رواية حياتي عذاب -14
لمى مو مستوعبه: لحظة الحين هو فيه أو راح...؟؟
فوز: راح...
لمى: جاء وشافك صح.."هزت رأسها بأيه"...طيب وش دوري الحين؟
فوز تأخذ مخدتها الكبيرة وتضربها: مالت عليك وعلى اللي يجي ويقولك أقولك جاء وجلست معه تقولين وش دوري..؟؟..
لمى: فوز..هذه مو أول مرة يجي من تملكتوا وهو راز وجهه...
فوز بعصبية مصطنعة: حدك عاد المسكين بسبب دوامه المضغوط ما يأخذ إلا أربعاء وخميس والجمعة يسافر..
لمى: متى حددتوا موعد الزواج..؟؟..
فوز: بصراحة قلت له يقول لأهله بالعطلة مو أحسن..؟؟..
لمى: إيه صح..وخاصة أن عيد الأضحى على الأبواب تتوقعين يكفى لنا ولك...
فوز: راح يكفى لا تخافين.."ناظرت لها بخبث"..أقول لمووو طلعي اللي تحتك..
لمى بخوف وارتباك: هااااه وش اللي تحتي...؟؟..
فوز: تتوقعين أني ما شفتها الصورة..؟؟...
لمى تبلع ريقها:..إي..... صورة..؟؟...
فوز: وأنا وش عرفني الصورة اللي معك طلعيها أحسن لك...؟؟..
لمى بخوف: بالأول اوعديني ما تجيبين سيرة لأحد حتى أمي...
فوز بنرفزة: وعـــــــد بس طلعيها بسرعة.."طلعتها وهي مستحيه منزله عيونها بالأرض تفاجئت فوز من صاحب الصورة وناظرت بأختها بعصبية"..
فوز بعصبية: وش جاب صورة طلال عندك..؟؟..
لمى بارتباك: بصراحة...هو أعطاني إياها.....عشان ارسمه...
فوز: وش عرفه انك ترسمين..؟؟..
لمى: والله العظيم ما ادري يمكن أخواته قالوا له أو رياض...
فوز: لمى أنتي صغيرة على السوالف لا تخلين شئ يشغلك لا طلال ولا غير طلال..
لمى بقهر: بس طلال ولد خالتي ما اعتقد انه يضحك علي مثلا..؟؟
فوز: أنا مو قاعدة أقول انه يضحك أو غيره ولا تنسين اعرف طلال مثل ما أعرفك بس يا لمى..لا تحطين شئ براسك دامك للحين مو عارفه وشلون تحددين مصيرك معه.."نزلت عيونها بحزن"...مو عشان أقول كذا أضيق صدرك تعرفين أنتي أختي وحبيبتي وما أرضى أشوف دمعة تنزل منك لأي سبب من الأسباب.."حاولت تبتسم"..يمكن طلال يعدك وحدة من أخواته وحب تسوين له خدمة وأنتي فسرتيها شئ ثاني.." لااااا طلال ما قالي كذا..طلال..طلال...ما ادري وش قال بس متأكدة انه يبادلني نفس المشاعر إيه متأكدة..."...
لمى بحزن: طيب وش تبغين أسوي..؟؟..
فوز: ما أبغى تسوين شئ دامه يبغاك ترسمينه ارسميه كأخ لك مو شئ ثاني فاهمه.."هزت رأسها بأيه".. يله بروح تحت ترى الدلوعة مها ونجود جو انزلي قبل ما يرسلون عيالهم عندك.."..طلعت أختها وتركتها مع أفكارها اللي توديها وتجيبها معقولة كلام فوز صح وان طلال يعدني مثل أخته بس أنا أحبه..إيه أحبه..معقولة هو ما يحبني طيب وشلون أتأكد انه يحبني..وشلون..أميرة..لااااا...يا خبله مو أميرة..أنتي اكتشفي بنفسك هالشئ وأعيش المغامرة لوحدي لا من شاف ولا من عرف.."...
دخلت عليه وحصلته نايم بسابع نومه ما هان عليها تشوفه متكشف والمكيف بارد آخذت الغطاء وغطته وبست جبينه وطولت وهي تدرس ملامحه الغامضة...قامت وفتحت البلكونه ووقف تتأمل المكان حست بنسمة باردة حركت خصال شعرها وتفكيرها بالشخص النايم كان ودها تدخل برأسه وتعرف بايش يفكر وليش هالانقلاب المفاجئ عليها...
"""الجزء الثالث عشر """
جالس بمكتبه ومعه أوراقه الهامة دخلت ومعها كاس عصير وأول ما شافت فوضى الأوراق بكل مكان وعبوسه وكانه ما حصل اللي يبغى حطت العصير على طاولته"...
متعب بضيق: مو مالي عينك هالاوراق شيليه الحين ينكب عليهم.." اللهم طولك يا روح وبعدين على مزاجه اللي له كم يوم على هالحال"...
أميرة تحاول تتمالك نفسها: يعنى ما تبغى العصير..؟؟..
متعب بملل: لا ما أبغى شئ ممكن تروحين أشوف شغلي..؟؟..
أميرة بقهر: لدرجة وجودي مسبب لك ضيق...؟؟..
متعب يتأفف: اوووووف أميرة وش تبغين بالضبط..؟؟..
أميرة تتنهد: سلامتك بس بعد أذنك شماء تبغاني أروح معها السوق..؟؟..
متعب يترك أوراقه ويناظر لها بعصبية: ومن سمح لك تروحين من دون ما تأخذين شوري..؟؟...
أميرة بقهر: ما قلت بروح قلت ممكن تسمحلي أروح معها؟
متعب باشمئزاز: روحي بس لك ساعة...مفهوم...؟؟..
أميرة بضيق: ساعة..!!... ما تكفي...
متعب بملل: يعنى كم تبغين..؟؟..
