رواية كل يوم لك حال جديد يوم قريب ويوم بعيد -46

رواية كل يوم لك حال جديد يوم قريب ويوم بعيد -46

دخلت عبير بدون ماتدق الباب ويوم شافوها سكتوا ثنتينهم...

عبير اخاف بس كنتوا تسولفون فيني ويوم شفتوني سكتوا؟

نوف باحتقار لاابدا مافيك شي مميز يخلينا نتكلم فيك ولا ياحصة؟

حصة بتاْييد أي طبعا بس تفاجاْنا يعني من طريقة دخلتك كذا علينا ..

نوف كملت وفكرناها الشغالة وكنا بنغسل شراعها لانها مادقت الباب قبل لاتدخل..

حصة رغم انها ماتسويها ابدا وماشية على الاصول....

مشت عبير وماكانها تسمع وهي تناظر بالغرفة وجلست...

عبير انتي جالسة بها الجناح مع مشاعل؟

نوف أي...

عبير وبعد ماانتي تتزوجين وهي تتزوج وش بتسوون فيه بتقفلونه ولابيدخله عمي على البيت ولا شنو؟

نوف حطت رجل فوق الثانية وقالت مدري لسه ماقررت بس قلت لتركي يخلي لي اياه مقفل وبعدين لو فكرت ادخله على قسمي بس حاليا بتركه مثل ماهو؟

حصة وهي تضحك لنوف ماقلتيلي انك اعتذرتي من عبير امس؟

نوف ضحكت وقالت انا مااعتذر لااحد حبيبتي انا وراي تركي واللي بيدوس بيتي لازم يحط في باله ها الشي؟

ظلوا يناظرون في بعض هي وعبير بدون مايقولون أي شي وكل وحدة في عيونها كلام تبي تقوله بس مانطقته بذيك اللحظات؟

فواز يالله كملي تسوقك عادي لاتهتمين لوجودي معك اعتبريني البودي جارد..

مشاعل خخخ ترى اصدق حالي..

فواز أي صدقي حالك وليه ماتصدقين حالك يااميرة مشاعل..

مشاعل واو,,,,ذكرتني بسالفة هبلة سوينها من زمان انا ونوفوا..

فواز شنو

مشاعل لك خلق تسمع..

فواز وهو يمشي جنبها طبعا لي خلق...

مشاعل وهي تضحك وتسولف له كنا رايحين دبي واحنا بثاني متوسط...قبل سبع سنين..

عاد تونا على الدنيا واللي يصير فيها وكنا مدري بصراحة باي مجمع ودخلنا لان نبي ناخذ لاامي هدية انا وهي وشكله الموظف توه مستلم الوظيفة وانا اقولها وش رايك في هاذي يااميرة نوف وهي ترد علي لا يااميرة مشاعل ذيك احلى وعاد هو الاهبل عيونه علينا بالطول وبالعرض وقال لنا وشكله مصدوم حده انتوا اميرات!!عاد احنا بغيناها من الله قلنا له ليش شكلنا مايوحي ان احنا اميرات..انا الاميرة مشاعل وهاذي الاميرة نوف وهو انهبل ساعتها...وعلشان نثبت نفسنا اكثر قمنا اخذنا من عنده شنطة وياليتها حلوة بس علشان نطلع له دفتر الشيكات اللي سارقينه من ابوي مع بطاقاته وقلنا له تبي الحساب شيك ولاكيف؟

فواز وهو يضحك مو عاقلينا ابدا!!

مشاعل يو لو اقولك سوالفنا ماتنهي....كل يوم كانت لنا سالفة وقصة اساسا لو مافي سالفة احنا نخلق لبعض سالفة ...يعني اذا دق فينا الملل مرة ومارضوا يطلعونا نقوم نتهاوش انا وهي في الصالة ونجر شعور بعض ونشمخ بعض بالاظافر علشان يجون يفككونا وتقعد نوف تبكي انها تبي تروح بيتهم وانا ابكي ابي لعبة لين يطلعونا...

فواز بيصيرون عيالي مثلك؟

مشاعل لاخلهم عاقلين مثلك احسن ترى ان صاروا مثلي ماحد بيرحمهم الكل متحلف فيهم اخواني وخالدوا والكل..

فواز استحي الرجال بيصير ابو بعد كم يوم وانتي خالدوا اذا سمعك من حقه يكوفنك مكانك...

مشاعل لا انا وهو والبنات علاقة خاصة لو يصير جد وشايب ماشلنا همه...

فواز مسك يدها وهمس لها بتكونين سعيدة معي؟

مشاعل اكيد...

فواز وعد مني لك يامشاعل اني اسعدك بقد مافيني....

مشاعل عسى ربي يسلمك لي..

فواز ماتدرين شقد انتظر تجي ليلة العرس ياروحي...احس اني بنفجر من كثر ما انتظرها

مشاعل قربت ماباقي شي يافواز ونكون مع بعض علطول....

المغرب ...

ابو سعد دقي على فارس واخذي منه اذن لطلعتك انا مالي شغل فيك؟

نورة باعتراض بس يبى انا ساكنة معك شلون مالك شغل فيني!!

ابو سعد الشور عنده اللحين ولاسافر ورخص لي ارخص لك بالطلعة والدخلة بس مدامه هنا انتي كلميه ..

نورة طب يالغالي دق له انت...

ابو سعد وانتي من متى تستحين خبري فيك لسانك دايم يسبقك بكل شي؟

نورة اوووف هاذي فكرتك عني!!معناته تبي يوم طلعتي من ها البيت بسرعة....

ضحك ابوها وماقال شي..

نورة برجاء* ها يبى..

ابو سعد بحزم قلت لك طلعة من ها البيت من غير شور فارس ماحتطلعين يانورة ومالك معي كلام ثاني يابنيتي؟

اوووف ها الكلمة بس اللي كانت تدور براس نورة لانها عارفة ابوها يرخي معها بكل شي بس اذا قال لا ومالك كلام ثاني معناته لاتتعبين نفسك...

بعد ماقام ابوها رفعت جوالها وكتبت له رسالة ..

ماكان ودها ترسل له او حتى ترد عليه بس انها اخر جمعة لهم قبل عرس نوف وروحتها بيت الله وعرس مشاعل...

كتبت له مسج ودزته(اذا ماعندك مانع بطلع انا والبنات بالكورنيش الليلة ابوي قال اخذ شورك قبل لااطلع وان شاءالله ماعندك مانع)

بعد ثواني جاها منه مسج(انا عند بيتكم طلعي ابيك...

تنهدت بقوة ماكانت تبي تشوفه..لانه اذا كلمها بتكلمه وها الشي هي تبي ماتسويه خله يحترق شوي بناره وبعدها يصير خير تلين وتكلمه اما اللحين كثير لايق عليه دور العاشق الذليل..

دخلت جوالها بشنطتها وعدلت نقابها وطلعت له وقالت لاابوها انها بتكون مع فارس برى يبي يسولف معها..

فتحت الباب الخارجي وكان واقف قباله وهو متسند على سيارته..

سوت روحها مو مهتمة وماتناظر فيه وقالت تفضل ادخل ابوي هنا..

فارس انا جاي لك انتي مو لاابوك؟

نورة مابينا شي علشان نتكلم؟

فارس طيب وليش تشاوريني مدام مابينا شي؟

نورة لان ابوي قال اخذي اول شور فارس وبعدها طلعي؟

فارس معناته لنا في بعض...

نورة .

فارس ركبي بوصلك؟

نورة بصدمة اركب معك؟

فارس نورة شفيك...انا زوجك؟

نورة منت زوجي...

فارس نورة...

نورة انا سئلتك بس ترخص لي الطلعة وبس؟

فارس اها يعني كنتي طالبة الرخصة مني...تصدقين على بالي انك بس تعطيني خبر ..يعني اللي فهمته انك غصب توافق وماعندك مانع...

نورة .........

فارس ادله الكورنيش والله ادله؟

نورة لاشكرا بخليهم يمروني؟

فارس طيب جيبي سعد معنا اذا ماتبين تجلسين معي بروحك؟

نورة مايشكل معي وجود سعد بالمرة؟

فارس طب انتي من شنو خايفة بالضبط؟

نورة بثقة انا مو خايفة من شي..انا بس ماابي اتكلم مع شخص يكرهني؟وعلى فكرة انا بعد اكرهك يعني شعورنا متبادل؟

فارس بعذاب أي..كذا تطلعين نورة اللي اعرفها....هذا الجواب المناسب...طب اتفقنا تكرهيني واكرهك معناته مايخالف اوصلك الكورنيش وبالطريق نقول لبعض شكثر احنا نكره بعض؟

فتح باب السيارة اللي كان متسند عليه ومسك يدها واعترضت بس تحت قساوة يده عليها رضخت ودخلت,,,,,

على الكورنيش...

نواف باعتراض بعيدين هنا..

تركي أي خلهم ياخذون راحتهم...

نواف ياسلااام...

تركي أي مو مرتك ونورة لازم يفتحون براقعهم ومشاعل بعد...يعني خلك شوي من حكرتك...

نواف أي امري لله...

تركي يعني انا ابي افهم جالسين وش بيسوون بالله..شوي وبياخذون لهم شي من هنا ولامن هنا وبيردون مكانهم..

نواف ماقلنا شي....

تركي يعني اترك عنك حركات انك تراقبها وماتشيل عيونك عنها..

نواف .........مرتي؟

تركي وتحبها وتغار عليها بجنون ندري بس بعد اعطيها شوية حرية كني سمعت البنات يتكلمون انك ماكنت موافق تجي؟

نواف أي ماكنت موافق اجي...بس بعد مادقيت انت لي وقلت انك مابتمشي بتظل وافقت وامري لله...

تركي صار بينكم شي البارحة؟

نواف أي..

تركي وليش اذا طلع النهار تنسى انها كانت معك بالليل..

نواف كنت بفتح معها صفحة جديدة البارحة وقررت اليوم اني افتحها خلاص بس جت سالفة الطلعة وظلت هي بعدين طول الوقت ساكتة حتى يوم طلعنا نختار غرفة احمد واغراضه يادوب تسولف معه واذا جت عندي اجاباتها تكون بالملي..

تركي تستاهل عساك من ها الحال وازود ان شاءالله....

نواف تنهد ....

عند البنات..

نوف بعدك زعلانة مني!!

ياسمين أي زعلانة انتي الثانية شوفيها توها رادة من فواز من الصبح وهي معاه؟

مشاعل بدفاع رحت معه علشان يجبر بخاطري؟

نورة بشماتة وان شاءالله جبر عدل بخاطرك المكسور؟

نوف انتي سكتي بروحك قصتك قصة وش اللي خلى فارس هو اللي يجيبك؟

نورة وبيمرني بعدين بعد احد له عندي شي ياناس زوجي وموصلني!!

ياسمين بسرعة تكلمي بسرعة وشلون جابك وشنو قلتوا؟

مشاعل وليه ماتقولين انتي عن نواف؟

تنهدت ياسمين وش اقول عن نواف؟؟؟انه اسواء شخص صادفته بحياتي؟

نوف بتاْنيب ياسمين..

ياسمين مسحت دمعة نزلت منها احبه..وهاذي بروحها مشكلة...تدورن شنو معنى تحبين حجر؟مايحس؟اللي يبيه ياخذه واللي مايبيه مستحيل تسويه حتى لو كان الشي يريحك؟لبسك بحدود ولازم هو يشرف عليه؟طلعتك محاسبة عليها..حتى التلفون مااتكلم الا وهو جنبي...ماعليه مافيها شي ماعمري حسيت من رجعنا بمشاعر صادقة معي الا باللحظات الخاصة وبس يجي اليوم الثاني احسه تحول لاانسان ثاني....ماادري وش مشكلته...احمد يقول ان امه قالت بترد وها الشي يضايقني..ابي افهم انا وش بيصير فيني..

مشاعل أي بس نواف ماقال انه بيردها والكل يدري انه مابيردها يعني كلام احمد مالازم يغير عليك تفكيرك وحياتك؟

ياسمين ليش طلقها؟هو شاك فيها..هذا الشي اللي انا متصورته..حركاته معي محسستني بها الشي وانه قاعد يراقبني علشان لااكون مثلها...مدري بس انهم افرضوني عليه..

نورة باعتراض محد افرضك عليه...جدي اختاركك ونواف وافق بدون أي تردد وين الفرضية بالله..اساسا هو كان يبي القرب من أي وحدة فينا وصرتي انتي من نصيبه بعد وين الفرضية..لاتحطين ها الشي في بالك ترى بيظل معذبك ومابيريحك ابدا!!

تنهدت ياسمين وسكتت..

نوف طب حاولي انتي تغيرينه..

ياسمين حاولت وماتغير الا بسفرتنا ومن رجعنا رجعت حياته ..حتى ولده مابينه وبينه أي سالفة...ولؤلؤة اللي تمنيت انها تكون معي بالبيت تونسني شوي كاهي خطبها ولد خالها وهي موافقة ونواف وموافق وبعد كم يوم بيملكون وبتروح معه...

ظلوا البنات ساكتتتين.....

مشاعل نورة دورك سولفي؟

نورة مافي شي جديد عندي..

نوف لا بالله وكيف جابك فارس اجل؟

نورة طلبت من ابوي يوافق اجي معكم وقال اخذي الشور من فارس ويوم كلمت فارس يعني دزيت له رسالة جاني الجواب سريع جدا انا واقف عند الباب وطلعت له ومارضى اني اجي معكم واصر انه يوصلني وظل طول الطريق يحلف انه يحبني ومن شافني تعلق فيني وانه من زمان ينتظر اني اشرف حياته وماالى ها الحكي وبعدين قال لي نورة انتي تبين فعلا ننفصل؟

ناظروا فيها البنات كلهم..

نوف وش قلتيله؟

مشاعل اكيد قلتيله أي..

نورة ماقلت له شي..لانه قال لي اذا مريت بعدين اخذك باخذ جوابك النهائي وطول منتي جالسة مع صاحباتك فكري فيها وشاوريهم....

ياسمين واحنا نقول لك لاتصيرين مجنونة...

نورة ومن قال اني بنفصل عنه...بس خله يحترق شوي..

نوف عرسكم تحدد بعد شهر وانتي تقولين خله يحترق؟؟والله محد بيحترق غيرك؟

نورة انتي صدق وش سويتي مع عبير اليوم؟

نوف ها البنت عجيبة صدق سالفتها سالفة...مدري من وين طالعة؟

عبير شفت اهلك وشلون مباعديني عنهم ياعبدالله وانا اللي علشانك دخلت بيتكم اليوم وقلت لامايصير هذا الغالي وهذولا اهله واكيد حوستهم حوسة بالعرس؟

عبدالله تسلمين..اي خلك كذا عاقلة ولايهمك أي شي....

عبير ياليت يبين بعيونك عاد..

عبدالله بهمس حبيبتي ومن قال انه مو مبين بعيوني؟

عبير بدلع متاْكد؟

عبدالله طبعا...شنو ماصار وشنو مااختلفنا حبنا بعيد عن كل شي...

عبير الليلة بنسهر مع بعض وبكرة تفضي نفسك انا ماشريت فستان لعرس اخوك بعد مايصير يكونون هم ارفع مني وانا مو جاهزة مثلهم؟

عبدالله ولايهمك اللي تبينه بكرة بيكون عندك وش تبين بعد يالغالية؟

عبير ابي حبك....

عبدالله تقرب منها وحبي موجود انتي بس تعالي وشوفي بعيونك وش يكون حبي....

بيوم العرس...

كان الكل بحالة استنفار وقايم قاعد ..

ومشاعل تجي لنوف وترجع تمسح دموعها...

هاذي اول مرة بيتفارقون فيها وبتروح نوف عنها لبيت الله بدونها والاهم ماراح تحضر يومها وتشاركها فرحتها...

نوف بعد كانت حاسة بشي مو طبيعي ضيق على سعادة على ارتباك على تعب على قلق مجموعة مشاعر ماهي قادرة تحددها شنو...

دق جوالها وقطع عليها افكارها والكوافيرة تسوي شعرها..

نورة لفت لها وقالت قفلي جوالك ماراح تحتاجينه اللحين خليه لبكرة اليوم كلنا معك مابنحتاج نتصل فيك..

ابتسمت لها ويوم شافت اسم المتصل نزلت منها دمعة وقالت لنورة ببحة هذا سعود..

ناظرتها نورة بدون ماتقول أي شي....

وردت هي بلهفة هلا اخوي..

سعود هلا نوف....

نوف شلونك...

سعود مبروك يااختي....

نوف وهي تمسح دموعها الله يبارك فيك....

سعود يالله عاد بيضي وجهنا وصيري احلى عروس..

نوف سعود راح تحضر العرس..

سعود افا...اختي العروس ومااحضر شلون هاذي عاد؟انا بالفندق مع عمي اللحين...

نوف جد؟

سعود أي ادري ماراح تصدقين بس بدخل لك ابارك لك وبتصدقين وترى دحوم وحشواخ هم اللي قايمين بالعرس بتشوفينهم بعدين...يالله نوف انا مابطول عليك بشوفك بعدين بس بغيت اسئلك تبين شي؟

نوف وهي تمسح دموعها رضاك عني...تكفى لاتزعل مني ياخوي..

سعود ومن قال اني زعلان منك...انا راضي لك والف الف مبروك يااختي......يالله اشوفك بخير يالغالية....

سكر سعود السماعة ولف لتركي وقال بشماتة خلاص انتهى الدور ولالسه؟

تركي بتحذير لا لسه...لانك بتدخل لها الفندق الليلة وتبارك لها انت وعيالك وبعدها بيكون انتهى دورك...

سعود

تركي بتهديد قلت لك لو سعادة نوف بالقمر بشتريها لها ومابتغلى عليها يعني اذا كانت سعادتها بانها تحس باهتمامك فماراح ابخل عليها بانك تحسسها بها الاهتمام لو اشتريه بفلوس الدنيا فاهمني!!!

نورة اللحين ليش البكي..

نوف وهي تمسح دموعها طول الاسبوعين اللي فاتوا وانا كل يوم اكلمه وماكان يرد علي....

ياسمين طيب كاهو اتصل فيك وبارك لك وكاهو بالفندق مع عمك وش تبين بعد غلط وحس انه غلطان وكاهو برر غلطته....وسوى الشي الصح؟

نوف مسحت دموعها وهدت شوي....

نورة خلاص....

نوف بهدوء تركي..

ياسمين شفيه بعد؟

نوف بهدوء تركي اللي خلاه يتصل انا عارفة ها الشي......

ناظروا في بعض وقالوا للكوافيرة تجي تكمل شغلها لان ماكان عندهم أي شي يقولونه...

ورجعت كل وحدة مكانها تخلص شغلها...

****عبير وهي تمشي الليل ضربت بمشاعل بالعمد..

مشاعل وهي ترفع ذيل ثوبها معليش سوري..

عبير باحتقار توقعت ثوبك يكون افخم من كذا مرة عادي؟

مشاعل أي انا كنت ابيه يكون عادي مو بذيك الفخامة..

عبير وحتى مكياجك جدا هادى..

مشاعل انا ابيه كذا..

عبير حشى منتي اخت المعرس...

مشاعل عارفة بس بعد عرسي بعد خمسة ايام وابي اكون بارزة بليلتي ..

عبير نوف صايرة مرة شاحبة ؟

مشاعل وهي تلف للكوشة وش حليلها كنها قمر..

عبير لالالالا احسها فيها شي لايكون بس حامل؟

مشاعل حامل عاد مرة وحدة؟

حصة من وراهم منهي الحامل؟

مشاعل تغمز لحصة نوف ...عبير تقول انها حامل..

حصة الله يسمع منها تخلص حجها وترجع بالسلامة وتجيب لنا عيال يرفعون الراس؟

عبير وشفيها عاد نوف علشان عيالها يرفعون الراس؟

حصة بنتنا ومنا وفينا ومحد مربيها غيرنا وطبايعنا وطبايعها واحد....

مرت وحدة وسلموا عليها مشاعل وحصة ووقفت تسولف معهم شوي وبعدها مشت...

عبير مني هاذي؟

حصة هاذي بنت عمة ابوي..

عبير لايكون ام ثامر الرويللي..

مشاعل ليش تعرفينها؟

عبير اذكري الله واحد مايعرفهم ذولا..طب ليه ماعرفتوني عليها وقلتوا لها اني خطيبة عبدالله...

حصة اقول مشاعل وين البنات شلتك اللي بالجامعة ماوصلوا...

مشاعل كاهم جايين اللحين...

عبير اصلا عرسكم مرة بارد انا اذا العرس بدون موسيقى مااحبه؟

مشاعل هو كان بموسيقى بس نوف باخر اللحظات يوم عرفت انها بتروح الحج كنسلت الموسيقى ...

حصة خالاتي اركبوا الكوشة انا بركب معهم..

مشاعل انا بشوف شلة الجامعة وين بيقعدون وبعدها بجيكم...

مشت حصة..

عبير بضيق حاسة ان مالي أي ذكر بالعرس..

مشاعل وش تبين تسوين يعني..

عبير مدري أي شي يبرزني...

ناظرتها مشاعل مستغربة وقالت على ماتخلصين من تفكيرك بيكون تركي دخل لان ماباقي غير نص ساعة ويجي قايل يبي الزفة بدري علشان يرتاحون,,,

في فندق الهوليدان الخبر ...

دخل تركي وسكر وراه الباب ولف لنوف اللي كانت تشيل عبايتها وشال مشلحه ورماه فوق الكرسي ووقف قبالها..

تركي بهمس اساعدك..

ابتسمت له وقالت بهمس كلها عباية وش تساعدني فيها..

تركي انا حتى الريشة ماابيك تشيليها بروحك...

نوف تركي.....

تركي لبيه ياحلالي...

نوف شكرا....على كل شي..على حبك ووقفاتك معي..على العرس ...على الحج...على اتصال سعود فيني...صدق بامر منك مو منه بس رفع شوي من معنوياتي ..انا ابي ارد لو جزء من حبك وجميلك معي ياولد عمي..

مسك يدينها وقربها منها وجلسوا على حافة السرير وقال بهمس مدامك معي وصرتي لي اعتبري انك اكبر جميل وهدية جيتيني بالدنيا...انا كل اللي ابيه واطلبه انك تحبيني كثير ها الشي يانوف؟

نوف بدفاع بس انا احبك ياتركي؟

تركي حبيني اكثر وين المشكلة؟خلينا نغرق مع بعض اكثر واكثر ...مدام ان احنا مع بعض ولبعض مايهمنا أي شي يانوف...

تنهدت بارتياح وقالت عساني ماانحرم منك يالغالي....

تركي يالله قومي بدلي علشان ترتاحين ورانا الفجر مطار جايك التعب....

نوف ببدل بس ماراح يجيني نوم انا عارفة...

تركي ماعليه تريحين شوي...انا متعمد اخلي الزفة بدري علشانك وعلشان راحتك...

نوف انت بعد قوم ليش ان شاءالله بحج بروحي انا وانت مو حاج؟يالله قوم ارتاح..من اليوم راحتنا مع بعض وتعبنا مع بعض...

مسك يدها وباسها ووقف معها علشان يدخلون يبدلون ويرتاحون,,,

عند قاعة الفندق توها ياسمين طلعت علشان بتمشي ويوم تقربت من سيارة نواف انتبهت ان في وحدة واقفة جنبه وهاذي مو لؤلؤة لان لؤلؤة كاهي جالسة مع البنات ومع وضحى..

تقربت اكثر واكثر منها..وكان نواف عاطيها ضهرها بس البنت اللي معه تكون قبالها ويوم رفعت راسها انتبهت انها ريم..وريم شافتها..بس سوت روحها ماانتبهت..

ريم بصوت عالي حبيبي خلاص..

وقف قلب ياسمين وطاحت شنطتها..

ريم كملت بسرعة قبل لايتكلم نواف زواجك ماغير شي صدق ان قلبي بيحترق لمى تكون في وحدة موجودة بالنص بينا بس انت لي ..انت ملكي...انا مااقدر اعيش بدونك يانواف..وبعدين انت ليش ساكت علشانها وصلت حضرتها بالناقص اول وتالي بتعرف؟

نواف بحدة بعد ماشاف ياسمين واقفة مكانها كانها تمثال ريم خلاص امشي من هنا ولاوالله مابتشوفين خير..

ريم فكر بالموضوع زين..

قبل لاتمشي ريم مشت ياسمين بترجع الفندق من جديد بس يد نواف مسكتها بسرعة وقال بشدة وين رايحة؟

ناظرته باحتقار وقالت روح لها...

نواف بارتباك ياسمين انتي فاهمة غلط؟

ياسمين والدموع بعيونها قالت بلامبالاة ومايهمني بعد!!

وقف وماعرف شيقول لها حس انه مرتبك وانها مو مصدقة أي شي بيقوله..

ياسمين بنام عند امي الليلة؟

نواف برجاء لا....خلينا نتكلم...

ريم وهي مابعد مشت خلها تروح عند امها ...

توها بتتكلم الا نواف راح لها وعطاها كف سكتها حتى ياسمين وقفت مكانها من الموقف..

ريم ترفع يدك عليّ!!

نواف بتحذير قسم بالله اذا اشوف وجهك مرة ثانية لاتلومين الا حالك فاهمتني..روحي ضبي نفسك عن الشوارع يامتربية؟

لف لياسمين علشان يكلمها لقاها دخلت الفندق وتنهد ووقف مكانه ماعرف شيسوي...

رفع جواله ودق لها....بس ماردت...

دق لو ضحى....وسئلها عن ياسمين وقالت له انها طلعت ...

ظل واقف قبال الفندق علشان اذا طلعت يشوفها لان سيارة خالد كانت موجودة وعبدالله وخالد واقفين ووقف معهم....وانتظر لين طلعوا كلهم وطلعت خالته ام مشعل وطلعت معها ياسمين ومن شافها راح سلم على امها وبارك لها وقال لها يالله ياسمين مشينا..

كانت بتقوله روح بس ماعرفت..حطها بموقف محرج كاءنه ينتظرها من زمان وهي تجي وتقوله بنام عند اهلي!!مشت معه وهي تمسح باقي دموعها...

دخلوا السيارة ولف لها نواف وقالت بحدة لو سمحت خلنا نروح البيت انا مافيني اتكلم ولابشي..

تنهد وسكت لين وصلوا...

دخلت الغرفة ولحقها بسرعة قبل لاتقفل الباب..

شالت عبايتها ووقفت قبال الدولاب تناظر بللي فيه وهي اصلا عيونها مغرقة بالدموع ومو شايفة شي...

وهو ظل يناظرها..

حاس بالارتباك منها..ليش كذا..هي ماجت الا بالموقف اللي ماينصفه يوم كانت ريم تتكلم ولا من بداية كلامهم كان غاسل شراعها يوم شافها ماجت....

ويوم قرر انه الليلة يصارحها بحبه وبمشاعره ناحيتها قلبت وصار بينهم ها الشي..

حتى ها الثوب من اشترته وهو كل ليلة ينتظر تجي ليلة عرس تركي علشان تلبسه ويشوف شلون صاير شكلها فيه..

رفع عيونه ولقاها مشت....

بس الحمام مافيه احد وكاهو انواره مطفية..

مشى للحمام مالقى فيه احد راح لغرفة التبديل ومالقاها هناك..ثواني بس وطلعت من الغرفة يوم يسرح فيها..

طلع لغرفة احمد ومالقاها هناك..

وهو راجع سمع صوت بكيها بغرفته القديمة اللي اجتمعوا فيها اول مرة...

تقرب اكثر ووضح له صوتها...كانت تبكي بقهر ..دق الباب وماردت عليه...

حاول يفتحه ولقاها مقفل...

نواف بارتباك ياسمين افتحي الباب؟

ماجاه منها أي شي وبكيها ماتغير وماكانها تسمعه...

نواف لازم نتكلم مو معقولة تصورين شي بذاكرتك عني مو صحيح؟

ياسمين ..........

ظل واقف ينتظرها تلين لو تفتح الباب ومافتحت..

فارس لاتقولين نمتي؟

نورة لا بعدني؟

فارس بس بغيت اتطمن انك صرتي حلوة الليلة؟

نورة بغرور لا ماصر ت تطمن؟

فارس طيب فيني اشوفك علشان احكم؟

نورة مو بصاحي انت!!عارف كم الساعة اللحين؟

فارس عارف واللي عارفه بعد انك توك راجعة من العرس يعني مابعد بدلتي ونمتي ..يعني مالك امل تكذبين عليّ!

نورة طيب يمكن اني مبدلة من الفندق؟

فارس لا تحاولين شفت نهاية فستانك وكان بنفسجي؟

نورة انت شسالفتك بس واقف عند الباب تشوفني متى ارجع ومتى ادخل وشنو لون ثيابي بعد!!

فارس شسوي فيك مو راضية تلينين عليّ

نورة على فكرة فارس...فينا مانكلم بعض لين ليلة العرس؟

فارس ليه؟

نورة ماهو طلب غريب...

فارس أي ماقلنا شي....بس ليه يعني؟

نورة كذا لين ليلة العرس ...مالازم نسمع صوت بعض فيها..

تنهد فارس وقال بتعب انتي طبعا مايهمك ادري فيك بس انا يهمني..مقدر مااسمع صوتك فيها؟

نورة اعتبر انك مسافر واني مغيرة رقمي..مدري اعتبر أي شي...وبعدين ماباقي شي يافارس ...

فارس طيب ممكن اسئلك سؤال؟

نورة ماراح اجاوب عليك الا ليلة العرس ..

فارس تنهد بتعب وليه كذا تتعبيني يابنت الناس؟

نورة تصبح على خير...

مضت الاربعة ايام ببرود شديد وتهرب من ياسمين ناحية نواف وكانوا اصلا طول الوقت بحفل الاستقبال اللي سوه لتركي في بيت خالتها وحتى اذا قعدت معه سمعت اللي عنده وظلت ببرودها وبدون ماترد عليه وها الشي خلاه يتضايق اكثر واكثر,,,,

لاسيما ان عرس مشاعل وصل وماكان في وقت يسولف معها فيه على راحتهم..

كان عرس مشاعل هو العرس الاسطوري فعلا...

كان مبالغ فيه بكل معنى الكلمة حتى عرس تركي ماكان يتقارن فيه وهذا اللي خلى عبير تغتاظ اكثر واكثر لان مشاعل ماكانت بمستوى جمال عبير وكانت جنبها عادية جدا ...

مرت ليلتهم الاسطورية اللي خلت الكل يحكي فيها وانزفوا العرييسن لفيلتهم بالخبر ورجع الكل بيته وجه الفجر,,,

وظلوا بيت ابو تركي جالسين بالصالة...

ام تركي وهي تمسح دموعها والله انها كانت مالية علي البيت؟

ابو تركي كانت طول وقتها تجلس هنا قبال التلفزيون..

عبدالله الله يسعدها ماقصرت فينا وبالمقالب اللي تسويها...

ابو تركي ماتخيلت اشوفها بثوب العرس اصلا...والله كبرت مشاعل ياام تركي..

مرام وهي تبكي بكرة بتسافر وماراح نشوفها يبى مايصير كان خليتها تنام معنا الليلة؟

ابو تركي انتي بعد يبى بتكبرين وبتتزوجين وتروحين عند زوجك وبتتركينه....

ام تركي هاذي سنة الحياة...يالله بعد اسبوع يرجعون اهل الحج ويسلونا شوي....

عبدالله لا يمه مشاعل غير محد ياخذ مكانها ويسلي عنها....

ابو تركي أي والله كلكم لكم معزتكم بس ها البنية غير عنكم...مدري وش فيها ربها محببها بقلبنا مانقدر على فراقها....

دق جوال ابو تركي وناظروا فيه..

ام تركي خير ان شااءالله منو داق لنا والاذان ياذن؟

رد ابو تركي بسرعة... نعم منو معي؟

مشاعل وهي تبكي يبى انا مشاعل...يبى الحق احنا بالمستشفى..

ابو تركي وقف وقال بصدمة مستشفى!!شفيكم يامشاعل يبى..

مشاعل وهي تصارخ يبى فواز...فواز...

اشوفكم يوم السبت باذن الله

****

***

**

*

مرحبا فيكم من جديد...

وانا اسفة للظرف اللي صار لي وخلاني انقطع عنكم...ورحم الله موتانا وموتى المؤمنين جميعا والف شكر لسؤالكم يالغلا...

الخامس والثمانين

ام تركي بخوف سترك يارب تكلم يابو تركي شصاير؟

ابو تركي لاحول ولاقوة الا بالله...

عبدالله بفزع يبى مشاعل شفيها؟

ابو تركي شال النظارة وقام يمسح دموعه..

ام تركي بخوف اكبر بو تركي...تكلم والله طقت كل عروقي ومو قاوية اوقف على رجلي من خوفي...تكلم مشاعل وش اللي جاري عليها يارجال؟

ابو تركي صار لهم حادث قبل يوصلون فلتهم...

ام تركي بفزع يمه بنتي...وش اللي صار فيها اللحين؟

ابو تركي تقول هي ماصار فيها شي بس فواز شكله تعور وكاهم بالمستشفى وهي حايسة بعمرها هناك...

عبدالله أي مستشفى يبى...

ابو تركي بالدمام..

ام تركي قوم ياعبدالله خذنا لها قوم وش تنطر...ويلي عليك يابنيتي..وش ها الفرحة اللي ماتمت لك....عين وماصلت على النبي....

ابو تركي انا مقدر اشوفها ياام تركي مقدر...قبل شوي كنت معها بالفندق ...قبل شوي بس ياام تركي كيف اقابلها اللحين بالمستشفى,,

انا توي قبل ساعات بس كنت معها على الكوشة ارقص معها واسلم عليها وابارك لها...اللحين وش بشوف ياترى؟

عبدالله يبى اذكر الله ...ان شاءالله مافيه الا الخير...

ام تركي قامت تبكي بصوت عالي..

عبدالله يمه..مايصير انتي الثانية بعد...

ام تركي وش ها الحظ يامشاعل يايمه وش ها الحظ....

عبدالله اللحين هي هناك ومحتاجة وجودكم جنبها ووقفتكم معها مو تقعدون تلومون الحظ وتنوحون عليها...قوموا شوفوها ووقفوا معها..حسسوها انكم جنبها وبتظلون دايم...هي لو ماكانت تبيكم ماكانت دقت عليكم,,,,

يتبع ,,,,

👇👇👇

تعديل المقال