رواية حياتي عذاب -20
عرفت قرار الانفصال... دخل فهد وبلقيس ومعهم هاجر اللي حالها أسوء من حال بلقيس يبكون على أمهم اجتمعوا الأخوان على بعض يهدون هاجر اللي ذبحت نفسها وفهد ما قصر في محاولة تهديه بلقيس طلع عليهم الدكتور وعلامات وجهه ما تبشر باي شئ غير....
مساعد بخوف: خير طمنا يا دكتور...
متعب: وش فيها أمي..؟؟..
الدكتور: تحتاج للملاحظة الدقيقة وحاليا وضعها حرج والباقي على العزيز القدير..."راح عنهم والدنيا ضايقه بهم على اللي سمعوه... وجلسوا يدعون ربهم عسى إن شاء الله تتحسن حالها..."...
فهد بهمس: عمري يا بلقيس.. خلينا نروح ونجيها على بكرة الصبح..
بلقيس بصوت مبحوح: ما اقدر يا فهد اترك أمي وهي بالحال...
فهد يضغط على يدينها: وإخوانك وين راحوا... مشاعل تدق أكثر من مرة وتقول عهد بس تصيح...
بليقس تمسح دموعها: ما اقدر... يا فهد والله ما اقدر.."وصاحت تنهد فهد ولمها له وبدء يقرأ عليها آيات تهديها"....
مساعد وقف عندهم: فهد اخذ بليقس وهاجر خلهم يرتاحون ترى مو زين لهم يضلون للوقت...
بلقيس بصوت مخنوق: لا بجلس عند أمي...
مساعد يجلس على رجوله بجنبها: حنا موجودين... وأي شئ يصير بنتصل عليكم... لا تنسين عيالك يبغونك وجدتي لوحدها هناك... أنتي روحي مع فهد وبكرة الصباح تعالوا عشان الغالية روحوا الحين... "هزت رأسها بأيه وراحت لأختها اللي ذابحه روحها بالصياح على أمها لمتها وطلعوا من القسم مع فهد"....
انتشر خبر دخول أم مساعد بالمستشفى وصار لها يومين على حالها ما تغير ساكن.... الكل واقف معهم بالمستشفى إلا أميرة اللي من عرفت وهي بس تبكي ونفسيتها بالنازل وكانت شماء والبنات عندها...
شماء: مالك نية تروحين تزورين خالتك.....؟؟..
أميرة تتنهد بضيق: أكيد بزورها بعد ما تحس باللي حولها الله يعافيها يا رب ويقومها بالسلامة...
شماء بتردد: آمين..المفروض عشان خاطر متعب اللي حاله يكسر الخاطر تروحين وتوقفين معه وتشدين من أزره.."شافت نظراتها الحزينة لما جابت طاريه"..أميرة للحين قلبك ما حن عليه يكفى هجر ارحمي ما في الأرض يرحمكم ما في السماء...
أميرة: وليش هو ما رحمني الله يخليك يا شماء لا تقولين شئ أنتي مو عارفته... وين بناتك ؟؟.. ما اسمع لهم صوت...!!...
شماء فهمت قصدها من تغير السالفة: ما ادري يمكن بالحديقة يلعبون إلا بسالك وش أخبار سارة..؟؟..
أميرة ببرود: بخير..مشغولة بالعريس وما أعطتنا وجهه للحين..
شماء: شكلها غاطسه بالعسل طيب ووليد وش أخباره بعد ما تزوج..؟؟...
أميرة بنرفزه: ما دري عنه وش شايفتني عايشه معهم 24 ساعة أروح ارتاح أحسن لي.."تركتها بحيرتها يا بعد عمري يا أختي وهو اللي جاك شئ سهل.. مرة أميرة تغيرت نفسيتها معقولة الحمل متعبها ومخليها ما تتحمل أي كلمه نقولها أو عشان مشكلتها مع متعب الله يكون بعونك ويكون بعون زوجك ويهدي سركم ويجمع شملكم من جديد.."...
مساعد بضيق: جلطة...!!...
الدكتور: حبينا نبلغ لأنكم أولادها ولازم تعرفون وش مع أمكم...اعتقد هذه المرة الثانية صار معها جلطة...
مساعد: ايه يا دكتور بس المرة الأولى كانت خفيفة ولله الحمد...
متعب بقلق: وكيف حالها الحين..
الدكتور: يا أخ متعب الوالدة بخير لعد فضل الله وتحت الملاحظة وبعد 48 ساعة كل شئ راح يبين معنا..
متعب بقهر: وش اللي يتبين..؟؟..
مساعد تدخل: متعب هدئ شوي..
متعب بنرفزه: ما تشوفه وش يقول..؟؟..
الدكتور: أخ متعب اسمعني للأخر الجلطة اللي تعرضتها الوالدة خطيرة على صحتها وخاصة أنها كبير بالسن وبعد ما تتعدى 48 ساعة كل شئ راح يكون بخير بس هي مسالة وقت وكل هذا بيد العزيز الحكيم وانتم ادعوا لها تتعدى هالمرحلة...
مساعد بضيق: وكم من الوقت تعدته للحين..؟؟..
الدكتور بأسف: ما اخبي عليكم... صار لها 42 ساعة..
متعب بخوف يناظر لآخوه: يعنى باقي 6 ساعات والحل يا دكتور..؟؟..
الدكتور بنظرة أسف: الحل مو بيدنا أدعوى لها.. "عالطول طلع متعب من مكتبه وراح سيده للممر اللي كان الكل واقف يبكي بصمت واللي معه قران يقرى وبعضهم يدعون بالسر على الطيبة اللي بالغرفة اللي مو حاسة بأحد تمنى تكون أميرة معه بالمحنة هذه تسانده وتشد من أزره كان محتاج لها كثير تسند على الجدار وعيونه بالسقف يدعي بسره وقلبه وروحه مع اللي بالداخل...
بلقيس بصوت مبحوح: متعب وش قال الدكتور..؟؟.."ما رد عليها غير يصد بوجهه للجهة الثانية".. متعب ريحني الله يخليك وش قال..؟؟..
متعب يتنهد بضيق: ادعي لها يا بلقيس ادعي لها.."ما قدرت تسمع أكثر وبكت على أمها الغالية أما هاجر اللي جالسه بجنب عمتها حصة تقرى عليها القران كانت منهارة من اللي تسمعه... هذه اللي كانت خايفه منه تفقد أمها وتظل وحيدة كانت شهقاتها غير مسموعة إلا للشخص اللي واقف مقابلها ويناظر لها بكل حب وحنان ما قدر رياض يشوف الحال اللي عليه هاجر وده يخفف عنها وده لو يضمها ويقرى عليها القران وده يواسيها باي طريقة المهم تظل قريبه عنده... حس بضربة خفيفة من طلال وكانه فهم عليه نزل رياض عيونه...
حصة بحزن: يمه طلال..."جاء ووقف بجنب أمه بالجهة الثانية"...
حصة: اتصل على البيت وقل لشماء تظل عند أميرة احتمال ننام عند خالتك عزيزة وأنت ارجع لهم بعدين...
طلال: إن شاء الله يمه..."طلع من المكان كله وكان نظرات متعب تراقبه كان وده تكون موجودة"..
شماء بقهر: لا ما اقدر أنام واترك بيتي وبعدين خوله بتجي خلها تجلس..؟؟..
طلال بنرفزه: والله هالكلام ما تقولينه لي قوليه لامي ولا تنافخين علي كأني الملوم..... والله..
شماء: طيب طيب أنا بتصل على أمي وأقولها... قلي وش أخبارها مرة خالي..؟؟..
طلال بحزن: ادعي لها يا شماء وعسى ربي يقومها بالسلامة... وقولي لأختك العنيدة تترك العناد وتجي توقف بجنب زوجها وتشوف خالتها اللي ما يعلم فيها إلا ربها...
شماء: طيب بقولها وقل لامي اللي قلته...
طلال: ما راح أقول شئ عندك أي معارضة دقي على أمي وقوليلها..باي.."سكر بسرعة قبل ما تقول أي شئ"...
أميرة تمسح دموعها: وش فيه طلال..؟؟..
شماء بقهر: يقول أنام عندك لان أمي بتنام عند خالتي عزيزة...
أميرة: طيب ما فيها شئ نامي ومن أصبح افلح..
شماء بنرفزه: لا ما اقدر اترك بيتي وماجد الليلة بيجي وما يحصلني.."لاحظت على أختها السرحان"...أشوفك ما سألتيني على خالتك...؟؟..
أميرة بحزن: الله يقومها بالسلامة...
شماء وقفت بعصبية: أنا بعرف شئ واحد وش هالبرود اللي فيك... يا أختي حرام عليك خالتك طايحة بين الحياء والموت وأنتي ولا هامك استحي على وجهك يا أميرة واتركي الأنانية والمشاكل مع متعب بجهة وزيارة خالتك جهة ثانية... والله لو منتي حامل لاتصل على ماجد ونسحبك سحب بدل ما أنتي جالسة وتمسحين دموعك روحي لها وتطمني عليها... ما توقعت بيوم من الأيام أن أختي يكون قلبها قاسي بالشكل هذا ليش يا أميرة تسوين بنفسك كذا ترى الدنيا ما توقف بالحال اللي أنتي فيه فكري بعقلك مو بقلبك وأنسى مشاكلك وتذكري الحرمة الطايحة بسبتك وسبت عنادك.."تركت أختها وهي تبكي أنا أنانية وما أفكر غير نفسي الكل يقول كذا ليش هم يفكرون بمصلحة الغير ولا فكروا فيني مو بنتهم ليش ما فيه احد يحس باللي أحسه الحين الكل يلومني وأنا المذنبة بس كلام شماء صحيح خالتي ما شفت منها مضره... ناظرت لربها تستنجد فيه.. يا رب ارحمني برحمتك واغفر لي زلااتي يا رب نور لي طريقي وأشفى مرضاك يارب... وبكت من جديد.."...
نجود: لمى..
لمى رفعت رأسها من الكتاب: هاااااااااااه..
نجود بقهر: هااااااه في عينك الناس تقول نعم.. سم.. هلا.. مو هاااااااااه تقل بقرة..
لمى بملل: الحين وش تبغين..؟؟..
نجود: طلب صغير..."تناظر لها ببرود"...انتبهي لنواف ومي بروح مع سلطان للمستشفى..
لمى: نجود... الحرمة للحين بالعناية ما تدري بأحد ليش تروحين بس تكمله عدد..
نجود بنرفزه: بلاك ما تعرفين الواجب... حبيبتي لمووو اقل شئ نوقف بجنب بنات خالي وإلا وش رأيك..؟؟..
لمى بحزن: الله يكون بعونهم ويقوم أمهم بالسلامة...
نجود باهتمام: لمى ما قالتك أميرة ليش زعلانه..؟؟..
لمى بقهر وتسكر الكتاب بقوة: شوفي يا نجود إذ شفتيها اسأليها... شئ خاص فيها ليش أتدخل؟؟..
نجود: ما فيها شئ مو انتم صديقات وتمونون على بعض
لمى: نمون إيه... بس مو بكل شئ..
نجود وقفت: طيب خلاص اكلتيني أعوذ بالله.."راحت عنها وسرحت لمى بأميرة اللي كثر غيابها يوم تجي و10 لا الله يكون بعونك يا أميرة.. وش اللي صار لك معقولة بينكم خلاف وشكله كبير بعد... وش صاير بينهم يا ترى...؟؟؟"..
أم عبد الرحمن بتعب: يا يمه يا خوله ما أبغى شئ الله يرضى عليك..
خوله تبعد ملعقة الدواء عنها: يا جدتي كذا راح تضرين نفسك الله يخليك لا تهملين علاجك..