أميرة بصوت مرتجف: أنت بعد شوي بتطلع وتخليني بروحي واهلك راحوا للمزرعة وأنا لوحدي اجلس بالبيت حتى ما خليتني أروح لأهلي..
متعب يتكتف وبنظرة استخفاف: وليش ما رحتي مع أهلي..؟؟..
أميرة: حسيت بشويه تعب...و...
متعب قاطعها: ومع أختك شماء لا ما شاء الله نشيطة مثل الحصان.. "نزلت عيونها وتحاول تمسك نفسها ولا تبكي قدامه"...شوفي أميرة.." ناظرت له بدموع".. بإمكاني أخليك لوحدك هنا ولا تروحين لا مع أختك ولا مع أهلي بس بكون كريم معك.." بسخرية"...روحي...
أميرة بنبرة مخنوقة: متعب ليش تسوي لي كذا..؟؟..
متعب ببرود: تقدرين تسمينها...لـــــــــعـــــــانه عرفتي الحين.." ناظرت له بحقد ولا ردت عليه".. ممكن تتركيني أشوف شغلي.."رجع للأوراق ولما حس أنها ما تحركت نزلهم واخذ يدقق بملامحها ولما شافها ما فيه أمل تتحرك وقف عندها ورفع رأسها وشاف عيونها الحزينة "...
متعب بحنان وحط يده على ذقنها: وش تتظرين اتصلي على شماء تجي تمرك ومنها توسعين صدرك وتطردين الطفش..؟؟..
أميرة تبعد وجهها عنه متحاشية لمسه يده: الطفش بكل مكان موجود.." فهم مقصدها وناظر لها بتكبر"
متعب بصوت شوي عالي: وش تبغين أسوي يعنى تبغين اترك شغلي وأتفرغ لك عشان أسليك وأوفر كل شئ لك بسهوله.." انتفضت من عصبيته وناظرت له بخوف يالله كل ما له يعصب وبكذا ما اقدر اطلب اللي أبغى منه"..
متعب حاول يهدي نفسه وتندم لما ثار عليها: والحين ممكن اعرف وش تبغين بالضبط..؟؟
أميرة بتردد: أبغى....فلوس...؟؟..
متعب بدهشة: وشوووو...فلوس...!!!...
أميرة: إيه....اجل اطلب من مين...؟؟..
متعب: والمبلغ اللي أحوله لك بحسابك شهريا وفلوس الكلية المفروض انك مجمعه لا يا حبيبتي المفروض انك ما تطلبين مني فلوس...
أميره حست بأهانه وبعصبيه شوي : اغلب الفلوس صرفتها والي معي ما تكفي أني أروح فيها السوق
متعب يرجع لمكتبه: اجل تحملي ما يجيك من اليوم ورايح ابدي تقتصدين لأني بثقل يدي بمصروفك "ناظرته بتحدي وعالطول طلعت وهي مفولة منه على الأخر بسم الله وش اللي سلطة علي ما كأني زوجته عدوته..وش فيه حتى اليوم ما خلاني أروح لأهلي المفروض أروح لان الأسبوع اللي راح ما شفتهم وبعد هالاسبوع والله حاله معه خليني اطلع وأوسع صدري دامه موافق أخاف الحين يطلع برأسه موال جديد يجلسني بالبيت..دقت على شماء اللي قالت بعد صلاة العشاء بتمرها تأخذها..
جالسين بالمقهى يسولفون مثل كل مرة ومع السوالف قاله رياض وش صار معه وفطس طلال عليه..
رياض بقهر: ضحكت من غير أسنان إن شاء الله قايل نكتة...
طلال: ههههههههههههههههههههه والله انتم النكتة هههههههههههههههههه..
رياض: ههههههااااااي ضحكتني ومالي نفس ...
طلال: لو أنا منك كان أعطيها ذاك الكف أخليها تعرف وشلون تتكلم معي مرة ثانية مو اكبر رأسها من أول لقاء بيننا..
رياض: أولا هذا مو أول لقاء وثانيا بالعكس قلت لها كذا عشان تستحي على وجهها وما تراددني بالكلام..
طلال: حبيبي اللي مثل هاجر بجراءتها وقوة شخصيتها عمره ما يعرف الحياء...
رياض بضيق: طلال ترى ما اسمحلك مهما كان هذي بنت خالك والمفروض ما تقول عنها هالكلام
طلال بابتسامة مكر: أنت الصادق..حبيبتك..."ناظر لها رياض بدهشة" إيه حبيبتك..لا تناظر لي كذا ما فيها شئ يا رياض بالعكس ليش تكبت مشاعرك وأحاسيسك اتجاهها أطلق لها العنان عشان ترتاح..
رياض: أنا مرتاح وبعدين أبغى افهم أنت من وين لك هالكلام.."بنظرة مكر"..ليكون أنت تحب بعد..
طلال بارتباك: هااااااه..إيه..وش فيها كل الناس تحب وأنا بصراحة أحب أمي وأبوي...
رياض: خل عنك الكلام اللي ما منه فايدة وقلي وش رأيك نروح للشرقية قبل العيد؟؟
طلال يحك ذقنه: والله مو شينه بس قل للشباب بالأول ومحسن هذا لا تخبرونه..؟؟..
رياض بغرابة: ليش ؟؟ وش فيك على الرجال...؟؟..
طلال بقهر: سبحان الله ما ارتاح له أحسه لهي بالدنيا أنت وصي الشباب وان شاء الله الأربعاء بنمشي من المغرب...
بعد ما راحوا وتمشوا واشترت كم غرض للكلية وجلسوا تعشوا وشغلها مع متعب اللي ما تدري ليش هو كذا معها حتى الاتصال ما اتصل مثل كل مرة إذ رحت لأهلي يزعجني باتصالاته ورسايلة وش فيه يا ربي وش صار معه عشان يعاملني كذا بصبر وبشوف أخرتها...
