رواية خاتم في اصابع رجال -22
انسدحت وعقب تذكرت لو مبارك يا البيت منو بيفتح له
والأكيد انه بيكون سكران وماعنده مفتاح البيت الثاني
نشيت وفتحت قفل باب الحويي
بحيث انه ينفتح اذا حد دزه بس
رديت حجرتي ورقدت ..
بعد ساعة :-
تحركت بانزعاج عَلى أصوات التكسير اللي تطلع
الله ياخذ الحيوان اللي عكر علي نومتي
رديت أتقلب ع الفراش احاول ارقد مره ثانية
لكن الزفت اللي برا مصر انه يزعجني ويخرب رقادي
ربع ساعة مرت وانا مسوية اكبر طاف لهالأصوات لكن كل مالها تزيد
ظهرت معصبة وانا ناوية اكفخ اللي برا واغسل شراعه
يكفي انه داش بيتي في هالوقت ورضيت لكن انه يزودها و يكسر ويزعجني شي ما ارضى فيه
شفت ثلاث رياييل ف الصالة وكل واحد شكله يلوع بالجبد اكثر عن الثاني
وكلهم شكلهم سكرانين والمصيبة انهم يتفالعون بالصحون
طالعت الأرض المليانة صحون متكسرة وزجاج
صرخت عليهم بكل عصبية : وربييييي وربييي لو نشيت باجر وحصلت قطعة زجاج صغيرة على الأرض لأدوسكم ف بطونكم واحد واحد وقولوا افنان ما قالت واذا تبون تدخلون البيت حياكم الله لكن لا تخربون علي رقادي فاهمين
طالعتهم بنظرة وهم يترنحون وواحد فيهم يمسح ويهه بشكل يلوع بالجبد
عطيتهم نظرت احتقار ودخلت الحجرة قفلت ع عمري الباب بالمفتاح احتياط لو فكروا يتهجمون علي
انسدحت وانا افكر معقولة يكونون ربع مبارك وهو طرشهم لهالمكان ..
ما استبعد عنه هالشي ..
غطيت راسي بالمخده أحاول اقلل حدة الأصوات اللي يطلعونها والتكسير
نص ساعه ورقدت بعدها وطبعا ما خليت دعوه الا دعيتها على مبارك اللي مامنه فايدة ...
الساعَة 11 اليوم الثاني ..
نَشيت متضايقة من اشعة الشمس اللي مركزة على ويهي
لازم اغير مكان شبريتي مستحيل اتحمل هالشي اللي مب مخليني ارقد
تذكرت اني مب مصلية الفجر يا ربييي ساروه بتذبحني لو عرفت
نشيت توضيت ع السريع ما ادري اذا صح الخطوات ولالا المهم اذا سألتني ساره اقول هيه صليت ..
خلصت صلاة استغفرالله
طريق ربي ما اعرفه حتى صلاتي ما ادري أأديها بشكل صحيح ولالا والآيات ما اقرا غير سورة الفاتحة لأني ما اعرف غيرها وما حفظتها الا بصعوبة
ظهرت من الحجرة وانصدمت من الجثة المرمية عند الباب
وعلى طول تذكرت اللي صار امس
دست الريال المرمي عند الحجرة
ومشيت من فوقه حسيت الشي كشخه كأنه جسر
تعديته وضاق خلقي وانا اشوف العفسة اللي في البيت وينها منيرة خل تساعدني
يت ف بالي فكرة
مبارك محد ..
وهييل شخيرهم واصل لين ما ادري وين ومستحيل ينشون
فأحسن لي اظهر من البيت وأونس عمري ..
مشيت لين حارة منيرة وانا مستمتعة ..
كم صار لي ما مشيت ياربي شكثر مستانسة احس اليوم شي عجيب
وقفت عند باب بيت منيرة
وحصلت سيارة خالد .. هههه يا زينها من ايام
توجهت لسيارته ولقيتها مغبرة باختصار اقدر اشخبط عليها
رسمت عليها واحد متين بكرش ومعصب على بنت شعرها مكشوش
ضحكت ع الرسمة صدق اني فاشلة بصمت بإيدي كإشارة لمالت عليك
كنت مستمتع هوانا اشخبط وارسم خطوط وما الى ذلك تمنيت اني اعرف اكتب عشان اسبه لكن للأسف
شبعت شخبطة ويوم لفيت بكمل سيري لبيت منيرة انصدمت بكندورة بيضا جدامي
وما لقيت غير اقول
افنان : يا نهار اسود ..
رفعت راسي وانا ف داخلي اتمنى مليون مره انه هو ابا انرفزه هههه
ما تدرون شكثر استانست وانا اطالع ملامحه المعصبة ونظراته اللي شوي وتذبحني
ابتسمت له بروقان ومديت ايدي بسلم
افنان : اوووه مرحبا خلوود من زمان ما شفتك والله
تمت ايدي معلقة في الهوا فتره شكله ما بيمدها نزلت ايدي ومسحتها بعباتي كأني امسح الحركة
افنان : مطول وانت تطالعني ، لهالدرجة انا حلوة
حسيت اني استفزيته بهالجملة ف ابتسمت ومشيت وهو ما تحرك من مكانه
ويوم قربت من باب بيت منيرة صرخت : خبر امك واختك اني بزوركم بأي وقت
سمعته يصرخ
خالد : لو قربتي من عتبت الباب بكسر ريولج فاهمة !!!
افنان : هذا اللي اباه ، لا تسرع وانت تسوق مع السلامة
دخلت بيت منيرة اللي بابه دوم مفتوح وانا اضحك هالريال فظيع احب انرفزه لو تزوجته بدال مبارك مب احسن ,, تخيلت حياتي وانا متزوجة هالعصبي كل يوم بتولع حريقة ف بيتنا
دخلت الصالة وانا اصرخ
افنان : يا أهل البيت انا ييييييييت ...
عَبدالعزيز
قاعد في التاكسي متوجه لراكان واناظر موبايلي متحسف ع الخطوة اللي أقدمت عليها .. ساره بتكوفني الله يستر
مادري شو الجرأه اللي خلتني أشرد من البيت في اليوم اللي بوقف فيه ضد عمي ف المحكمة واتوجه صوب راكان ..
طلعت من البيت متسلل عن تشوفني ساره ... وبعد مدة طويلة اكتشفت غيابي
حسيت تصرفي حز في خاطرها وايد لكن ما اظهرت هالشي وما قالت غير
سارة : على راحتك يا عبدالعزيز ....
وسكرت الخط مادري ليش متحسف احسها شلت ف خاطرها وحليلها صار لها يومين تخطط وتجهز للروحة ومواجهة عمي بعد ما رفض انه يعطيني فلس وانكر اني ولد اخوه .. وان التحاليل مزورة ...
ياربي الحين شو اسوي أرد ولا لا !!
بس انا خايف خايف وايد اني اواجه البوتمبه عمي كل ما اذكر نظراته لي احس برجفة فظييعة
وبعدين ما باقي شي واوصل بيت راكان ... ناوي افاجأة بس يا خوفي يطلع البيت اللي انا دال راعي التاكسي عليه غلط
رِبع ساعة ووصلنا للبيت قريت اسم راعي البيت بس ماعرف هل هذا هو اسم بو راكان ولا لا
ومن حسن حظي لقيت هندي واقف عند سيارة ويغسلها الظاهر يشتغل في هالبيت
عبدالعزيز : هذا بيت بو راكان ؟
الهندي : ايوا
عبدالعزيز : راكان داخل ؟
الهندي : ايوا
استانست يوم عرفت اني ما اخطيت بالعنوان ومن زود وناستي دخلت البيت
احترت في البداية من أي باب ادش
كان فيه باب في النص وبيت صغيرون ف الجانب الأيمن ( ملحق )
سميت بالله ورحت صوب الباب الأوسط
دخلته ومشيت وانا ادور بعيني وين ممكن يكون راكان
سمعت حس أشخاص في الغرفة ع اليسار مشيت بخطوات بطيئة ومن لمحت كشة راكان دخلت وانا مستانس وصرخت
عبدالعزيز : راااااااااااااااااكان وحششششتني يالدب
شفت ملامح راكان المصدومة وسمعت حس حرمة تصرخ وتدخل داخل حجرة
وشكل هالريال اللي اتوقع انه ابوه مب مستانس بدخلتي وشكل موتي بيكون على يده
راكــــــــــان
كِنت يالس ويا العايلة العزيزة وكل واحد ماسك له شغله
امي ويا فهود تلعبه
وابوي يالس يدرس عيسى
وانا اتعلم من مي الحروف
هالبنت تحسسني اني اغبى كائن على وجه الأرض مب كأنها ام 6 سنوات
كل شوي تقولي ماتعرف هالحرف شوهو !!
احسها تتحسبني استهبل
مي : انزين هذا اي حرف
راكان : باء
مي : كيييف باء اللي نقطته تحت باء هذا تاء
راكان : وين الفرق
مي : شوف نقطة هذا وين وكم عنده نقطه
راكان : زين كلهم نفس الشي المفروض يكون فيه تغيير خلصت اشكال الدنيا
شفتها تشل دفترها وتقوم معصبة وتصرخ
مي : راكان انت غبي غبي غبي .. ما بلعب معاك مدرسة بروح عند عيسى ..
انحرجت من كلامها وايد ، صح صغيرة وما تعرف شي بس بعد أثر فيني كلامها حتى بين على ملامحي هالشي
سمعت حس امي
ام راكان : مي عيييب هذا اخوج الكبير هو يباج تتعلمين ولا هو يعرف وذكي
مي : لا هو غبي ما يعرف شي
حاولت ارمس عشان ابين لهم اني مب منحرج بس مب قادر .. انا صدق مفتشل من عمري
كل يوم حد من هالصعاليك ناط لي انت غبي وغبي ..
وصدق اللي ما عنده من العلم شي فهو غبي .. انا لازم أعزم وادخل وادرس ولو ان شاءالله ما بتعلم الا بعد ستين سنة .. لكن ع الأقل اجاهد وان شاءالله اني انجح
في قمة اندماجي بأحلامي صحتني صرخة شخص اعرفه ..
عبدالعزيز : راكاااااااااااااااااااااااااااااان
بطلت عيوني منصدم حبيبي ، اخوي ، عبدالعزيز ...
انا مصدوم كيف وصل هنيه .. مب ساره اتصلت علي وقالت اني لا ايي الا الاسبوع الياي كيف قدر يوصل لي ..
انصدمت وانا اسمع امي تصرخ وتدخل داخل حجرة ..
وابوي نش معصب .. بلاهم بسم الله ..
شفت ابوي متوجه لعبدالعزيز ومعصب شكله ناوي يذبحه ... بس لييش ؟
خليت افكاري بعيد وقمت ورا ابوي ناوي احضن الدب هذا اشتقت له ..
لكن وقفت مصدوم وانا اشوف ايد ابوي تنمد وتضرب عبدالعزيز بقسوة
خفت الا ارتعبت .. ليش ابوي يهاجم اخوي .. علامه يضربه وهو الأب الحنون
تجدمت معصب مو من حق ابوي يضربه ... صح ابوي لكن عبدالعزيز ما ارضى عليه
سحبت ابوي عن عبدالعزيز وحضنت عبدالعزيز ما ادري هل يتهيأ لي لكن انا دمعت عيني يمكن من الشوق له او من الألم اللي ياني وانا اشوف ابوي يضربه
اما هو ف حسيت بارتجافه ... الظاهر ان يصيح ومب غريبة عليه عبدالعزيز دمعته على خده تعلم من رحاب الظاهر
سمعت ابوي يتكلم وهو معصب ..
بو راكان : منو الزفت هذا يا راكان ..
انصدمت من كلمة الزفت ناظرت ابوي مصعوق الحين عبدالعزيز صار زفت ...
راكان : ابوي !!! هذا اللي عندي مب زفت هذا دنيتي اخوي وامي وابوي
حسيت ابوي انصدم من كلامي ..
بو راكان : كيييييف كيييف يدخل بيتي من دون لا احم ولا دستور البيت بيته وين نحن عايشين .. مايدري ان للبيت حرمه
انفجرت اصرخ ف ابوي ما ادري هل انا يالس اطلع غيضي فيه عقب كلمات اخواني اني غبي او من الكلام اللي وجهه لعبدالعزيز ..
راكان : هذا يا ابوي عبدالعزيز اللي يا ما تكلمت عنه .. وبعدين شدرانا احن بهالكلام للبيت حرمه وما دري شو نحن مب متعودين على هالكلام نحن تربية شوارع ما نعرف الصح من الخطأ .. احنا ناس تعايشنا مع ناس ما تعرف شي في هالدنيا .. كلنا نفس الطينة .. ما نعرف الأصول ... محد علمنا محد قالنا هذا صح وهذا خطأ .. محد قال لنا لا تسوون جيييه تراه عيب ومنقود .. وبعدين يابوي لو كنا متعلمين وكنا نعرف الأصول عبدالعزيز اخووووووي فاهم شو يعني اخوي يعني اللي انت تسويه لي لازم تسويه له يبه انت ماتدري شكثر شليت بخاطري عليك وانت تعامله جييه .. حسيت الضرب اللي ياه فيني ..
حسيت ابوي تم يطالعني مصدوم وما انكر ان نظرة عيونه حيرتني ما ادري شفيه هل تأثر او تحسس من كلامي ..
بو راكان : مهما سويت ومهما قلت اظل ابوك يا راكان ما يحق لك تصرخ علي بهالطريقة .. غلطت او سويت شي غلط قولي لكن بهدوء .. ولعلمك انا ما غلطت وبعدين شو يعرفني ان هذا اللي ما يتسمى عبدالعزيز ...
انصدمت من لهجة ابوي ... كيف يقول جيه مادري بس حسيته انسان كريه وبان على حقيقته .. ييت برد عليه بس حسيت بحركة عبدالعزيز وهو يبتعد عن حظني ويتجدم صوب ابوي
مادري ليش خفت ابوي يمد ايده عليه مره ثانية عشان جيه مسكت ايده
لكن هو ابعد ايده عني
عبدالعزيز : يا عم انا آسف ما كنت اقصد من شوقي لراكان دخلت البيت وما استأذنت وبعدين انا رمست الهندي اللي برا اذا راكان داخل قالي هيه وما منعني اني ادخل فقلت عادي .. آسف حقك علي .. وآسف لأني نكدت عليك بظهر الحين مع السلامة بس كنت ياي اسلم على راكان
انصدمت من رمسته هذا من صدقه بيظهر .. بعدني ما شبعت من شوفته
راكان : اييه عبدالعزيز عن الهبل وين بتروح بعدك ما يلست وياي
شفته يصد عني ويطلع طالعت ابوي بنظرات عتب على بالي بيتأسف لكن ولا همه تم على نظراته ورد يلس مكانه
حسيت اني لو تميت شوي بكفخ ابوي
فظهررررت وانا معصب اليوم لا يطااق كريه
ظهرت للحوي وانصدمت وانا اشوف امي واقفة جدام عبدالعزيز بوقايتها والظاهر انها ترمسه .. مادري ليش خفت ا نامي تتهجم عليه شرات ما سوى ابوي ف مشيت بسرعه صوبهم
عَبدالعزيز
والله والله لو تقيسوون مدى جرحي وحزني ما بتقدرون ..
احس ودي اذبح عمري انا كللللب لو يلست عند ساره ورحت واجهة عمي مب احسن بدال المذلة اللي حصلتها اليوم
توجهت لبرع البيت الكريه بعد ما تأسفت لبو راكان وكل هذا عشان خاطر راكان
ما ادري ليش احس اني مفتشل من عمري واني سودت ويه راكان .. مع انه دافع عني
ما حسيت وانا امشي الا بصوت يناديني
عبدالعزيز
صديت ولقيت وحده بوقايتها متغشية ... ماعرفت من تكون
ام راكان : انا ام راكان ... شخبارك حبيبي ؟!
انصدمت منها .. ماتوقعتها تسألني بلطف عكس ريلها الكريه
ابتسمت لها بألم
عبدالعزيز : الحمدالله يا خالة ... مبروك ردت راكان لكم ..
ام راكان : الله يبارك فيك يمه .. ليش طالع حياك الله ما قعدت ويانا
عبدالعزيز : لا ماعليه رايح اللي سويته كفايه
ام راكان : والله ما تروح
ما عرفت شو ارد عليها وفي نفس الوقت تقرب منا راكان
ام راكان : راكان اسمع اخوك يقول بيظهر اقنعه ييلس ابا اسولف وياه
استحيت منها وايد واستانست وايد يوم سمعتها تقول اخوك .. طالعت راكان شفته مبتسم
راكان : افا يا عزووز يهون عليك ترد الغالية .. يلا يالسخيف قوم برويك لعبة غريبة يلعبونها وربي بتستانس
ماعرفت كيف اتصرف لكن شوقي لراكان خلاني ابعد احساس الحزن
ابتسمت ومشيت مع راكان وامه بعد ما سحبني بإيده
مادري ليش حسيت اني مستحي يمكن لأني برد اجابل ابوه ..
دخلت البيت وحسيت براحة يوم شفت بو راكان محد
يلسنا وتمينا نسولف ..
وايد ارتحت لأمه حسيتها انسانة حبوبة وقلبه طيب وكبير .. يا حيه راكان
ربع ساعة وبعدها دخل علينا بو راكان
مادري ليش وقفت مرتبك .. حسيت اني ابا اطلع من البيت ما ابا اجابلة
بس وقفت بمكاني يوم سمعته يقول
بو راكان : ام راكان شلي الغشوة من ويهج محد غريب عبدالعزيز ولدي وولدج واخو راكان ...
مدري شو اوصف لكم شعوري وقتها .. لكن الأكيد اني ماعرفت اعبر عنه الا بالصياح بالصوت العالي ..
قالوها حمد وراكان مره انا نفس طينة رحاب بس أصيح وخواف
لكن برايهم الموقف أكبر من اني اتحمله .. شسوي فرحان …
بو راكان : مصيبة هالريال كل ما نطقنا بكلمة صاح يبالي اعلمه كيف يحبس دموعه
راكان : يا يبه الله يهديك هذي دموع الوناسة خله دامه مستانس
ام راكان : فديييته
راكان : اقول يمه شرايج تروحين تبوسينه بعد
ام راكان : يا ولد استح
مي : ماما ليش يصييح هالريال ؟
راكان : الله يفضحك يا عبدالعزيز فشلتنا اسكت بس اليهال بيتمصخرون عليك
عبدالعزيز : جب
راكان : والله محد يعطيك ويه اطلع برا بيتنا اطلع
قهرني هالراكان شكله ما بيخليني اكسر خاطرهم زيادة
يلست على الأرض امسح دموعي وطالعت راكان بتحدي
عبدالعزيز : قاعد على قلبك
راكان : زي العسل والله ..
عبدالعزيز : غصبا عنك
راكان : صدق انك ثور محد يعطيك ويه
عبدالعزيز : مب لازم عندي واحد واوسم منه مافيه
راكان : تتحدى منو أحلى
عبدالعزيز : والله اتحداك
راكان : عيل تعال فوق
نشيت وياه ويوم ييت بظهر من الحجرة تذكرت بو راكان اخافه يظربني مره ثانية
صديت صوبه ولقيته يطالعني
ارتبكت ماعرفت شو اقول ..
وهو أنقذني يوم قال
بو راكان : خذ راحتك يا عزوز ماعندي بنات كبار ، البيت بيتك
ابتسمت له بامتنان
عبدالعزيز : تسلم يا عم ..
ظهرت من الحجرة وتلعوزت الحين وين اروح وين الدري وين
مشيت ولفيت يسار
هذا راكان شكله سبقني اكيد بيتحايل علي نصاب هذا
شفت حرمه بحجاب ابيض شكلها فلبينيه ..
ماشاءالله بو راكان متزوج فلبينيه شكله ينوع في الحريم
يوم شافتني اطالعها وايد ابتسمت لي
يممممه ظروسها تخرع
عبدالعزيز : وين غرفة راكان
البشكارة : افتح هزا باب حصل دري روح فوق اول غورفة مناك
عبدالعزيز : ايوا شكرا عمتي
رحت فوق اشرد من نظرات هالحرمة
دخلت الحجرة وانصدمت باللي أشوفه ..
راكان لابس ومتكشششخ الهرررم على باله بنحكم ع الكشخه
عبدالعزيز : بالنصاب احن اتفقنا منو الأجمل شكلا مب لبساً
راكان : اقولك انت ماتعرف قواعد هالناس الكاشخ هو اللي يلبس هالبنطلون الراص والقميص اللي مشخبط عليه بشخابيط اطفال ...
عبدالعزيز : الله يعطيهم العقل
راكان : آمين ، خذ هالبدلة البسها شريتها لك عشان نلبس نفس الشي والجوتي هذا ويلا بنطلع مع سواق ابوي المول بنلعب
عبدالعزيز : راكان تشوف اللي اشوفه ؟
راكان : للأسف ما اشوف غيرك
عبدالعزيز : راكان يالأهبل لاحظ احلامنا بأن نحن نصير مثل الناس تحققت بنروح السوق مب عشان نسرق ولا نشحت ونشتغل لا عشان نستانس
راكان : ايوا الحمدالله ياما تمنينا هالشي والحمدالله تحقق وعسى ربي ما يردنا شرات قبل ..
عبدالعزيز : آمين ، تدري راكان احس اني خيبت ظن سارة فيني اليوم ..
راكان : ليه ، شو سويت يا رحاب الثانية ؟
عبدالعزيز : ممم اخافك تعصب علي بعد
راكان : قوووول خلصنا كل شي ولا زعل ساروه
عبدالعزيز : اليوم كان المفروض اقابل عمي ف المحكمة وآخذ ورث ابوي بس شردت
راكان : شوووووووووووووووووووووووووو ..الا اقولك شو يعني محكمة ؟
عبدالعزيز : ماعرف هو مكان تاخذ حقك فيه
راكان : ويالخديييه ليش ما رحت دامك بتاخذ حقك
عبدالعزيز : انت ماشفت شكل عمي يوم رحت له يخررررع حسيته بياكلني
راكان : ياربي ياربي انا مرابع بنية الله يعينا عليك ، زين ساروه ما اكتشفتك؟
عبدالعزيز : اتصلت علي بعد ما ظهرت بنص ساعة قالتلي سو اللي يريحك ، مبين انها زعلت
راكان : متى المفروض تروحون ؟
عبدالعزيز : على المغرب اتوقع ..,
راكان : عيل يلا البس وبنروح مكه
عبدالعزيز : شوووووووووووووووه !!
راكان : اللي سمعته ، انت لازم تاخذ حقك راكان نحن لازم نبدا حياتنا من اول ويديد نتعلم نعرف الصح من الخطأ نعيش شرات الأوادم والناس ... لازم ما ننجرح وننهان اكثر عن جيه اخواني الصغار معلقين علي غبي وانت شفت كيف ابوي اليوم أهانك .. لازم لازم نتغير وغصبا عن خشمك بتمشي وياي
عبدالعزيز : من متى صرت تتكلم جيه كبرت والله
راكان : الله يخليك امي مره قالتلي هالكلام وسجلت صوتها وتميت يومين احاول احفظه
عبدالعزيز : هههه وانا اقول من وين يبت الكلام ، زين روح خبر اهلك وانا بلبس
راكان : يرحم ايام اول يوم كنا نلبس ويا بعض لا حيا ولا مستحى
عبدالعزيز : عن الخرط كنا نسكر عيونا
راكان : انت مسكين تسكر عينك بس انا لا
عبدالعزيز : يالحيواااااااااااااااان ، اظهر برااا
راكان : اعصابك اللي عندك عندي يلا بظهر .. الله يعين على حشرة ابوي اخاف ما يوافق
عبدالعزيز : يسوي فيني خير والله
ظهر راكان من الحجرة وتميت انا بروحي ما ادري بلاه قلبي يرقع بقو شكل مصيبة بتستوي بس والله اني وايد خايف من عمي ... الله يستر
بس صدق تأثرت بكلام راكان لازم نعزم نغير ..
انا كم مره عزمت لكن خوفي يطغى علي
لبست وظهرت من الحجرة وانا متأكد مليون بالمية ان اهل راكان بيركوهوني
اول ما ييت سويت مشكلة والحين باخذ ولدهم الله يستر
دخلت الحجرة اللي سمعت اصواتهم ظاهرة منها
ومن دشيت لقيت بو منصور ينش ويقول
بو راكان : يلا انا بروح وياكم ناخذ حق عزوز من الظالم عمه
رِحــــــــــاب
امشي في السوبر ماركت أدور على أشياء اشتريها ..
ثلاجتنا فاضية ، لو تدري سارة اني ظهرت من البيت بتكوفني هالأيام مسوية حراسة مشددة وانا ما قمت اطلع اشتري اشياء للبيت
لكن اليوم مليت وبعد لأني ابا اطبخ لعبدالعزيز شي اذا انتصر على عمه اللعين
ابتسمت على افكاري من متى وانا اسب واتحدا صدق الأيام والحرية لعبت فيني وغيرتني
ناظرت قسم المعلبات اتوجه له ولا
تذكرت ان حمد هالأيام طايح على الفول ما ادري شو عنده
مشيت ويلست أنقي ، المشكلة ان توني بديت اتعلم شو النوع الزين من الأكل والفضل كله للحريم اللي يشترن اتم اناظر واشوف شو أكثر الأنواع اللي يشترونها وابدا اشتري ..
هالمَرة ابا شي يديد أسويه بس شو ياربي مممم
أأخ مادري شو صدمت فطحت ع الأرض ياربي شو هالإحراج
التفت يمين وشمال الحمدالله محد شاف الطيحة
رفعت راسي فوق ابا شوف شو دعمت وانصدمت وانا اشوف ريال يا فشششلة
ناقصة
بس حزني وانا اشوفه يمد ايده بضياع
الريال
أعمى ..
ياربي شو أسوي .. هو أعمي وانا ما ارمس كيف بسوي
شفته يحرك حلجه بـ
الريال : عزيزة .. عزيزة وينج !!
ماعرفت شو اسوي كيف انبهه ان اللي يناديها محد واني ما اقدر ارمس
رحمتني حرمة تجدمت ومسكت ايده وناظرتني باستغراب كيف اني يالسة ع الأرض
ابتسمت بإحراج ونشيت من مكاني وتميت ايمع العلب اللي طاحت
بعد ما انتهيت رفعت راسي وشفت حلجها يتحرك الظاهر كانت ترمسني بس انا ما لحقت ع البداية شو كانت تقول
هزيت مره ثانية واشرت بإيدي عيدي ..
حسيتها استغربت
عزيزة : آسفة بس كنت أسأل اذا هو دعمج بالغلط ..
انتبهت ان الريال رد يرمس
الريال : اوه ما كنت اعرف اني دعمت وحده آسف
التفت للحرمة وابتسمت لها بإحراج
حسيتها وايد استغربت وعشان انهي استغرابها والموقف البايخ اللي انا فيه
أشرت لها اني ما أتكلم ..
حسيتها استحت وابتسمت ومبين ان الشفقة بعيونها
وانا بالمرة انهيت هالموقف ومشيت عنهم وانا أحمد ربي مليون مرة على النعمة
ما اسمع ولا أتكلم اهون من عميا ..
ما ادري ليش قمت أحس ان ربي قام يرويني ان حالي احسن من غيري
الحمدالله والشكر لك يارب على النعمة ...
مشيت للبيت ومن ييت بدخل
انصدمت باللي أشوفه
إنتهى
الجزء الثاني والعشرون
رحَاب
مشيت للبيت ومن ييت بدخل انصدمت وانا أشوف شخص واقف عند باب الصالة
رديت لورا بسرعة قبل ما ينتبه علي
وطلعت من البيت أركض لأي مكان ممكن يحميني او يبعدني عنه
وقفت في مكان فيه بيت كهربا
من زود الخوف اللي فيني دخلته ويلست ع الأرض اهدي من ارتعاشي
خايفة بقوة ، قلبي مب راضي يهدي من دقاته
ياربي
ليش يانا ؟
وكيف عرف مكانا ؟
معقولة قصتنا مع رابح بتنعاد ؟
وسارة وحمد اللي داخل بيسوي فيهم شي !!
ياربي احميهم
دموعي بدت تطيح
وانا تذكر اني شفت رابح واقف عند بيتنا اللي كان سعيد
تميت نص ساعة وبدا خوفي يزيد المكان بدى يظلم وما بقى شي على أذان المغرب وخايفة بعد ان حمد وسارة صابهم شَي
حسيت بالقهر من نفسي اكيد هم يتظاربون وياه وانا قاعده هنيه شو من قلب عندي
لازم اروح اساعدهم واوقف معاهم
لازم اخلي الخوف والدموع ..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك