رواية من أعماق أحضان مجنونة -53

رواية من أعماق أحضان مجنونة -53

قاطعته بسرعة ابوي بنفس المكان اللي انا فيه يامطلق؟

ابتسم بخبث وقال بس انا ماقلت وش اللي مشتهيه بالضبط؟

دارين بخجل ادري فيك بتتهور وتقول كلام ماصخ؟

مطلق طيب عنادا فيك ..كنت بقول مشتهي نملك ها الليلتين وش رايك انتي!!

دارين مدري.....

مطلق خلاص قولي لاابوك انك موافقة وانا بحدد معه ها اليومين ولاتعترضين طيب,,,

هزت راسها بالموافقة وتنهد بارتياح,,,

اشوفكم بكرة على خير ان شاءالله,,,

هههههه اي والله شاطرين بدمج البارتين مع بعض علشان ماانزل ههههه عجبتيني ياطلع القمر عرفتي الاجابة الصحيحة,,,

انا ماقلت لكم اني بنزله بس بالنهار يعني مالي وقت ثابت انزله فيه بس انتوا تعودتوا الفترة اللي راحت تلاقونه قدامكم بالنهار...

عموما يسلموا على اهتمامكم وسؤالكم وها المشاعر ماهي غريبة عليكم ياحلوين,,,

يالله قراْة ممتعة ولاتنسوا بصمتكم وراها,,,

البارت الرابع والستين والخامس والستين,,,,,,,

قام مطلق من الطاولة اللي هي فيها ووقف شوي يسولف مع ابوها وغسان وبعدها مشى...

وهي ظلت بروحها لين شافت كل سرابه مشى وراح وهم يناظرونها وكانهم يقولون لها تعالي...

وقامت وجلست معهم...

ظلت ساكتة وماحد علق بشي...

اللي قطع الصمت غسان بضحكته يقول ها نقول مبروك؟

ماردت عليه وضحك بقوة وقال شكلها مو مبروك..

ابو احمد بقوة لاان شاءالله مبروك....مطلق ماينرد...ولاشرايك يادارين؟

ماقوت ترفع راسها وتناظر فيهم وقالت هالة بقوة خلونا نكمل عشانا وتركوا ها السالفة لاردينا البيت هناك لكل حادث حديث..

رجعوا لعشاهم اللي تركوه وكملت هي سرحانها وشرودها بدون ماتلمس من صحنها ولاشي,,,,,

بعد ماطلع احمد من الشقة باليوم الثاني للمستشفى..

جلست ريم ترتب شوي بالكركبة اللي سواها احمد وهو يدور مفاتيحه وتبسمت...

هالرجال مدري لمتى وهو بها الحال؟

كل يوم هاذي سالفتنا يحط مفاتيحه وجواله ومحفظته وينسى وين تركهم؟

ماهو جايز عن ها الطبع ولابيجوز بعد!!

جلست على الكنبة شوي تريح الا وبجرس الشقة يدق..

فزعت من مكانها...مين اللي بيزورني من صبح الله وبغير موعد كذا!!

مو معقولة احمد راد لانه صار له فترة من طلع ومفاتيحه عنده...

قامت بسرعة للباب وقالت بشوية خوف منو؟

جاها صوت ام وليد الثاير انا ام وليد افتحي ياريم؟

ظلت ثواني تستجمع افكارها للاسباب اللي ممكن تخلي ام وليد تزورها بها الوقت؟بس مع ذلك ماخلتها توقف عند الباب وفتحت بسرعة....

ريم هلا باام وليد تفضلي...

قبل لاتنطق ها الكلمة ريم كانت ام وليد دخلت مثل البركان الهايج ووصلت لنص الشقة...

سكرت ريم الباب وراحت وراها وقالت تفضلي ارتاحي..

ام وليد بحدة انا مو جاية اتفضل ولاجاية ارتاح...هي رسالة وابيك توصلينها لزوجك؟

ريم بهدوء خير...

ام وليد بحدة مدام زوجك بالنص مابيجي خير اكيد؟

سكتت ريم وكملت ام وليد بنفس الانفعال ولدي الليلة يطلع من التوقيف ...

ريم واحمد شكو بس ياام وليد؟

ام وليد خليه يروح يكفله ويطلعه...

ريم اذا تنازل جراح بيطلع...

ام وليد اذا راح احمد وكفله جراح بيسد حلقه وبيستحي من احمد بس اذا زوجك ها العلة ماتلحلح راح فيها ولدي؟

ريم أي بس احمد مو عاجبته تصرفات وليد ويبي ..

قاطعتها ام وليد وهو منو ان شاءالله علشان تعجبه تصرفات وليد ولاماتعجبه؟بالناقص ..عمره ان شاءالله ولا عجبته مايهمني...كل اللي يهمني ان ولدي يطلع؟

ريم شلون مايهم...وليد اخو احمد واكيد احمد تهمه مصلحته ويبيله الخير..

ام وليد خل الخير له مانبيه...

ريم انا اسفة ياام وليد مقدر اتدخل بسالفة مثل كذا واصير انا بالنص؟بينه وبين اخوه؟احمد عنده افكار اذا اقتنع فيها لايمكن يغيرها بسهولة؟

ام وليد بتهديد شوفي ريم انا ماابي ادعي على اللي في بطنك بس اذا مايطلع ولدي الليلة بدعي على اللي في بطنك مايطلع لها الدنيا ولايشوف نورها...وبسوي المستحيل علشان فعلا مايطلع سامعتني!!!

قالتها وطلعت بنفس السرعة اللي دخلت فيها وتركت ريم تتنهد وهي تهز راسها وتحط يدها على بطنها,,,,

وهي بسيارتها انتبهت على سيارة جراح اللي كانت ماشية وراها من طلعت من البيت...

تنهدت بحدة...

هذا شيبي؟

متى بيفهم ان تصرفاته غلط بغلط؟

متى بيحس ان اللي قاعد يسويه جنون...

تذكرت كلام مطلق الامس وهزت راسها....لازم جراح يكرهها مايحبها؟

قالت للسايق بحدة وصلني على كرسبي كريم..

السايق بتتاءخر على مستشفى..

هالة بحدة وانت شكو؟

سكت السايق وانصاع لااوامرها بدون أي نقاش...

وصلت عند كرسبي كريم وماخلت السايق نزلت هي بنفسها لغرض في بالها بيعتمد عليه ان جراح يلحقها ولالا؟

وفعلا بس نزلت هي وقفت سيارته ونزل هو بعد وراها...

طلبت لها قهوة.....ووقفت تنتظرها وصار هو واقف وراها مباشرة وكانه يقراء بالقائمة...

يوم بعد الكاشير شوي عنهم تقرب اكثر وسوى روحه بيمد يده ياخذ القائمة اللي على الطاولة ..

لفت له وقالت بحدة يعني مافي غير ها المكان توقف فيه؟

حس بانه طاير فوق وهو بها القرب الكبير منها وريحة عطرها مخليته بحالة سكر...

قال بدون ماينزل عينه من عينها ماهو محل ابوك على مااعتقد...المكان ملك للجميع..كيفي اوقف بالمكان اللي ابيه,,,,!!

كان يتكلم بهدوء وبرود شديدين...وهي موصلة للانفجار وهي تكلمه...

لفت عنه وهي تقول استغفر الله...بصوت عالي...

قرب منها اكثر وقال لها بهمس ان شاءالله مفكرتني مجنون؟

غمضت عيونها وقالت بحدة ليه انت عاد نفسك من العاقلين ان شاءالله...

جراح بهمس اكبر لعلمك انا اعقل انسان بها الدنيا...

حست فيه ابتعد عنها شوي.....

ويوم رفعت راسها كان طلبها وصل....

توها بتستلمه رجع همس لها وقال خليه على الحساب ترى والله مايسوى..

بحدة هامسة قالت جراح فارق واللي يعافيك...

جراح قلت لك المحل ماهو ملكك ومالك حق تطرديني منه؟

فتحت الغطاء حق قهوتها و.....كبتها كلها عليه وطلعت من المحل بدون ماتلتفت صوبه ولاتشوف وش صار فيه؟

دارين طيب انت وش رايك يااحمد...

احمد الراي رايك انتي مو راي انا ولاراي احد غيري؟

دارين انا محتارة...

احمد الزواج مافيه حيرة...ياموافقة وحاسة انك مرتاحة...ولامافي نصيب...

دارين ...........

احمد انتي يوم سولفتي معه البارحة وش حسيتي؟

دارين امممم بصراحة حسيت اني كنت جالسة معك يااحمد....مطلق فيه كثير من طيبتك وصراحتك....

احمد بضحكة ههه لالاتحاولين مافي مني اثنين..

دارين ههه لامن جد حسيت في بينكم ها التشابه؟

احمد وبناته يادارين انتي قد مسؤليتهم؟

دارين انا مااحسهم عايق..عادي...

احمد وغير بناته...

دارين احمد...انت وش تعرف عنه...

احمد مطلق كرجال محترم وله اسمه ومكانته بالمجتمع ترى مااله مثيل ...اما شخصيا تراني مااعرفه...يعني من زمان..بس يوم كنا مع بعض...

كان يعجبك...مطلق تعتمدين عليه وانتي مغمضة...

دارين وبعد!!

احمد كنا صغار وبعدين افترقنا يادارين وهو صارت عنده علاقاته وانا عندي علاقاتي وانشغلنا رغم ان احنا كنا دوم مع بعض....

دارين قال لي اني مو الاولى بحياته....

احمد وهذا اللي مزعلك؟

دارين ابدا....بالعكس صراحته كبرته بعيني؟

احمد ماضي الانسان ماتعني ابدا حاضره ولامستقبله يادارين...ومدامه صارحك هذا مايعني انه مستهتر فيك وبمشاعرك لا..بس لو كذب عليك احد بيحاسبه ولابيكشفه ...ابدا!!انتي يمكن ماتحسين؟ خلي ها النقطة من ايجابياته وفكري بهدوء وبدون أي توتر علشان توصلين لشي يريحك...

دارين كنك تبي تسكر التلفون بوجهي؟

احمد أي والله

دارين شوف اللي مايستحي؟

احمد ههه عندي موعد بالمستشفى مع ريم بنروح نتطمن على ولدنا؟

دارين معناته سلم لي على ولدك الغالي..

احمد بدينا بالمصالح..سلم على ولدك الغالي هذا معناته اشتري لي ثو ب للملكة؟عندك ابو خله يتكفل فيك انا مو شاري لااحد شي...

دارين هههههههه

ابو مطلق وش عندك بس ياحرمة...

ام مطلق انت مو حاس ان سالفة العرس بتفرقنا من جديد ياابو مطلق؟

ابو مطلق ................

ام مطلق اختك من امس وهي قالبة الوجه ولاتكلمني...هي من جراح واللي سواه بوليد ولامن مطلق اللي يبي دارين؟

ابو مطلق جراح ماهي غلطته غلطة ولدها التعبان...ومطلق هذا اختياره؟

ام مطلق بقهر مو من زينها بس بنت العراقية علشان يقول يبيها؟

ابو مطلق بصرامة يكفي ان هو اللي اختارها مابعيد وبزيد بها السالفة؟

ام مطلق هذا كله من بشاير الله يهداها هي حلتها بعيونه؟

ابو مطلق وبشاير شكو؟

ام مطلق لو هي ساكتة وماقالت له عنها كان مابيقول لنا ابيها...

ابو مطلق ..........

ام مطلق تعال استلم وجع الراس الللي بيجينا من ورى سالفة ها العرس؟وياليت العروس تسوى بعد!!

بشاير الو..قالتها بتردد...

زينة هلا وغلا..

بشاير هلا فيك..

زينة طبعا ماعرفتيني؟

بشاير طبعا..

زينة ضحكت برقة وقالت انا قلت مابتردين الا اذا ارسلت لك مسج اني وحدة من البنات ومغيرة رقمي..

بشاير بحذر منو معي!!

زينة انا زينة اخت مشاري؟

سكتت بشاير مرة وحدة..

زينة شلونك بشاير..

تنهدت تنهيدة طويلة وقالت الحمدلله...

زينة بضحكة ثانية اوووف..ترى تنهيدتك طلعت منك وراحت على ناس جالسة جنبي تساْل عنك؟

صخت بشاير مرة وحدة...يعني مشاري جنب اخته وقايل لها عن السالفة بعد!!

زينة بعدك معي بشاير..

بشاير بهمس اي...

زينة لاتخافين ترى مو حاطته سبيكر يعني مايسمعك رفعي صوتك..

بشاير بتردد شلونه؟

زينة بتنهيدة وهي تناظر بمشاري اللي يناظر فيها وياءشر لها يبي يسمع نوعا ما بخير...نفسيته من زمان ماراقت كذا!!

تنهدت بارتياح وقالت الله يسعده..

زينة ويسعدك معه...

قامت تبكي بشاير بلا وعي...

زينة بشاير..ليه تبكين؟مشاري يحبك ووده ترتبطون؟

بشاير بغصة انتي تشوفينها سهلة؟تراها بنت عمتي؟

زينة بتنهيدة ادري ماهي بسهلة بس اللي عليكم انكم تحاولون مرة ومرتين وعشر..منتوا خسرانين شي...ان كنتوا لبعض بتاخذون بعض...

تنهدت بشاير وسكتت...

زينة روقي..

بشاير بتقطع ولهفة شخباره..

زينة دايم يسال عنك ومن زمان كان يبيني اتعرف عليك واكلمك خصوصا انه محروم من سماع صوتك على قولته؟

بشاير انا وعدت اخوي اني مااكلمه وماابي اخلف بوعدي له...

زينة علشان كذا هو يبينا نتقرب اكثر من بعض وانقل له اخبارك واعطيك اخباره لو ماعندك مانع...

تنهدت بشاير بارتياح وهي تتخيل شكل مشاري وطيفه قبالها....

الجوهرة يعني اللي سويتيه هو الصح ياهالة؟

هالة بعصبية وهي تكلم بالجوال وش تبيني اسوي بالله؟

الجوهرة بذهول تحرقينه؟

هالة بالطقاق؟

الجوهرة هذا وانتي العاقلة الفاهمة..

هالة بانفعال انتي ماشفتي كيف كان واقف وراي....استغفر الله شوي ويحضني وماهي بعيدة على جنونه انه يسويها؟

الجوهرة تنهدت جراح مشكلته مشكلة ياهالة...وها التعامل ابدا ماينفع معه؟

هالة بانفعال زايد لا التطنيش ينفع معه ولاالصد والحقران ينفع معه ولاالتهزيء ينفع معه ..قولي لي شسوي بس!!تعبت يالجوهرة...جراح معي نبفس البيت وماني عارفة شسوي...

الجوهرة هدي..هدي شوي...

هالة يكفي كلام اخوه امس خلاني ماانام الليل...

الجوهرة طب ولو فرضنا ان جراح هو مطلق وهو اللي عنده بنات وش كان بيكون موقفك..

هالة باصرار بعد برفض....انا رافضة الكل لاجراح ولاغيره لهم مكان بقلبي اللي تسكر ياالجوهرة؟

الجوهرة انك ماتجيبين عيال ماهو سبب ياهالة انك تسكرين حياتك وتدفنين شبابك...

هالة بتنهيدة لو ماكنت بنفسي ارسل التقارير ومتابعة حالتي كنت بقولك العيب من علي ..بس انا دكتورة وافهم بها السوالف...عيب مامنه امل ياالجوهرة ولايمكن اجيب عيال بيوم من الايام وها الشي يجرحني وبيجرحني اكثر لو ارتبطت من جديد...

الافضل اني انسى ها السالفة نهائيا؟؟؟

نسايم قفلت الباب وجلست معهم وقالت ابيكم بسالفة ياحلوين؟؟

شيخة وش عندك؟

نسايم انتوا تعرفون ان البابا بيتزوج؟

عايشة أي...

فاطمة اخت غسان...قالتها بحماس...

نسايم بمسكنة وعارفين انها شريرة وعندها اكثر من وجه؟

فاطمة بخوف شلون يعني اكثر من وجه؟

شيخة ماهي بشر مثلنا علشان يكون لها اكثر من وجه؟

نسايم هاذي شريرة وحتى ماما ام مطلق ماتبيها..

شيخة والبابا يدري عنها...

نسايم لا

عايشة وليه ماقلتي له؟

شيخة لايكون تبينا احنا نقوله؟

نسايم انا اذا قلت له ها الكلام مابيصدقني وبيفكرني اكذب عليه...

فاطمة يعني احنا نروح نقول له؟

نسايم لا...احنا مابنقول للبابا...احنا بنخرب عليها الشريرة؟

شيخة أي بس احنا شفناها وماهي شريرة ولاضربتنا؟

عايشة أي صحيح..

نسايم هذا لانها شريرة...تدعي الطيبة قدامكم وقالت بعد ماتتزوج ابوكم بتاخذكم وبتاخذ البابا وبتطلعون من البيت ولابنشوفكم ودايم بتضربكم...لانها ماتحبكم..

شيخة عمتي انتي بعد تضربينا؟

عايشة يعني ماتحبينا؟

نسايم انا اضربكم علشان افهمكم الصح من الغلط لو غلطتوا؟

شيخة باصرار حتى اذا ماسوينا شي تضربينا ياعمتي!!

نسايم هي تبي تفرقكم عنا ولاتحب ماما ام مطلق ولاتبيكم بعدين تشوفون عمكم جراح ولاعمتكم بشاير....

فاطمة بزعل طيب وش نسوي..

عايشة لازم البابا يكتشفها انها شريرة..

نسايم علشان كذا انا وانتوا بنسوي خطة بس لازم محد يدري عنها وتكون سر بينا؟

شيخة عمتي فطوم ماتحفط السر؟

فاطمة بزعل احفظ السر ومااعلم احد...

نسايم كلنا بنشترك بالخطة هاذي وبعدين البابا بيكتشفها وبيدري انكم تحبونه وبتخلصونه من شرها قبل لايتاءذى فيها؟

عايشة باعجاب يعني مثل افلام دزني...واخر شي الطيبين يعيشون بسعادة والاشرار يموتون؟

نسايم بخبث بالضبط...عليك نور ياعواشة...ونخلي البابا يتركها واحنا اللي نشمت فيها؟

مطلق بنرفزة انت وش تنتظر بس ياجراح بعد!!!

مارد عليه وهو شارد بعيونه بعيد..لسقف الغرفة...

مطلق بحدة يدك وانجرحت بسبتها؟حرق طول بعرض بصدرك والاكيد انه بسبتها بس انت ماتبي تقول؟

تنهد بالم وقال وهو يضغط على حرقه مالها شغل؟

مطلق باصرار بلى...لها شغل انا متاْكد ان لها شغل؟

جراح بقهر لاتخليني اندم اني خليتك تجي معي المستشفى..

مطلق جراح هالة ماتناسبك...افهم ها الشي؟

جراح بجنون انت وش عرفك انها ماتناسبني!!

مطلق تدري عن حبك ومطنشتك؟

جراح بنرفزة لاماتدري...وبعدين انت وش له جايب سيرتها؟

مطلق الحرق هذا منها صح؟

جراح بذمتك يعني هالة بتحرقني يامطلق؟

مطلق يعني مو بعيدة فيك تكون سوبرمان ويكون احد بيحرقها وتاخذ الحرق انت مثل المرة اللي فاتت...بس على فكرة المرة الثالثة اكيد بتكون ثابتة وبتوديك بداهية..

جراح بمرارة احسن بعد!!!

قالها وكانه يطوي صفحة الكلام ولايزيد عليها باي شي...

سكت مطلق وهو يهز راسه....

ورجعت لجراح ذاكرته لقبل كم ساعة مضت يوم حرقته بالقهوة؟مشت..بكل برود وماكانها اشعلت فيه نيران...

ماهمه الحرق ولاشال المه اصلا!!

كل اللي همه قربه منها كيف خدره ...عطرها كيف شوش عليه الجو وخلاها بحالة سكر؟؟؟

لابالله ياهالة حبي لك مافيه أي عقل كله جنون بجنون..!!!

ابو احمد اجل انا مو بموافق ياام وليد..

سكتت عنه ومسكت المجلة تقلب فيها..

ابو احمد بشماتة والله زين....قمتي تعطي موافقتي وعدمها بلسانك؟

ام وليد انت مو من صدقك....

ابو احمد وش عليه؟

ام وليد يعني مريم نفسيتها حييل تعبانة ووليد ماهو معنا وانت مبسوط بها الخطبة؟

ابو احمد وليه ماانبسط...ماهي بنتي اللي بتنخطب وتتزوج وتنستر؟

ام وليد يعني اللي تطلقت ماهي بنتك؟

ابو احمد نصيبها شسوي لها انا؟اجبره يكمل معها وهم مو مرتاحين مع بعض؟

ام وليد لا بس افرح لبنت العراقية ولاتبين لبنتك ضيقتها عليك..

ابو احمد بحدة سكتتها يعني هي بنتي وبنت العراقية جاية من الشارع؟؟؟ثنتينهم بناتي وماراح اوقف بنصيب وحدة اذا جاها على حساب الثانية وزعلها...

وبعدين ماتدرين يمكن خطوبة دارين تصير وجه فرح على خواتها....

ام وليد بتاءفف أي....

ابو احمد انا قايم بسولف مع اخوك وعياله وبنتفق اذا بتجين ترانا بالحوش..

ام وليد بضيق يعني خلاص معزمين على السالفة..

قام وقال بصرامة قولي مبروك وبس!!!

دخل مع ريم المستشفى علشان موعدها وكان ابو مشاري طالع والتقوا مع بعض....

احمد هلا عمي شلونك..

ابو مشاري هلا احمد يبى..شخبارك..

احمد الله يسلمك ياعمي...ها سلامات شعندك هنا؟

ابو مشاري والله جاي ازور واحد من جماعتنا ياولدي...

احمد غريبة الوالد ماهو معك؟

ابو مشاري كلمته وقال لي انه مرتبط وبيجي بوقت ثاني..عاد انا قلت مدام العزيمة موجودة وفي فرصة ماراح افوتها....انت شعندك؟

احمد ابد والله بس الاهل عندهم موعد...

ابو مشاري يالله ماتشوف شر...بالتوفيق ان اشاءالله...

احمد الله يسلمك ياعمي...

مشى ابو مشاري كم خطوة وبعدها وقف وكانه بيقول شي...

واحمد يناظره وريم بمكانها...

شوي الا وطاح عليهم....

راح له احمد وسط صرخة فزع طلعت منه وخلت السيكورتي ينادي الاسعاف اللي شالوه واحمد معهم...

وريم تمشي معهم علشان لاتضيع احمد ....

كان ابو مشاري يتنفس بقوة غريبة..

وقال بتعب احمد..زينة...زينة يااحمد....

ماتم جملته لان الدكتور قال بشدة مش عايزين أي اجهاد بالكلام؟

ماكمل عبارته الا وروح ابو مشاري مفارقته ورايحة لخالقها...

حتى ماقال له وش فيها زينة....

لف احمد شماغه عليه من اعلن الدكتور وقت الوفاة وريم كتمت صرخة فزع وهي عند الباب وطلع جواله وهو محتار منو يكلم ويبلغه بالاول..

يكلم ابوه..ولايكلم مشاري؟؟؟

اشوفكم على خير يوم السبت ان شاءالله...

مرحبتين كبار فيكم يالغلا...

كيفكم...وحشتوني مرة..احس من زمان عنكم هههه

البارت السادس والستين....

جراح جالس بفراشه وجته فطوم...

فاطمة عمي جراح وش فيك جالس بروحك هنا؟

تنهد وقال بزعل تعبان ومهموم ومتضايق...وكل شي يزعل بها الدنيا تراه بصدري..

فاطمة ليه؟؟؟

مارد عليها...

وانتبهت هي على الشاش اللي بصدره لانه قميصه ماكان مسكر عدل..

فاطمة بتاْثر عمي جراح وش فيك هنا؟

ناظر بالحرق وقال بتنهيدة فيني عوار..

فاطمة زين من شنو؟

جراح من شنو بعد...منها اكيد...وانا في شي غلط بحياتي غيرها...

فاطمة ليه سوت فيك كذا طيب؟

جراح بالم مدري....تهقين بعدها تحبه؟

فاطمة لاطبعا..

جراح طب ليه ماهي متقبلتني!!!

فاطمة اسئل نفسك؟

جراح انا راضي والله راضي...ماابي عيال..ابيها هي وبس....هذا حلمي من زمان من زمان....انها تكون لي...انا وبس...

فاطمة هي الخسرانة...

مارد وكانه يفكر بكلامها....

فاطمة مسوية تمسح على صدره... خلها تولي عنك وغني لها اذا شفتها الا ابكيها وتجي تتحسر وهي بتموت قهر...

ضحك لها..

فاطمة يالله خلينا نغني مع بعض..

جراح الااخليها تموت قبالي..وينكسر هذا خشمها العالي......الا اموتها علي من القهر..وتوب بعد وماتدلل!!

كانوا بالحديقة جالسين ويسولفون ويتفقون على الملكة...

مطلق وابوه ومعهم ابو احمد وغسان...ومن بعيد كانت ام وليد واقفة تناظر وبس!!

ودخل احمدعليهم...بشكل حزين وماْساوي وشماغه ملفوف عليه وباين بعينه اثر دموع لسه ماجفت!!

ناظر الكل صوبه يوم يوقف قبال ابوه وماتكلموا..

ابوه من شافه استشعر بالخطر وقف وقال بصدمة احمد...احمد ياولدي شفيك؟صاير شي؟

تقرب من ابوه بهدوء وباس راسه...

ابو احمد بخوف احمد..كلمني..

احمد بهدوء ممزوج بحزن وضجر كلنا ماشيين على نفس الطريق اللي بيرجعنا لربنا هذا حق على كل بني ادم....بو مشاري يطلبك الحل يبى...

وقف مصدوم وجامد بمكانه يبي يصدق الخبر اللي سمعه من احمدوماهو قادر يصدقه...

بس شكل احمد يدل على ان ها الشي صحيح ومافيه أي نوع من الاشاعة ولاالمزح؟اصلا احمد مايمزح بكذا امور...

جلس على كرسيه بنفس الصدمة اللي سمع فيها الخبر....

وتقرب منه احمد وركع عند رجله وقال بمواساة وهو يحط كتفه على رجله يبى...هذا شرع الله وكلنا ماشيين على نفس الطريق....قوم...ترى مشاري محتاج وقفتك يبى لاتتركه ولادقيقة تكفى...يالله قوم...

يتبع ,,,,

👇👇👇

تعديل المقال