شماء تعطي بناتها البطاطس: أميرة وش فيك ما تأكلين..؟؟..
أميرة انتبهت على أختها: هااااه تصدقين شماء ما لي نفس بالأكل قلتلك ما أبغى بس أنتي أصرتي علي
شماء: يا بنت الحلال اغصبي نفسك وأنسى ما علينا متى تروحين لأهلي..؟؟..
أميرة تتنهد بتعب: ما أظن أروح هالاسبوع متعب مرة مشغول بالشركة..
شماء: وطلال وين راح وأنا بعد ما فيها شئ ليكون متعب مانعك.."ابتسمت بحزن وقطع عليهم جوال شماء"...
شماء بدلع: هلا والله بصاحب الصوت..
ماجد: الحين هلا والله وأنتي رحتي وتركتيني لحالي ما نقول إلا الله لنا..
شماء: يا بعد عمري ولا يهمك الحين أجي لو بطيارة إذ حبيت.."ناظرت لها أميرة بغرابة وابتسمت لها شماء"...
ماجد: المهم لا تنسينا من الهدايا الحلوة...
شماء: افااا عليك كم عندي أبو ندى وشذى واحد عسى الله يخليه لي..
ماجد بحنان: يا بعد عمري والله يا شماء تدرين الحين أجي وأخذكم وش رأيك..؟؟..
شماء تناظر أميرة بخجل: لا مو الحين معي أميرة ولسه ما خلصنا من السوق بدق عليك إذ خلصنا اوكي يا عمري...
ماجد: اوكي يا روح عمري يله انتبهي على نفسك وعلى البنات مع السلامة.."وأرسل لها بوسه"...
أميرة: ما شاء الله يا شماء مو كأنك نسيت حالك..
شماء تقفل بخجل: وش أسوي يا أميرة أحبه وما اقدر استغنى عنه...
أميرة تبتسم بحزن: شماء بسالك هو يحبك..؟؟..
شماء: يوووه أما ما يحبني كان اذبحه تدرين هو يموت على تراب رجولي..؟؟..
أميرة سرحانة: الله يهنيكم ويسعدكم...
شماء: وأنتي يا أميرة ما يصير بينكم كذا ..؟؟..
أميرة بارتباك: هااااااه لا يصير يعنى على حسب.."تغير الموضوع"..ندى حبيبتي تبغين بطاطس..
عهود: هند أنتي للحين متمسكة فيه بصراحة ومن غير زعل ما عندك سالفة ولا حتى كرامة...
هند بعصبية: لا تهمني لا كرامتي ولا غيره يا عهود أنتي وش عرفك بالحب متعب يجري بعروقي متعب هو أول حب وأخره مستحيل أتنازل عنه بالسهولة.. ولا تنسين تحديت نفسي ووثقت فيه وخنت اعز الناس عندي عشانه وبالأخير بالسهولة يرسل صديقة ويقولي أنسى كيف انسااااااااه وهو دنيتي...
عهود تهديها: طيب يا هند بالحالة وش تسوين إذ رقمه غيره مثل ما تقول خلاص انسيه يا هند وترى الدنيا ما توقف على متعب...
هند بعبرة مخنوقة: صدقتي متعب أول حب بحياتي ومو قادرة أشيله من راسي لازم أوصله باي طريقة وهاجر الطريقة الوحيدة توصلني له لو على حساب نهاية زواجه أهم شئ استرجع متعب لي وأفوز بحبه واخلي أميرة اللي فرضت نفسها علينا وعلى حياتنا تندم على اليوم اللي أخذته فيه..
الحال ظل مثل ما هو بينهم عندهم مادة الثقافة الإسلامية وكانت الدكتورة تعد كشف أسماء الطالبات لمعرفة الحاضر والغايب منهم متكئه على طاولتها بعد ما قلت اسمها وهي مو على بعضها تحس بصداع فضيع سكرت عيونها تريحها قبل ما تبدأ المحاضرة ولما فتحتهم حست الدنيا قلبت فوق تحت ومن قوة الدوخة رجعت بنفسها للوراء وحطه أيدها على رأسها لاحظتها الدكتورة لأنها جالسة بالصفوف الأولى وقريبة جدا منها...
دكتورة نوال: أميرة....تعبانه...؟؟..
أميرة بعيون كلها تعب ويدها مازالت على جبينها: شويه أحس بصداع...
دكتورة نوال: طيب...روحي لطبيبة تحت ارتاحي.."هزت رأسها بأيه ولما وقفت رجعت جلست بسرعة والطالبات اللي بجنبها مسكوها بسرعة"
دكتورة نوال تكلم وحدة من الطالبات: وديها للطبيبة ولا تتركينها إلا وأنتي موصلتها.."هزت شوق رأسها مسكت يد أميرة عشان تساعدها على الوقوف بعد ما طلعوا من القاعة ونزلوا للطبية نامت على السرير وقبل ما تروح شوق للقاعة.."...
أميرة بتعب: الله لا يهينك شوق انتبهي على شنطتي..
شوق تبتسم بحنان: لا تهتمي أهم شئ ارتاحي وإذ طلعت من المحاضرة جبتها لك.."ابتسمت لها"..
الطبية: سلامات أميرة وش تحسين فيه..؟؟..
أميرة بصوت كله تعب: صداع....صداع ذابحني...؟؟..
الطبية تكشف على عيونها: أكلتي شئ اليوم...؟؟...
أميرة: لا...مو مشتهية لأي شئ..؟؟..
الطبية: أنتي متزوجة أميرة...؟؟..
أميرة بتعب: إيه...؟؟..
الطبيبة: ولك أطفال ...؟؟..
أميرة: لا.... لسه....
الطبيبة قامت وراحت لمكتبها: الحين لازم تأكلين شئ قبل ما أعطيك على مهدئ بس أبغى منك أول ما ترجعي للبيت تروحين تكشفين على نفسك...
أميرة تجلس على حيلها بخوف: ليش دكتورة وش معي بالضبط..؟؟..
الطبية تبتسم: ما فيك إلا العافية بس يمكن تكوني حامل..."من صدمة ما سمعت عالطول جاء ببالها متعب ما تدري تزعل أو تطير من الفرح متعب إذ عرف وش يقول يفرح مثلي أو..مو مصدقة وينك يا منال تسمعين اللي اسمعه خسارة لو مو اليوم غايبة انتبهت على كلام الطبية وبداخلها سعادة ما توصف"...
على وقت المغرب جالسة مع بنت خالتها بمجلس الضيوف بعد ما قالت لها عن الموقف اللي صار معها...
بشاير بدهشة: ولد عمتك هذا أحسه ما يستحي...
هاجر بدلع: لا عاد مو لدرجة أصلا أنا اللي زودتها معه تدري على أني كنت جريئة معه لكن بداخلي كنت ارتجف...
بشاير تغيظها: ههههههههههههههههههههههههه أثريك علينا لسان وشخصية وأنتي من جنبها....
هاجر بقهر: أقول يالله بس عن الكلام اللي ماله داعي...
بشاير: هههههههههههههه عشان قلت الصدق على فكرة وين خالتي وأميرة..؟؟..
هاجر تلعب بخصال شعرها: أمي راحت مع متعب للمستشفى وأميرة راحت لأختها...
بشاير: إلا تعالي حفلتك متى نويتي تحطينها...؟؟..
هاجر: والله دامها حفلة كبيرة فكرت وقررت أحطها قبل العيد وش رأيك..؟؟..
بشاير: تصدقين كنت شايله همها اشوا غيرتي موعدها عشان اشتري بكيفي طيب وين تحطينها هنا بالبيت..؟؟...
هاجر: إيه...بصرف أمي وجدتي ويخلى لنا الجو....
بشاير: وحريم أخوانك..؟؟..
هاجر بملل: عندهم خبر اطمني إذ على نورة بتجي أما اللي ساكنه فوق قالت لها أمي وما قلت شئ...
بشاير: وأخوات رياض بيجون...
هاجر بمكر: أكيد يجون هم الداخلين وحنا الطالعين...
بشاير: اووووووه الأخت طبت ولا احد سم عليها....
هاجر بخجل: تدرين وش أفكر...أفكر أزورهم ببيتهم ومنها أشوفه...
بشاير بدهشة: والله انك قوية بنت استحي على وجهك بكر يقول هذي ما تربت زين...
هاجر بنظرة قهر مخلوطة بغرور: يخسى اللي يقول عني كذا وبعدين أنا ما جيت له جيت لأخواته...
بشاير: ما أقول إلا الله يوفقك..."جلسوا سوالف مع بعض عن الجامعة ومشاريعهم بعد الاختبارات"
منال: ألف مبروك والله تستاهلين كل خير..
أميرة بفرح: الله يبارك فيك...ما تتصورين يا منال لما تأكدت طرت من الفرحة...
منال: اشوا ما طرتي...
أميرة: ههههههههههههههههههههه لا معي شماء مسكتني ما توقعت بيوم من الأيام بكون حامل بعد 5 شهور مين يصدق...
منال: الحمد لله طيب بلغتي شيخ الشباب...
أميرة تتنهد بضيق: خايفة يا منال...خايفة من رده فعله...
منال تهديها: ليش تخافين..؟؟...
أميرة بصوت مرتجف: خايفة أنصدم وخاصة له كم يوم وهو متغير علي ما ادري وش فيه...
منال تهديها: يا بنت الحلال توكلي على الله وقولي له وبعدين مو شرط تقولين مهدي الوضع...
أميرة باستنكار: وشلون...؟؟..
منال: أنا أقولك...قولي له اللي صار لك انك طحتي بالكلية وجلست كل المدة عند الطبية هو عاد مو مطمن ويأخذك للمستشفى عالطول قولي أن السالفة كذا وكذا...
أميرة: خايفة منه...ونفس الوقت مستحية...
منال: ايووووه قولي كذا بدل هالخوف قولي لامه وهي تقوله أو وحدة من خواته...
أميرة: أشوف الوضع تدرين منال توني اعرف انك حكيمة...
منال بتكبر: افااااا عليك دنا منال أم ريوف وما اطلع حكيمة كان صرت خبر كان.."ضحكوا مع بعض ويقطع عليها فتحت الباب ويدخل"..
أميرة بارتباك: اوكي منال...أكلمك بعدين...
منال: أكيد شيخ الشباب عندك الحين يله تشجعي وقولي له بعدين إذ عرف صدفة يزعل صدق ولا يفرح....؟
أميرة بدهشة وضيق: صدق والله ...
منال: هههههههههههههههههههههههههه لا امزح..
أميرة بقهر: طيب مردودة يا حكيمة.....
منال: ههههههههههههههههههههه يله ما أطول عليك وانتبهي على نفسك...مع السلامة...
أميرة تحاول تبتسم: مع السلامة.."سكرت وناظرت له اللي كان جالس بالبوفيه يفكر قامت أميرة وقلبها يدق بقوة وقفت عنده "...أميرة وعلى وجهها ابتسامة خوف: حمد لله على السلامة..."ناظرلها ببرود"..
متعب: الله يسلمك..." يعنى حتى اليوم مزاجك زفت وشلون الحين أقولك... "
أميرة تحاول تضبط من نفسها وتعدل من نبرة صوتها: تبغى أحط لك عشى مسوية لك بيتزا مخصوصي لك..؟؟..
متعب قام: تعشيها مالي نفس... "فتح غرفة مكتبه ووقفه صراخها والتفت عليها بعصبية"...
أميرة بصراخ: وش فيك أنت علي وش سويت لك..ليش كذا تعاملني وش الذنب اللي اقترفته من غير ما ادري..ترى والله مليت منك ومن طريقتك ما تبغاني ليش تخليني اجلس معك بالعذاب اللي كل يوم تعذبني فيه إذ أنت مغصوب علي ترى أنا بعد مغصوبة عليك عمري ما رفضت لك طلب ولا حاولت أني ازعلك وفجاءة تقلب علي وكأني عدوة لك مو زوجة..ليش يا متعب...ليش..."دخلت غرفتها وهي تبكي أنصدم من انفجارها الغريب وش حليلها قبل شوي فجاءه تثور من غير أي سابق إنذار ناظر الباب..أنا صحيح غلطت بحقك والمفروض تلاقين مني الإحسان مثل ما الاقيه عندك يالله أنا مو ناقص مرض أمي من جهة وعماتي من جهة ومساعد من جهة والشغل من جهة وتجين يا أميرة تكون من جهة بعد ووش مغصوب ومغصوبة الظاهر انجنت بنت عمتي.. جلس على الكنب بتعب بخليها الحين تهدى وبعد شوي اكلمها أما هي من دخلت رمت نفسها على السرير تبكي وكل ما تذكرت اللي قالته ووضعها معه تشقه شهقة قوية صادرة من أعماق قلبها وسمعت صوت الباب تسكر شكله طلع هو همه شئ أصلا عمره ما اهتم فيني المشكلة يا ليت القصور مني وفوق هذا يعاقبني بشئ مالي ذنب فيه خلاص أنا تعبت لازم ابعد عنه شوي ما اقدر أتحمل العيشة معه لازم أروح لأهلي و أطول الجلسة عندهم للين ما يتأدب وتشوف يا متعب ما أكون أميرة إذ ما خليتك تتأدب وتبطل عنك هالتصرفات السخيفة ورجعت تصيح مرة ثانية وما حست إلا وهي بسابع نومه..."...
أخذت رقمهم من الدليل وعالطول طلعت لغرفتها ودقت عليهم انتظرت طويل ما رد ناظرت لساعتها لسه الساعة 10 ونص وينهم...
رياض: السلام عليكم....
هاجر بدلع: وعليكم هذه بيت عمتي عزيزة..." ابتسم رياض وعرفها عالطول"...
رياض يقهرها: والله دام انك طالبة الرقم ومتأكدة انه هو ليش تسالين...
هاجر بقهر: أنت أكيد....الـــ
رياض يقاطعها بغرور: إيه بشحمه ولحمه...
هاجر: ههههههههههههههههههههههههه تصدق عندك روح دعابة...
رياض: مشكورة من ذوقك أمريني يا الغالية...
هاجر سكتت فجاءه وحست بالحرارة على وجهها: صدق...
رياض بغرابة: وشو الصدق...
هاجر بخجل: آني......غــ ....غالية..."استغربت من ضحكته العالية"..
هاجر بغرابة: وش فيك تضحك..؟؟..
رياض: ههههههههههههههههههههههههه عليك.. هههههههههههههههههههههههههههههه..
هاجر بغرور: وش فيني ما اذكر أني قلت شئ يضحك..؟؟..
رياض يستفزها: إلا تبغين تعرفين...
هاجر بملل: يا ليت...
رياض: من شوي قاعد اكلم أمي اللي هي عمتك وأنتي دخلتي بالعرض...
هاجر بغرابة: كيف...؟؟؟.
رياض: اووووه هاجر للحين ما عرفتي أمري لله أفهمك قلت الغالية لامي عزيزة مو لك أنتي...
هاجر اللي فولت على الأخر منه وحست بالإحراج: وين فوز.....؟؟؟...
رياض مبسوط لأنه عرف يكسر خشمها: والله حاليا مو فيه ولا لمى بعد إذ جوا مين معي عشان نبلغهم.."حس بالسماعة قفلت ابتسم عليها وقفل وشاف الرقم ولقاه رقم جوالها أخذه ما احد يدري يمكن يحتاجه مع الأيام"....
على الساعة 11 بالليل صحت من نومها على صوت طق قوي على الباب قامت بتعب وتحاول تستوعب الأصوات تمشي بخطوات ثقيلة وبالنهاية استوعبت أن جوالها يدق فتحت الباب وشافت متعب واقف عند الباب ووجه خالي من أي علامات غصب مد لها الجوال وأخذته بكل هدوء وشافت شوق متصل بك...
أميرة بصوت مبحوح: هلا شوق...؟؟..
شوق: هلا أميرة ليكون نايمه وأزعجتك.." دخلت جوا الغرفة تبعد عن نظراته وجلست على السرير تمسح دموعها العالقة حول عيونها"...
أميرة: لا ما كنت نايمه..؟؟..
شوق: طمنيني عنك إن شاء الله بخير..؟؟..
أميرة بارتباك لما دخل عليها: الحمد لله بخير...
شوق: ليكون سهرانه على البحث..؟؟..
أميرة تحاول تتذكر: أي بحث..؟؟..
شوق: يوووه ليكون نسيتي بحث اللغويات...
أميرة تتذكر: ايييه صح...تصدقين نسيته عن وشو قالت نجيب الموضوع..؟؟؟
شوق: طرق نقل المنتج للناس من ضمنها الدعاية الإعلانية...
أميرة وهي متأكدة انه يراقبها: طيب متى قالت التسليم..؟؟..
شوق: بعد بكرة عشان كذا قلت أخاف تغيبين وتنسينه...
أميرة توقف: مشكورة يا عمري لا ما راح أغيب...
شوق: طيب ما أطول عليك وإذ ناوية تغيبين أرسلي عملك مع احد البنات واسفة على الإزعاج...
أميرة: لا إزعاج ولا شئ عموما ما قصرتي...مع السلامة.. "سكرت وعالطول طلعت من الغرفة دخلت الحمام غسلت وجهها وللحين الآثار طازجة بوجهها مو مهم لازم اكلم هاجر قبل ما تنام وبعدين أروح فيها وعالطول طلعت من القسم وراحت لهاجر متجنبه متعب لما ناداها أول ما طقت الباب ما انتظرت طويل فتحت لها وكانت لابسه برمودا وناظرت لأميرة بتعجب"...
أميرة تبتسم: هاجر.. ممكن اخذ من وقتك شوي...
هاجر تفتح الباب كله بملل: تفضلي.."دخلت وقفلت الباب ورآها إما هي عالطول جلست على كرسي جهازها وناظرت لها ...أميرة ارتبكت من نظرتها شكلي أزعجتها وأنا ما ودي أتصادم معها بس الحاجة وما تسوي"..
أميرة بتردد: هاجر.."مدت لها ورقة".. أبغاك تساعديني وتطلعين لي الموضوع.." أخذت منها هاجر باهتمام وبعد شوي ناظرت لها لكن ما عرفت وش معنى هالنظرة"..
هاجر بثقة: يعنى مثل البحث..؟؟.."هزت أميرة رأسها"...طيب متى تبغينه..؟؟..
أميرة: التسليم بعد بكرة وبصراحة أعطتنا فرصة مرة قليلة.."هاجر لفت على كرسيها وفتحت صفحة قوقل وبدت تبحث ظلت واقفة تناظر لها من مسافة شوي بعيدة ولما فكرت أنها تتقدم خافت من رده فعلها أحسن أنثبر بمكاني بصراحة بهذا البيت تخاف تسوي شئ بعدين يصير ضدك.."...
هاجر التفتت عليها بغرور: ليش واقفة جيبي هذاك الكرسي وتعالي اوريك اللي تبغين عشان أسويه لك " ابتسمت أميرة وعالطول سوت اللي قالته وجلست بجنبها وشافت كل شئ بعالم النت"...
هاجر تكسر حاجز الصمت بتكبر: ما عندكم انترنت ببتكم...
أميرة: إلا عندنا بس ما استخدمه كثير
هاجر بنظرة سخرية: وشلون تجيبي أبحاثك..؟؟..
أميرة تبتسم: مستوى عن مستوى يفرق..وشوفي هذه الصورة وش رأيك يكون كصفحة للبحث...
هاجر تكبرها: حلوة...وخاصة أحسها جايبة مع الموضوع شوفي راح اضبطه لك وأطبعه وان شاء الله راح يطع يجنن وبتاخذين الدرجة الكاملة بعد...
أميرة تبتسم: دام أنتي اللي تسوينه أكيد راح اضمنها...
هاجر بفخر: أكيد..عمري ما سويت شئ ولا احد اخذ عليه درجة كاملة.." حاولت تبتسم وقامت تبغى تطلع"..
هاجر بتردد: أقول.." التفتت عليها"....أمي قالت لك عن حفلتي صح..؟؟..
أميرة: إيه قالت لي...
هاجر: وعندك شئ زين..."هزت رأسها بأيه"...اقدر أشوفه...؟؟..
أميرة بقهر: الحمد لله عندي ذوق بالاختيار ما احتاج رأي احد سوا إذ أعجبه أولا لأنه عاجبني أنا وبس.."بعد ما شافت القهر بعيون هاجر عالطول يفتح عليهم الباب بقوة بطريقة تخوف وقفت أميرة بمكانها من الخوف.."...
متعب بقهر: حضرتك هنا وأنا أدور عليك.." ناظرت بهاجر بخوف"...
هاجر: بسم الله الرحمن الرحيم وش فيك داخل علينا بشرك.." ما اهتم لأخته وكل نظرة منصب على المغلوبة على أمرها"..
متعب: جوالك من الصبح ما سكت روحي شوفي مين.." طلعت بضيق مو يكفى أختك تجي أنت وراحت لغرفتها وسمعت جوالها يرن شالته وكان الوالدة تتصل بك"...
أميرة تحاول تهدي من نفسها : هلا يمه...؟؟...
حصة: وينك من زمان وأنا أدق ما حد شاله...وينك فيه...؟؟..
أميرة ناظرت له وهو توه داخل وراح جلس يأكل: كنت بعيدة عنه...
حصة براحة: المهم وش أخبارك وأخبار متعب وأهله كلهم...
أميرة تتجنب نظراته: كلنا بخير أنتي وش أخبارك وأخبار ابوي وخوله ورغد..؟؟..
حصة: بخير شفتك ما تسالين قلت اطمن عليك.."ارتاحت أميرة لما عرفت سبب اتصال أمها خافت أن شماء بلغتها عن شئ ودقت تعاتبها لان المفروض تقولها مو شماء"...
أميرة تحاول تبتسم: والله ودي كل يوم اكلم بس تعرفين دخلنا على الامتحانات وانشغلنا معها...
حصة: إيه...عسى الله يوفقكم بتجين هالاسبوع...
أميرة تناظر له اللي كان يراقبها: إن شاء لله يمه...
حصة: مو تتصلين تقولين متعب انشغل ومو عارفه ايش ترى لك أسبوعين ما شفتك...
أميرة بتحدي: لا تطمني حتى إذ انشغل بجي مع طلال لا تخافين...
حصة: طيب...وأنتي جايه قولي لخالتك وأمي خليهم يجون...
أميرة بحيرة: والله ما ادري يمه أخاف ما يرضون...
حصة: أنتي قولي لهم وإذ مو جايين بسلامتهم بس بلغيني بالأول...
أميرة بتعب: إن شاء الله...
حصة: طيب ما أطول عليك شكلي أزعجتكم بذا الوقت...
أميرة: وش دعوة يمه بأي وقت اتصلي...
حصة: طيب...يله مع السلامة وسلمي على متعب والجميع...
أميرة بضيق: إن شاء الله...مع السلامة.."بعد ما سكرت ناظرت شاشة جوالها وما كان لها خلق تحط عينها بعينه وما حست إلا بهاجر دخلت فجاءه لان الباب كان مفتوح.."...
هاجر بغرور: شوفي أميرة وش رأيك.."شافت البحث اللي طلبته خلصته بأقل من ساعة"...
أميرة تبتسم: ما شاء الله عليك...بسرعة خلصتيه وشلون..؟؟..
هاجر بتكبر: لا حبيبتي هذه سر المهنة.."تقرب منها"..هذا وش يبلع.."حطت يدها بفمها تكتم ضحكتها لكن متعب عرف أنهم يتكلمون عنه"...
متعب بفم شوي مليان: تعالي هاجر..لا يفوتك بيتزا إنما أيه ما حصلتس...
هاجر تروح لعنده: اووووه بيتزا مرة وحدة تصدق عاد كنت بطلب قبل شوي لكن الحمد لله ربي رحمني.."تقربت وتناظر بانبهار".. عادي أكل وحدة..؟؟..
متعب: خليك قد كلمتك وحدة مو تجوز لك تقولين أبغى ثانية...
هاجر بقهر: أميرة...أنقذيني من الدب الجائع...
أميرة توقف عندها وتحاول تكتم ابتسامتها: ولا يهمك كل اللي فيه حلال لك كم هاجر عندنا...
هاجر بغرور: كم هاجر...هاجر.....سمعت مو متعب...
متعب يكلمها: وأنتي ما تبغين تأكلين..؟؟..
أميرة بتحدي: مو مشتهية...
هاجر بفم شوي مليان: بجد الجد أميرة أنتي مصلحتها..." سبحان اللي مغير الأحوال"...
متعب يقهرها ويرفع البيبسي يبغى يشرب: اجل مثلك يالرفلة ميح ما تعرفين شئ...
هاجر تناظر له بغرابة: وش فيه زوجك متسلط علي..؟؟..
أميرة تقهره: مو بس أنتي أنا لي أكثر من يومين وهو متسلط علي كأني سارقة حلاله.." ناظرلها بعصبية وتجنبت نظرته"..عن أذانكم..."دخلت غرفتها وطلعت للبلكونه كان الجو بارد بالليل جلست على الكرسي وناظرت للشارع وكانت بعالم مو عالمهم تنهدت من أعماقها وما حست إلا جاء وجلس عندها وعالطول قامت لان ما تبغى تتكلم معه باي شئ ومن غير سابق إنذار مسك يدها بقوه ووقفها"
متعب: وين رايحه..؟؟..
أميرة تحاول تفك يدها منه: ممكن تفك يدي...؟؟..
متعب بتحدي: لا....لازم نتكلم...؟؟.."ووقف مقابلها"...
أميرة تناظر له بسخرية وبنبرة مخنوقة: على ايش نتكلم الكلام انتهى وما بيننا شئ من الأساس..عـــ
متعب قربها منه: مو بكيفك تقررين إذ الكلام انتهى أو لا...
أميرة بتعجب وتحاول تفك يدها: اجل... بكيف مين؟؟..بكيف سعادتك...
متعب بصوت شوي عالي: أمــــــــيـــــرة...بطلي معي هالاسلوب اعتقد سبق وحذرتك...
أميرة: متعب..أنت بكذا تتعب نفسك وتتعبني معك ترى مهما قلت ما راح يغير شئ بالموضوع..
متعب يتأفف: اوووووووف أنتي ليش كذا عنيده..؟؟..ليش ما تعطين فرصة لغيرك..؟؟..
أميرة بضيق: لأني أعطيتك فرص وش كثرها وأنت اللي ضيعتها خلاص متعب والله العظيم تعبت وش تبغى الحين..؟؟..
متعب يقربها أكثر له وبحنان: أبغاك تعذريني أنتي ما تدرين باللي أمره كل يوم وكل ساعة ودقيقة بدل ما توفقين معي تكوني ضدي إذ أنتي ما قدرتي تتحمليني اجل مين يتحملني.."صدت للجهة الثانية وما حست إلا بيده الدافئة ترفع وجهها عليه وعيونها مليانه دموع" حبيبتي أميرة...انـ...
أميرة قاطعته باستنكار: حبيبتك...."بنظرة سخرية"...رجاء متعب لا تقول شئ أنت مو قده..
متعب بغرابة: ليش..عشان بس قلت حبيبتي..." ناظرت له بعيون حزينة"...أنتي فعلا حبيبتي وتاج راسي ومالي غنى عنك.." لا أكيد أنا احلم وش فيه اليوم أول مرة يسويها برغم انه ما قد وضح لي لا يا أميرة أشياء كثيرة تدل على حبه لك لكن فسرتها بأنه فرض على كل زوج بس متعب قال يحبني"
متعب يقربها له: وش فيك سكتي...؟؟...
أميرة بخجل وبصوت مرتجف: بس أنت عمرك ما قلتها ولا حتى بينتها لي دايم كنت أشوف فيك زوج عليه حقوق وبس...
متعب بابتسامة حنان: والزوج هذا مو من حقه يحب زوجته وخاصة إذ كانت مثلك إذ صاحت انتفخت عيونها وتطلع بسم الله تخرع...
أميرة بدهشة: لا عاد مو لدرجة...
متعب: وش أسوي مرات الحقيقة تكون مرة...صح..
أميرة بخجل: صح..."ونزلت عيونها.."...
متعب بصوت قريب للهمس: وأنتي...؟؟..
أميرة ووجهها احمر من الخجل: أنا...وش فيني...؟؟...
متعب: لا سلامتك ما فيك شئ بتقولين وإلا ارجع أتسلط عليك...
أميرة تسوي بيدها stop: لا...لا...لا.. الله يخليك لا تعيدها ترى والله تعبت وما اقدر أتحمل...
متعب: بسم الله عليك من التعب يا الدلوعة ما تقدرين تتحملين عشاني يله تتكلمين أو وشلون؟؟
أميرة خجل: وش تبغاني أقولك...غير أني حتى أنا ما اقدر على زعلك ولا على بعدك عني تعودي عليك انقلب حب لك...
متعب: إيه والدليل زعلك بسرعة بسم الله كبريت ما حسيت إلا و لسانك يطول أذانك...
أميرة: هههههههههههههههههه وش أسوي فيك جربت معك كل الطرق ومن غير فايدة قلت أجرب معك هالطريقة يمكن تنفع....
متعب يتنهد براحة: اعذريني يا بعد عمري والله مو بيدي وما كان ودي ادخل ضغط الشغل ومشاكله بيننا بس ما قدرت عاد قلت أميرة حبيبتي إذ تحبني راح تتحملني بس طلعتي دلوعة ما تتحملين شئ..
أميرة تبتسم بحياء: ليش شايفني ما أحس فيك..ما أبغى تضغط على نفسك وبالنهاية تفرغ طاقة الشغل وتصير على راسي وأنا اللي أكلها..
متعب يلمها له: ولا يهمك كم أميرة عندي وحدة ويالله قادر على لسانها.."ضحكوا و جلسوا سهروا مع بعض وقالت له عن اللي صار معها وما توقعت رده فعله اللي خاف عليها ولازّم ما تروح بكرة للكلية لكن أصرت تروح عشان تسلم بحثها.."..
كانوا جالسين بالصالة يتابعون الأخبار دخل عليهم والحزن يكسوا وجهه جت عنده منيرة بخوف وجلست بجنبه...
منيرة بخوف: مساعد وش فيك يمه.." نزل رأسه و ما رد عليهم وفضل السكوت.."...
أم عبد الرحمن: بسم الله عليك...وش فيك مساعد تراك خرعتنا...؟؟..
مساعد بصوت كله حزن وضيق: نورة....
منيرة حطه يدها على قلبها: بسم الله عليها وش فيها نورة...؟؟..
مساعد يتنهد بحزن طالعه من قلبه المكسور: تطلبكم الحل..." شهقت أم مساعد بقوة وجلست تبكي على مرة ولدها.."..
أم عبد الرحمن بصوت مخنوق: من أيام كانت معنا ما فيها إلا العافية وش فيها..؟؟
منيرة تبكي: لا حول ولا قوة إلا بالله الله يرحمك يا نورة ويحللك وش اللي جاه..؟؟؟..
مساعد يحاول يضبط صوته: طاحت من الدرج وكان معها نزيف قوي ومع الضعف والإجهاد اللي فيها ما قدرت تتحمل وهذا مكتوب لها...
أم عبد الرحمن: إنا لله وإنا إليه راجعون لا حول ولا قوة إلا بالله...
منيرة تمسح دموعها: الله يرحمك يا الطيبة وطيف وينها..؟؟.
مساعد: بالبيت عند الشغالة أول ما طلعت من المستشفى عالطول جبت هنا.."حط يدينه على رأسه بحزن"..
منيرة تبكي: خبرت أهلها...؟؟...
مساعد يتنهد: إيه..جوا عندي وهم اللي قالوا ارجع البيت..."وزاد بكاء منيرة تتحسر على فقدان مرة ولدها الحبيبة اللي عمرهم ما احد تأذى منها نزلت هاجر عليهم وشافتهم بالحال خافت وجت عند أمها اللي عالطول ضمت بنتها وسألتهم ولا احد رد عليها وبعد ما فقدت أعصابها سالت مرة ثانية بصوت عالي نطقت أمها بصوت متقطع وكانت فاجعة كبيرة لهم..لا..ما اصدق..لا..نورة ما ماتت..ما اصدق اللي اسمعه وشلون وليش تموت هي نورة طيبة وحبوبه وعمري ما شفت أو سمعتني كلمه تزعل... نورة لا...لا...."..
ومع دخول فصل الشتاء وبرودة الطقس وخاصة مثل هالاجواء من كل سنة تلازم متعب أنفلونزا شديدة لدرجة انه تطيحه بالسرير لعدة أيام متواصلة مصحوبة بارتفاع في درجة الحرارة بشكل مو طبيعي والهذيان المستمر كانت تغير له الكمادات اللي تحطها على رأسه وتحت ظهره وحتى هو مريض يجننننن كان يهذي بكلام أو خرابيط ما فهمتها أميرة إلا غير هند...هند.. تجمدت أميرة بمكانها وناظرت له بخوف وعدم مصداقية ما تسمع مين هند وش تصير هذه كان ودها تصحيه من غيبوبته وتستجوبه عن هند اللي ذكرها أكثر من مرة بركان يفور بداخلها ودها تعرف حقيقة هالهند هذي...
كانت جالسة تشرب حليب بالكاكاو وتتفرج على التلفزيون تفكر باللي قاله من كم يوم مين هند وش علاقتها بمتعب وشلون اعرفها إذ سألته أكيد بينكر وشلون اعرف..؟؟..
متعب طل من غرفته وعلامات المرض للحين ظاهر على وجهه: والله انك مزعجه كل هذا ما تسمعين تراك ازعجتيني.." انتبهت على صوته وحمدت ربها ما كشف سرحانها جاء وجلس بجنبها تحاول تبتسم للحين اللي صار معها ما نسته كانت تبغى تفاتحه وتعرف حقيقة هند لكن خافت عليه وخاصة أول مرة يقوم من سريره من بعد 4 أيام عاشها مع المرض.."...
أميرة تحاول تبتسم: حمد لله السلامة..صحيح أزعجتك...؟؟..!!..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك