رواية تعلمت أن احترم مشاعرك لكن لا أثق فيها -9

رواية تعلمت أن احترم مشاعرك لكن لا أثق فيها -9

اخذ منه الظرف و راح نايف و رجع سعود لالحان و حط الظرف ع الكنبة و جلس شوي مع الحان و بعدها دخل مكتبه يكمل شغل المناقصات و لمن خلص افتكر الظرف و فتحه و ياليته ما فتحه حبيبته في احضان الغريب خرج سعود من مكتبه معصب و مقهور و الشرر يتطاير من عينه و ينادي ع الحان بأعلى صوته خرجت الحان مفجوعة ع صراخه وكانت لسى تبغى تسأله ولكن كف قوي طيحها ع الأرض و طاح فيها ضرب بالعقال و برجوله { اكرمكم الله } إلين نزل منها الدم و هي مو عارفة سعود ليش يضربها .

سعود : انتي وحدة حيوانه و خاينة و بنت ..................

الحان : ما أسمح لك تتكلم علي كذا

سعود : لا والله أجل كيف تبغيني أكلمك يا ست الحسن والدلال

الحان : سعود واللي يعافيك فهمني ايش الموضوع

رمالها سعود الصور و شافت صورها مع خالد اللي خطبها من جدها وكان نيته سيئة ولمن عرفت فسخت خطوبتها بمساعدة رجال الحي اللي وقفو بجنبها و ساعدوها

الحان : سعود هذي الصور

ما خلاها تكمل كلامها بكف قوي خلى راسها تتخبط ع حافة الدرج و نزل دم

سعود : لا اسمع اسمي مرة ثانية ع لسانك { و يشد شعرها } والله يا الحان لا تشوفي عيشة مني عمرك ما شفتيها وانتي من اليوم ورايح مجرد خدامة تشوفي احتياجاتي و بس .

تركها سعود و خرج و من البيت وهي جثة مهلوكه و كله دم تحسفت الحان ع اليوم اللي وافقت ع خالد اللي كان هدفه شرفها بس وماكان حق الزواج ابداً طلعت الحان بصعوبة الغرفة و أخذت لها شور و غيرت ملابسها و شافت انه الجروح ما يحتاج خياطة بس لصق و مرهم و يخف . جلست تنتظر سعود يرجع ولكن جلست الليل كله تنتظره ولكنه ما جاء و غفت في الصالة , وفي الصباح صحيت و طلعت الغرفة ولقت سعود ماخذ شور و جالس يلبس

الحان : صباح الخير

سعود : غرفتك مو هنا .. أغراضك وديته في الغرفة الثانية

الحان حست بقهر و بفقدانه اللي تعلقت فيه بدون ما تحس ولكنها تكتمت عن مشاعرها

الحان : سعود اسمعني .......

سعود : قلت اسمي لا عاد اسمعه ع لسانك .. وانسي حبي لك خلاص انتي بالنسبة لي ميته ومالك وجود

دمعت الحان لا شعورياً و طالعت فيه و مشت سوت له الفطور و طلعت غرفتها الجديدة رمت نفسها ع السرير و بكت .

{ بيت أبو فارس }

كان فارس توه واصل من برى كان طول الوقت مع سعود اللي كان مقهور من الحان و شكى له وكيف هزت ثقته و اللي قرر يتزوج عليها عشان يقهرها و يحرق قلبها مثل ما حرقت قلبه .

شافته ندى و سلمت عليه و تركها فارس و طلع غرفته ونام و راحت ندى لعند فتون و فطرو مع بعض و بعدها قرروا يروحون لالحان لانه لهم فترة عنها ما شافوها .

{ بيت أبو سيف }

كانت رحمة و روان جالسين مع خالتهم و حورية اللي امها اجبرتها تجلس معاهم و كانو يسولفون مع بعض و بعدها حورية اتصلت ع الحان تجيها و بعد خمس دقائق جاتها والحان و طلعو غرفة حورية

حورية : لحون ايش الحفلة اللي بيسويها سعود اليوم

الحان باستغراب : أي حفلة

حورية : مدري بس قال اليوم جهزو نفسكم

الحان : ما بعرف والله

حورية : لا يكون حفلة زواجكم لا تنسين انه ما سويتو حفلة

حوراء من وراهم : ايه حفلة زواج قالي

و فجأة رن جوال الحان و لقته سعود و ردت عليه

سعود : اسمعي وداد اليوم بتجيك و أبغاك تجهزينها اوك

الحان : عشان ايش

سعود : بدون أسأله سوي اللي قلت لك عليه وانتي ساكتة

و قفل الخط وجهها سعود و انقهرت منه الحان و قالت مع السلامة عشان ما يحسون البنات بشيء.

و رجعت ع بيتها و سوت الغدا لسعود و طلعت غرفتها و نامت و ع المغرب صحيت و صلت العصر مع المغرب لانه فاتها و نزلت ولقت وداد جالسة في الصالة سلمت عليها و كانت وداد مبسوطة مع انها ما تعرف ليش سعود قالها تعالي البيت وخلي الحان تجهزك بس ما حبت ترفض له طلب و قامت الحان تجهزها و طلعت لها الفستان اللي سعود قالها عليه قبل لا تنام , وبعد ما جهزو نادو ع وداد و راحت و الحان لبست فستان هادئ و سوت ميك اب خفيف و طلعت للضيوف و سلمت عليهم وجلست ولكن فجأة سمعت من اللي جبنها تهمس اللي جالسة جنبها

.............: تصدقين شكله بسبب أخلاقها ولا ايش يخليه يترك كل الجمال و يتزوج بنت عمه

............: أنا سمعت أنها خانته

و دخلت أم سيف بزغرودة و الضحكة تشق و الكل يبارك لها و فجأة جاء عينها ع الحان

أم فيصل بصوت عالي : شوفوها وجهها ممسوح بموية المرقة زوجها تزوج عليها وهي نافخة ريشها و جالسة في حفة زواجه

الحان و كأنه أحد كب عليها موية نار بخبر زواج سعود انصدمت و انحرجت في نفس الوقت لأنها حضرت زواجه , تركت الضيوف و طلعت من الصالة وهي طالعة شافت أخوها مشعل ابتسمت له ابتسامة صفرا و تركته و رجعت لغرفتها و حطت جسمها تحت دش بارد من حرارة قلبها و بكت و بكت كيف يسوي فيها كذا ويخليها هي تجهزها بنفسها و بعد ما تعبت من البكا و التفكير قررت تخرج من الدش و تنام.

{ زواج سامر و أنهار }

الزواج الوحيد اللي صار في القاعة و كان هدف أبو سيف أنه يراضي أخوه ع اللي عمله ولده سيف في أنهار فسواه في أكبر و أفخم قاعة في الرياض . كانت الحان تجهز رفيف و رائف و أخوها اتصل عليها و يقولها انه تحت ينتظرها خلصت لهم الحان بسرعة و أخذت عبايتها في يدها و خلتهم يمشون قدامها في الدرج , جرو العيال يسلمون ع سعود اللي كان كاشخ و جالس في الصالة , الحان من يوم تزوج سعود وهي حابسة نفسها ما تبغى تشوفه , وقفت تنتظرهم يخلصون السلام عشان يمشون , سعود فرح لمن شافهم و سلم عليهم و قالهم يجلسون عشان يوصلهم و لمن الحان سمعته يقول كذا , لبست عبايتها و مشت لعند الباب لكن صوته وقفها ..

سعود : قلت أنا أوصلكم ما سمعتي

الحان وهي معطياه ظهرها : مشعل ينتظرني و بروح معاه

سعود : أنا ايش قلت

الحان وهي تلتفت له : معاك العيال و زوجتك أنا ايش خصني أروح معاكم

سعود بعصبية : روحي انطقي اجلسي أنا بوصلكم

وداد وهي نازلة : حبيبي أنا خلصت يلا نمشي

سعود : يلا

و مسك سعود من كتف الحان بقوة و مشاها معاه و جلسها في السيارة قدام عنده و راح لمشعل قاله يروح و راح و جات وداد شافت الحان جالسة قدام و راحت تكلم سعود و الحان لمن شافتهم فهمت و نزلت جلست وراء مع العيال و ركبو و مشو و طول الطريق سعود كان حاط المرايا ع الحان يشوفها وهي تطالع في الشباك , نزلو كلهم من السيارة لمن وصلو و أخذت الحان الأطفال و دخلت بسرعة لمن شافت سعود جاي لها و ما أعطته فرصة يقرب منها , شالت عبايتها و دخلت سلمت الضيوف و أخذت لها كرسي و جلست بعيدة عن الناس وخاصة من أم سيف و أم فيصل , ما تبغاهم يتشمتون فيها كفاية اللي سوه فيها يوم زواج سعود .

دخلت فتون و معاها ندى و ولدها عمر و سلمو ع الضيوف و لمن شافو الحان راحو عندها وجلسو معاها

فتون : كيفك يا وحشة كذا ما تردين ع اتصالاتي

الحان : آسفة ولكن والله ماكان لي خلق أكلم أحد

فتون : و أنا أي أحد

الحان : أكيد لا انتي أختي ولكن أعذريني مرة ما كنت ع بعضي عشان أرد

فتون بهمس : تحبينه

الحان سكتت و ما ردت عليها و جلست تطالع في عماتها كيف فرحانين و خاصة أم ريان تمنت أنه أمها تكون ع قيد الحياة و ما ماتت ع الأقل تلقى أحد يفرح لها و يحزن لحزنها و نزلت دمعتها بدون ما تحس فيها و مسحتها بسرعة عشان ما حد يشوف لكن ما كانت تدري أنه المكان اللي جالسة فيه كان فيه باب و مفتوح شوي و كان سعود مار و شافها و قفل الباب عشان ما يبانو للخارج والمار من هنا .

جات ولاء سلمت عليهم و قالت لالحان تطلع سامر يبغى يشوفها , تركتهم الحان و طلعت فوق. و جلست ولاء معاهم وانضمو لهم أسيل و حورية .

دقت الحان باب الغرفة اللي كان جالس فيه سامر و مشعل و قالو لها تدخل مافي احد , ودخلت و شافت سعود جالس معاهم , ابتسمت الحان و سلمت ع سامر و مشعل وجلست بينهم .

الحان بابتسامة : ألف مبروك

سامر : الله يبارك فيك عقبالك

مشعل بصوت عالي : ههههههههههههههههههه

سامر : ايش فيك

الحان : أنا متزوجة

سامر : أدري

مشعل : أجل كيف تقولها عقبالك

سامر : وانا ايش يدريني اشوف الكل يقول كذا

مشعل : هذا لو كان الشخص مو متزوج

سامر : طيب اقلب وجهك

مشعل : ههههههههههههههههههههههه

الحان : بغيت شيء مني يا سامر

سامر : ايه بس خليهم يطلعون

سعود : افهم من كذا احنا مو مرغوبين

مشعل : أنا مو طالع

سعود : ولا أنا زوجتي و بجلس معاها

سامر برجاء : تكفون الله يخليكم ابغاها في كلمة راس

الحان تهمس في أذنه : بعرف اللي تبغاه تطمن ان شاءالله تكون زوجة كويسة و تحبك ولكن اهتم فيها

سامر بابتسامة : الله يطمنك مثل ما طمنتيني

الحان وهي تقوم : آمين

سامر : ع وين

الحان : خلاص بنزل تحت بجلس مع البنات

سعود : طيب تعالي ابغاكي

واخذها سعود و طلعو من الغرفة و وقفو

سعود : ليش كنتي تبكين

الحان بابتسامة مصطنعة : متى بكيت و ع ايش ابكي

سعود : لحون شفتك تبكين تحت وانتي جالسة مع البنات

الحان : افهم من كذا كنت تطالع الحريم ... ايش بتقول وداد لو عرفت

سعود : وانتي ما بتقولي شيء

الحان : لا

سعود : ليش ؟

الحان : لأنه مو من حقي ... والحين خلني اروح

سمعو حمحمة و التفت سعود لمصدر الصوت و لقى سيف مع فارس واقفين عند باب الخارج و معطينهم ظهرهم , بسرعة سحبت نفسها الحان و نزلت تحت عند البنات وجلست معاهم .

كان الفرح مرة حلو و الكل كان مبسوط و خاصة مشعل كان مبسوط لسامر ولد خاله و صديق عمره , خلصت الحفلة والكل راح ع بيته , و راح سامر مع أنهار ع الفندق و دخل سامر و انهار دخلت و بسرعة أخذت شور و نامت دخل سامر و شافها واستغرب منها

سامر : بتنامين

أنهار بنفخ : وانت ايش شايف

سامر : زين طيب تكلمي بأسلوب حلو

أنهار و تلتفت لناحيته : أسلوبي حلو

سامر و هو خارج : ايه واضح

أنهار بقهر أخذت المخدة و رمته , كيف تتزوجه ما تبغاه ولا تفكر فيه و راحت طلعت جوالها و اتصلت ع صحبتها مريم إلين صبح عليهم و بعدها قفلو الخط و نامت أنهار و صحي سامر و دخل عندها لقاها نايمة تذمر منها و اخذ شور و لبس و خرج من الفندق يتمشى.

{ بيت أبو سيف }

صحيت حورية و صحت الحان اللي كانت نايمة عندها و بعدها دخلت تاخذ شور , قامت الحان و رتبت السرير ع بال ما تخلص حورية , رن جوالها و شافت اسم سعود

الحان : الو

سعود : صباح الخير

الحان : صباح النور

سعود : ليش نمتي عند حورية

الحان : حبيت أنام عندها ونمت فيها شيء

سعود : وليش تكلميني بدون نفس

الحان : آسفة ... بغيت شيء

سعود : ارجعي ع البيت الأطفال لوحدهم

الحان : طيب بس أغسل وارجع

سعود : الحين

الحان : طيب

خرجت الحان من غرفة حورية و راحت غرفة حوراء واستأذنت منها تغسل وجهها و تفرش أسنانها عندها و سمحت لها , بعد ما غسلت أخذت شرشفها و حطته فوق راسها و مشت لبيتها و هي تدخل شافت سعود جالس و حاط رجل فوق رجل والجريدة في يده والقهوة قدامم , و جات تبغى تطلع الا و سعود يمسكها من يدها

سعود : ثاني مرة مافي نوم برى بيتك و غرفتك مفهوم

الحان بتنهيدة خفيفة : ان شاءالله

سعود : روحي سوي لي الفطور

الحان : هو أنا بس ........................

سكتت و ما كملت افتكرت كلامه انتي من اليوم ورايح خدامتي و تلبين احتياجاتي

سعود باستغراب : انتي ايش

الحان : ولا شيء

فكت نفسها منه و دخلت المطبخ و سوت له الفطور و لمن جهزته حطته قدامه و طلعت غرفتها و أخذت لها شور.

نزلت وداد و جلست جنب سعود تفطر معاه

وداد : حبي سعود ليش جدة وليه ما نروح باريس

سعود : قلت لك عندي شغل هناك اما باريس هالفترة ما اقدر اسافر خارج السعودية

وداد : وليش

سعود بتذمر : عندي شغل

وداد : بس ابغى اروح باريس انا

سعود بعصبية : احمدي ربك اني بوديك شهر العسل عشان اقهر الحان اللي ما وديتها اي مكان

الحان كانت نازلة مع العيال و سمعته و دخلتهم الصالة و طالعت في سعود و راحت المطبخ تجهز الفطور للعيال

وداد : وانت ليش تقارني بها

سعود : وداد واللي يرحم والديك سكري عن الموضوع

وداد : بس انا ابغى اسافر برى ما ابغى هنا

دخلت الحان و اخذت الاولاد و دخلتهم غرفة الاكل و جلست تأكلهم و جاء عندهم سعود و جلس معاهم

رائف : ماما اليوم نروح الملاهي

الحان التفتت لرائف وابتسمت أول مرة يناديها ماما : طيب حبيبي نكلم خالو مشعل يودينا

سعود : وأنا عندكم طرطور يعني

الحان وهي تدخل اللقمة في فم رفيف : ع حسب علمي انت مسافر اليوم

رفيف : عمو انت مثافر فين

سعود : يا سلام لها تقولون ماما و أنا عمو

رفيف : عسان انت عمو بث ثح ماما

الحان : لا حبيبتي هذا أبوكم

رائف : طيب و بابا سيف

الحان : حتى بابا سيف أبوكم و سعود كمان أبوكم

رفيف : خلاث أنا بقوله بابا

سعود وهو يبوسها : شاطرة حبوبتي رفيف

رائف غار : وأنا

سعود : حتى انت شاطر و باسه ع خده

رفيف : و ماما ما راح تبوثها

الحان فتحت فهمها و سعود قرب من الحان

سعود و هو يبوسها : أكيد أبوسها مو هي أمكم

الحان نزلت عينها و جلست تأكل رفيف و ما تبغى سعود يشوف انحراجها منه و خلصو الأكل و دخلتهم غرفة ألعابهم اللي خصصه لهم سعود و جلسو يلعبون و هي جلست تتفرج عليهم و تبتسم لبراءتهم و ما حست بسعود وهو جالس جنبها إلا لمن همس لها

سعود : أمووت في انحراجك

التفتت الحان ولمن شافته قريب منها مرة بعدت عنه بسرعة وخلت بينها مسافة

سعود : ليش بعدتي

الحان : ما حسبتك تحب تجلس مع الخدم

سعود : عندي استثناءات

طالعت فيه و هي ساكته و بعدها الفتت لرفيف اللي كانت ترسم وهي منبطحة ع بطنها

سعود : لحون ليش خنتيني

الحان : سعود لا تفتح موضوع ما راح نلقى نتيجة فيه

سعود : جاوبيني ليش خنتيني

الحان : سعود تكفى قفل عن الموضوع

سعود : ما راح نقفله لازم أعرف ايش ناقصني أنا عشان تخونيني

الحان بعصبية : أنا ما خنتك الصور اللي انت شفتها يوم أنا مخطوبة له و تقدر تروح للحي اللي كنت اعيش فيه و تسأل كل اللي يعيشون فيه هناك و هما يحكون لك قصة الصور هذي

سعود : انتي كنتي مخطوبة له .. وكيف تصورتي معاه وانتي مخطوبة له

الحان : سعود قفل الموضوع

سعود : من حقي أعرف كل شيء

الحان : بعد ايش .. بعد ما تزوجت علي و خليتني سيرة ع كل لسان

سكتت الحان و جلست تبكي و لمن شافوها العيال جو حضنوها و بكو معاها

سعود : أنا تزوجت لأني .......

الحان تقاطعه : خلاص ما أبغى اسمع شيء منك انت تزوجت و هالشيء ما تقدر تغيره و أنا راح أكون الإنسانة اللي تبغاها خدامة لك و بس , ولا تفتكر بسوي هالشيء لخاطر عيونك لا يا سعود ... ولكن بسبب هذول { و تأشر ع رفيف و رائف } و مستعدة أسوي أي شيء عشان سعادتهم .

شالت رفيف في حضنها و مسكت رائف من يده و طلعتهم غرفهم و سعود كان واقف مستغرب من ردة فعلها و بعدها قرر أنه لازم يسأل عن خالد هذا .

{ بيت ابو فارس }

كانت ندى مع فتون و جالسين يتفرجون ع فلم و دخل عمر يتفرج معاهم و مندمجين و فجأة جات لقطة واحد يضرب طفل صغير بوحشية و جن جنون عمر و بدأ يصرخ و يكسر الأشياء اللي قدامه و تشنج و صار ينفس بقوة و فتون جلست تهدي فيه و ندى واقفة مو عرفة ايش تسوي أول مرة تشوفه ع هالحال و جاء فارس و ابوه ع صراخ عمر بسرعة أخذه فارس للمستشفى و فتون معاه وهي في الطريق اتصلت ع الحان

فتون ببكاء : لحون الحقيني عمر بيروح مني

الحان بفجعة : خير وايش صاير

فتون : رجع له الحالة

الحان : أوك انتي فين

فتون : مع فارس في السيارة رايحين ع المستشفى

الحان : طيب اسأليه اي مستشفى بيوديكم

فتون وهي تنزل الجوال : فارس أي مستشفى

فارس : مستشفى .............

فتون وهي ترجع الجوال لأذنها : مستشفى الـ ................

الحان : أوك الحين بجي

سكرت فتون الجوال من عند الحان و مسكت راس عمر و تقرأ عليه الين وصلو و دخلوه الطوارئ بسرعة .

{ بيت سعود }

الحان كانت تتعثر ع الدرج وهي نازلة خايفة ع عمر لا يدخل غيبوبه هو كمان زي أمه و الدكتور أحمد تتصل عليه ما يرد عليها , سعود كان خارج من مكتبه و شافها وهي تلبس عبايتها و فجأة رن جوالها وحمدت ربها انه الدكتور احمد

الحان : دكتور الله يوفقك عمر في المستشفى ....... ممكن تلحقنا هناك

الدكتور أحمد : خير ان شاءالله

الحان : رجع له الحالة ... دكتور الحقني هناك واشرح لك كل شيء هناك

الدكتور أحمد : ان شاءالله

قفلت الحان الخط و عدلت طرحتها و خرجت بسرعة و نست سعود و قوانينه و طلعت مع السواق و راحت ع المستشفى و سعود لحقها بسيارته , دخلت الحان و شافت فتون جالسة وحاطة يدها ع راسها و كان فارس واقف قدامها و لمن قربت الحان منها حضنتها فتون و جلست تبكي

فتون : لحون ولدي بيروح مني الله لا يوفق اللي كان السبب الله ياخذه وافتك منه ومن شره

الحان وهي تربت عليها : هدي نفسك الحين الدكتور أحمد بيجي و يشوف عمر لا تخافين

فتون : ياليتني ما تفرجت ع الفلم ولا خليته يتفرج معانا

الحان : فلم ايش

فتون : فلم امريكي و جاء واحد يضرب ولد صغير

الحان : انتي تدرين انه عمر يخاف من العنف

فتون : راح من بالي

الدكتور أحمد : السلام عليكم

التفتو كلهم للدكتور و ردو السلام

فتون : دكتور الله يخليك انقذ لي ابني

الدكتور احمد : ما يصير الا كل خير ان شاءالله بس انتي هدي بالك

سعود اللي كان واقف من اول : طيب دكتور هو ما عنده اي ادوية للحالات هذي

الدكتور احمد : في ادوية ولكن الحان رفضت اي ادوية نعطيه له

فارس : وليش ان شاءالله هذي صحته ولازم ياخذ أدوية

الحان : أدوية ما راح ياخذ و راح يتعالج باذن الله باختلاطه بالناس والتعامل الحلو

فارس : بس انتي شايفة كيف حاله يعني لابد من الأدوية

فتون : ولدي ما راح ياخذ أي أدوية مثل ماقالت الحان

سعود : لا تحسبو نفسكم الدكاترة وانتو اللي تقررو

الحان : محنا دكاترة ولكن نعرف مصلحته و دواء ما راح ياخذ

فارس : مو بكيفك بكيف الدكتور

الدكتور أحمد : القرار الأول و الأخير يرجع لهم أنا ما أقدر أعطيهم شيء هما ما يبغونه

فارس : يعني اشلون نخلي الولد كذا

الدكتور أحمد : عن اذنكم بروح أشوفه

الكل : تفضل

فتون : لحون لو ما نفع نخلي الدكتور يكتب لنا ع الأدوية

الحان : لا يا فتون نسيتي فيصل الله يرحمه وصانا انه ما نخليهم يكتبون له أي دواء

فتون : بس ولدي بيروح

الحان : نص العمى ولا كله

فارس : فهموني ليش ما تبغونه ياخذ اي ادوية

فتون : لأنه بيعطي مضاعفات بعدين لو تركه

فارس : كيف يعني ما فهمت

الحان : بعض الأدوية بيسوي مضاعفات في المستقبل لو تركه ممكن يخلي عقله يضعف أو يصير معاق جسدياً

فارس : معقولة اجل ليش يكتبون له لو هو كذا

الحان : صار هالشيء لواحد من الاولاد اللي فيصل كان يعرفهم وصار له نفس المضاعفات عشان كذا قالنا لا تخلوه ياخذ اي ادويه و بعدين انا اشوف اختلاطه بالناس احسن علاج

سكتو لمن شافو الدكتور خرج من عند عمر و طمنهم انه مافيه شيء بس صدمة خفيفة ومافي اي داعي للخوف و انه اعطوه مهدئ بس ينام و بعد ساعتين يفوق و يقدر يرجع معاهم , فرحت فتون كتير و حضنت الحان و بعدها رجعت الحان مع سعود و رجع فارس يطمن ابوه واخته و بيرجع لها بعد ساعتين عشان يرجعهم معاه.

كانت فتون جالسة و تقرأ ع ولدها الين حست بعطش و نزلت الكافتيريا تشتري لها مويه واي شيء تاكله وهي داخلة صدمها واحد الين طاح منها غطاها من وجهها و المحفظة من ويدها والتفتت تاخذ المحفظة الرجال اللي صدمها انذهل بجمالها الهادئ و عيونها , اخذت محفظتها وعدلت غطاها وكلمت طريقها واخذت مويه وكروسون و رجعت شافته واقف زي ما هو تبغى تطلع لكن هو صاد المكان بضخامة جسمه

فتون بصوت واطي : لو سمحت ممكن تبعد عن الطريق أبغى اعدي

بعد لها وهو ساكت و مو حاس بنفسه أول مرة تدخل بنت مزاجه ياما وياما صد بنات ودكتورات لكن أول مرة يحس بشعور غريب اول ما شافها و كأنها هذي اللي من أول ينتظرها و مشي وراها و شافها دخل غرفة

الدكتور أحمد : دكتور رامي

التفت رامي لمصدر الصوت و شاف الدكتور أحمد اللي طول عمره يعبره مثل أبوه و يروح له لمن يكون متضايق

رامي بابتسامة : هلا عمي كيفك

الدكتور أحمد : هلا بابني اللي له يومين ما أدري عن أراضيه

رامي : سامحني يا عمي ولكن هاليومين كانت عندي عمليات صعبة شوي

الدكتور أحمد : الله يعينك و يوفقك يا ابني ... ها قولي ايش عندك جاي وراء فتون

رامي : مين فتون

الدكتور أحمد : اللي جالس تلحقها من الكافتيريا

رامي : ههههههههههه وانت شفتنا

الدكتور أحمد : تعال مكتبي ونتكلم هناك

و مشى رامي مع الدكتور احمد لمكتبه وجلسو و تكلمو في أمور كثيرة ومنها عرف رامي عن فتون و لكن لمن سمع عن اسم الحان افتكر فيصل و ريان و اخته رحمة وكيف مات فيصل ومين اللي قتله .

{ بيت أبو فيصل}

كانت أم فيصل تجهز نفسها تبغى تزور دلوعتها , وابو فيصل كان يجهز نفسه عشان بيسافر , أما ولاء فبسبب الحان كانت تتجهز و ودها تشوفها , و بعد ما تجهزو نزلو كلهم الصالة و سلمت ولاء ع ابوها وطلعت السيارة ونفس الشيء أم فيصل سلمت عليه و طلعت السيارة , ومشو ع بيت سعود و بعد نص ساعة وصلو ع البيت استقبلتهم وداد و جلستهم في الصالة , وبعدين جو عندهم أم سيف وبناتها و أم رامي وبناتها .

دخلت الحان البيت و وراها سعود سلمو ع الضيوف و طلعت الحان غرفتها و معاها ولاء وحورية

ولاء : يااااااااه ما احب جلستاهم كلها مؤامرة و هتك العرض

حورية : تراهم أهلنا لا تتكلمين كذا

ولاء : كلمة الحق ينقال .. يعني بالله عاجبك كلام امي وامك وخالتك

حورية : لا مو عاجبني ولكن ايش تبغينا نسوي

الحان : النصيحة وهذي اضعف الايمان

ولاء : لو نصحتيهم بياكلوكي

حورية بتردد : اممممممم لحون

التفتت الحان لحورية و شافت ولاء تغزها وتهمس لها

الحان : خير وايش فيكم

ولاء : مافي شيء

الحان : حورية ايش في قولي

حورية : بصراحة قالوا كلام بس مدري

الحان : اي كلام

ولاء : لحون انسي الموضوع

الحان : لا مني ناسية ودامكم بديتو يلا سمعوني اللي عندكم

حورية : خالتي ام فيصل تقول انك قتلتي فيصل و انا مرة سمعت سيف يقول نفس الكلام وانه تزوجك بسبب الانتقام

الحان : بعرف بكل شيء

ولاء : طيب لحون ليش ما تدافعين عن نفسك وانا بساعدك و سعود اكيد ما بيقصر معاك خاصة انه يحبك

الحان بابتسامة : مافي شيء يستاهل عشان أدافع عنه

حورية : من جدك انتي ... متهمينك ع قتل وانتي تقولين مافي شيء يستاهل

الحان : أنا مستعدة أخسر نفسي ولكن ماعندي استعداد أشوف اللي قدامي يخسرون حياته

و فجأة سمعو دق باب و سمعو صوت سعود ينادي ع الحان وخرجت له وشافته واقف و يلعب بجواله

يتبع ,,,,

👇👇👇

تعديل المقال