رواية حياتي عذاب -19

رواية حياتي عذاب -19

بينكم.."جلس متعب يقوله كل شئ باستثناء الكف لان هالشئ راح يقلل من قيمته كرجل عند أخوه وخاصة أن مساعد قد مرة سمع أهله زمان عن موضوع البنت اللي اختارها لكن ما لقى بال مثل ما قالهم هذه حياته وهو حر فيها"...

مساعد: اتصل على عمتي واسأل هناك عنها..

متعب بعصبية: من صدقك أنت تبغى أجيب لنفسي المشاكل محتار يا مساعد دلني والله ضايع ومو عارف وش أسوي...

مساعد يناظر لخوله اللي دخلت وكأنها متضايقة: خلاص انتظر مني اتصال.. مع السلامة..

خوله بخوف: وش فيها أميرة..؟؟..

مساعد بنظرة عصبية: أنتي تتصنتين علي...؟؟..

خوله بقهر: ما تصنت وأنا رايحه لغرفة البنات وصوتك كان عالي لما قلت أميرة مو عندنا مساعد.."وقفت مقابله وشدت على يدينه"... الله يخليك قلي وش فيها أميرة وش صاير بينهم...؟؟..

مساعد يبعد عنها: استهدي أنتي الثاني واتصلي على بيتكم الحين وشوفيها إذ هناك أو لا...

خوله بنرفزه: الحين أقولك وش صاير بينهم وتقولي اتصل على أهلي...

مساعد بعصبية: اسمعي الكلام وبعدين تعرفين كل شئ... يله سوى اللي قلتلك عليه.."ناظرت له بقهر وأخذت سماعة التلفون ودقت الرقم بعصبية "...

مرت أيام على السالفة وللحين ما احد يعرف غير بلقيس وخوله مما خلى متعب يتضايق كثير بمعرفة خوله عن السبب وأكيد أخذت فكره سيئة عنه.. لكن بعد ما جلس معها وفهمها على الموضوع وسمعها ما توقع أن خوله تقول كلام حكيم أول مرة يسمعه ولا توقع منها هالموقف العقلاني... بالبداية ظنها راح توقف بجنب أختها لكن تفاجئ العكس اليوم جايين ببيت حصة عشان يقنعون أميرة وما تكبر السالفة...

بلقيس: استهدي بالله ترى ما يجوز اللي تسوينه بعمرك واعترف أن اخوي بالبداية غلط لكن كل هذا بنظري ما سوا شئ...

أميرة بنرفزه: الحين كل هذا وما سوا شئ تبغيني أتفرج.. ولا وش رأيك اصفق له وأقوله برافوا مو هذا اللي تبغونه...

بلقيس تمد جوالها: هذه جوالك نسيتيه متعب يبغى يكلمك...

أميرة تناظر لها بقهر: ومن قالك أني أبغى اكلمه خلاص كل شئ انتهى بيننا ليش تتعبون أنفسكم....

خوله: أميرة وش قاعدة تقولين لا تخلين وحدة تهدم بيتك... تدرين إذ تركتي لها الملعب راح تكسب الجولة وبعدين يا حبيبتي متعب أكد لي أن هذا ماضي وقطع علاقته من أول مأخذاك كبري عقلك...

أميرة تتمالك عبراتها: شفتي يا خوله قلتيها ماضي يعنى معترف أنها حبيبته من زمان... يعنى سبق وعرف غيري وحب غيري وهذا له معنى واحد أن كل يوم له وحدة وحب جديد وأبو طبيع ما يترك طبعه..

بلقيس وقفت بعصبية: ما اسمح لك يا أميرة تتكلمي عن شئ وأنتي ما تعرفين عنه صح اخوي غلط بس ما تظنين انه من النوع المستهتر واللي ببالك وللمعلومية كان غرضه من هذا كله الارتباط مو مثل ما تفكرين...

أميرة بصوت عالي: وليش ما تزوجها..؟؟ الحين جته الفرصة يروح وش ينتظر.." ناظرت لها بقهر وعالطول طلعت نزلت تحت ودقت على فهد يجيها الحين وجت عمتها وجلسوا بالحديقة تنسى من كلام أميرة القوي للين ما يوصل فهد.."...

خوله بقهر: أنتي مهبوله بالله هذا كلام تقولينه ما تخافين تقول لمتعب..

أميرة تمسح دموعها بعصبية: أحسن أنا ابغاها تقوله وبعدين بدل ما توقفين معي تصيرين ضدي ضحك عليك بكم كله يا خوله لو تسمعين اللي سمعته وتشوفين اللي شفته ما قلتي كذا أنا شفت دليل قدام عيوني وتبغوني ما أصدقها... خوله لو تكونين مكاني وعرفتي عن ماضي مساعد وش بتسوين بساعتها...قولي وش راح تسوين..؟؟..

خوله: أفكر بالعقل قبل أي شئ ولنفرض أن كلامها صحيح والدليل اللي شفتيه بس المفروض ما أحط الكرة بملعبها.."تنهدت بتعب"..والحين وش قررتي راح تطولين ببيت أهلي ولا كيف...

أميرة تتنهد بضيق: ما ادري ما فكرت غير أن ابعد مدة طويلة عنه وما أبغى أشوفه...

خوله بحنان: طيب..أعطيه فرصة اسمعيه وش بيقولك مو تقفلين الأبواب بوجه..

أميرة تبكي: المشكلة محد يحس باللي فيني يا خوله تعبت والله تعبت.."حطت يدينها على وجهها جلست بجنبها تهديها وحطتها على صدرها تمسح على شعرها.."..

منيرة بحنان: متعب... مالك نية تجيب أميرة..؟؟؟..

متعب يحاول يبتسم: إن شاء الله يمه قريب... يله هاجر انتظرك بالسيارة...

هاجر تحط كاس الشاي بتعجب: بروح مع السواق...

متعب التفت عليها بعصبية: قلت انتظرك بالسيارة..."طلع عنهم وعالطول طلعت هاجر ورآه"...

منيرة: أقول خالتي ما تلاحظين اللي ملاحظته...

أم عبد الرحمن: إلا شايفه وسامعه بس عيالك ما يتكلمون...

منيرة بضيق: تكلمي مع متعب وشوفي إذ بينهم شئ لا سمح الله..

أم عبد الرحمن بقهر: كل هذا وما تعرفين إذ بينهم شئ... يا منيرة شكل ولدك مزعل أميرة ما تشوفينه بس برا وإذ احد كلمه نفسه بخشمه...

منيرة بضيق: يا خوفي اللي بينهم شئ كبير أقول خالتي خلينا نروح لحصة نعرف وش السالفة وإلا أقولك نتصل عليهم مو أحسن...

أم عبد الرحمن: أنتي لا تفكرين كثير ترى مو زين لك التفكير والضيقة وان شاء الله بمسك متعب واعرف منه كل شئ...

منيرة بحزن: متى تمسكينه..؟؟ إذ حنا ما نشوف وطلعت أميرة شكلها مطوله معقولة عمتها كل المدة تعبانه مثل ما قال لا أنا مو مطمنه...

أم عبد الرحمن: يا منيرة ترى مو زين لك والخبر اليوم بفلوس وبكرة ببلاش...

متعب: هاجر بسالك عن الحفلة مين كان جاي أو مين كان مع أميرة....؟؟...

هاجر بتعجب وبنفس الوقت باستخفاف: الله... توك تذكر الحفلة لها أسبوع وبعدين مو عيب عليك تسال مين جاء ولا مين تكلم مع أميرة.. آخ يا القهر لو حرمك المصون فيه ما تجرأت وفتحت فمك تسال هالاسئلة...

متعب بنظرة عصبية: تتكلمين وإلا كيف...؟؟..

هاجر بحذر: خلاص بتكلم بس قلي بالأول أميرة صح زعلانه.."هز رأسه بأيه"..وليش زعلانه...؟؟..

متعب يتنهد بضيق وتركيزه على الطريق: ما تشوفيني ليش أسالك...؟؟...

هاجر تفكر: اللي جاء صديقاتي اللي معي بالجامعة و بنات عمتي عزيزة و.....بس...

متعب: ومين صديقاتك...؟؟..

هاجر بغرابة: متعب من صدقك أقولك اسم كل وحدة...

متعب بضيق: هاجر الله يخليك ريحيني مو معقولة أنتي بعد ما تساعديني يكفى أميرة اللي قاطعة أي وسيلة اتصال بيننا تذكري مين جلس معها أو كلمها...

هاجر: طيب يمكن زعلانه من شئ ثاني ليش خليت وحدة من صديقاتي مزعلتها...

متعب بنرفزه: لان نفس اليوم زعلت وطلعت من غير ما تبلغني..هااااه قولي...

هاجر تفكر: اممممممم سوير..غروده..عفيف..هيومه..بدّور..رنو..فطوم.."ناظرت لآخوها بغرابة وهو فاطس ضحك عليها"....ليش تضحك...؟؟..

متعب: ههههههههههههههههههههههههه أنتي متأكدة أنهم أسماء بنات ونحصلهم بالقاموس كذا...

هاجر: وش عرفك أنت أصلا بالدلع.."يدق جوالها فتحت الشنطة وشافت مين"..أوف وش تبغى هذه الحين..

متعب: مين بعد ليكون فطوم وعفيف ههههههههههههههههههههههه..

هاجر بقهر: لا..هذولاء بحل عند هالهندية ذي سبحان الله ما تنزل لي من زور هالادمية..

متعب: هههههههههههههههههه وليش هندية عاد شكل أصلها يرجع للقارة الهندية..

هاجر: اسمها هند وما اعتبرها صديقتي مرة تتلزق بي باي طريقة إيه صح هذه من المدعوات بالحفل.."سرح بتفكيره ليكون هي نفسها اللي يعرفها بس وشلون وصلت لأختي صح قد مرة قالت تعرف هاجر بس من بعيد ما في غيرها دام وصلت لهاجر أكيد وصلت لأميرة وشلون أتصرف مع هالانسانة الحين هي ما تفهم أني خلاص تركتها واخترت أميرة بنت اللذين خربت علي حياتي حسبي الله ونعم الوكيل.."....

جالسه لوحدها تفكر بالأيام اللي راح تقابلها أمي بدت تشك بالموضوع دام طولت عندهم وش أقولها أن ولد أخوك المحترم خاين..."ناظرت للسماء".. يارب ساعدني وش أسوي...؟؟..

حصة تجلس عندها: ليش لوحدك جالسة ما تدخلين جوا عند أبوك يسال عنك...

أميرة تتنهد بتعب: إن شاء الله يمه الحين ادخل...

حصة بمكر: متعب ما اتصل..؟؟..

أميرة تجنبت النظر لها: لا..

حصة: طيب اتصلي عليه شوفي إذ وصل أو لا..

أميرة بضيق: هو قال بيدق ليش اتصل بعد...

حصة تناظر لها بعصبية: وش بينك وبين متعب يخليك تجلسين عندنا ولا ترجعين عنده...

أميرة بغرابة: ارجع وين..!! إذ هو لسه ما رجع من السفر واحتمال سفره يطول...

حصة بصوت عالي: أميرة... لمتى تضحكين علي شفتينا ساكتين تحسبين ما نعرف شئ.. أمس متصلة على متعب وما جاب طاري سفره ولا شئ وانه ما تحرك لمكان.."نزلت رأسها وما ردت عليها وبحنان"..أميرة يمه تحسبيني ما انتبه على حالك وش صار بينكم...؟؟..

أميرة بضيق وبتردد: يمه....ما....أبغى متعب..

حصة بدهشة وعصبية: وشوووووو..!!!!!! وشو اللي ما تبغينه هو بكيفك؟؟.. وليش وش صاير؟؟.....

أميرة بعبرة مخنوقة: ما صاير شئ بس ما ابغاه...

حصة وقفت بقهر: اسمعي يا أميرة ما عندنا بنات تقول أبغى أو ما ابغاه بتقولين وش صاير وإلا اتصل على متعب يجي يأخذك بالقوة...

أميرة بين دموعها: يمه حرام عليك... حرام مو يكفى انك زوجتيني بالغصب واجبرتيني عليه وأنا ما ابغاه من البداية مو يكفى انك تتحكمين بحياتي وأنا ما ابغاها يكفى يا يمه يكفى حرام عليك.."راحت وهي تبكي ومرت من عند أبوها بالصالة نادها وما لقت بال وشاف حصة تدخل من ورآها وبوجهها عبوس"..

محمد باستنكار: وش فيها أميرة..؟؟..

حصة تجلس بضيق: بنتك انهبلت.. ما قلت لك متهاوشه مع متعب وشكل هوشتهم كبيرة...

محمد بنرفزه: وش صاير..؟؟..

حصة بقهر: بنتك ما تبغى متعب..!!..تبغى تطلق..

محمد بدهشة: وشوووووو..!!..ليش وش صاير بينهم عشان تفكر بالطلاق...

حصة تتنهد بضيق: ما ادري عنهم ما قالت شئ.. اسمع يا محمد اتصل على متعب وخله يجي نعرف وش السالفة..

محمد: أكيد بتصل بس بعد ما اجلس مع أميرة واسمعها قبل ما أناديه واسمع منه....

مساعد: يا متعب لا تدخل مشاكل بيتك مع الشغل تعرف هذا رابع مرة أشوف غلط بملفك... متعب حاول تركز ترى هذا شغلنا أكل عيشنا...

متعب بضيق: معليش يا مساعد.. اسمح لي أنا فعلا صرت ما أركز بس أوعدك أن أحاول افصل بين المشاكل والشغل...

مساعد قام وجلس مقابله: خلاص اجل على كذا بعطيك أجازة أسبوع ومنها ترتاح وتريح أعصابك وتفكيرك ترى ما يسوى عليك وأنا أخوك وإذ على أميرة بترجع...

متعب يتنهد بضيق: وشلون ترجع إذ هي قاطعه خيوط الاتصال بيننا...ماتقولي وشلون..؟؟..

مساعد: اسمح لي يا خوي أنت السبب.."ناظر له بعصبية"...لا تناظر لي كذا أنت السبب لو أنا مكانك ما اقطع أي أداة اتصال تربطني فيها.. وخاصة إذ كنت أحبها ولو على حساب كرامتي.. يا متعب ترى ما بين الزوجين كرامة أنت أعط نفسك وراح تعرف معنى كلامي...

متعب بحزن: بس يا مساعد ما لي وجهه أقابلها وش أقولها... أقولها أنتي صادقة بكل كلمة واني لي ماضي وقبل ما أعرفك على كذا راح تعند وما راح ترجع معي...

مساعد يواسيه: كل إنسان وله ماضي... أنتم لو فعلا تحبون بعض صدقوني راح تتخطون كل هالازمات بس ارجع وأقولك أعط نفسك وراح تشوف.."سرح بكلام أخوه فعلا مساعد صادق أنا اللي خليتها ولا سالت عنها المفروض أجي لحد عندها من أول يوم طلعت وشلون راحت على بالي.. أميرتي والله مشتاقة لك موت يا أحلى وأرقى أميرة عالطول ركب سيارته ومسك خط الخرج وراح يبدى بأول محاولة معها وحاط بباله آمل كبير أن يقنعها وان شاء الله يحاول..."...

أول ما وصلت من الجامعة كانت متضايقة ما تعرف وش السبب جلست بعصبية على سريرها وناظرت لجوالها هذا وينه بعد لا اتصال ولا حتى أرسل رسالة يقاله الحين زعلان من كلامي... هذا مثل المثل اللي يقول سوا خير وقطه بحر...أحسن جعلك ما ترضى يا راض يوووه وش أقول..؟؟ الحين مشتاقة له وادعي عليه وينك يا رياض لك وحشة..أنا الغلطانة المفروض ما رد عليه بالرد هالسخيف...اتصل عليه...اتصل وش أقول والله ما عندي شئ أقوله كيفه إذ اشتاق لي يعرف طريقي طيب أنا مشتاقة له... يوووه وش أسوي طيب بتصل بنتظر وبشوف وش أخرتها معك يا رياض...

جايه من الجامعة وتركت أخوها اللي تغيرت أحواله بيوم وليلة من يومين كان مبسوط وفرحان باتخاذ القرار وكان مقتنع والحين سبحان مغير الأحوال..رياض ظل جالس بالسيارة بعد ما نزلت فوز يفكر بكلام هاجر وش تظن نهاية هالعذاب والمكالمات والحب تسلية X تسلية الحمد لله ما استعجلت وقلت لامي شئ وإلا كان أنا متحطم أكثر من الحين..الله يصبرني أنا الغلطان المفروض ما أبدء خطوة إلا وأنا واثق ومتأكد منها...

دخلت عليها بالغرفة وتوها مغيرة من ملابسها وتشيل ماكياجها وعرفت من أختها عن غياب أميرة...

فوز بتعجب: وليش ما داومت..؟؟..

لمى بحيرة: مستغربة كثرك حتى اتصل عليها يعطيني مقفل وهاجر ما ترد..

فوز: بسم الله ليكون فيهم شئ طيب اتصلي على بيت خالتي اسألي عنهم...

لمى بتريقه: اتصل وش أقول يمكن خالتي ما تعرف مثلنا فكري معي مين اللي راح يجيب لنا المعلومات هالقيمة...

فوز تشيل عدساتها: ما ادري عنك وبعدين ترى يمدحون العقل هالايام...

لمى قامت: خليته لك يعنى هذا جزاتي أقولك.."سكرت الباب ورآها نزلت تحت وسمعت التلفون يرن رحت ورفعته وعالطول تعرفت على صاحب الصوت"...

لمى بحياء: عاش من سمع الصوت..؟؟..

طلال بتكبر: عاشت أيامك عفوا نبغى تجيبوا الهوم سيرفس ينظف لي الخيمة..

لمى بتعجب: نعم....

طلال بقهر: من قال نعم سمع..لعنبوا حيكم يا عيال خالتي كل ما أجي إلا الخيمة عفسه احد يجي ينظفها ترى ما تعودت على العفسة...

لمى بقهر: عداااااال بسم الله عليك انتبه ليدخل فيك ميكروب أو فيروس خطير ويسدحك علينا ولا نعرف له علاج....

طلال: هههههههههههههههههههههههههه حلوة منك يا بنت خالتي بس لا تعودينها..."بهمس".. وينك ما صرت أشوفك حتى صورتي اللي أعطيتك إياها آخذتيها وقفلتي عليها وينها لا صورتي ولا رسمتي...

لمى بدلع: والله اللي له شئ عندي يحصلهن بصندوق المفقودات...

طلال باستخفاف: اهااااا طيب وين مكان هالصندوق عشان نأخذ مفقوداتنا منه...

لمى بنرفزه: طلال وش تبغى الحين...؟؟..

طلال بغرابة: افااااا يا بنت خالتي شكلك زعلتي ترى امزح والله امزح..."ابتسمت لمى على روحه البريئة"...طيب ممكن لو سمحتوا ترسلوا احد يرتب هالعفسة وتنادي أخوك البثر ترى مليت وأنا لوحدي جالس...

لمى: إن شاء الله الحين أنادي رياض وأرسل الشغالة تجي تنظف...

طلال: لالالا تعالي أنتي...

لمى بدهشة: نــــــعــــــــم.....

طلال: لا لا ما أقول شئ...

لمى بحياء شوي: إلا طلال بسالك عن أميرة لها كم يوم ما داومت عسى ما شر...؟؟...

طلال: متعب مسافر وجلست ببيت أهلي لين ما يرجع وخلي عنك اللقافة ويله سوي اللي قلته... باي.."قفل بسرعة وناظرت للسماعة وهي تبسم إذ زوجها مسافر طيب ليش جوالها مقفل أكيد ما شحنته يوووه وشلون تشحنه وهو عام يوووه إذ فكرت كثير بنسى الحبيب وهو متوعدني..."...

أميرة بعصبية: لا قلت لا ما راح اطلع وسوي اللي تسوينه...

حصة بعصبيه: أميرة اقصري الشر وراح تنزلين غصب عنك فاهمة الرجال متعني يبغى يكلمك وش نقوله وهالعناد ما راح يفيدك...

أميرة بتحدي: ما راح انزل يعنى ما راح انزل قولوا اللي تبغين.."دخل محمد على صوت بنته العالي"...

محمد: خلاص يا حصة لا تغصبينها خليها على راحتها...

حصة بقهر: بدل ما توقف معي تصير ضدي اقنع هالعنيدة تنزل وتكلم زوجها بدل البرود اللي فيك...

محمد بنرفزه: لا تضغطين عليها أقول ومن اليوم ورايح لا تدخلين في أميرة سامعة أنا اللي بحل أمورها وخليك بعيده عنها تسمعين أو لا.."ناظرت له بقهر وطلعت تركتهم ما قدرت أميرة تتحمل جلست بتعب وحاولت تتماسك قدام أبوها جلس محمد بجنبها يمسح على شعرها يبغاها تتكلم ويعرف وش اللي صاير بينهم أميرة ما حبت تقوله الحقيقة المرة اقل شئ ما يطيح من عين أبوها مثل ما طاح من عينها... متعب من عرف العذر اللي قالته له عمته مو صحيح تنهد وحاول يمسك أعصابه قبل ما يفلتها استأذن وطلع بسرعة برغم من محاولات عمته يجلس يتغداء لكن اعتذر ومسك طريق الرياض وهو مسرع وكل تفكيره محصور بشخص واحد..........أميرة..."...

منيرة بعصبية: وليش ما قلتوا لي..؟؟.. هذه أخرتها يمه يا مساعد أنت وإخوانك تخبون علي..

مساعد يهديها: الله يهديك يا الغالية كل هذا عشان خايفين عليك...

بلقيس: وبعدين يا يمه أميرة بترجع إن شاء الله بس محتاجة وقت تبعد عن متعب شوي...

منيرة بخوف: لا أكيد اللي بينهم شئ كبير وانتم عارفين وما تبغون تقولون لي وش فيها أميرة يا مساعد...وشفيها يا بلقيس..؟؟..

مساعد: يمه ترى مو زين لك.."ناظر لجدته"..جدتي قولي شئ..

أم عبد الرحمن: وش أقول إذ كلامكم هذا ما أقنعني الحين أميرة محتاجة تبعد عن متعب بالله هذا كلام طيب ليش تبعد وش صاير بينهم...؟؟..

بلقيس بتوتر: سوء تفاهم بسيط وان شاء الله ينحل..

أم عبد الرحمن بقهر: صدقت أمك اللي بينهم شئ كبير مو عشان دراستها ولا شئ...

بلقيس: يمه وأنتي يا جدتي تعرفون متعب إذ حط شئ برأسه شئ لازم ينفذه وهالشئ مو جديد عليكم وبعدين من حق أميرة تكمل دراستها...

منيرة بعصبية: وليش ما يبغاها تكمل...؟؟..

مساعد: يمه الله يخليك لا تضايقين بروحك وان شاء لله موضوعهم ينحل و بكلم متعب مرة ومرتين لا تخافين عليهم...

أم عبد الرحمن بعصبية: والحين وينه طرازان البيت..؟؟..

مساعد يبتسم: مسافر..

منيرة: وين مسافر وليش ما قالي..؟؟..

مساعد: مسافر لشغل وليش ما قالك يمكن نسى لا تلومينه يا الغالية من اللي فيه قام حتى بالشغل يلخبط ولا تسوين بنفسك كذا...

منال تجلس: طحت عليك وش تفكرين فيه بالأب أو بالابن..؟؟..

أميرة كأنها سرحانة: أفكر باللي راح يجي وشلون راح أواجهها...؟؟..

منال بغرابة: أميرة...وش فيك أول مرة أشوفك كذا...؟؟..

أميرة تناظر لها بتعب: إلا ما قلتيلي ما شفتي لمى بطريقك..؟؟..

منال: لا..أميرة أحس فيك شئ ليش مو راضية تقولين لي قولي يمكن ترتاحين من اللي فيه..

أميرة تتنهد بضيق: ارتاح..!!.. ياليت ارتاح يا منال أنا...أنا نويت انفصل عن متعب..؟؟..

منال بدهشة: لـــيـــــش..؟؟..وش صاير..؟؟..

أميرة منزلة رأسها بضيق: يعنى..اكتشفت أننا مو مناسبين لبعض عشان كذا قررت الانفصال...

منال بضيق: توكم الحين اكتشفتوا مو مناسبين لبعض والحب والكلام اللي تقولونه لبعض وولدكم ما فكرتي فيه بس فكرتوا بأنفسكم ليش يا أميرة تهدمين بيتك بيدك مو حرام..

أميرة بحزن: خلاص منال هالموضوع قفلت عليه وما أبغى ادخل في نقاش طويل

منال بقهر: ومتعب وش كان رأيه.....؟؟..

أميرة بحزن: متعب... ما عنده خبر لكن بأقرب فرصة بوصله قراري...

منال بتعجب: اسمحي لي يا أميرة أنتي أنانية..."ناظرتها أميرة بصدمة لما وقفت"... قررتي وزوجك ما عنده أدنى خبر..أميرة فكري زين ترى قرارا مثل هذا يمكن يدمرك ويدمر حياتك... وقرار الانفصال تراه مو سهل وخاصة بمجتمعنا اعتقد ما يحتاج أذكرك أكثر... فكري يا أميرة زين ولا تتركين للشيطان مجال يدخل بحياتكم.."سرحت بكلامها وما تعرف إذ كلامها صح أو لا..وشافت منال راحت عنها ومبين أنها مقهورة بالحيل من كلام أميرة"...[/

خوله بعصبية: يمه من صدقك تبغون تطاوعون أميرة باللي تقوله...

حصة بتعب: أنتي صاحية أميرة ما تعرف تفكر ولا تعرف مصلحتها زين وحتى ما تبغى تسمع مني أي شئ وأبوك صاف معها..

شماء: وشلون معها يعنى راضي باللي قالته..

حصة بجدية: لا طبعا بس يقول خلوها على راحتها للين ما تهدى... خوله أنتي متأكدة باللي قلتيه أكيد هذا سبب الخلاف....

خوله بتوتر: يمه الله يهديك هذا اللي قاله متعب لي وش تظنين يكون اجل..

حصة بتفكير: ما أظن كل هالزعل عشان سفر طيب يمكن الرجال يسافر للمشاغل مو مثل ما تظن...

شماء: يمه هي أبخص بزوجها...

حصة بضيق: انتم أخواتها وحاولوا معها وأقنعوها يمكن تسمع كلامكم... معي عمك اصمخ ما تسمع ولا كلمه..."دخلت عليهم واستغربت لسكوتهم المفاجئ والأنظار كانت متجهه عليها"....

أميرة تحاول تبتسم: وشفيكم سكتوا لما دخلت ليكون مسوين مؤامرة ضدي...

شماء تغير الموضوع لما شافت أمها بتقول شئ: إلا وش أخبار الدراسة والمشورة معك..

أميرة تجلس بتعب: خليها على ربك مشورة تهد الحيل...

حصة بقهر: أنتي اللي حديتي على نفسك وش فيها لو رجعتي لبيت زوجك ما كان هذا حالك الحين.."حاست بفمها وناظرت للجهة الثانية وفضلت حصة تقوم"..

شماء: يمه وين رايحه..؟؟..

حصة تناظر لأميرة اللي صدت للجهة الثانية: أروح أحط الغداء.."راحت وهي تناظر لخوله وكأنها تقول عليكم فيها"...

خوله تبتسم: خالتي منيرة وجدتي يسلمون عليك ومشتاقين لك كثير...

أميرة: الله يسلمك ويسلمهم وحتى أنا مشتاقة لهم كثير...

شماء: خلاص اجل وش رأيكم بعد المغرب ننزل للرياض ونروح لبيت خالي ونتعشى هناك وبالمرة تشوفينهم ويشوفونك...وبعدين.."تغمز لها"...ما اشتقتي لغرفتك..

أميرة ببرود: لا ما اشتقت لها ولا أبغى اشتاق لها وإذ تلمحين لشئ أبشرك ماله مكان بقلبي ولا يهمني باي شئ... سمعتي...

خوله: الله يهديك يا أميرة بسم الله وش اللي جاك عليه عين وصابتكم استهدي بالله ولا تتدخلين الشيطان بينكم...

أميرة بعصبية: الشيطان من زمان داخل بيننا لكن ما حسيت فيه ولما وعيت طردته ما تشوفينه برا الحين..

شماء: هذا كلام يا أميرة وش اللي جاك أنتي والله مرات ودي ابكي على متعب مو لك...

أميرة بقهر وسخرية: ابكي بس بالنهاية راح تندمين مو عليه على دموعك اللي نزلت على شئ ما يسوى..

خوله بقهر: لا أكيد انهبلتي.. أميرة.. ترى مو عيب ولا حرام أن الواحد يغلط ما تشوفين نفسك وش صايره التعب مأكل أكل استهدي بالرحمن وروحي معنا...

أميرة تقوم وبصوت عالي: لا.. ما راح أروح لو وش يصير مو يكفى عليكم قتلتوني بالبداية مو حرام عليكم خلوني أعيش للأيام الجايه خلوني لحالي لا احد يتدخل فيني وعلى فكرة ياليتك يا خوله تقولين للي راسلك أميرة ما عادت تبغاه القلب طاب منه.."طلعت وراحت لغرفتها وعالطول ارتمت بسريرها تبكي...يا ربي ما في احد يحس فيني الكل هامه أني ارجع وبس ما يعرفون الخنجر اللي غرز بقلبي ليه يحسسوني أنا الغلطانة ليش ما يشفونه ليش ما يقولون الغلط منه مو مني...يارب فرج لي يارب.. ومع البكاء والشهقات اللي صادرة من أعماق قلبها المذبوح ما حست إلا بسابع نومه"..

حصة بتعب: والله يا يمه تعبت معها ما تسمع لي كلمه واللي متعبني أكثر تحط كل شئ على راسي...

أم عبد الرحمن تهديها: معليش يا حصة ترى هم البنات للممات بس تحمليها وهي معذورة البنت تبغى تكمل دراستها...

حصة بغرابة: تكمل دراستها وش دخل الدراسة...!!..

أم عبد الرحمن: مساعد يقول متعب معند ما يبغاها تدرس...

حصة: وخوله تقول أن سفر متعب اللي كل بعد يومين هو اللي خلها تزعل وتطلع من البيت...

أم عبد الرحمن بتفكير: تدرين عاد يا بنتي السالفة مو كذا... السالفة اكبر...

عزيزة: انتم لا تتدخلون بينهم حصة الله يهديك خلي أميرة تحل مشاكلها بنفسها لا تضغطون عليها...

حصة بقهر: الحين خوله تقول لي سالفة ومساعد يقول لامي سالفة وش شايفينا يلعبون علينا..

عزيزة: لان ما يبغونكم تتدخلون هم أبخص بمصلحتهم وخلهم يتحملون لو مرة مشكله ويحلونها...

خوله: طالع.."وقف على صوتها ووقف بملل قدامها"..

مساعد ببرود: شوفت عينك تبغين شئ..؟؟..

خوله تقدمت عنده: إيه أميرة يا مساعد مضيقة صدر أمي وأبوي حالها ما يسر عدو ولا صديق..

مساعد: يعنى وش نسوي لها متعب ما قصر وأختك عنيده على أمك..

خوله بقهر: وش دخل أمي الحين..

مساعد: خوله ما فكرتي كل اللي صار لكم عقوبة من الله..

خوله بدهشة: عقوبة..!!..حنا وش سوينا وليش تقول كذا..؟؟

مساعد: يمكن حاولتوا بكل الطرق تتقربون لنا وفعلا زوجتوا اخوي لأختك وتزوجتك عشان حلالكم وجت سالفة أختك وربي عفسكم عفيسة عشان تلهون في مصيبتكم..

خوله بقهر: ما اسمح لك يا مساعد تقول شئ من عندك وليش ما تقول هذه عقوبة لكم على نواياكم معنا وحنا مالنا ذنب باي شئ تقولونه.."ناظر لها بغرور وطلع وتركها مصدومة من كلامه كل يوم اكتشف أشياء مو شئ عن هالادمي المغرور هو ليش حاط دوبه بدوم أمي وش فيه علينا وكانه متشمت فينا وهو ما يدري يتشمت باخوه "...

انزعجت من الصوت كل شوي يطّول اوووف وينهم هذولاء ما يسمعون باب الشارع يطق قامت على حيلها تطرد النوم بعيونها شافت الغرفة ظلام شكلنا دخلنا على وقت العشاء قامت بتعب وناظرت نفسها بالمرايا مسحت على عيونها المنتفخة وانتبهت على صوت التلفون طلعت من الغرفة وما سمعت أي صوت وأول ما نزلت شافت أبوها داخل من برا...

محمد يبتسم: هلا والله بأميرة وشلونك الحين..؟؟..ترى أخواتك راحوا مع أمك للرياض..

أميرة تبتسم بتعب: الحمد لله... طيب ليش ما رحت معهم؟؟..

محمد يحوطها بيديه: مواعد لي رجال الحين بيجي... ما ادري يا بنيتي تقّوين تجهزين القهوة والشاي..

أميرة تبتسم بتعب: إن شاء الله تأمر أمر..."راحت للمطبخ وتسمع أبوها يدعي لها بالهداية"...

دخلت الملحق وحطت الترامس على الأرض وقبل ما تطلع تواجهت معه وهذه أول مرة تشوفه من بعد أخر ليلة... شافت بوجهه ابتسامته اللي تنور وجهه وعيونه اللي تلمع بالحب... قصدي بفرح نزلت عيونها ماحبت تواجهه ولا حبت تشوف عيونه اللي أسرتها من أول نظرة أما متعب مو قادر يضبط نفسه ولا هو عارف كيف يبدأ أخيرا شفت أميرتي لكن هي ليش كذا معقولة اللي صار يسويها كذا هذه مو بشرة أميرة الناعم الصافية اللي تشع منها البياض ولا هذه عيونها اللي ترسم بالفرح والسعادة وتبدلت بحزن ودموع وهالات سوداء حولهن ولا هذه الصحة اللي كانت محليتها ليش يا أميرة تسوين بعمرك وبعمري كذا يعنى أنا انقص عنك وقطع عليهم أبو طلال...

محمد: حياالله بمتعب تفضل... عاش من شافك...

متعب يتقدم معه ويجلسون: زاد فضلك عاشت أيامك..."ناظر لها وللحين ساكنه بمكانها.."...

محمد: ابوي أميرة تعالي ليش واقفة...

أميرة بخجل: لا يبه عندي شغل لازم أخلصه عن أذنك..."طلعت تحاول تهدي نفسها وش جايبه ليكون هذا الرجال اللي يقصده ابوي كان قالي من الأول ليش يخبي حطت يدها على جبينها تفرك بخفه وسكرت عيونها بتعب..."...

متعب بحنان: وش أخبارك أميرة.."رفعت رأسها وشافت الابتسامة اللي محليته.."...وش أخبارك وأخبار دحومي...؟؟...

أميرة وقفت تناظر له باحتقار: أحسن منك بمليون مرة..."تصدى للجهة الثانية".. نعم وش أخدمك فيه...؟؟..

متعب تقرب منها: أبغى أميرة...أميرة اللي فقدتها وكأني فقدت روحي...امـ.....!!...

أميرة قاطعتها: فقدت ايش..؟؟..على مين تلعب يا متعب اسمع ترى عارفه كل شئ ما يحتاج تتنكر بقناع البراءة كل شئ ظهر وبان...

متعب بقهر: بعرف شئ واحد أنتي وشلون تصدقين كلام مثل هذا عني... أميرة لازم تسمعيني لازم نتفاهم لدرجة هنت عليك...؟؟..

أميرة بعبرة مخنوقة وبين دموعها: مثل ما هنت عليك... والبنت ما جابت شئ من عندها لو أنها قالت كلام قلت يمكن لكن إذ دعمت بصور ورسايل من رقمك القديم تظن أني بكذبها.."بصوت عالي ومرتجف"...والحين عرفت سبب تغير رقمك لان ضميرك ما طاوعك تخوني وزين طلع لك ضمير ولا تنسى يا أستاذ... مرة ذكرت اسم الحبيبة.... هند.... على لسانك و قدامي كنت بوقتها مريض ونويت اصحيك من غيبوبتك لكن رحمتك وقلت الأيام كفيلة أن اعرف كل شئ وفعلا ربي ما رضا علي أعيش طول عمري مخدوعة معك وكشف لي كل شئ وأرسل لي....... هند.."ناظرت له باشمئزاز من فوق لتحت"... طحت من عيني ولا عاد لك مكان بقلبي ولو سمحت ما أبغى منك غير ورقتي انتظرها....

متعب بدهشة: ورقة...!!..أي ورقة؟؟..

eأميرة تناظر له بتحدي وعيون مليانه دموع: ورقة طلاقي... وإلا ما تعرف أي ورقة بعد..."عالطول طلعت فوق وانهارت دموعها بصمت وتركت متعب بحالة من الذهول والصدمة من اللي يسمعه"....

""" الجزء السادس عشر """

سلمان بدهشة: نسيت..!! متعب كلمتك من مدة بالأخير تقول نسيت.."انتظر يقوله شئ لكن مارد وبضيق"... خلاص ما يحتاج تفاتح أختك عرفت الرد..

متعب بضيق: سلمان... الله يخليك لا تقول شئ من عندك ولا تعتبره رفض والله ما فاتحتهم الله يخليك اللي فيني مكفيني...

سلمان بغرابة: ليش عسى ما شر...!! صاير شئ لا قدر الله..؟؟...

متعب يتنهد بضيق: إلا أشياء يا سلمان... وضعي مع زوجتي متدهور وأنت تفاتحني بموضوع أختي..

سلمان بخوف: عسى ما شر يا متعب فضفض قول اللي بخاطرك وأنا أخوك...

متعب: وش أقولك أو ما أقول باختصار المرأة تبغى الطلاق...

سلمان بتعجب: وشوووو الطلاق..!!.. ليه.. "ناظر له متعب بعيون حزينة: ما قلتلك يا سلمان هالهند هذي هدمت حياتي واللي خايف منه صار...

سلمان بدهشة: هند...!!!..طيب ما قلت لي وش صار بالضبط.." قاله كل شئ صار من يوم الحفلة للين أخر جملة قالتها.."...

سلمان بعصبية: وليش ما كلمت هند ولعنت جدفها اقل شئ ترد شوي من اعتبارك...

متعب بضيق: أي اعتبار الله يهديك السالفة صارت بيدين زوجتي... والحين كل شئ عرفته ما ادري وشلون أتصرف فكرت ادخل أختي بالموضوع لكن ما راح تسوي شئ كل اللي قلته تبعد عن هند... سلمان اللي يخليك لا تزعل مني والله الظروف واقفة ضدي هالايام...

سلمان يواسيه: افااا عليك يا أبو عبد الرحمن هونها وتهون وبإذن الله الأمور تتصلح بس طول بالك وأعطيها فرصة وصدقني إذ هي تحبك راح تتخطى هالامور... وبعدين اللي فيها صدمة وان شاء الله تتخطها..

متعبد بغرابة: صدمة...لا تقول مني...

سلمان يبتسم: شوف يا متعب... كل حرمة بالدنيا تشوف زوجها ملاك وعمره ما خطئ وأنت مثل أي واحد له الحق يحب ويعيش حياته بس هااااه بالعقل... وصدقني يا متعب زوجتك تحبك عشان كذا مصدومة وتتمنى يكون حلم أو إشاعة أو أي شئ بس عشان يرجع لها الملاك مثل ما رسمته بعقلها..."تنهد متعب ياليت يصدق كلامك يا سلمان والله تعبت على فراقك يا أميرة متى تحنين علي وتعطيني فرصة أقولك اللي بقلبي....متى...؟؟؟

طلع من المقهى بعد ما تركه سلمان وأول ما ركب السيارة جت أغنية على FM ترسم حاله من بعد أميرة وسرح مع كلماتها.."...

في قلبي شئ بأقوله وأبي تسمعني للأخر..

أنا كل لحظة لك أوله تعب قلبي وهو صابر أبتقرب أنا لدنياك وتصير عيونك أوطاني

وأعيش أحلى العمر وياك وأنسى جنبك أحزاني

يا كل مناي هناء دنياي

احبك من قبل ما اعرف معنى الحب والغيرة

حنانك سر حبي لك حنانك ما أبي غيره

من أول ما تلاقينا وقلبي صار في يدينك

نسيت العالم وجيتك أدور حلمي في عينك

أبتهرب من أشجاني وأعيش بقربك أزماني

وكل ما ينتهي عمري بحبك ينولد ثاني

بقدم لك عطايا الحب حنيني لهفت سنيني

اخذ اصغر هدايا الود اخذ عيني اخذ عيني

يا كل مناي هناء دنياي...

وقطع عليه تفكيره سيارة كانت مسرعه جت من جهته لكن لطف الله وستره نجا من حادث ما يعلم مين بيروح فيه... دخل البيت وحصل أمه جالسه تنتظره وقبل ما يطلع طلبت منه يجلس معها ما حب يرفض لها أمر وخاصة أنها منتظرته للوقت هذا... جلس معها للين ما حققت معه طلع فوق عشان يرتاح وكان متضايق انسدح بالسرير وسرح بخيال أميرة ورده فعل أمه بعد ما عرفت كل شئ صار بينهم...

أما هي ما جاها نوم حست أنها مخنوقة وقررت تنزل بالحوش تشم شويه هواء... وقفت بوسط الحوش تناظر للسماء بنجومه الموزعة تنهدت بتعب وجلست على الدرجات المدخل ورجع شريط حياتها من أول ما دخلت أمها تبلغهم على موعد الخطبة ورده فعلها وكل شئ...

""" حصة: متعب... ولد اخوي خطب أميرة مني...

محمد بغرابة: متعب... متى صار هالكلام...؟؟..

حصة: قبل شوي كنت عندي منيرة أزورها واخطبوها مني...

أميرة بضيق: يمه وش تقولين أنتي...

حصة: أقول اللي سمعتيه وبصراحة أنا عطيتهم كلمة...

محمد: وشلون اعطتيهم كلمه... البنت مالها رأي ولا حتى أب تأخذين بشورها...

حصة: محمد أنا وأنت واحد وأكيد تحب لبنتك الأفضل ومتعب ما فيه منه والكل يتمنى أشارة منه جت على بنتك...

محمد وقف بقهر: وحتى أميرة الكل يتمنى أشارة منها..

حصة بعصبية: يعنى وشلون..؟؟..أقولهم أبوها مو موافق وتكسر كلمتي..

محمد بضيق وهو طالع من المجلس: خلاص دامك سويتي اللي براسك ليش تقوليننا..."وطلع وتركهم"..

أميرة بضيق: يمه...

حصة ببرود: وش عندك بعد.. ليكون لك كلام ثاني...

أميرة بقهر: أكيد يمه...ما أبغى أتزوج...

حصة وقفت بعصبية: وش تبغين اجل...

أميرة تصد للجهة الثانية: ولا شئ...

حصة: اسمعي اميرووووة خلاص الجماعة وأعطيتهم كلمه... كلام بالموضوع ما أبغى...

أميرة بعيون حزينة مليانه دموع: كل هذا عشان حلالكم.. تبيعين بنتك عشان نصيبك من الورث...

حصة بكل عصبية: بـــــس....""""

مسحت دمعه نزلت منها وحطت يدها على خدها وابتسمت بحزن وجت بمخيلتها كلامات قد قرتهم لأنها ترسم حالها....

ما عاد تفرق معي زعلت وإلا رضيت...

ياللي من أول هناي اليوم عنك اغتنيت

دور لي غيري يبيك لا غبت يبكي عليك...

مليت كثر الجروح طولت مخدوع فيك..

أنا عرفت الهواء جربت نار النواء

أنا أحب بضمير حرام نبقى سواء.

لا تقول قلبك ملاك ما حب قلبك سواء...

أنت أناني كثير وأنا ذبحني غلاك

ما عدت أنا الأولي لا عاد تسال علي...

بالغدر مالك مثيل كذاب وقلبك خلي

هذا جزاء من يخون تنساه حتى العيون...

أخر كلامي معك لولي أنا من تكون

الكل واقف بالممر ينتظرون خروج الدكتور يطمنهم على حال أمهم اللي طاحت عليهم وشافتها الشغالة ونادت على هاجر ومتعب.... جالس مساعد على أعصابه ويحرك رجله بتوتر وتفكيره مو معه مع الانسانه اللي داخل وش جاها...؟؟ أما متعب اللي كل شئ أصبح ضده مو عارف وشلون يفكر أو وش يسوى التفكير انشل من رأسه مو قادر يجلس اخذ الممر رايح جاي وكل تفكيره بالمسكينة اللي من عرفت قرار الانفصال... دخل فهد وبلقيس ومعهم هاجر اللي حالها أسوء من حال بلقيس يبكون على أمهم اجتمعوا الأخوان على بعض يهدون هاجر اللي ذبحت نفسها وفهد ما قصر في محاولة تهديه بلقيس طلع عليهم الدكتور وعلامات وجهه ما تبشر باي شئ غير....

مساعد بخوف: خير طمنا يا دكتور...

متعب: وش فيها أمي..؟؟..

يتبع ,,,,

👇👇👇

تعديل المقال