أم عبد الرحمن بحزن: يا بنيتي ما بقى شئ عشان أعيش له..
خوله تبوس رأسها: أنتي الخير والبركة يا جدتي وعسى ربي يطول بعمرك... الحين اشرب دواءك ترى مساعد موصيني عليك عشان خاطري.."ناظرت لها بحنان وشربت"...بالعافية...
أم عبد الرحمن بصوت كسير: يعافيك... أقول يمه خوله ما قالوا شئ عن منيرة..؟؟..
خوله بحزن: إلى الآن ما احد قال شئ وعسى ربي يقومها بالسلامة...
أم عبد الرحمن : الله يشافيها ويهدي سر أختك والله ما هقيت منيرة بتطيح علينا وياليت ما لزّمت عليها تلزم على متعب يقولها كل شئ كان ما صار اللي صار بس الله يشافيها....
خوله تلمها: يا جدتي كل شئ مقدر ومكتوب واللي مكتوب على الجبين تشوفه العين... وحال أميرة ومتعب ما راح يطول هي أزمة وبإذن الرحمن راح تعدي بس محتاجين وقت يبعدون عن بعض ووقت عشان يفكرون..
أم عبد الرحمن بعصبية: وش يفكرون فيه بالطلاق... الظاهر أختك أنضرب بمخها...
خوله تهديها بحزن: لا يا جدتي.. أميرة أكيد مأخذه موقف من متعب وما قالت كذا إلا من حرتها وبعدين أميرة مستحيل تبعد عن متعب وبينهم طفل وحب...
أم عبد الرحمن تتنهد بتعب: أي حب وأي طفل دام أختك برأسها شئ أكيد بتسويه...
خوله بتردد: ومتعب يا جدتي وش كان رده...
أم عبد الرحمن بحزن: رده انه شال أمه وودها للإسعاف والله يكون بعون الجميع...
من فرحه ما سمعوه عالطول متعب سجد شكر لله ووقف ضمه بكل قوة وشاف بعيون مساعد دموع متجمعه أول مرة يشوفها بعيونه القوية والحادة... الكل كان خايف عليها وخايف ما تتعدى مرحلة الخطر وبلغهم الدكتور أنها تحت الملاحظة...
مساعد: يعنى يا دكتور ما نقدر نشوفها..؟؟..
الدكتور: إلا أكيد بتشوفوها لكن من غير أي كلام أو صوت ولمدة دقيقتين...
متعب بفرح: متى نشوفها...؟؟..
الدكتور: راح أبلغكم يعنى بعد ساعة بالقليل... وحمد لله على سلامة الوالدة عن أذنكم...
محمد: حمد لله على سلامة الوالدة يا مساعد ومتعب...
مساعد يبتسم: الله يسلمك يا عمي..
متعب: بروح ابلغ عماتي وأخواتي.." راح عنهم يبشر أخواته وعماته وخواله والكل فرح وحمد ربه على تعدى مرحلة الخطر... دق مساعد على خوله يبشرها على الأخبار اللي تثلج الصدر... بعد ما دخلوا عيالها عندها وتطمنوا أنها بخير برغم ما تحس بأحد.. رجعوا لبيوتهم يرتاحون... راح مساعد يأخذ خوله اللي كانت عند أميرة اللي وصلها الخبر وفرحت من قلبها وحمدت ربها على سلامه خالتها الطيبة... وبما أن محمد وطلال بالطريق وحصة تنام عند عزيزة لين بكرة على الأقل تطمن على مرة أخوها... وخوله ما قصرت في محاولة أقناع أميرة لعلى يحن قلبها... لكن لا حياة لمن لا تنادي.. راحت خوله وبقت لوحدها جالسه تفكر باللي قالته حست بتعب وفضلت تطلع فوق دام أبوها وأخوها بالطريق لها... انسدحت على السرير تفكر... وتفكر... وتفكر... ناظرت للجوال ما تدري ليش حنت له... بس هو ما حن لي... ما يحبني كثر حبي له... أكيد بتقولون طولتها وهي قصيرة... بس خليكم مكاني إذا عرفتي عن ماضي زوجك وخاصة تحبينه وش بتكون رده فعلكم.. متعب أحبه لحد الجنون ما أتحمل أشوف احد غيري يشاركني فيه وشلون إذ صارت حبيبته من زمان.. يعنى كان يحبها أكثر مني... ويحلم فيها أكثر مني... ويراضيها إذا زعلت أكثر من مرة.... وما تهون عليه إذا بكت... بس أنا ايش بحياته..؟؟.. مجرد هامش على ورق... مجرد تعويض عن حبه القديم.. تعبت من التفكير دلوني..؟؟.. اضغط على نفسي وراحتي عشان واحد باع قلبي وروحي واشترى قلب غيري... تنهدت بحزن ومسحت دمعتها وحطت رأسها لعلى تنام وترتاح من التفكير... كان الوقت يمشى بطيئ تفكر بمتعب وباللي صار عليهم وأكيد الحين يقول لهند عن خططه الجديدة معها... وبخالتها الراقدة بخير والأيام اللي راح تقابلها مع أمها وما حست إلا وهي نامت.."...
مر شهر على اللي صار وحالة منيرة تحسنت جزيئا وفكرها مع ولدها متعب وأميرة... وأصبحت الزيارة مسموحه باي وقت الكل جاء وتحمد لها بالسلامة إلا شخص واحد تمنت جيته لكن مستحيل تقولهم تخاف احد يضغط عليها وخاصة أن الامتحانات شاغله العالم... على أن حصة دايم تقول أميرة ودها تجي بس عندها امتحان ما تدري هل هي صادقة بكلامها أو عشان تجبر بخاطري ولا أحس باي شئ... فضلت تحط بقلبها عشان ما احد يجبرها على شئ ما تبغاه وخاصة أنها تكون أم زوجها وما تبغى تحرجها...
هاجر بدلع وتلم أمها: يمه... يمه والله مشتاقة لك مووووت يله عاد يمه متى تطلعين..
منيرة تبتسم بتعب: الود ودي اليوم قبل بكرة بس هالاطباء ما ادري ليش ما يكتبون لي على خروج...
بلقيس: الحين يجي متعب أو مساعد ونقولهم يمكن يرأفون بحالنا...
حصة: وش معجلك يا منيرة تو الناس على خروجك أنتي ناسية أن جالستك بتطول واحتمال شهر أو شهرين
هاجر بغرابة: الللللله يا عمتي شهر ثاني لا تقولي والله البيت ما يسوى من غير الغالية.."باستها"...
بلقيس: حبيبتي ما احد يقدر يقرر غير دكتورها عمتي حصة وين عمتي عزيزة ما شفتها..
حصة: مرت ولدها ولدت وراحت تشوفها بنفس المستشفى بقسم الولادة..
بلقيس: ما شاء الله وش جابت..؟؟..
حصة: ولد..
بلقيس: اجل نروح نشوفها وش رأيك يا عمتي تجين عمي...
حصة وقفت: كنت انتظر خوله دامك بتروحين لها اجل أروح معك..."طلعوا مع بعض"...
منيرة بصوت كله تعب: هاجر أمي...
هاجر: سميه يمه..
منيرة تبلع ريقها: أميرة وش أخبارها...؟؟..
هاجر بأسف: يمه... أميرة بخير لا تشيلين هم احد الله يخليك يمه...
منيرة تتنهد بتعب: إذ ما شلت همكم أشيل هم مين.."سمعوا طق الباب لبست هاجر طرحتها وطلعت تشوف مين تفاجئت بطلال لوحده واقف وش يبغى؟؟.. لكن تفاجئت بالشخص اللي ورآه كاشف عن ملامح وجهه البريئة والتعب طاغي على ملامحها الحزينة.."..
هاجر بفرح مخلوط بدهشة: أميرة....!!!...
أميرة بنبرة مخنوقة: وشلونك هاجر.."سلمت عليها "...
هاجر تجرها من يدها: تعالي أمي تسال عنك.."أول ما دخلوا شافت خالتها بعيون كلها حزن وتعب منسدحة تطالع للسقف كأنها تدعي.. ولما حولت نظراتها وحطت عيونها بعيون أميرة قامت على حيلها والابتسامة تشع من وجهها "...
منيرة تمد يدينها لها وبصوت مليان فرح: هلا والله هلا بالغالية مرت الغالي هلا والله ببنتي أميرة
أميرة باست يدها وضمتها وبنبرة مخنوقة: حمد لله على السلامة يا خالتي...
منيرة بين دموعها: وشلونك يمه أميرة والله مشتاقة لك...
أميرة للحين ضمتها: أنا أكثر... سامحيني يا خالتي أنا السبب.."تبكي"... كله مني..
منيرة: لا مو أنتي السبب كل هذا مقدر ومكتوب... أميرة ليش تبكين..."بعدتها"...
أميرة تمسح دموعها: وشلونك الحين يا خالتي طمنيني عنك..؟؟..
منيرة تبتسم: دامني شفتك الحين بخير... أميرة من اللي جابك..؟؟
هاجر اللي كانت ساكتة بعد دخول أميرة وكاتمه عبرتها: طلال..!!.."التفتوا عليها وعلامات الدهشة مرسومة بوجوههم".. وش فيكم قلت شئ غلط.. "فجاءه يفتح الباب والابتسامة مرسومة بوجهه الجذاب لكنها اختفت أول ما طاحت عيونه عليها.... أميرة..... ما قدر ينطق لسانه باي حرف وكأن اللي تتكلم عيونه أما أميرة عالطول نزلت عيونها مو خجل منه هالمرة كارهه تحط عينها بعيونه عقب اللي صار وعرفت ماضيه وعن مكانتها عنده وياليتها ما عرفت وكانت هذه أول مرة يشوفها عقب أخر لقاء بينهم.."...
عزيزة تشيل ولد ولدها: الله يخليه لأهله...وش نويت تسميه يمه سلطان؟؟..
سلطان يبتسم: إلى الآن ما قررنا اسم معين..
عزيزة : حصة.. أمي ما جت اليوم..؟؟..
حصة تأخذ الولد منها: لسه ما جت وقالت بتجي مع خوله بس ما ادري ليش تأخروا..
مها بتعب: عذر الغايب معه يمكن انشغلت خوله بالبنات..
عزيزة تهمس لها بصوت واطي: وأميرة وشلونها للحين ما رجعت...؟؟..
حصة بأسف: وش نسوي البنت عنيده على أبوها..
عزيزة تبتسم: وليش ما تطلع على أمها..."ناظرت لها حصة بعصبية وجلسوا مع بعض عند مها"..
دخلت عليهم ومعها أخوها يبكي يبغى أمه وحصل عماته جالسات وحدة على الكمبيوتر والثانية معها كتاب التفتوا على صوت اللي يبكي وعالطول فتحت فوز يدينها لولد أخوها...
فوز تبوسه: وش فيك يا ريونا..مين اللي مصيحك؟؟..
رحاب ببراءة: يبغى ماما..؟؟.
فوز تحضنه: ماما يا حبيبي بالمستشفى جابت بيبي صغير...
لمى تضحك: ههههههههههههههههههههه بيبي وش عرفه بالبيبي...
فوز بقهر وتحط ولد أخوها بحضنها: اجل وش نقوله يا فالحة..
لمى بتكبر مصطنع: البزران يعرفون دادا مو.."تقلد صوتها الناعم"..بيبي..
فوز بقهر: تدرين الشرهه مو عليك على اللي معطيك وجه..
لمى قامت من السرير: وعلي أنا اللي جيت وأذاكر عندك قال ايش قال اشتقت لأختي اللي بتعرس وتولي عنا بعد شهرين.."سوت كش عليها"...مالت علي.."طلعت"..
فوز تمسح عيونه: خلاص حبيبي الحين يجي رياض ويودينا للبقالة ونشتري حلاو كثير اوكي.."هز رأسه بأيه"..رحاب وين أبرار...؟؟..
رحاب بحركة عفوية ودلع: تحت تذاكر...
فوز نزلت ريان من حضنها: يله نروح لأبرار ونذاكر معها وأنتي رحاب مين ذاكر لك..؟؟..
رحاب بعفوية: ما احد..!!..
فوز تهز رأسها بلا: يله أمري لله أذاكر لكم ما في احد غيري والست لمووو عندها اختبار يله قدامي...
"نزلوا عليها وكانت تشوف التلفزيون وتاركه كتبها ودفاترها بجهة قفلت فوز التلفزيون وطلبت منهم يدرسون عشان يروحون للسوبر ماركت مع رياض إذ جاء.."..
دخلوا المستشفى لوحدهم على أساس يدورون على موقف وأم عبد الرحمن نزلت عند البوابة قبلهم مع شغالتها وسبقتهم لهناك... وهم ماشين سمعوا صوت أنثوي ينادي على زوجها..
الدكتورة ريم: مبروك على كسب القضية وعسى ربي يعوضك الخير..
مساعد يبتسم: الله يبارك فيك ومشكورة دكتورة وما قصرتي لولا الله ثم أنتي ما كنت اعرف بالموضوع خير شر..
الدكتورة ريم: وش دعوة ما سويت غير الواجب ولا تنسى أنت صديق سعود واللي عزيز على سعود عزيز علينا.."ناظرت لخوله اللي ساكتة من أول ما وقفوا كانت ميتة قهر من مساعد"…عموما آسفة إذ عطلتكم..
مساعد: لا وش دعوة لا عطلتينا ولا شئ …
الدكتورة ريم: ما ادري وش تسمي اللي بقوله لكن تأكد انه فضول مني عسى ما شر جاي هنا ليكون للحين حاقد على الدكتور خلاص ما عندنا هنا دكتور مثله…
مساعد وكانه مرتاح معها: الله لا يجيبه ولا يجيب أشكاله الله يسلمك الوالدة تعبانه ومتنومه هنا..
الدكتورة ريم: سلامات وما تشوف شر وحمد لله على السلامة ما تستاهل والله..
مساعد: الله يسلمك"حس بخوله أنها مفوله عليه وكأن هذا اللي يبغاه"…
الدكتورة ريم: اجل عطلتك عن الوالدة وان شاء الله راح أزورها قريب...عن أذنكم.."راحت عنهم ومشى شوي وشافها ما تحركت"..
مساعد بلامبالاة: وش فيك بعد..؟؟..
خوله بقهر: كل هذا وما تعرف إذ فيني شئ أو لا…؟؟..
مساعد ببرود: خوله.... بلاش لعب دور الزوجة الغيورة وما يحتاج كل شوي أذكرك أنتي وش بالنسبة لي..
خوله بنرفزه: مساعد أنت وشو..؟؟.. من غير قلب ولا أحساس…
مساعد يتمالك نفسه: اعتقد مو الوقت ولا المكان المناسب وإلا وش تشوفين..؟؟..
خوله بقمة القهر: اللي أشوفه ترضى لو اكلم دكتور وكأني اعرفه من زمان ولا أعدك موجود معي ترضى أو لا..؟؟..
مساعد بنظرة عصبية: سويها يا خوله والله ذبحك على يديني حلال سامعة…
خوله بسخرية: سبحان الله تحللون لكم وتحرمون على غيركم إذ تغار على محارمك وما ترضى عليهم خاف على الناس تراهم عيال حمايل وسمعة…"راحت عنه وجلس بمكانه يفكر بالكلام اللي قالته كله صحيح ولها الحق تسوي كذا وأكثر تنهد وراح لقسم أمه لما حس بان وقفة غلط بالممر.."..
الكل فرحان ومبسوط بلم الشمل مثل ما قالت أم عبد الرحمن وأكثر شئ فرحان منيرة.. اللي مجلسة أميرة بجنبها والشخص الثاني أكثرهم فرح من أول ما دخل وما شال عيونه عليها... تمنى نظرة منها عشان تعرف مدى الشوق والحب اللي بداخله... انتبهت عليه بلقيس وابتسمت على أشكالهم واحد هايم والثاني مو ملقى بال لأحد... ضربت هاجر بخفة وأشرت على أخوها الهايم بالشخص الجالس ومقابله منزله عيونها وبوجهها ابتسامة لكنها مو مثل ما تعود منها ابتسامة حزن وقهر وألم مو طالعة من قلب صافي..
أم عبد الرحمن تحرجه: متعب وأنا جدتك شوي شوي على أميرة بتآكلها بعيونك الله يكفيها شر عيونك.."الكل ضحك عليهم وحست بالإحراج وقلب وجهها للأحمر"...
متعب بإحراج وبقهر: الله يهديك يا جدتي حتى بحلالي تحاسبيني فيه..
أم عبد الرحمن بخبث تناظر لهم: حلالك ومحنا قايلين فيه شئ عليك بالعافية بس خف شوي..
بلقيس تكمل عليهم: إيه والله جدتي من أول ما دخلت أميرة وعيونه عليها خف يا اخوي وش تقول بكرة عنك ما تقل شفت حرمة.."على أخر جمله ناظرت له وبوجهها ابتسامة سخرية وما أعجبته هالحركة لأنه فهم وش معنى الابتسامة والنظرة"...
متعب بقهر: لا ما شفت حريم... ولا قد عمري شفت غير "لم جدته".. أم عبد الرحمن الغالية الله يخليها لنا..
"وتبادلوا النظرات لكنه أصر ما يشيل عينه منها أما هي نزلتهم للحين الابتسامة ما فارقتها وش تقصدين فيها يا أميرة ونظراتك وش معناها"...
أم عبد الرحمن: الله يلعن إبليسك من ولد الحين أنا الغالية وأميرة.."تناظر لها بمكر"..وش تصير..؟؟.
متعب بنظرة حنان: هي مكانتها غير...هي الغالية.. أم الغالي زوجة الغالي اللي هو أنا…
بلقيس قاصده تحرجها: الله عليك يا اخوي ما هقيتك رومانسي لدرجة يا بختك يا زوجته يسمعك كلام حلو مو مثلي أنا…" قطع عليهم هالكلام دخول مساعد اللي أربك أميرة وتغطت بطريقة عشوائي وعفيسة... ما حصل خوله وين راحت هذه ..أنا ناقصك يا خوله... بعد ما سلم جلس بجنب أمه وعالطول وقفت أميرة ووقف هو معها وانتبه على اللي يضحكون عليه ناظر لأخواته بعصبية وكانه يتوعد لهم.."…
منيرة تمسك يدها: وين يمه أميرة ما شبعنا منك..؟؟..
أميرة تحاول تبتسم: تأخرت يا خالتي..
بلقيس: وين تأخرتي... ما سمعتي أمي وش تقول ما شبعناااااااا.."ناظرت لآخوها"..سمعتي ما شبعناااااااا منك يعنى مو بس أمي والناء تدل على الفاعلين ..
أميرة فهمت عليها: تعرفين الامتحانات بدت واليوم خير شر ما فتحت شئ.."التفت على خالتها وباستها"...ما تشوفين شر يا خالتي وحمد لله على سلامتك...
منيرة بأسف ونبرة حزن: أميرة بترجعين للبيت..؟؟..
أميرة ناظرت لمتعب اللي متلهف يسمع هالرد بالذات: أنتي قومي بالسلامة وان شاء الله يصير خير...
أم عبد الرحمن: أميرة ترى مكانك موجد بيننا واللي ما يبغاك.."تناظر لولدها بقهر"...ما نبغاه وماله مكان عندنا.."شاف أخواته يضحكون من كلام جدتهم له الله يهديك يا جدتي الحين أنا ما أبغى أميرتي أكيد جدتي خرفت"...
متعب حب يصلح الوضع: جدتي الله يهديك احد قال ما يبغى أميرة قولي مين هو وأنا انسفه نسف على وجه الأرض..
أميرة مشت وباست رأس جدتها: تأمرين على شئ يا جدتي..؟؟.."كان قريب من جدته لدرجة أنها شمت ريحه اللوشن اللي مستخدمه"...
أم عبد الرحمن بحزن: إيه يمه أميرة والله مشتاقين لك وأولهم اللي بجنبي ارجعي للبيت ولك اللي تبغينه وأنا أمك عشان خاطري وخاطر خالتك التعبانة..."ما قدرت تقول شئ غير كلمة الوداع بس ما احد يعرف هل هو الوادع الأخير أو لا.."…
متعب بقهر يناظر لأخواته: زين كذا الحين احرجتوها...
هاجر تغيضه: أحرجنها أو أحرجناك..
متعب بنرفزه: هاجر يا زينك ساكتة..وأنت احد يدخل بذي الطريقة على الأقل طق الباب... تنحن.. قل شئ...
مساعد بغرابة: وأنا وش عرفني أن زوجتك المصون هنا ولا احد بلغني وحتى أختها ما قالت أنها بتجي اليوم كان ما طبيت المستشفى خير شر..
بلقيس تغمز له: أقول متعب اشتغلت الغيرة…
متعب بقهر: أنتي اسكتي ويا أختك اللي بجنبك وحسابكم معي بعدين...
أم عبد الرحمن: راح شوف حرمتك الله يصلحك.. ووقت الحساب ليوم الحساب..." طلع ورآها وشافها واقفة مع أمها وخوله اللي تغطت بسرعة عن متعب وأميرة تعدل طرحتها... صدق ما عندي سالفة الحين أعاتب اخوي ولا شفت نفسي وأنا وش دراني أن خوله جايه مع عمتي"..
حصة بدهشة: أميرة مين اللي جابك..؟؟.
أميرة بتعب: طلال... يمه أعطيني جوالك بدق عليه..
حصة: وليش تدقين عليه انتظري لين ما نروح كلنا...
أميرة: يمه الله يخليك أنا تعبانه أبغى أروح ارتاح.. "وقف بجنبها وسلم على خوله وعمته"...
متعب يكلمها بعد ما سمع أخر جمله قالتها: أميرة وش فيك..؟؟..
أميرة متجاهله سؤاله: يمه هاتي جوالك..!!..
حصة بقهر: متعب يكلمك ليش ما تردين.." تنهدت بتعب وطلعت من الممر"...
متعب: تفضلي عمتي حياك ما فيه احد غريب...
حصة بقمة القهر: متعب يمه طول بالك عليها وإذ قدرت خذها معك للبيتكم لو بالقوة وش يقولون علينا الناس ما جلست ببيت أهلها أكيد بينهم شئ...
متعب يحاول يبتسم: يصير خير...عن إذنكم.."وطلع ورآها"..
خوله: يمه الله يهديك عاجبك الحين؟؟..
حصة بنظرة عصبية: لا مو عاجبني أختك يبغالها تربية من جديد لعنبوها زوجها يكلمها ولا ترد عليه كأنه مو موجود.. وأنا قاصدة أسوي كذا عشان تلجئ له مو لنا...
خوله: بروح أشوفها وبخليها تكلم طلال..
حصة مسكتها: ما تطلعين ولا تعطينها الجوال..
خوله: يمه الله يهديك يعنى هذا طريقة عشان ترجع أميرة لبيتها... يمه أميرة تبغى من يفهمها ويوفق معها مو ضدها..
حصة تمشى بقهر: ليش حنا واقفين ضدها يا خوله كل اللي أسوي من مصلحتها.."دخلت وناظرت لامي بعصبية حرام اللي سويتوه في أميرة جايين تكملون عليها مستحيل أشوف أختي كذا واسكت لازم أسوي شئ"...
متعب بصوت شوي عالي: أميرة...أميرة انتظري.. "مسكها"...
أميرة بنرفزه: نعم وش تبغى..؟؟…
متعب: وين رايحه انتظري أوصلك..
أميرة بسخرية: توصلني وين..؟؟..
متعب يتقرب منها: للي تبغين..
أميرة بنظرة تحدي: شكرا.. ما أبغى أنت بالذات تسوي لي شئ.."لفت تبغى تمشي وشافت حرمتين جايت لعندهم"..
فوزيه: وشلونك يمه متعب...؟؟؟
متعب: الحمد لله هلا والله بخالتي فوزيه وشلونك وشلون أبو راشد والعيال..؟؟..
فوزيه ما لقت بال لأميرة: بخير يسألون عنكم وشلون أمك..؟؟..
متعب: بخير والحمد لله...
بشاير بدلع: وشلونك متعب.. حمد لله على سلامة خالتي منيرة؟؟.."أول ما سمعت صوتها ناظرت لها بكل حقارة ورجعت تناظر له بنفس النظرة"...
متعب: بخير الله يسلمك وشلونك أنتي ؟؟؟..
بشاير: بخير دامك بخير.."جت لعندهم خوله وسلمت على فوزيه وبنتها واستغربت من سكوت أميرة وأخذتهم خوله لعند غرفة خالتها منيرة وتركتهم لوحدهم"...
متعب بغرابة: وش فيك ساكتة ليش ما سلمتي على خالتي وبنتها..؟؟.."ما ردت عليه ومشت بعصبية لكنه وقف مقابل لها"...
أميرة بنظرة مالها أي معنى: ممكن تبعد عن طريقي...
متعب بقهر: أميرة... لازم نتكلم ... لازم نتفاهم...
أميرة بابتسامة سخرية: على ايش نتفاهم اعتقد ما بيننا تفاهم...
متعب بنرفزه: غلطانة.. حياتي انـــ...
أميرة قاطعته وبسخرية: نعم وش قالت..؟؟.. لو سمحت لا تستعمل كلمات سبق واستعملتها لناس غيري...
متعب بقهر: والله عاد بكيفي استعملتها أو ما استعملتها لك أو لغيرك واسمعي عاد ترى مليت من أسلوبك...
أميرة تبتسم بمكر: إيه هذا متعب اللي اعرفه اللي ما يهمه مشاعر احد...
متعب متمالك نفسك: الظاهر الكف اللي أعطيتك إياه ما صاحك زين..
أميرة بعيون مليانه دموع وكأنها تتذكر كل شئ قدامها: لا غلطان يا متعب كفك هذا صاحني من غيبوبتي وعرفت من هو معي ومن هو ضدي ومن هو الخاين ومن هو المخلص..."راحت عنه تحاول تكتم شهقاتها"...
متعب مسكها: أميرة لحظة...
أميرة بنرفزه: متعب تراك تعبتني خلني أروح... وش تبغى مني...
متعب بحنان: أبغى أميرتي..
أميرة تحاول تضبط من نبرة صوتها: أميرتك ماتت وأنت اللي قتلتها..."سمعت خوله تناديها"...
خوله: وين رحتوا دورت عليكم..
متعب بقهر: خوله عقلي أختك ما يصير اللي تسويه فيني وكأني كفرت...
أميرة بعصبية: كل هذا وما أكفرت إذ أنت تشوف للحين انك على حق ولا غلطت اوكي.. مثل ما تبغى بس أنسى أني دخلت بحياتك بيوم من الأيام..."مشت عنهم"...
خوله وقفته لما شافته بيلحقها: انتظر متعب.. أميرة عنيده وبكذا ما راح تتوصلون لشئ... خلها كم يوم أنا بكلمها وان شاء الله أنها تسمع لي هالمرة..
متعب بضيق: الله يخليك قوليلها يكفي اللي سوته فيني والله أتعذب كل يوم على فراقها... تعرفين يا خوله أميرة هي كل شئ بالنسبة لي ومستحيل أفرط فيها لو وش يصير...
خوله: خلنا نلحق عليها وان شاء الله ما يصير خاطرك إلا طيب.."كانت عيونه متعلقة بالشخص اللي بعد عنهم وقلبه مليان حقد وكره عليه.. الإنسان مو معصوم عن الغلط وابن ادم طبعه النسيان وأميرة بيجي يوم وتنسى مثل ما نسيت الماضي وقفلت عليه ورميته بالبحر.."...
بغرفتها جالسة تفكر فيه.. له مده طويلة ما اتصل ولا حتى أرسل مسج زعلان للحين على الأقل يتحمد بسلامة أمي معقولة اخذ بخاطره من كلامي.. بس حبيت أوضح له الصورة واكشف أوراقه بس الظاهر أخطأت بالحدس ليكون... خليني أدق وأشوف.. عملت اتصال جواله مقفل غريبة بذا الوقت كان يتصل علي والحين مقفل وشلون اكلمه الحين لا ما راح أرسل مسج ولا راح اتصل المفروض ازعل اقلها يتحمد لي على سلامة أمي.. رياض مشتاقة لك كثير ما توقعت بيوم من الأيام راح اشتاق لك هالكثر وقطع عليها أفكارها صوت بشاير...
بشاير بهمس: اللي مأخذ عقلك...
هاجر تبتسم: أنتي...تصدقين...
بشاير: ايه اصدق هههههههههههههه على فكرة وحنا جاين تو شفت أخوك متعب واعتقد اللي معه أميرة...
هاجر: طيب...
بشاير بغرابة: وش اللي طيب أقولك متعب سلم ونشد عن أحوالنا ألا مرته ساكتة كل الوقت لا تتوقعين ميتين على سلامها بس الاحترام واجب..
هاجر تتنهد بتعب: لا تلومينها يمكن ما انتبهت لك...
بشاير بدهشة: معقولة.. طيب أنا ما انتبهت بس أمي معقولة ما شفتها تدرين الشرهة على أخوك راكض ورآها تقل ما فيه بنات غيرها...
هاجر بقهر: بشاير لا تخليني اندم عشان قلتلك...
بشاير: لالالا خلاص توبة الله يهدي سرهم...
هاجر وقفت: قومي ندخل عند أمي دام مساعد طلع.."قامت بشاير وكان مو عاجبها اقتراح هاجر جلسوا معهم وأخذوها سوالف على الأقل تطلع من اللي فيه وتنسى رياض اللي ما افتكر فيها...
طلال بصوت شوي عالي: لا يعنى لا.. أميرة بكرة عندي امتحان صعب ويكفي أني ضيعت ساعتين..
أميرة بقهر: يعنى وشلون مو موصلني ترى حتى أنا عندي امتحان..
طلال: أميرة عندك متعب أو ابوي اتصلي عليه…
أميرة شافته جاء لعندها ووقف بجنبها: ابوي ما ادري وينه ما يرد على اتصالي الله يخليك يا طلال تعال… "سحب منها الجوال"…
متعب بعد ما سلم عليه: خلاص أنت شوف أشغالك ولا تشيل هم أختك..!!..
طلال بنرفزه: أصلا ومن قال شايل همها تدري عاد يا متعب زوجتك ذي دلوووووعة من الدرجة الأولى الله يعينك عليها قايلك لا تدلعها وريها العين الحمراء...
متعب ابتسم لما حس بغضبها: لا عاد ما أرضى عليك تقول عن أميرتي كذا هذه الغالية أم الغالي واللي يقول عنها كذا ذبحه على يديني... وبعدين أميرة تستاهل أي شئ مو عاد الدلع بس..
طلال بقهر: أقول يا قيس بن الملوح طيع شوري بكرة تكبر رأسها وتتوهق...
متعب يقهره: عسل على قلبي أنت وش دخلك بين رجال ومرته يله أشوف عطيناك وجه..
طلال بقهر: لا والله الحين تقول كذا وقبل شوي شوف زوجتك شوي وتحب يديني عشان أرجعها للبيت..
متعب: هههههههههههههههههههه طلال أنت نسيت أنا موجود وأي شئ أميرة تطلبه منفذ وأنا مغمض
طلال بنرفزه: أنت وش قصتك تبغى تقهرني وإلا كيف..
متعب باستخفاف: هههههههههههههههههه تقدر تقول كذا..
طلال: اهااااااا اجل يا زوج الست أميرة ضف وجهك لأني ورأي امتحان صعب وما اعتقد بعد اللي سمعته منك ومن اميرتووووووه راح اطلع بسهوله منه...
متعب: اوكي خلينا نشوفك يا الخال وركز بالمذاكرة مع السلامة.."سكر منه وكانت تناظر له بحقد على اللي سواه"...
أميرة تحاول تتمالك نفسها: من سمح لك تأخذ الجوال مني..؟؟..
متعب باستهبال: متى غيرتي جوالك.."يناظر له باستخفاف وأخذته منه "..
أميرة بعصبية: أولا هذا مو لي جوال خوله..
متعب يتقدم عندها: طيب طيب دامه مو لك ليش كل هالعصبية..
أميرة بغرابة: كل هذا وما تبغاني اعصب وتقل الموضوع مو هامك..
متعب يتجاهل عصبيتها: والحين ما تبغين أوصلك للخرج عشان عندك امتحان بكرة وإلا تنتظرين لين ما يجي طلال... وأخوك اغسلي يدنك منه ما راح يجي..."ماردت عليه ابتسم على طريقه عصبيتها وحتى هي متغطيه شكلها جنااااان ومبين أنها واصله حدها... راحوا للسيارة ومسكوا طريق الخرج وطول الوقت ساكتين وأكثر من مرة يحاول يتكلم بس عارف وش بتكون النتيجة الرفض.. ومثل ما قالت خوله راح تحاول معها وان شاء الله تقدر عليها"...
بغرفتها جالسة تفكر فيه.. له مده طويلة ما اتصل ولا حتى أرسل مسج زعلان للحين على الأقل يتحمد بسلامة أمي معقولة اخذ بخاطره من كلامي.. بس حبيت أوضح له الصورة واكشف أوراقه بس الظاهر أخطأت بالحدس ليكون... خليني أدق وأشوف.. عملت اتصال جواله مقفل غريبة بذا الوقت كان يتصل علي والحين مقفل وشلون اكلمه الحين لا ما راح أرسل مسج ولا راح اتصل المفروض ازعل اقلها يتحمد لي على سلامة أمي.. رياض مشتاقة لك كثير ما توقعت بيوم من الأيام راح اشتاق لك هالكثر وقطع عليها أفكارها صوت بشاير...
بشاير بهمس: اللي مأخذ عقلك...
هاجر تبتسم: أنتي...تصدقين...
بشاير: ايه اصدق هههههههههههههه على فكرة وحنا جاين تو شفت أخوك متعب واعتقد اللي معه أميرة...
هاجر: طيب...
بشاير بغرابة: وش اللي طيب أقولك متعب سلم ونشد عن أحوالنا ألا مرته ساكتة كل الوقت لا تتوقعين ميتين على سلامها بس الاحترام واجب..
هاجر تتنهد بتعب: لا تلومينها يمكن ما انتبهت لك...
بشاير بدهشة: معقولة.. طيب أنا ما انتبهت بس أمي معقولة ما شفتها تدرين الشرهة على أخوك راكض ورآها تقل ما فيه بنات غيرها...
هاجر بقهر: بشاير لا تخليني اندم عشان قلتلك...
بشاير: لالالا خلاص توبة الله يهدي سرهم...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك