رواية كثر ما قلتلك اكرهك كثر ما انا اهواك -28
ما سوّيت اللّي سوّيته و أني رشدتها للدرب الصح .. بس , بس أنا كنت في وضع تعبان و كانت هي مثل البلسم وقتها ..
أم الجازي : جب بس جب لا تحجي أكثر , انته استغلّيت بنتي و حرقت قلبها بس ..
كنت للحين حاطه ايدي على قلبي خايفه شنو بيصير و شنو بيسوي أبوي , لفّ عليّ تركي و همس جأنّه جان يأكّد لي
اللّي قال لي اياه قبل ..
تركي : لا أنا حبيتها يا أم الجازي , محد يقابل بنتك و ما يحبها بس ..
أبو الجازي : بس شنوووو ..
لفّ على ابوي ..
تركي : أنا ما استحق بنتكم ..!!
صخوّا أبوي و أمي و تمّوا يطالعونه مب فاهمين , أما تركي دخل يدينه في بنطلونه و هو يهمس بكبرياء ..
تركي : أنا ما استحق بنتك عمي , ما استحق بنتك خالتي ..! بنتك درّه و أنا , أنا و لا شيء !!
و نزّل راسه قبل يهمس ..
تركي : و مع ذا , أنا آذيت بنتكم و أنا اسف لذا الشيء , أدري مستحيل تسامحوني بس سامحوا الجازي ,
و انتبهوا عليها و مهما كان , لا ياخذها الاّ اللّي صدق تحسون يستحق هالدره ..!
و سكت قبل لا يطالعني و يهمس ..
تركي : أنا بمشي خلاص , انتبهي على روحك الجازي .. (( و لفّ على ابوي و امي )) .. عن اذنكم ..
طالعت أمي و ابوي أبيهم يقولون شيء بس ابوي جان مكابر , و امي جانت مترددّه تكون بصفّ أبوي أو لا ..
رحت لهم عقب جفت تركي ينزل الدري ..
الجازي : يبه يمّه قولوا شيء .. ما تخلونه يروح بدون ما تسامحونه ..
أبو الجازي : ليش اسامحه عشان شنو .. بأيّ حق أخلّيه يرتاح ..
الجازي : عشاني يبه , عشان بنتك اللّي أدري انك تعشقها ..
تنهد أبوي و لمّني له قبل يهمس ..
أبو الجازي : لو سامحته بأسامحه لانّه ريّال و قدر يوايهني و يعترف بدون خوف بانه آذى اغلى ما املك ..
أم الجازي بابتسامه : في النهايه اخترتي ريّال اليازي .. ما تدرين اشكثر سهرت أفكّر منهو هاللّي اخترتيه ..
ابتسمت و لمّيتهم قبل لا اسمع ابوي يهمس ..
أبو الجازي : روحي ألحقيه و قوليله أنّه محللّ و قوليله يخلّي وساوسه و عقدته في نفسه لاّنه ريّال ..
ابتسمت و ييت بأركض وراه بس أمي سحبتني و همست بابتسامه ..
أم الجازي : و قوليله هم ما نبي نجوفه أبد ثاني ..
ضحكت و هزّيت راسي و لحقت ورى تركي .. جفته وصل عند باب القلعه .. مسكت ذراعه و هو لفّ عليّ ..
تركي : الجازي شتسوين , وين امك و أبوك ..
ابتسمت و تكتّفت بكبرياء قبل اهمس ..
الجازي : امي و ابوي يقولون لك محللّ بس ما يبون يشوفون ويهك أبد مره ثانيه ..
ابتسم و همس ..
تركي : تبين هالشيء انتي بعد ..؟!
طالعته ثواني و أنا أفكّر , بالمنطق أوّل حبيب لي كان تركي, بالقلب بشار جان أوّل واحد حبيّته ...!
بس كلّهم حبيتهم بطرق مختلفه, رفعت ذقني بكبرياء ..
الجازي : ايه ما ابي اجوفك ثاني ..!
تركي : لك اللّي تبين ما راح تشوفين وجهي أبد ثاني ..
و قرّب مني و حبّ يبهتي قبل يهمس ..
تركي : الوداع الجازي ..
الجازي بهمس : الوداع , بس قبل لا تروح : أبوي يقول لك انت ريّال لاا تجسي على روحك ..
ابتسم و هو يردّ بخطواته لورى ..
تركي : قوليله أنّه كان كريم معي حييل .. و حبّي لي راس أمّك ..
الجازي بابتسامه : انزين ..
رفع يدّه و لوّح لي قبل لا يلفّ و يطلع من القلعه و من حياتي للأبد .. زمّيت شفّتي و بسرعه مسحت دمعه جانت
بتسيل قبل لا أرفع ذقني و أروح لأبوي و أمّي و أنا خلاص مقرره أبدأ حياة يديدة الحين . .
.. (( تـــركــــي )) ..
جلست في السياره و لا حرّكتها , غمَضت عيوني و رجعت راسي لورى و على صوت الخليج و الهواء البارد الهادي ..
ابتسمت و حسّيت بدمعتي تنزل , ما منعتها أبد ما فكرت أمنعها و أنا احس بكلّ هالراحه تغمر صدري ..
و أوّل مره احس بها بعد وفاة الغالي , هم و انزاح كانّه جبل كان على صدري و راح ..
فتحت عيوني و ناظرت الخليج و أنا اتنهد و احمد الله بسرّي .. من كان يتوقع اني أقابل الجازي هنا من بين كلّ الأماكن
بس زين اني قابلتها و زين أني استجمعت شجاعتي و قلت لها اللّي كنت ابي اقوله من ثلاث سنين ..
عدّلت جلستي و مسكت الطاره و أنا مقررّ ارد الشاليه خلاص .. حرّكت المفتاح و شغّلت السياره ..
و قبل لا احركها ناظرت القلعه لآخر مرّه قبل لا أهمس و أنا احرّك بالسياره ..
تركي : الوداع !
*****************************************
.. (( البحرررين ** هيثم )) ..
يلست على الصوفا و بيدي موبايلي كنت أفكر أشلون أقص صورة تركي و ادمجها بصورتي اللي التقطتها من المقطع
اللي عندي بـ اللاب توب و بديت في الشغل بس شوي سمعت أبوي يزقرني نشيت و أنا أحط الموبايل ..
و سرت أجوف يبه شوه يبا مني .. عادي ما خفت ان أحد يجوف المقطع لأن ماشي حد داخل الشاليه
من الشباب و الشياب هم يميعهم بره الشاليه .. !!
******************************
انتبهت لهيثم يوم طلع ابتسمت و رحت و جلست فوق الصوفا .. و ناظرت الاب و كان مفتوح ع الفوتوشوب
عقدت حواجبي يوم شفت صورة تركي و صورة هيثم في الفوتو .. نزلت المؤشر تحت و لقيت مقطع فيديو
مفتوح بذا الاسم " ×× " حطيت عليه المؤشر و انفتح .. جلست أناظر المقطع و أنا أعض على شفايفي ..
لااا لا !! لااااا يا هيثم لا وشو ذا .. حسيت بدموعي تسري .. وقفته و أنا أتنفس بسرعة ..
ناظرت صورة تركي / لا ما أتوقع يبي يسوّي شيء سيء لهالدرجه ما كان بيسوي كذا !!
حطيت يدي على جبهتي و جلست أصيح ..
.. : ريمان شفيك تــصــيحــيــن ..
ناظرت تركي و الله اني شفقت عليه وقتها .. حرام يسوي هيثم به كذه لااا لا يستاهل خله ..
لا لاااا ما أبي أنا ما أكرهه لهذه الدرجة ..
تركي : ريمان بسم الله عليك شفيك ..
قمت و عديته و أنا أغطي وجهي بيديني و أصيح من قلب .. ركضت لشاليهنا بسرعة ما أبي أحد يشوفني ..
دخلت غرفتي و ارتميت على سريري و جلست أصيح ..
***************************
جلست أناظرها لين اختفت عن عيوني .. رديت عيوني للأرض .. شفيها تصيح ..
رفعت عيني للي كانت عنده .. طاحت عيني على جوال هيثم جنب لابتوبه و صرت أهز رأسي بيأس
و أنا أناظره بصدمه لا يكون شافت المقطع اللي بجواله ! أنا أكره هيثم صح بس حرام تشوفه بعد ..
رحت للجوال بس شفت فيه صورتي .. استغربت رفعت عيني لـ اللاب توب و طاحت عيني على المقطع
اللي وقفته في نصه .. و من وراه الفوتوشوب و صورتي منقوله فيه مع صورة لهيثم من نفس المقطع ..
لا يا الخسيس كان يبي يوهقني أنا زين أجل انها شافتك قبل لا توهقني أنا ..
مشيت بسرعة لبره ناظرته و هو واقف و يسولف مع خالد و يضحك .. تضحك بعد ..
رحت له و زين ان ما به أحد غير نايف و بندر و خليفة و خالد و هزاع و ضاحي .. مسكته و لفيته علي ..
تركي : انت يا .. يا ابن الـ ..
هيثم : هيييييييي لا تقولها هااااه احترم نفسك ..
مسكت ياقته و أنا أشد عليها , حسيت نفسي بذبحه اليوم ..
تركي : من اللي المفروض يحترم نفسه .. أنا ولاّ انت ..
هيثم : شوه .. انت لا تزخني جيه .. هدني .. و فهمني شوه فيك .. مينون ..
تركي : مـا المجنون الا انت ..
لكمته لكمه طيحته عقب جلست فوقه و صرت أضربه من حرتي .. و هو حاول يدافع عن نفسه ..
خالد : تركي فكه تركــي ..
حاولوا كلهم يفكونا .. نايف و بندر و خليفة و خالد .. لكن ضاحي و هزاع .. جلسوا يناظرونا مصدومين ..
هيثم : هالحين ما ترمس ليش .. . قول شوه سويت عسب تضربني جيه ..
تركي : قول وش ما سويت انت بقي شيء ما سويته .. حطمتني من أول يوم شفتك فيه و تبي بعد تكمل يا الخسيس ..
وش اللي بيني و بينك عشان تسوي كذه / زين أن ريمان شافت المقطع قبل لا توهقني أنا يا ابن الكلب ..
خليفة : تــركــي كافي .. احترم ألفاظك سبّه هو لا تسبّ أخويه .. و بعدينه شوه فيك ..
قمت و أنا أمسح جبهتي و أناظره بحقد و أنا انتفس بصعوبة .. حسيت صدري بـ يشب ..
تركي : حرام عليك .. لها الدرجة تكرهني ليش .. أنا وش سويت ..
هيثم : للحين منيب فــــــــاهم تركي فهمني ..
تركي : من يوم طلعت بدنيتي و كل شيء انقلب فوق تحت .. بـ الأول الريم و عقب إلياس .. و الحين ..
الحين تبي تطعني في ظهري يا الكلب .. ما تربيت انت ..
مسكته مرة ثانية و لما جيت بضربه .. غيرت رأيي .. وقفت .. و صرت أناظره و أنا أتنفس بصعوبة .. صار يناظرني
و هو جالس عقب شهق و غطى وجهه / ابتسمت بسخرية ..
تركي : وش فيك .. تذكرت وش نسيت .. تذكرت جوالك و اللاب ..
قام بسرعة و مسك كتوفي .. ناظرت ملامحه اللي بدت تتألم ..
هيثم : لاااا .. لا تقول ان ريمان جافت المقطع ..
ناظرته بيأس و ألم .. مسكته من كتوفه ..
تركي : تدري .. اذا صار لها شيء .. .. و الله ما تلوم الا نفسك يا هيثم ..
دفيته عني و مشيت دخلت على الشاليه و ركضت بسرعة لغرفتي .. و لما جيت بفتح الباب حسيت صدري ينقبض ..
فتحت الباب بسرعة .. جلست على سريري بتعب .. فتحت الدرج .. سحبت جهازي و حطيته بفمي بسرعة ..
آآآآآآآآآآآآآآآآآآآآه أشوى بغيت أموت .. نزلته من فمي و جلست أناظر قدامي .. و أنا منيب شايف شيء حولي ..
كل اللي أشوفه هيثم .. جد خسيس .. يا ربي لك الحمد و الشكر .. لولاك كان وهقني قليل الخاتمة ..
قمت .. خاطري أروح لها أبي أهديها / جلست أتساءل بتم معه حتى بعد ما شافت المقطع ..
غمضت عيوني و أنا أتذكر وش بـ المقطع .. كان معه في شقتهم ثلاث بنات .. و أظنهم بريطانيات ..
و كل وحدة بملابسها الداخلية بس .. لا و يراقصهم و يحبّهم مع شفايفهم و كذا حركات !
هزّيت راسي و أنا أحاول أنسى / رحت مسكت اللحاف و حطيت رأسي على المخدة و غمضت عيني .. !
**************************
.. (( اليـ الثـ السـ 6:20 الفجر ـاعة ـاني ـوم )) ..
كنت جالسة فوق سريري .. و ساندة رأسي على الدريشة اللي جنبه و أناظر البحر بره ..
كنت للحين مصدومة .. و منيب مستوعبة .. كنت متصورة أو كان ببالي ان هيثم كان يكلم بنات ايه ..
بس ما يسوي أكثر من كذه .. المقطع اللي شفته أمس كرهني فيه .. كرهته من قلب ..
مسحت دموعي بظهر كفي .. دموعي اللي ما رضت توقف من أمس ..
كل ما أتذكر مظهره و هو يحبّ البنت مع شفايفها أحس بـ قلبي يحترق داخلي ..
غمضت عيوني .. . أكيد تركي شاف كل شيء .. أكيد لأني شفته يتهاوش مع هيثم ..
بديت أندم اني حبيت ها الهيثم .. ندمت على كل ثانية راحت علي و أنا أفكر به .. و لاّ على صوره ..
ناظرت الساعة شفتها 6:40 الفجر .. آآآآه أحتري عمي خالد يصحى من رقاده عشان أكلمه ..
و الله و اللي خلقني ما راح أجلس على ذمة واحد مثله لو تنشق الأرض و تبلعني أهون عندي من أتزوجه ..
حطيت رأسي بين ركبي و جلست أصيح و أنا أحاول أكتم شهقاتي شاللّي راح ينسّيني حبه بسس ..!
رن جوالي ناظرته و أول ما شفت الرقم استغربت .. كان جوال نايف بس بعد رديت و كان خالد ..
خالد : ألــووووو ريم ..
ريمان : عـمـ ـي وينـ ـك .. أبـ ـي أشوفـ ـك ..
خالد : زين أطلعي أنا عند الشاليه ..
قفلت بسرعة .. رميت جوالي تحت مخدتي و لأن ما لي خلق أغير بجامتي .. لبست عبايتي و شيلتي لفيتها على شعري
و نزلت .. شفته واقف و معطيني ظهره .. رحت له و أنا أحاول أمسك روحي عن أصيح ..
خالد : ليش لابسة عبايتك ..
ريمان : ما لي خلق أغير البجامة ..
طوق كتفي و مشي بي ..
خالد : زيــن تــعــالـي نـبـعد عن الشـالـيـه ..
مشينا على الرمل .. و بعدنا شوي عن الشاليه .. كنت كل شوي أمسح عيني و دموعي ..
و هو كان مطوق كتفي و ساكت و أحيان يتنهد كل ما يلمحني أمسح دموعي ..
ريمان : عـمـي .. أنـ ..
خالد : قال لي نايف عن كل اللي بـ المقطع ..
ساندت رأسي على صدره و جلست أصيح ..
ريمان : لااااااااا لا تـ ـقول ان نايـ ـف يدري لا تـ ـقول ..
خالد : الا يدري .. . يدري من يومين هو و تركي شافوه بـ الصدفة .. و سكتوا .. و لا قالوا لأحد ..
ريمان : ليش .. ليش ما تكلموا .. كانوا يبوني أجلس مخدوعة ..
خالد : يا ريمان أول من شافه هو تركي .. على كلام نايف يقول لمّا دخلت الغرفة شفت تركي جالس
على السرير و يناظر جوال هيثم بصدمة .. و لما سحبته منه عرفت شفيه ..
ريمان : لـيـ ـش ما تـكـ ـلموا ليـ ـش ..
خالد : تركي قال لنايف لا تقول لأحد ..
ناظرت عمي مستغربة .. و أنا امسح دموعي اللي عيت توقف ..
ريمان : ليـ ـش .. بـ العكس .. تـ ـوقعته بـ يتشفى مني .. توقعته بـ ـيجـ ـي يتطنز علي ..
خالد : لاااا تركي ما يسويها .. سكت لأنه خاف عليك ما يبيك تنصدمين ..
ريمان : لو قال لي أحسن .. لو كـ ـان يحبني كان تكلـ ـم ..
خالد : ايييييه هو يحبك و الكل يعرف و لأنه يحبك رفض انه يقول لك خلاك جاهلة أحسن ..
داري أنك مبسوطة و ما يبيك تتألمين مثل الحين ..
جلست أصيح على صدره و أنا ساكته .. حظي مايل من ججججد مااااايل ! شسوي الحيـن .. سمعت عمي يتكلم ..
خالد : تدرين انه تحدّى تركي قبل لا يسبحون عليك ..
رفعت رأسي بسرعة ..
ريمان : اشـــلــــون .. ؟!!
خالد : قال له اللي بـ يأخذ المركز الأول .. هو اللي يحب الريم أكثر من الثاني .. بس تركي بعد ما فاز قال له :
.. " شيء أكيد اني أستحقها أكثر منك بعد " .. و عشـ ..
ما سمعت باقي كلام عمي .. كل اللي أعرفه اني حسيت بندم فظيع اني رفضت تركي .. بس لااا أحسن اني رفضته ..
أنا اذا شفته أرتجف خوف أبرك لي اني رفضته .. حطيت يدي على وجهي .. كل واحد فيهم به علّه ..
بس الأكيد ان تركي أحسن و بـ كـثــــيـــــــــر عن هيثم ..
خالد : عموما يا الريم .. وش بتسوين ..
ناظرته برجا .. و أنا احس بدموعي تسيل على خدي .. شديت على ذراعه ..
ريمان : عـمـ ـي تـ ـكفى طلبـ ـتك مـ ـا أبـ ـيـ ـه ..
ضماني لصدره يهديني يوم شافني أصيح و أشاهق .. جلس يربت على ظهري .. عقب همس ..
خالد : متأكدة ما تبينه ..
ريمان : إيــ ــــــــه ..
خالد : ترى أغلب الشباب كذه ..
رفعت نفسي منه و أنا أقول بحدة و أصيح ..
ريمان : لا مـ ـب كلهم .. شـ ـوف سلمـ ـان و نـ ـايـ ـف و .. عمـ ـي مـ ـا أبـ ـيـ ــه ..
رفع يديه باستسلام ..
خالد : زيــــن زين .. اللي تبينه يا الريم بيصير ..
ريمان : مـ ـشكـ ـور عـ ـمـي ..
و رجعت ارتميت بحضنه و أنا أصيح .. أصيح حبي الكذاب .. همس ..
خالد : بيني و بينك أحسن بعد رفضتيه ..
***********************************
اليوم من صفحة حياتي بـ أمسحك * * هديت صرحك ثم طاحت ركونك
و لا أبي عيوني لو تصورت تلمحك * * أعلنت موتك و أنسجن لي كفونك
و إن جيت تطلب ترجيتني أسامحك * * بـ أهديك طعنة من بقايــا طعونك
*********************************
.. . (( بعد ثمان أشهر .. . كانت الريم بـ السعودية هي و أهلها .. خلاص تطلقت من هيثم .. بعد معارضات
جاه لها أبوها كان زعلان حـيـل منها لأن مهيب حلوة تطلق البنت بعد ملكتها لكن يوم عرف السبب بطل العجب
أما هيثم .. راح لـ ريمان .. ترجاها تسامحه .. حلف لها ان كل اللي بـ المقطع كان قبل أربع سنين .. .
لكن ما له عذر .. زين كان مسحته ليش محتفظ به .. ؟؟!!
عموما صاح عندها طلبها انها تسامحه .. . كانت بـ تتراجع في آخر لحظة .. بس أبوها رفض ..
و بـ الأخص يوم عرف وش كان ناوي يسوي هيثم بتركي .. . اللي يهمنا الحين ان الريم تطلقت ..
و ردوا للسعودية .. . لكن بعد هذا ما منع العائلتين انها تتواصل .. و من حكمة الجد خليل انه منع المشاكل
عشان مشكلة بين الشباب .. مرت هالحين ثمانية شهور .. تملك فيها خالد على ميثا ..
ميثا اللي ما رضت بـ كبريائها ترد حق هيثم .. يوم جات لها خالتها اللي هي أمه و قالت لها بـ خطبك له ..
رفضته بـ الأصل ما كان هيثم راضي و يوم رفضته ارتاح .. ما كان يبي يتزوج على أمل ان الريم ترد له ..
و الحيـن بعد كل ها الفترة .. تزوج بندر بـ وضحى .. و سلمان و راكان و نايف و نواف تزوجوا ..
و بعد فارس تزوج شاهه .. . و ضاحي و هزاع .. ملكوا بعد .. ضاحي على ظبية و هزاع على حمده ..
كانوا من قبل يــــبون يملكون .. و عقب سنة الزواج .. لكن و لأن ميثا ما تزوجت سكتوا .. .
لكن الحين ميثا بـ تتزوج .. . و خلاص الطريق قدامهم مفتووح ..
و اليـوم بـ يحضر الجد محمد زواج آخر ولد له .. . اللي هو خــالــد ..
اليوم زواجه بـ الرياض من ميثا .. . و بـعد زواج خليفة من جمّون ..
و قبل لازم أقول لكم شيء عن أهل الكويت .. .. بشار .. يوم عرف عن اللي صار لـ هيثم ..
ندم انه طلب منه ينتقم له .. . تعذر من هيثم لكن هيثم قال له انه غلطي و بس ..
بشار راح تزوج وحدة تقرب له من جهة أمه اسمها .. " شيخه " الجازي يوم عرفت صاحت /
تألمت بس كمّلت حياتها ..!! حصة تزوجت من ولد عمها و مريم بعد تزوجت و هي الوحيدة هالحين اللي ما تزوجت ..
فاطمة للحين عندها أمل ان تركي يحبها و نهى ظلت تحاول تتصل بتركي بس الرقم .. " خـارج الخــدمــة " ..
و الحين أخليكم مع الواقع واقع مفرح للبعض , و مؤلم للبعض و بلا ألوان للبعض .. )) ..
************************************************
نهآيةة البارت الرابع و الثلاثين ..
توقعاتكم حبايبي .. ^^
و آن شآء الله عجبكم '$
آلبآآرت الخآمس و الثلاآثين . . '$
******************************************
.. (( الريـ السـ 1:30 الليل ـاعة ــاض )) ..
مسحت دموعي و أنا أشوف جمّون تنزفّ بعد ما انزفت ميثا و عمي خالد و الحين دورها هي و خالي خليفة ..
كنت أزغرد لها و حيل حـيـل كنت فرحانة لهاا و عاد خالي مو أي انسان خالي يحبها و هي حبته ..
يوم وصلوا لـ الكوشة زغردوا الكل ... قمت رايحة أسلم عليهم و بكل تأكيد كلهم ما أتحجب عنهم ..
هذا عمي الغالي و هذا خالي الغالي .. و بعد جمون ذا عمها و ميثا خليفه يصير عمها بعد ..
طلعت الكوشة و يوم شافني خالد ابتسم و فتح ذراعيه ..
رحت حضنته و سلمت على جبهته ..
ريمان : ألــــــــــف ألــف مــبــروك يا أغلى عم عسى الفرح يضوي دنيتك ..
خالد بابتسامه : عقبالك يا الغلا ..
ابتسمت له و ما ردّيت و أنا ألف على ميثا ابتسمت لها و حضنتها و حبيت خدها ..
ريمان : ألــف مبروك و عاد لا أوصيك على عمي تراه غالي ..
ابتسمت و هي منحرجة و أنا ضحكت و لفيت على عمي ..
ريمان : و انت بعد تراها غالية علي ..
خالد : هههههههههههههه أفـــااا عليك توصيني على قلبي ..
و طوقها بذراعه و هي اختبص لونها ..
ريمان : ههههههههه زين خليني أروح جد ما تستحي ..
لفيت على خالي و تخصرت بدلع ..
ريمان : لا عاد انت لا أوصـــــيــك ترى زوجتك تصير قلبي ..
خليفة : هههههه و لا يهمج لا توصين حريص ..
سلمت عليه و باركت له و لما وصلت لـ جمّون ناظرتها بابتسامة حضنتها و من غير ما أحس ..
بديت اصيح على كتفها و هي تصيح .. شيء طبيعي و الكل بـ يكون ردة فعله مثلي ..
هذه أختي اللي ما ولدتها أمي من يوم عرفت الدنيا و هي معي و الحين بـ تبعد عني للإمارات ..
صحت من قلب عليها لين مسكت نفسي .. بعدت و مسكت يديها و هي كانت منزلة رأسها و تصيح ..
ريمان : جمّون خلاص لا تصيحين بـ يخترب مكياجك ..
ناظرتني بحب و حنيه و دموعها تسري على خدها ..
جمانه : ريم انتبهي على نفسك و تـرى بأشـتـاق لك ..
ضميتها أقوى شيء عقب بعدت و حضنت وجهها ..
ريمان : انتبهي انت بعد على نفسك و صدقيني ما راح تحسين بـ الغربة ترى خالي حبيب حـيـل ..
هزت رأسها و أنا ابتسمت و مسحت دموعها .. ناظرت خالي اللي كان مبتسم و يناظرها ..
ريمان : خـالـي ..
ناظرني بابتسامة ..
ريمان : لا أوصيـك عليها .. تراها حيل حـيـل غالية ..
خليفة : لا توصين حريص مثل ما قلت لج و لا يهمها هي متى ما اشتاقت لج .. أنا أييبها هني جم جمّون عندي ..
ناظرته جمانه بخجل و أنا ابتسمت و نزلت عن الكوشة .. خلاص الحين بيمشون للفندق ..
عقب للمطار .. عمي بيروح لـ ماليزيا شهر العسل و خالي بيروح لـ مصر ..
مسحت دموعي و رحت جلست على طاولة .. رفعت عيني لـ شاهه اللي جالسة و ماسكة بطنها لأنها حامل ....
ابتسمت و أنا أناظر ملامح وجهها تشبه هيثم كثير ممكن قبل ما لاحظت بس الحين لانه بعيد لاحظت الشبه ..
هيثم الحين وينه فيه .. لا تناظروني كذا و لا تبدون تتكلمون !
ترى منيب ندمانه اني رفضته و تطلقت منه بالعكس أحسن بس بعد القلب مستحيل ينسى / تجيني أوقات و أحنّ ..
لفيت على وضحى يوم هزتني ..
ريمان : ايه وضحوه شتبين خلعتي كتفي ..
وضحى : هههههههه سوري بس كلمي الخالة تبيك ..
لفيت على حرمة شوي كبيرة .. ابتسمت لها ..
ريمان : هلا يا خالة في شيء ..
الخالة : اييه يا بنيتي أبسالك وش تقربين للعريس ..
ريمان : العريس عمي ..
الخالة : زين يا بنتي وين أمك ..
أشرت لها لطاولة أمي و هي راحت لها و جلست معها .. رديت عيني لوضحى ..
وضحى : خـاطـب جديد ..
ابتسمت و ناظرت الحرمة ..
ريمان : تتوقعين ..
وضحى : أكيــد كذه الحريم يوم يخطبون ..
ريمان : يالله أحسن لي لو كان خاطب ..
سكتت وضحى لأنها ما فهمت مغزى كلامي .. لكن كنت أقصد ان أحسن لي عشان أنسى قليل الأصل هيثم ..
*********************************
.. (( بعد شهرين : السعـ السـ 7:20 الليل ـاعة ـودية * * ميثا * * )) ..
كنت ظاهرة من المطبخ و جان خالد بـ يظهر من البيت .. طالعني بـ ابتسامة و أنا ابتسمت له ..
ميثا : بـ تسير عند تركي صح ..
قلت جيه لـ أني تعودت اذا بـ يظهر ما يسير الا عند تركي و لاّ عند بندر ..
خالد : ايه عمري .. تبين شيء ..
ميثا : هيه أبـا سلامتك ..
ابتسم و حبني ويّا خدي قبل شفايفي عقب همس ..
خالد : سلامة قلبك .. يالله عمري أنا رايح ..
ميثا : باي ..
قال " باي " و بند الباب رديت لـ الصالة يلست أتابع التلفزيون .. فكرت أتصل على شاهه لي فترة ما رمستها ..
مسكت التلفون و اتصلت على بيتها هي و فارس .. يلست أتريا عسب يردون بس الصوت اللي ياني ..
صدمني ما توقعت أتصل على شاهه يظهر لي هيثم ..
.. : مرحبااا ..
صخيت شويه قبل لا أسحب نفس و أردّ ...
ميثا : السلام عليكم ..
هيثم : و عليكم منو ويّاي ..
ميثا : أعطيني شاهه ..
صخ شوي عقب رمس و صوته به مصخره ..
هيثم : اوه الشيخه ميثوه هلا والله شحالج ..
ميثا : بخير .. عطني شاهه ..
هيثم : شحال خالد و شحال العلاقة بينكم ..!!
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك