هذي اللي بجوالك ومن الولد اللي صوره بالجوال .. ووش المقطع الوسخ بعد ومن وين جااايبته .. ويقطع كلامه بكف لف لوجين وطيحها على الارض من قوته..
لوجين صارت تبكي وهي طايحه على الارض ورد سحبها من شعرها وقالها : انت بطيحين راسنا بالأرض ورفسها برجوله .. تكلمين وليد خويي ياواااطيه .. وش بيقول علي الحين يالووجين ..
لوجين تصرخ وتحاول تفك نفسها من بين يدينه وتقوله : فهد والله خلاص اخر مره ماتتكرر والله ماعاد اكلمه وانا ماادري انه خويك
فهد يصرخ عليها : خويي ولا غيره يامتربيه .. وين جوالك ؟!
لوجين وهي تبكي : علىالسرير ..
رماها على الارض وراح للسرير نفض اللحاف وشال المخده يدور الجوال ومو شايفه وهو قدامه صرخ : وينه؟!
لوجين : هذاك هو عند المخده
اخذه وحطه بجيب الثوب ووقف فوق راسها وهي منزله راسهاعلى الارض وتشهق وتبكي سحبها من شعرها مره ثانيه للين صار وجهها مقابل وجهه وقال: شوفي الغرفه هذي مافي طلعه منها ابد فاااهمه من البيت للمدرسه ومن المدرسه للبيت وتدخلين الغرفه زيك زي الكلاب سامعه وتركها .. وهو طالع سحب المفتاح وقفل الباب من برا ونزل لأمه بالصاله ..: يمه
هدى : هلا ياوليدي وش بلاكم تصارخون
فهد: لوجين لا تطلع من غرفتها سمعتي
هدى قامت وقفت : ليه ؟! وش صاير ؟!
فهد وهو طالع : بعيد تربيتها من جديد .. وطلع للأستراحه بيروح يكمل على وليد
هدى طلعت لبنتها وتفتح الباب مقفل وتكلمها من وراه : لولو يايمه
لوجين تبكي بصوت عالي وتقرب للباب وهي تزحف : ما ما ... افتحيلي
هدى : وش صار ؟! وش سويتي ؟!
لوجين: فهد ضربني .. وتصيح بصوتها كله
هدى انجنت برا : وش انت مسويه يابنتي .. ليه ضربك وقفل عليك الباب؟!
,,,,,,,,,,,,,,,,,,,,,,,,,,,,
الشباب في الاستراحه مجتمعين عبدالرحمن : وش اسوي يارجال والله الشغل اخذ وقتي تعرف الوالد تعبان الله يقومه بالسلامه والشغل تقاسمناه انا عزيز
خالد : الله يقومه لكم سالم
وليد : الا وين فهد ماعاد ينشاف اختفى مره وحده
عبدالرحمن : والله كلن لاهي .. حتى انا من زمان ماشفته
وليد : الله يعين ياابن الحلال
لفت انتباه الشباب دخول فهد عليهم بدون سلام ولا كلام متوجه جهة وليد : وليد تعال شوي
عبدالرحمن ضحك : ههههه الطيب عند ذكره
وليد مبتسم : أي والله ان عمرك طويل ماشالله
فهد : قووم ابيك شوي
الشباب مستغربين الاسلوب اللي يتكلم فيه مع فهد.. وقام وليد له وطلعوا برا الاستراحه
وليد : خير ان شالله .. لكنه ماحس غير بضربه بكس من ايد فهد على وجهه ..
وليد عصب : هييي وش فيك انت صاحي ولا مريض
فهد ضربه ركبه على بطنه : بس ولا كلمه ياحقير
جلسوا يتضاربون وحسوا الشباب بأصواتهم علت وطلعوا يفكونهم وعبدالرحمن يمسك فهد : استهدي بالله يابن الحلال ..
فهد : اقول فكني على اللي مايخاف ربه
عبدالرحمن : وش السالفه الله يهداك
فهد يحاول يفك نفسه من عبدالرحمن : هو عارف وش مسوي .. اتركني عليه ابن....
خالد ماسك وليد ويدخله للأستراحه وهو عارف طبعا وش الموضوع
اما عبدالرحمن اخذ فهد وركبه السياره وراح فيه عن الاستراحه : الله يهديك بس ياابو عبدالله .. محد يسوي سواتك
فهد : لو انك مكاني كان سويت مثلي
عبدالرحمن : وش اللي صار منه .. فهمني بس
فهد : موضوع خاص
عبدالرحمن : افااا خاااص .. علي يافهد خاص
فهد بطفش وعصبيه : دحيم واللي يرحم والديك اسكت
عبدالرحمن مقدر حالته : ابشر
,,,,,,,,,,,,,,,,,,,,,,,
وصلت هند والهنوف لعند نور وضي وهم داخلين مدت هند يدها وماسكه الايسكريم : تفضلي ياجولييت
نور تضحك : الله الله اسكريم شكررررررررررررا ياعمري
هند : لا تشكريني اشكري روميو
نور استغربت : وش فيك انت روميو وجولييت .. وش سالفتك
هند : اللحين خليني افصخ عباتي وانت دخلي الايسكريم بالفريزا يجمد شوي وتعالي اقولك
سوت نور اللي قالت عليه هند وجاتها مره ثانيه وهي جالسه بالصاله وتقلب بالتلفزيون : وين ضي وهنوفه
هند : طلعوا فوق
نور راحت ورمت نفسها جنب هند : ايه وش اخبارك يادووبا
هند : تمام الحمدلله .. انت اخبارك
نور: ماشي الحال .. ماقتيلي وش عندك اليوم على قيس وليلى يؤيؤ اقصد روميوا وجولييت اسطوره الحب
هند تناظر فيها وتضحك : تدرين ان ماجد يموووت عليك
نور : نعم .. وتحرك اصبعها السبابه من عند مخها وتقول: اقين .. عيدي مااستوعبت
هند بهدوء وبطئ تعيد كلامها : تدرين .. ان .. ماجد.. يموت .. عليك
نور ضحكت بصوت عالي : ضحكتيني الصراحه .. هذي نكتة الموسم
هند بجديه : نكته بعين العدو .. تراني اتكلم جد
نور: ايه ووش دراك انت؟!
هند : هو اللي يقول بلسانه انا ماقلت شي .. تدرين انه مارضي يجيب الاسكريم الا لما قلت انك انت اللي طالبته
نور مبتسمه : والله .. ياحظي .. في احد يحبني
هند : وبعد يقول كل شي لعيون نونو ولاحظي انه يدلعك كل شي لعيونها يهون
لو المحل بسطح القمر بروح له دامها هي اللي تبي .. ويوم اقول انا اختك يالنذل مارضيت وترضى لها.. يقول ايه اختي لا رحتي ولا جيتي بس نور حبيبتي
نور صار وجهها احمر: من صدقك تتكلمين انت
هند : أي والله حتى اسألي الهنوف
نور: طيب طيب غيري الموضوع
هند : ليه مستحيه
نور تطالع فيها وترفع حواجبها : لا طبعا مالقيت استحي غير منك
هند تضحك "طيب .. ليه تبيني اغير الموضوع
نور: لأنك عارفتني .. ماافكر بهالامور
هند : أي امور
نور: الحب والخرابيط الزايده هذي
هند: بس ماجد صادق .. وكذا مره لمح لي
نور: خلاص خلاص بالله .. سكري على الموضوع
هند : طيب ..
الا تعالي وش اخبار اهات
نور: يوووووه خبرك عتيق ... زماااااااااان عنه
هند : ليه ؟! ماتكلمينه
نور: لا زمان بطلنا حركات المراهقين
هند : ياشيخه قال حركات مراهقين ,, لا جد وش صاير
نور: ابد والله ماصار شي .. بس على قولته ننتهي على خير ونذكر بعضنا بالطيب احسن من شي ثاني
هند : شلون يعني مافهمت ؟!
نور : مره جلسنا نتكلم .. وانت عارفه طبيعه العلاقه اللي بيننا انها ماتتعدى حدود الصداقه ..
هند : ايه والله تبين الصراحه يانونو انا ماكنت اقتنع بشغله ان الولد اذا كلم بنت يكون صديقها بس بعدك اقتنعت فيها وبقوووه
نور: ايه صح بس ناادر ياهنو تصير كذا .. تدرين اني انا كنت احسب الف حساب للكلمه اللي اقولها عشان احافظ على الحدود اللي بيننا .. وهو بعد نفس الشي .. يعني ماتتخيلين كيف كانت علاقتنا شفافه .. بس مستحيل ان احد رح يفهم اللي بيننا او يصدق انها علاقه اخويه لا اكثر..وجلس يقولي ان حنا لازم نخفف الاتصالات اللي بيننا عشان مانتعود على بعض اكثر من كذا وبعدين يصير الشي اللي مانبيه وطبعا يقصد الحب .. وبس اتفقنا على كذا .. لكن اذا صارت احداث مهمه او مناسبات تستدعي هالشي ماننسى بعض
هند: حلو ...طيب وكيف انت عادي . . ولا مشتاقه له
نور: حبيبتي هند لما انت تحطين شي ببالك وتبين يكون مثل ماخططتي له .. مابيكون صعب عليك ابدا .. وانا لأني قلت آهات صديق فهو صديق بمعنى الكلمه ولا وصلنا لمرحله الحب اللي تخليني مااقدر اتحمل غيابه .. صحيح اني اشتاق له لكن مع الوقت تعودت على بعده وصار الوضع ايزي بالنسبه لي .. وبعدين لا تنسين انه يحب بنت خالته .. انا ماابي اكون بلحظه سبب في بعده عنها
هند : طيب دامه يحب بنت خالته ليه يكلمك
نور: هم كانوا مارين بمرحله سيئه واوضاعهم مو تمام .. مثل وضعي مع ياسر اهمال وعدم مبالاه وانشغال ماله حد .. بس ماوصلوا لدرجه الخيانه اللي طعني فيها اللي مايتسمى ياسر
هند : بس برضو تعتبر خيانه دامه يحبها
نور: انا اول ماعرفته قلتله هالكلام .. قلت له انت كذا بتكون خاين .. تدرين وش رد علي
هند : وش رد؟!
نور: قالي يانور اولا انا مابدر مني أي شي يزعلها ولا عمري غلطت عليها .. وثاني شي تعتبر خيانه لما انا اكلمك واكلمها وبنفس الوقت اقولها احبك وارجع اقولها لك مثل ماكان يعمل معك ياسر .. لما يقولك احبك ويروح يقول للوجين نفس الكلمه
هند : والله كلامه مقنع .. الصراحه هذا انسان واااااو ونادر اللي مثله
نور: ايه والله نااادر .. وابيك تعرفين شي .. ترا طول فتره معرفتنا كنت احاول اصلح العلاقات بينه وبين بنت خالته ..لأنها حب الطفوله
هند : وانت بعد انسانه وااو
نورتبتسم لها : شكرا
هند : والله مااجاملك يانونو انت الصراحه نادر وجودك مثل آهات يعني وين تلقين بنت تكلم واحد حوالي قريب السنه ولا حبته لأنها تبي تكون عند كلمتها انه صديق وغير كذا تصلح بينه وبين حبيبته
نور: هذي انا ياناس علي وااو عليكي يانفسي وتضحك
هند : بس بالله عاد مدحناك اللحين وش يفكنا منك
نور تضحك : تستاهلين محد قالك امدحيني وانت عارفه راسي بينفخ عليك
هند : طيب انتبهي لا ينفجر
نور: هههههههههههههههههههه
هند : قومي خلينا ندخل المسن
نور: على طاري المسن شفتي اورنج
هند : ايه .. وش فيه
نور: تراه خوي اهات .. برا المسن
هند : والله
نور: ايه والله ..آهات قالي... وراحت تجيب اللاب توب عشان يدخلون مسن ويغيرو الروتين اليومي اللي ملو منه
,,,,,,,,,,,,,,,,,,,,,,
رجع فهد البيت وطلع يشوف لوجين بغرفتها ولا لا .. ولا تكون امه فتحت لها وطلعتها بالمفتاح الثاني .. لكنه لقى امه رايحه جايه بالسيب وعارفه بكل الموضوع من لوجين.. ولوجين مالها صوت
فهد : السلام
هدى : تعال ياوليدي افتح لأختك الباب ..حرام عليك ..
فهد : لا مو حرام خلها تتربى شوي ماوصلها لهالمواصيل غير الدلع الزايد.. وراح
لغرفته .. وهدى تلحقه ..يمه حرام عليك ..تعال افتح خلني اشوفها لي ساعه انادي عليها ماترد
فهد : قلت لا يعني لأ .. وبعدين ماردت يعني ماتت مثلا .. مارح تموت وبتقوم مثل الجني مافيها شي
هدى : انا امك وكلمتك ماتمشيها علي
فهد: محشومه ..لكن هي قالت لك وش مسويه .؟!
هدى : ايه قالت لي
فهد : وعاجبك .. وبعدك حانه عليها .. لوجين لازم تتربى من جديد وعلى يدي ان شالله
هدى : انا ام ياوليدي وقلب الام عمره مايقسى على عياله حتى لو وش كان غلطه .. وبعدين اختك صغيره ومراهقه .. ولازم تمر بهالمرحله من عمرها
فهد : ايه تمر فيها .. لكن اللي يغلط يتعاقب عشان مايرد يعيد نفس الغلط ولو انت وانا وابوي سكتنا لها مارح تحسب لنا حساب بعد كذا .. خليها اللين بكره .. وانا بفتح لها... خليها تحس بكبر الغلطه اللي مسويتها..
هدى : حرام عليك اللين بكره كثير .. لو مافتحت لها انا بفتح لها
فهد : افتح تشوفينها ويرد الباب ينقفل
هدى مقتنعه بكلامه بس هي بتطمن عليها عشان ترتاح : طيب يلا تعال..وراح
يفتح الباب يشوفها .. دخل وشاف منظرها كسر خاطره بس تحمل عشان تتربى ..لقاها على طيحتها بنص الغرفه ووجهها على الارض ونايمه
راحت لها هدى وصحتها : يمه لولو .. لولو حبيبتي قومي
رفعت راسها بصعوبه وناظرت امها .. ثم ناظرت فهد ويوم شافته تحركت بسرعه لأمها : ماما بيضربني
هدى لمتها : لا موب ضاربك .. بس قومي تعشي يايمه ونامي زين
لوجين تبكي ومو قادره ترفع نظرها لفهد : ماابي شي
فهد لازال واقف عند الباب وقلبه يبي يتفطر عليها لكنه متمالك نفسه قدامهم : لا جى ابوي لاتقولون له شي سامعين .. لأنه لو عرف ان بنته المصون مسويه كل هالمصايب بنلاقيه مرقد جنب ابو عبدالعزيز ... وطلع من الغرفه..ورجع تكلم وبسرعه عشان برد اقفل الباب ..
,,,,,,,,,,,,,,,,,,,,,,,
رجعت هند والهنوف البيت بعد ماقالت لنور تجيها بكره.. وعبدالرحمن وهو راجع للبيت يتصل على خالد يبي يعرف وش السالفه اللي صايره بين وليد وفهد ..رد خالد: هلا والله دحيم
عبدالرحمن : هلابك .. وش علومك
خالد: بخير .. اخبارك انت .. واخبار فهد وش صار معاه
عبدالرحمن : والله مافهمت منه شي ماتكلم لأنه معصب وانا ماضغط عليه بالاسئله .. انت وش سويت مع وليد .. ووش صاير بينهم
خالد : والله مدري شقولك .. بس الله يهديه فهد
عبدالرحمن : وش السالفه ..
خالد : شفت البنت اللي يكلمها وليد ؟!
عبدالرحمن : ايه
خالد : تصير اخت فهد
عبدالرحمن وكأن احد ضربه كف :هااااااه ,, لا ياشيخ
خالد : والله هذا اللي صار .. وفهد بدال مايسوي هالسواه يروح يعقل اخته بالاول
عبدالرحمن انقهر من الكلام اللي سمعه : وانت من متى عارف بالموضوع اليوم ؟!
خالد : لا والله انا داري من اول .. ووليد اصلا ماكان عارف انها اخت فهد .. ويوم عرف حاول بكل الطرق انه يبعد عنها ويتركها بس ماقدر البنت تحبه وناشبه فيه
عبدالرحمن يقول بنفسه حبتها القراده : طيب ووليد ماحاول يفهم فهد هالشي
خالد : وهو اعطاه فرصه يتكلم ولا يفهمه شي .. والله اخر زمن .. ياخي يربيها بالاول بعدين يجي يسوي اللي سواه
عبدالرحمن : صدقت بس ماينلام والله ... لو انت مكانه بتسوي نفس الشي
خالد : يالله الله يستر علينا وعلى ولايانا
عبدالرحمن : اللهم امين .. خلاص اجل انا بحاول اتفاهم مع فهد وبكلم وليد يتفاهم معه بعد ..بس بعد مايهدون شوي
خالد : الله يقويك ..
عبدالرحمن : يالله اخليك الحين
خالد : اوكي تامرنا بشي
عبدالرحمن : سلامتك
خالد : مع السلامه
عبدالرحمن : مع السلامه ويقفل منه وفي قلبه قهر مو طبيعي ان لوجين اللي حبها طلعت كذا ... وصل البيت وراح لنور على طول بيسألها اذا هي كانت عارفه من اول ان لوجين تكلم شباب واذا هي لعابه ولا لأ...لأن عارف انهم يعرفون بعض زين واكيد امور مثل هذي مايخبونها عن بعض ...
,,,,,,,,,,,,,,,,,,,,,,,,,,,,,,,,
هدى كانت جالسه بالصاله دخل عبدالله : السلام عليكم
هدى : وعليكم السلام .. علامك تأخرت اليوم
عبدالله : والله الشغل كثير وبعدها عزمني ابو نواف على العشا وتعشينا عنده .. وجلسنا سوالف رجال وغيرنا جونا
هدى : زين استانستوا وغيرت جو العمل اللي اخذ كل وقتك
عبدالله وهو طالع الدرج : ايه والله الحمدلله .. واللحين تعبان والله بروح انام
قامت هدى وراه عشان تدبر الموضوع اذا سأل عن لوجين ولا مر عليها : يالله وانا بعد بطلع معك
وهم طالعين قال عبدالله : شلون لوجين استعدت للأمتحانات .. تذاكر ولا لأ
هدى : الا والله تذاكر واليوم كله جالسه على كتبها واكيد نامت اللحين .. هدى قالت كذا عشان مايقول ادخل اشوفها
عبداللله زين الله يوفقها .. وفهد متى رجع البيت
هدى : له اكثر من ساعه بالبيت
ودخلوا الغرفه وقفلوا الباب...
اما لوجين كانت بالغرفه ومقفل عليها الباب والنور مطفي ومافي غير نور الابجوره على المستوى الاول .. جالسه على السرير ورافعه ركبها لصدرها وضامتها بايدينها وتهز نفسها وتبكي بقهر على اللي صار .. ..
يتبع...
,,,,,,,,,,,,,,,,,,,,,,,,,,,,,
بعد ماوصل عبدالرحمن للبيت وبدل ملابسه كانت نور بالصاله جالسه اما ضي نامت نزل عبدالرحمن من فوق وجلس : نور
نور لفت عليه لأن عيونها كانت على التلفزيون : هلا
عبدالرحمن : بسألك عن شي ..
نوربعدم اهتمام : اسأل
عبدالرحمن : انت وهند ولوجين شلون علاقتكم مع بعض ؟!
نورواهتمت بسؤاله : ليه ؟!
عبدالرحمن : بس
نور: من ناحيه ايش ؟!
عبدالرحمن : من كل النواحي
نور: علاقتنا من احلى مايكون
عبدالرحمن : يعني ماتخبون شي على بعض صح ؟!
نور استغربت من اسئلته : ايه
عبدالرحمن سكت شوي ,,,,
نور: ليه تسأل ؟!
عبدالرحمن : طيب بسألك سؤال وتجاوبيني بصراحه
نور : ان شالله
عبدالرحمن : ماابي ان شالله ابيك توعديني وتحلفين انك تقولين الصراحه
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك