رواية ما ادري القاها من جرح القرايب والا عذاب الاحباب -11
عاد ابي توقعاتكم عن ابو راكان وعائلته هل ممكن يسوي شي ابو راكان لفيصل ويساعده ؟؟
راكان وندى يقدرون يعرفون سر امهم او يظل مختفي عنهم ؟
نواف هل يوصل لسلطان ويقدر يمسك طرف خيط على الاقل عشان يبدا مشواره الحقيقي بالانتقام من سلطان واللي معه ؟
نور مانهاااااااية حياتهااااااااااااااا بوسط بيت جاسم ؟؟
كانت بالامس شيماء يحاولون يزوجوها واليوم طلع عبدالرحمن ايش تتوقعون يصير معه ومع ابوه ؟
انتظروني بالبارت الجديد يوم الخميس القادم ان شاء الله
اليكم البارت الحادي عشر (11)
اول ماوصل فيصل وغلا ونزلوا من الطياره وهم متجهين لسيارة اللموزين
غلا : اقول فيصل الحين انت تدل بيت عمتي وضحى زين ؟
فيصل : ايه اجل اجي هنا على عماي ماعرف شي
غلا : ايه على بالي
فيصل : على بالك ايش ؟
غلا : على بالي ماتعرفه وجاي هنا يد ورا ويد قدام وتبي تسال الين تحصله
فيصل : ليه للدرجه هذي شايفتني اهبل
غلا : لاحشاك عاد عن الهباله هههه
فيصل : بس بالاول بشوف لي فندق استاجر فيه
غلا : وليه تستاجر حنا مو بنظل ببيت عمتي ؟
فيصل : لا نستاجر لنا ببيت احسن ماحد يعرف كيف ظروف عمتي هناك
غلا : بس عمتي وحيده واللي اعرفه انه بيتها كبير
فيصل : حتى لو انا افضل لنا اننا نسكن برا واذا اصرت اننا نظل عندها يحلها ربك وقتها
ببيت ابو راكان
راكان هو واخته رايح كل واحد منهم لغرفته قابلوا ابوهم
راكان : ها يبى كيفك الحين ؟
ابو راكان : لاالحمد لله احسن انا زين من قال انه فيني شي ؟
ندى : لاابد يبى بس من سالفة انه صدمنا بالسياره ووعرفت من اللي صدمناه وانت مو على بعضك
ابو راكان اخذه التفكير بينه وبين نفسه .. اكيد بيشغلني بالي كيف اقول انه
اللي انه فيصل هذا اخوكم وانتم من وعيتوا بالدنيا وعلى بالكم انه مالكم اخوان
راكان : يبى وين سرحت حنا نكلمك
ابو راكان : لاولاشي ايش كنتوا تقولون ؟
راكان : كنا نقول انك مو على بعضك من ساعة الحادث البسيط اللي صار
ابو راكان : لا بس شوية مشاكل بالعمل
ندى: يبى اي مشاكل اللي خلتك كذا
راكان : والمشاكل ماجات الا من طاري فيصل هذا اللي مايتسمى
ابو راكان : لالا اي فيصل عاد
سلمى : انتم ايش فيكم على ابوكم ؟
راكان : مافينا شي بس حاسين انه فيه علاقه تربط ابوي بفيصل وعائلته
ابو راكان : انتم تتوهمون مافي اي علاقه تربطني فيهم
راكان : طيب يبى بنقول انه مالك اي علاقة تربطك فيهم من هي هدى
ابو راكان تفاجأ من السؤال ماتوقع يسالونه عن هدى
سلمى : راكان ندى انتم تحققون مع ابوكم
راكان : ياعمتي انا من وعيت على الدنيا وصرت اعرف اميز الاشياء
وانا ماني شايف انه فيه حاجه
ماعرفها عن ابوي وكان كل شي طبيعي فجأه ابوي شفته بمنظر اول ماذكرنا
عائلة فيصل ودخل اسماء اشخاص مثل هدى هذي وصراحه وضع ابوي يوم
شفته اثبت لي انه يعرف العائله هذي مو بس كذا الا يعرفها وكان بينهم علاقات
كبيره خلت ابوي يتاثر بذكر اسمهم
ابو راكان : راكان انا ماتعودت نخفي شي ولاتخاف ماراح اخفي حاجه بس الحين
اتركوني بحالي فيه شوية مشاكل مشغلة بالي ولابس يجي ببالي اقول لكم السالفه
كلها بقولها لكم بالوقت الي اشوف نفسي متفرغ فيه
راحوا غرفهم راكان وندى بعد ماقتنعوا شوي بكلام ابوهم
سلمى : ايش ناوي تقول لهم ؟
ابو راكان : الى الان مادري ايش اقول لهم لكن بفكر بعدين بقول لهم القصه
سلمى : تقول لهم قصه مؤلفه ؟
ابو راكان : اكيد اجل اقول لهم انه امكم مسجونه من زمان بقضية تهريب مخدرات
بس انا مو مقطع قلبي الا فيصل وياترى اخته عايشه ولاميته وايش وضعها
سلمى : سالم لاتشغل نفسك بالامور هذي بالاول والاخير يظلون اغراب
ابو راكان : ياسلمى انا حيران لاتنسين انه هدى بتخرج من السجن قريب وانفتح
علينا ابواب لها اول مالها تالي واله يستر من نهايتها وياخوفي بعدين راكان وندى
يزعلون لاني ماخبرتهم عن امهم على الاقل يعرفون انه عندهم ام ياخذون اجر برهاا
سلمى : وايش ناوي تسوي انت طيب؟
ابو راكان : مادري بس اعتقد في الوقت الحالي بساعد فيصل
سلمى : افرض فيصل عرفك ؟
ابو راكان : اخر زيارة كانت لي لهدى قالت انه فيصل مايعرف انه له اخوان غير اخته غلا
سلمى : افرض قالت له ؟
ابو راكان : مايهم انا بتفاهم معه بالاول والاخير يظلون اخوان وبطلب منه يخلي الامر سر لحين الوقت
المناسب
سلمى : ومتى الوقت المناسب ان شاء الله ؟
ابو راكان : مادري بس اصلا في كل الحالات ندى وراكان مصيرهم يعرفون بموضوع
اخوانهم الحين او بعدين لانه لو كان فيصل عرف بموضوع اخوانه هذا معناه انه
فيصل الحين بيبحث عنهم ولو بحث عنهم بيجي اليوم اللي يحصلهم فيه ولو ماعرف
انا مابي اقول له شي بخليه مثل ماهو مايعرف شي
سلمى : ليته ماعرف وربي ياخذ هدى ونفتك منها
ابو راكان : لاياسلمى لاتدعين عليها
سلمى : تحبها ياسالم بعد كل اللي سوته فيك
ابو راكان : هدى رايتها بيضا ياسلمى ماسوت لي شي طول عمرها كانت الحرمه
اللي يحلم فيها اي رجال وشوفي كيف عيالها كلهم ماخذين طيبتها وعلى قد كلامك
انه فيصل واضح انه طيب
سلمى : دخلتها بالسجن لوحده يكفي ويمحي كل حسناتها فيك ياسالم
إلى متى يا " ضيقه الخاطر " على مجرى الوريد
ماعـــــــاد باقي من دمـــي قطره مهي مستوجعه !
انا دخيلك يا وفا قـــــلبي تســـــــــــافر بي بعــــيييد
طموحك " الربان " .. وجروحك بـ قلبي الامتعه !
وجه الزمن ماعاد يغري .. وانقفل باب الـــــــــبريد
وانته " وفاي " اللي لو أخدع دنيتي .. ماأخدعه !
لا صارت الدنيا مصالح .. والوفا ؟ كم فـ الرصيد !
انو السفر يم الأمــل وأفرد جــــــــميع الأشــــــرعه
بس البلا لا صارت أمــــواج " التعاسه " من جليد
وإن صاح جرحك مالقيت اللي يحن ويسمــــعه ...
من لا يقدّر خوتي .. فـ " أبرك سنه " فرقـاه عيد
أما " الرفيق الغالي " إليا غاب .. خذ قلبـــــي معه !
البارحه هبت هواجيسي فـ صــــــــــــدري من جديد
سوالف ٍ تــــــــشره على قلــــــــــبي بـ حلم ٍ ضيعه
لاهنت يا " جرح الزمن " حــــــــــقق مرادك مايريد
أهديت للخـــــــــــــــافق جروح .. وهو رفع لك قبعه !
يا ويل حالي من شقى اللوعه ويا قـــــــــــطع الوريد
على آخر جروح الصداقه .. والطعون الــــــــموجعه
قلبي " مصفي نيته " لو كل من حوله ضـــــــــديد
يبقى ( الجبل ) مهما وطته الريـح ماهي تزعزعه !
من طاح من عيني ماعـــــــــاد يهم ينقص أو يزيد
اللي ينزل قدره بـ نفسه .. هو اللي يرفــــــــــــعه !
" ريحت قلبي " من عنـا الدنيا وانا اللي مســــتفيد
مادام قلبي مالقى في الوقت شـــــــــــــــــــي ٍ يقنعه
إلا رفيق ٍ يجبر الكسر .. وعلى الشـــــــــــــده عضيد
هذا منى قلبي عـلى الدنيا وهذا مطــــــــــــــــــــمعه
أضحك لو أن الضيقه اللي في الحنايا تــــــــــستزيد
لين أقهر الضيقه وأخليها تفارق فـ الـــــــــــــسعه !
لا خانك الوقت الردي " وما للحديد إلا الحــــــــديد "
اللي شراك أهده وفـا .. واللي خذل عهــــــــــــدك بعه
تمشي المقادير بـ هوى الراضي وتلعب بـ الــــــــعنيد
صدق اللي قال ان طاعك " الوقت الردي " ولا طعه !
العمر بـ أيامه قطار .. وراكب ٍ سكــــــــــــــــة حديد
وتمر لحظاته مابين المحزنه و المـــــــــــــــــمتعه
كل الحياه دروس والدنيا عبر والمــــــــــــستفيد !!
اللي خذا من ( جمله الـــــــــــــــدنيا ) دروس ٍ تنفعه
نور ومادراك مانور جالسه بظلام تبكي بكاء يقطع القلب تبكي بكاء لو يسمعه
الد اعدائها بيرحمها اااه يبا وينك ليه انا كذا الله لايسامحك يبا اللي خليت مثل
جاسم الكلب يضربني ويعذبني ليل نهار الله لايسامحك دنيا ولااخره الله يجعلني
اشوف فيك يوم يالظالم الله يجعلني اشوف فيك يوم ياللي ماتخاف الله الله ينتقم
منك الله ياخذ حقي منك وانا عايشه اشوفك تتعذب قدامي ناظرت باركان الغرفه
ركن ركن وماتشوف الا شوي من ملامح الاركان الظلام يغطي انحاء غرفتها
مافي الا نور خفيف من اطراف الباب المقفول ونور خفيف مع شباكها حست نفسها
مكتومه وغصبت نفسها انها توقف تبي تفتح الشباك تبي تشم هوا تبي تنتفس تحس
نفسها مخنوقه تحس كل الاكسجين اللي بالغرفه دخل بصدرها وزاد على عذاب
همومها عذاب حاولت تفتحه اكتشفت انه مقفل من قهرها ضربت بقوه على الطاقه
لكن لامستجيب
صاحت وهي تضرب بيدها : اااه كل شي بدنيتي مقفل بوجهي كل شي بدنيتي ظلام
مستقبلي ظلام مستقبلي والسعاده قافله ابوابها بوجهي يارب ساعدني يارب فرج كربتي يارب
يتبع
ببيت وضحى
غلا وفيصل جالسين بالصالة الكبيره ينتظرون عمتهم وضحى
غلا : الله ياخوي شوف العز اللي عايشه فيه عمتنا الظاهر عائلتنا كلها عندها فلوس مافي الاحنا
فيصل : لاتخافين ياغلا بيجي اليوم اللي تحطين راسك براس اكبر حرمه ورجال
بالعائلة بس اصبري
وخليك معي وانا اوريك ايش بسوي فيهم
صوت عصا وضحى يضرب على الارض وهي متجهه نحوهم
وضحى بدون نفس : سلام عليكم
ردوا السلام عليها فيصل وغلا
غلا تساسر فيصل : ايش فيها تتكلم بدون نفس
فيصل : اسكتي لاتفضحينا
وضحى : ايش فيكم وش اسراركم اللي بينكم اللي مالقيتوا لا هذا المكان تقولوها فيه
فيصل : لا ابد عمتي مافي الا كل خير كيف حالك ؟
وضحى : بخير من الله ولله الحمد
سكتوا شوي
غلا : واحنا بعد بخير الحمد لله
وضحى اعطت غلا نظرات حاره خلتها تحط عينها بالارض وتسكت
وضحى : تفضلوا خذوا ضيافتكم
فيصل : حنا مو جايين نتضيف عمتي حنا جايين نوقف جنبك ونعزيك ونشوفك لو محتاجه شي
وضحى بحده وصرامه : وانا مو محتاجه وقفة او مساعدة احد ماعرفني الا بالوقت هذا
فيضل : شكرا عمتي على الترحيب
وضحى : فيصل تراني ماحب كلام الطنازه هذا فاهمني ولا لا ؟
غلا : هذي جزاتنا اللي
قاطعها فيصل : غلا خلاص عمتي وضحى انا ماهمني كلامك انا جاي عشان الواجب لاكثر ولا اقل
وضحى : لا ماشاء الله اعرفكم ياعيال اخواني انتم واخواني راعين واجب وماينقصكم شي
فيصل : الحمد لله هذي شهادة اعتز فيها عمتي
وضحى باستهزاء : واللي علموكم الواجب وينهم ولا ارسلوكم تشوفون اخباري واخبار
الورثة اللي جات مني
غلا : عمتي لحد هنا وكفايه
فيصل : عمتي انا الحياه هي اللي علمتني الواجب اللي عليه واللي لي وانا مو منتظر
احد يعلمني المشكله في اللي مايعرف الواجب ويعين ويستهزي بالناس
وضحى : صدق انك ماتستحي اطلع برا ولعاد اشوفك ببيتي
فيصل : شي اخير عمتي ياراعية الواجب اعتقد انه من الواجب تعرفين اخبار
عيال اخوك واللي صار لهم وتوقفين جنبهم يوم كنتي مقتدره ومو شرط وقفة
بالفلوس وقفه بقول الحق وانا بالاول والاخير جيت اسوي واجبي معك رغم انك
ماسويتي واجب القرابه بيننا ولاحتى سالتي ولاتعرفين اخبارنا انا واختي والي
صار لنا مع اخوانك واخواني ورغم هذا كله الا الان انا ملتزم بواجبي عليك
هذا رقمي عندك متى ماحبيتي اي شي تراني حاظر وسلمي لي على اخوانك هذا
اذا جا احد منهم اصلا يسوي اللي سويته انا سلام
خرج فيصل وظلت عمته وضحى واقفه مصدومه من كلام فيصل لانها حست بالتقصير
على طول اخذت جوالها واتصلت على محمد
محمد : هلا وضحى
وضحى : كيف حالك يامحمد وحال العيال ؟
محمد : بخير الحمد لله
وضحى : كيف حال سلطان واخوانه ؟
محمد : لاالحمد لله كلهم بخير ويسلمون عليك
وضحى : ماشوف احد جاني يااخوي يوقف معي
محمد : ها صدقيني ياختي انشغلت الله لايشغلنا الا بطاعته لكن جايك جايك ان شاء الله اليومين هذي
وضحى : مو شرط انتم على الاقل احد من العيال مثلا فيصل واخته
محمد : ها عاد تعرفين وراهم دراسه تصدقين عاد فيصل بالذات مو قادر يقول اخر
سنه له وتوه يدرس ويشد حيله بيتخرج حتى اخته انا قلت له مره لاتشيل همها اي شي
تحتاجه حنا حاظرين نرسل واحد من السواقين او الخدم يلبون الي تحتاجونه
وضحى : ايه الله يعينه الظاهر لك اسبوع ماشفته فيصل ياعيني عليه مسكين مشغول باختباراته
محمد : صحيح هو ماجاني بس انا مو مقصر معه عاد تصدقين توني خارج من بيت
سلطان لان فيصل عندهم هو وغلا ومالي ربع ساعه يوم كنت مقابل فيصل شفت ايش
محتاجين ووصيتها مع السواق وفيصل الله يعينه يذاكر
وضحى : ايه الله يعينه عموما معاد يحتاج تجي يلا مع السلامه
محمد ماصدق تقول له لاتجي : مع السلامه
وضحى اول ماقفلت من محمد : ياالله شكلي ظلمتهم خرجوا من عندي مكسورين
الخاطر بس انا لازم اعرف ايش صار لهم بالضبط مالي الا فاطمه تقول لي واضح
انه محمد مو بالبيت اتصلت على فاطمه
وخلونا نوقف نا ونروح لفيصل وغلا
غلا : صراحه اخر شي توقعته اني اسمع هذا الكلام من عمتي وضحى
فيصل : وتلوميني ليه قلت باخذ لي شقه اسكن فيه طول فتره اقامتي هنا
غلا : الا ماقلت لي فيصل صرفت الفلوس اللي كتبها لك سلطان ؟
فيصل : لسه ولااقدر اصرفها سلطان هذا شيطان الله ياخذه كاتب لي تاريخ الشيك بعد ثلاثه شهور
غلا : اوف وليه طيب فوق ماهو ماكل حقنا بعد يتاخر في دفعه
فيصل : تقدري تقولي انه يبي يغيضني بس بس ماعليه انا وراه والزمن طويل
غلا : لاتخوفني
فيصل : اخوفك لي عاد ؟
غلا : تخوفني عليك يافيصل سلطان مو سهل
فيصل : لاتخافين طول ماهم بعيدين عنك انا اقدر اخطط براحتي انا ماهمني نفسي اقدر
اتحمل اي شي يسوونه فيني لكن الشي الوحيد اللي ماتحمله هو انهم يمسونك شعره فيك
غلا : وتخطط لمتى يافيصل ؟
فيصل : لاتخافين حتى لو طالت المده مصيري اعاقبهم واحد واحد
غلا : ماقلت انك تخوفني
فيصل : هههههههههههه
نتركهم ونروح عند وضحى
وضحى : الله واكبر عليهم الحين كل هذا يطلع من اخواني وعيال اخواني الله
واكبر عليهم اللي مايخافون الله ليه ليه كل هذا عشان وصخ دنيا طز في الفلوس
والساعه اللي خلتهم يعرفون شي اسمه فلوس
فاطمه : الله يهديهم بس ياوضحى
وضحى : الحين بيطفشوهم من البيت ويسوون كل هذا فيهم حسبي الله ونعم الوكيل
يلا فاطمه انا الحين فيه حاجه شاغله بالي بسويها وبعدين اكلمك
فاطمه : براحتك ياوخيتي فمان الله
حمد بحديقة بيتهم يكلم يوسف وفيه شخص ثالث يسمع له بدون مو حاس فيه
وماتعبكم بالتفكير الشخص الثالث هي اخت حمد
حمد : يوسف انت سمعت بخبر زوج عمتك ؟
يوسف : ايه سمعت عنه
حمد وهو متردد : ااايه
يوسف : حمد كاني حاس انه عندك كلام بتقوله
حمد : هاا صراحه ايوا
يوسف : بخصوص من الموضوع ؟
حمد بتردد : بخصووص بخصوص فيصل اخوك
تغيرت نبرة يوسف لجدية اكبر ووضح انه فيه خوف بكلامه: ايش فيه فيصل ؟
حمد : لاتخاف مافيه الا كل خير بس
يوسف : بس ايش ؟
حمد : بس انا لاحظت انه في ناس تراقبه
يوسف باهتمام : ناس من يعني ؟
حمد : مادري يمكن من اهلك
يوسف : كم لهم يراقبونه ؟
حمد : صراحه مالاحظت الا باليومين اللي فاتت واخوك الحين مسافر لعمتك
يوسف : اوك بس اول مايجي وتلاحظ اللي يرقبه ابيك تشوف ناس تراقب هذا
الشخص وتعرف كل المعلومات
وتعرف من اللي وراه ومن من مرسول
حمد : حاظر ولايهمك يالشيخ يوسف
كملوا سواليفهم اليوميه كالعاده اما روان سرحت بعيد : انا نفسي اعرف
الحين ثقيل الدم هذا وش هو اللي مهتم فيه اول مره احسه يهتم باخبار شخص كذا
ادفع نصف ثروتي واعرف في مين يفكر ويتكلم ((( ملقووفه لاتلومونهااا )
عند ماجد واحمد
ماجد : ايش فيك سرحان مو على بعضك من وقت سالفة فيصل واخته ؟
احمد : تبي الصدق ؟
ماجد : ايه !!
احمد : بس ماتضحك
ماجد : وش هو له اضحك عاد
احمد : غلا
ماجد : غلا من ؟
احمد : ماجد انت غبي غلا اخت فيصل
ماجد وكانه فهم على احمد :لايكون بس ؟
احمد : عليك نور
ماجد : بس انت عارف اهلك وش سووا فيهم
احمد : حنا مالنا دخل ابوي واخوانه هم اللي سووا فيه يعني عشان ابوي اذاه تجي ف
وق روسنا القرب والبعد هذا ماله خص واكبر دليل انه سلطان اخوهم
ماجد : مادري عنك عاد بس بعد لاتنسى اللي انت سويته
احمد : مو هذا اللي مو مخليني اركز في اي شي
ماجد : طيب اعتذر
احمد : يصير خير يصير خير
فيصل مع غلا بالفندق اللي استاجرو فيه دق جوال فيصل ورد عليه بدون مايناظر من هو المتصل
فيصل : هلا
وضحى : فيصل ؟
فيصل وخر السماعه عن اذنه وشاف الرقم وعرفها : هلا عمتي وضحى امري
وضحى : فيصل انا انا ..
فيصل : انت ايش عمتي ؟
وضحى : فيصل انا ماكان قصدي الكلام الي صار يوم جيتنا وماكان المفروض اعاملك بهذي المعامله
فيصل : اتصلتي وعرفتي اللي صار ياعمتي ؟
وضحى : فيصل والله
قاطعها فيصل : عمتي وضحى انا عارف انك طيبه وانا مقدر ضرفك وصدقيني لو غيرك
ياعمتي وضحى قال اللي قلتيه كان قلت في نفسي اني سويت الواجب وتركته في وهمه
وفي فكرته السيئه عني بس ماهان عليه اشوفك فاهمتني غلط وتغلطين بحقي وحق
اختي واظل ساكت
وضحى : فيصل واللي يعافيك سامـ..
فيصل : عمتي عيب عليه اخليك تعتذرين مني بالاول والاخير انتي لك التقدير والحشيمه ياعمتي
وضحى : الله يكملك بعقلك ياولدي خليك يافيصل لاترجع اليوم الرياض
فيصل : كيف عرفتي اني راجع الرياض ؟
وضحى : مايبيلها كلام انت جيت عشاني وبس ومابيدك شي لي وبعد اللي صار اكيد انت قررت ترجع الرياض
فيصل : بظل بس بشرط عمتي
وضحى : اشرط مثل ماتبي ياوليدي
فيصل : اني اظل بالبيت الللي انا وغلا فيه ونظل عندك ووقت النوم نرجع للفندق
وضحى : كذا انا مارضى بالشرط هذا يافيصل
فيصل : ياعمتي صدقيني حنا مرتاحين وانا شايف انه افضل لنا كذا
وضحى : يافيصل ياولدي انا محتاجتك >>> خنقتها العبره وبدت تكمل بصوت باكي : فيصل
الله يخليك ياوليدي انا محتاجتك جنبي يافيصل انا لاولد اشد الظهر فيه ولا اخوان اعتمد
عليهم كل واحد منهم اذا تقرب مني بيتقرب مني عشان اللي معي فيصل ياووليدي انا
باليومين هذي محتاجه رجال يوقف جنبي
فيصل : لالا ياعمتي كله الا دموعك ماعاش من ينزلها وراسي يشم الهوا وانا من
ايدك هذي لايدك هذي وانا تحت امرك واعتبريني عصاك اللي ماتعصاك عمتي
ومايصير خاطرك الا طيب افا عاد انا كم عمه وضحى عندي
وضحى : تسلم يافيصل ولو انك مو ناقص ياولدي
فيصل : افا عمتي تبيني ازعل واهون ؟
وضحى : اعرفك يافيصل ماهون عليك وتسويها
فيصل : ههههههههه
يتبع
سلطان :ها غاده ايش قال لك عبدالرحمن وخالد ؟
غاده : خالد قال مايبي يتزوج
سلطان : طيب ماعلينا منه وعبدالرحمن ؟
غاده : موافق يتزوج
سلطان : طيب حلو اجل شوفي له بنت من خارج العائله
غاده : بس عبدالرحمن محدد اللي يبيها
سلطان : وم هذي اللي يبيها عبدالرحمن ؟
غاده : يقول يبي شيماء بنت سيف
سلطان : قولي له شيماء صغيره وخليه يشوف غيرها او بالمعنى العام يشوف له بنت من خارج
العائله
غاده : بس هو كلامه يدل انه حاطها على باله من زمان
سلطان : غاده كلمتي ماتصير ثنتين اذا مابتقولين له هذا الكلام ولاماقدرتي تقنعينه
كلميه يجيني الحين هنا وانا اتفاهم معه
غاده خافت منه : ان شاء الله الحين بروح اناديه لك
اول ماطلعت غاده وسلطان الافكار توديه وتجيبه : هذا اللي كنت خايف منه الحين
عبدالرحمن متعلق ببنت سيف وانا مابيه يتعلق بااحد من العائله عشان اسوي اللي
براسي بدون شوشره لكن لا انا مستحيل اخلي عبدالرحمن يخطب بنت سيف بس لازم
القى حل اصرف فيه بنت سيف عن طريق عبدالرحمن
فجأه جا عبدالرحمن وقطع تفكير ابوه
عبدالرحمن : يبى امي تقول انك تبيني
سلطان : ايه ابيك اجلس
جلس عبدالرحمن بالكرسي الي مقابل لابوه
سلطان : عبدالرحمن يقولون انك حددت البنت اللي تبيها صحيح هذا الكلام ؟
عبدالرحمن : ايه يبى كلامك صحيح
سلطان : ومن البنت اللي حددتها ؟
عبدالرحمن : اظن اللي قال اني حددت االبنت اللي ابيها اكيد قال لك عن البنت
سلطان بحزم : عبدالرحمن انت عارف اني ماحب الاسلوب هذا خليك معي صريح وجاوب على قد السؤال فاهم ولا لا
عبد الرحمن : ان شاء الله يبى
سلطان : والحين قول لي من هي هذي البنت ؟
عبدالرحمن : شيماء
سلطان : بنت سيف ها ؟
عبدالرحمن : وفيه غيرها من العائله يبى ؟
سلطان : عبدالرحمن انا كم مره اقول اسلوبك هذا اتركه ولا اقسم بالله العظيم مايصير لك طيب فاهم ؟
عبدالرحمن : انا اسف بس برضه يبى انت تسال اسئله اجاباتها فيها
سلطان : تراددني ياعبدالرحمن
عبدالرحمن : السموحه يبى مو القصد
سلطان : والحين قول لي شيماء بنت سيف ؟
عبدالرحمن : ايوا يبى شيماء بنت عمنا سيف عمنا كلنا يبى
سلطان : عمنا كلنا ها
عبدالرحمن : ايه يبى عمنا كلنا
سلطان : بس انا ماني موافق عليها
عبدالرحمن : ليه يبى ؟
سلطان : بدون ليه ماني موافق تاخذ وحده من تقرب لنا من جهتي انا على الاقل
شوف لك وحده من بنات خالاتك او خوالك
عبدالرحمن : يبى بس اللي يبي يتزوج وصاحب القرار بالاول والاخير انا وانا اتحمل
كل شي ناتج عن هذا القرار اللي اتخذته يبى
سلطان : عبدالرحمن انا قلت لا يعني لا والقرار الاول والاخير لي انا
عبدالرحمن بعصبيه من ابوه :يبى بس هذي حياتي انا واللي بيتزوج انا واللي بياخذ
القرار انا
سلطان : حياتك هي حياتي واي شي يخصكم يخصني واي شي يعتلق فيني من قريب
او بعيد القرار الاول والاخير فيه لي انا انا وبس فاهم ولا لا
عبدالرحمن : لا يبى اذا كانت حياتي وحده من صفقاتك اللي تعقدها بالشركه ذيك الساعه
لك الحق فيها
سلطان : انا ابوك ولي الحق باتخاذ قرارك هذا
عبدالرحمن : لا يبى مالك الحق القرار الاول والاخير بالشي هذا يعود لي انا يبى
انت ابوي على عيني وراسي والشي الوحيد الصحيح اني انا اعطيك خبر واستشيرك
بالشي اللي انا حددته وانت تقول الشي اللي تشوفه مناسب اما اتخاذ القرار انا اتخذه
وانا احدده وانا اتحمل نتائجه
سلطان : عبدالرحمن روح من قدامي الحين احسن لك قبل ماسوي شي مايرضيك
عبدالرحمن : كل هذا وبعد فيه شي اكبر مايرضيني
سلطان : عشان انت ولدي ماتعرفني زين وماتشوف الشي اللي ممكن انا اسويه
وقف عبدالرحمن يبي يمشي : لا يبى اعرفك اعرفك اكثر مما تظن وشايف ايش
تسوي انت شفت ايش صار مع فيصل وغلا وهذا الشي لوحده يكفي اني اعرفك
زين واعرف ايش ممكن انت تسوي واللي خلاك تسوي كذا باخوانك مو بعيد تسويه
مع اي عيالك
قام سلطان ووقف بوجه عبدالرحمن وفجأه ضربه كف طططططططططططططططططططخ
نزل راسه عبدالرحمن واتجه للباب ووقف قبل مايخرج : يابو خالد انا عارف انه الكف
هذا ولا شي مع الاشياء اللي ممكن تسويها ولا شي
خرج وضرب الباب بقوه
جلس سلطان على الكرسي : غبي غبي مهما اسوي بالعالم كله لكن تظلون انتم
الوحيدين اللي ماقدر اذيكم انتم الوحيدين اللي احبكم واخاف عليكم
عند نواف صورة نور مو راضيه تفارقه حاس انها صارت مثل الصديق له مو عارف كيف
يلغيها من راسه
ااه يانور وبعدين معك تفكيري مو راضي يروح منك حاس اني بكل لحظه افكر فيك
حتى لو حاولت اغير تفكيري وابعده عنك يرجع فكري فيك على طول انا وبعدين يعني
ليه كل هذا التفكير وش هو احساسي ناحيتها ؟ حب ( اول ماطرى بباله حب حس انه يتنرفز من طاري الحب بالذات تجاه نور )
لالا وش حب الا هذا الشي مابيه الا هذا الشي بلغيه على الاقل الفتره هذي نور لازم تكون سلاحي اللي ضد ابوها
لازم تكون نور هي السيف اللي بضرب فيه رقبة ابوها لكن نور ايش ذنبها ؟
( حاول يطرد عنه فكرة الشفقة تجاه نور بالقساوه ) لا نور بنته ودمها من دمه ولازم ابوها يذوق مرارة العذاب ببنته
ايه لازم يذوق العذاب ويحس فيه بالناس اللي يحبهم لازم
تــدري وش اللي يجرح القلب جرحيــــن
ويمـــد حبــــل الحـــزن فيـــك ويشــــــده
انـــك تناظــر طفــل مـن غيـــر ابويــــن
يمشــــي ودمعــــة سايــل فـــوق خــــــده
منظــر صعيـب ويقســـم القلب قسميـــــن
لا قــام يمســــح دمعـــــة بكــــف يـــــــده
يمشـي ولا يــدري طريقــة علـى ويـــــن
ليــن التعـــــب من كثـــر ماتــــاه هـــــده
اثقـــل حـــروف يشيلـهـا فـيـــه حرفيــــن
لا أب يــــــدري بــــــــه ولا أم تـــــــرده
في خطوتــه رحلـــة ودمعـــة وسـكيـــــن
وحــــــظ توســــد بالمــراســـي مـخـــــده
جيــت اسألـة باللـه قـللــي ولــد ميـــن ؟؟
وبغــى يجــاوب .. واختنــق صــوت رده
أنـــا يتيـــــم ومــا لدربــــي عنــاويــــــن
وجــــزر الحـــزن فينــي يســـاوي لمـــده
وطعــم الطفولــــة ما عرفتـه لهـا لحيــــن
وثــوب السعــــادة صـــرت مانيـب قــــده
ابكــي إلـــى من شفت غيــري سعيديــــن
ليـــن البكــــــا فينــــي يوصـــــل لحـــده
واقفـــى ورحت امسح دموعي من العيــن
وعينـــــي تناظــــر دمعتـــه فـــوق خــده
وهذا اللـــي يجـــرح القلــــب جرحيــــن
ويمــد حبـــل الحــــزن غصـب ويشــــده
عند نور بعد ماتدري ليه تفكيرها رايح عند نواف وفي حياتها : ياترى يانواف
ايش سر اهتمامك كل هذا كره في ابوي ههه اذا انا صرت اكره ابوي كيف
ابيك انت تحبه بس ياخوفي نواف تبي تعاقب ابوي فيني انا على قد ماشوف الحنان
بعيونك على قد ماشوف القسوه اللي احسها باحيان كثيره تغلب الحنان بداخلك وتخفي
ه وقفت عن التفكير شوي وتحسست مكان الضربات بجسمها ونزلت دموعها ثاني
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك