رواية علميهم ليه احبك حب ما حبه بشر -52
قاموا البنات وحضنوا ابوهم اللي اشتاقوا له مووت والعيال سلموا على ابوهم
ابوبندر ابتسم: الله لا يحرمني منكم يارب.. شلونك ديما شلون دراستك ؟
ديما وهي ميته من الوناسه انو ابوها رجع: الحمدلله كله تمام
ابوبندر: وانتي ياريما؟
ر يما: الحمدلله
ابوبندر يسلم على عياله بحراره ويقعد والكل حوله
ام بندر قامت بدون ولا كلمه
بندر: يمه وش دعوه مارح تقولين لابوي الحمدلله على السلامه ؟
ام بندر طالعت بندر بنظره وطلعت لغرفتها
ابوبندر: تعال يا بندر اقعد قول لي اخبارك .. يعني ماتعرف امك وحركاتها
بندر قعد مكان ما ابوه أشر له
ريما كنت حاطه راسها على صدر ابوها وضامته بقوووه
ديما عصبت: هيييي انتي وخري من هنا مو ابوك لحالك ماشبعت منه ترى
ابوبندر: هههههههههههههههههه انا اليوم مارح اتحرك من هنا بقضي اليوم كله معكم لا تخافون .. شلون العياده يابندر؟
بندر: الحمدلله كل شي فيها ماشي تمام .. صحيح تعب بس الحمدلله
ابوبندر: اي هذا الشغل
بندر:لا وبعد ياليت ماجد يساعد
ابوبندر: ليش؟
بندر: ماجد مثال للدكتور الكسلان ..انواااع التسيب ودايم يخلي الشغل على راسي.. كله من رنيم مقضي كل وقته معها
ابوبندر ابتسم: خليه يتهنى معها احلى الايام ايام الخطبه
ابوبندر: ياسلام هو يتعنى ويتدلع وانا انكرف كرف الحمير لحالي
بدر: هههههههههههه عيب عليك تتشكى مثل الحريم
بندر: حرام يعني افضفض واقول عن اللي بقلبي
ابوبندر: خلاص خلال الفتره هذي ان شاء الله نخطب لك وعيش مثل ما ماجد عايش
بندر: ان شاء الله
ريما: والله يابندر لو تخليني اخطب لك بكون اسعد وحده
ابوبندر: شكل عينك على وحده لبندر
ريما : لا والله بس بشوف له وحده من صاحباتي
بندر ابتسم لحماس اخته
ابوبندر : الله يكتب له اللي فيه الخير يارب
بندر: امييين يارب
ابوبندر: بدر وش فيك ساكت؟
بدر ابتسم: سلامتك اسمعكم
ابوبندر يتلفت: وين مشاعل ؟
بدر: مسافره
ابوبندر استغرب: وليش ماسافرت معها ؟
بدر: ماحب السفر يبه وانت تعرف كذا
ابوبندر: بس غلط مشاعل تسافر لحالها
بدر ماهو فاهم: ليش؟
ابوبندر :.............. لا ولا شي
ابوبندر كل يوم يتأكد انه تسرع بخبطة مشاعل لولده .. وخصوصا انه يشوف انهم ابدا ماهم متفقين وحياتهم مشاكل بمشاكل
ابوبندر التفت على ريما: ريما عظم الله اجرك حبيبتي
ريما: اجرنا واجرك
ابوبندر: كل شي ربي يكتبه لنا فيه خير .. والحمدلله على كل حال
ريما: والنعم بالله .. الحمدلله ..ديما يللا قومي معي خلينا نقول لهم يحضرون الاكل عشان نتغدى مع بابا ونتأكد انو غرفته متجهزه
ديما : يللا
بندر: اما انا استاذنكم .. لازم ارجع العياده
ابوبندر: اقعد تغدى معنا وبعدين رح
بندر: ابدا مافي وقت يبه .. بتغدا هناك مع ماجد هذا اذا ما سحب علي كالعاده وراح يتغدا مع حبيبة القلب
ابوبندر: هههههههههههه قلت لك هالفتره نخطب لك
بندر ابتسم: يللا فمان الله
ابوبندر وبدر: الله معك
ظلوا ساكتين لفتره
ابوبندر: بدر
بدر: سم
ابوبندر: الوضع ماهو تمام بينك وبين زوجتك ؟
بدر:......
ابوبندر: احكي لي انا ابوك
بدر: ابدا .. عادي
ابوبندر: شلون عادي
بدر: يعني عادي .. حياتنا زي حياة اي اثنين متزوجين .. ابتسم وكمل كلامه .. تصدق يبه صرت احس انها حتى هي مغصوبه علي
ابوبندر: حاولوا تتفاهمون مع بعض ياولدي
بدر يتكتف: لا ماينفع .. حاولت بس عجزت فيها البنت مدلله ومايعجبها شي حاولت ارضيها بس مافي فايده .. حتى اني قررت اني ما اجيب منها عيال الفتره هذي ابداااا لو ايش يصير الوضع ابدا مايطمن بينا
ابوبندر تنهد وسكت .. هو محترم قرار ولده وهو كمان يشوف انو الشي هذا عين العقل الحين
تردد قبل لا يسأله بس توكل على الله وسأله : و شذى؟
بدر حس بدقات قلبه تنسمع من كثرر ماهي قويه.. من زمان ماسمع اسمها
بدر: وش فيها؟
ابوبندر: ماتعرف عنها شي ؟
بدر: لا
ابوبندر: ........ بدر انت للحين تبيها ؟
بدر التفت على ابوه وهو مستغرب من كلامه : ابيها ؟
ابوبندر: بخطبها لك
بدر اتبسم بحزن : ماهي لي
ابوبندر :....
بدر: شذى تزوجت من زمان يبه
ابوبندر حس بالذنب زياده والندم صار ياكل قلبه اكل .. تحسف انه وقف بينهم وكان السبب بفراقهم .. صحيح كان خايف على ولده بدر بس مافكر انو شذى ممكن تكون غير وتكون فعلا تحبه ومستعده تسوي المستحسل عشان حبها له
ابوبندر: الله يستر عليها يارب
بدر: امين .. عن اذنك
ابوبندر: على وين ؟
بدر: بطلع مع محمد مواعده من وقت وسحبت عليه
ابوبندر: ماتبي تتغدا معي انا وخواتك
بدر: لا يبه بالعافيه ان شاء الله .. يمكن الحق واجي اتعشى معكم ..تامرني على شي
ابوبندر: ابي سلامتك
بدر: الله يسلمك ..مع السلامه
ابوبندر: ربي يحفظك ...
ما اصدق اني سويت فيك اللي ابوي سواه فيني يا بدر
زوجتك وحده ما تطيقها مثل ماسوى لي ابوي مع فوزيه
وياخوفي ياكلونها عيالكم بالمستقبل مثل ما اكلوتها انتو بيني وبين امكم
بدر ركب سيارته وحط راسه على الدركسون وغمض عيونه
كلما بغيت اشيلك من بالي يطلع لي مليون شي يذكرني فيك
واخرها ابوي .. لا وبعد يبي يخطبك لي
تأخرت كثييييير يبه الله يسامحك ...
بيت ابورنيم
رنيم كانت قاعده مع امها اللي كانت تعبانه بزياده الفتره الاخيره
ام رنيم بتعب واضح: حبيبتي قومي اطلعي غيري جو
رنيم: وين اروح بس ؟
ام رنيم: اي مكان .. روحي لصديقتك هديل من زمان عنها
رنيم: لا مابي بقعد معاك
ام رنيم: يابنتي روحي انا بخير ..روحي غيري جو وانبسطي
رنيم: هديل مااظنها فاضيه اليوم .. هذا اليوم اللي تتجمع فيه مع اهلها
ام رنيم: طيب روحي مطعم ولا ايش شي
رنيم: للدرجه هذي تبين الفكه مني ؟
ام رنيم: لا يابنتي بس والله مابيك تربطين حالك فيني ابدا وتدفنين نفسك هنا معاي
رنيم تبوس راس امها: انا روحي فداك ماما الله لايحرمني منك بس
ام رنيم بتعب: ولا يحرمني منك .. يللا حبيبتي قومي اطلعي
رنيم:ههههههههههههههههه مصره يعني
ام رنيم تهز راسها بايه
رنيم :........ طيب بطلع بس شوي مارح اطول
ام رنيم: اللي يريحك اهم شي تروحين وتغيرين جو
رنيم: طيب حبيبتي .. يللا يمه مع السلامه .. رنيم حضنت امها بقووووة وطلعت من غرفتها
ام رنيم تطالع بنتها وهي تدعي لها
رنيم توجهت لغرفتها وهي تفكر وش ممكن تسوي ووين ممكن تروح .. امها صادقه هي من زمان ما طلعت من البيت ومن تخرجت من الجامعه وهي ماتسوي شي غير مقابل امها
طالعت ساعة يدها لقتها وقت غدا
ابتسمت وهي تفكر ..
اروح الحين لماجد على العياده واخذ لي معاه غدا ونتغدى سوا
ماقد سويت له الحركه هذي ..
مسكت جوالها وكلمت مطعم ماجد المفضل وطلبت له كله الاكل اللي يحبه وراحت لغرفة ملابسها عشان تغير وتروح له .. ماعطته خبر تبي تسويها مفاجأة ..<< وياليتك كلمتي قبل ما تروحين
العياده
بندر وصل العياده وراح لمكتبه ..حمد ربه انو ماعنده اليوم مرضى للحين يعني يمديه يشرب له قهوه على رواق
اخذ قهوته وراح لمكتب ماجد ..طق الباب ودخل
بندر: اووووه ماجد مداوم قبلي ..وش صاير بالدنيا
ماجد : ههههههههه داومت بدري ما عجبك تأخرت ماعجبك سحبت عليك مره وحده برضو ماعجبك ..وش تبي مني انت
بندر قعد : ابي اشوفك منتظم ومحلل الراتب اللي ينصرف لك انت ووجهك
ماجد ابتسم: لا يكثر
بندر: ابوي حاكاني اليوم وقال يبي يخطب لي
ماجد فرح: اووووه اخيرا بتصير معرس
بندر: شفت كيف .. اجل تحسب مايتزوج غيرك انت ووجهك
ماجد: ومنهي سعيدة الحظ؟
بندر وهو يشرب من قهوته : مدري والله ريما تبي تخطب لي وحده من صاحباتها .. بس بيني وبينك انا ابي مها بنت عمي
ماجد : ما شاء الله .. اجل عينك على مها
بندر : اي ربي يسعدها
ماجد غمز له : وش السالفه ؟
بندر ابتسم لانه عرف انو ماجد كفشه : لا ولا شي ..
دخلت الممرضه المساعده لبندر عشان تقول له انو في مريض ينتظره
بندر كشر : يافرحه ماتمت توني اقول شكل اليوم بيكون فري عندي
ماجد: الدكاتره يطب عليهم الشغل فجاة
بندر: ربي يعيننا بس .. المهم اخليك انا الحين
ماجد: الله معك ..وكمل قرايه بالاوراق اللي قدامه
بعد خمس دقايق.. انفتح باب مكتب ماجد
ماجد بدون مايرفع راسه : بندر وبعدين معم مو عندك مريض
.....: انا مو بندر .. ارفع راسك وشو قاعد تتحجى مع منو
ماجد رفع راسه : رانيا !
بيت احمد
شذى ماهي قادرة تتحرك من التعب .. تحس بطنها يألمها مرررره والالم كلماله يزيد عليها .. جمعت قوتها وراحت للباب .. صارت تطق بكل مافيها من قوه وتنادي على احد يمكن يرد عليها
شذى تنادي الشغاله : سيتي .. سييييييتييييييييييييي وتطق على الباب .. ظلت تطق عالباب لدقايق ليين ماجتها
سيتي: نعم مدام
شذى: افتحي لي الباب الله يخليك تعبانه اااه
سيتي : مافي افتح باب .. بابا يقول مافي افتح
شذى: الله يخليك بمووووت من التعب افتحي لي الباب
سيتي : بابا قول مافي افتح باب .. وراحت
شذى تبكي من التعب حتى من كثر المسكنات اللي اخذتها خلال اليومين هذي خافت يصير شي بولدها
حطت يدها على بطنها وراحت بشويش للسرير وقعدت عليه .. تشد على يدها من الالم ..
بموووت .. اكيد اني بموت الحين ومحد بيدري عني
مارح تجيني فرصة اني اشيل ولدي بين يديني ولا حتى اشوفه
بموت ولا احد بيذكرني
وصارت تبكي ..
تعوذت بالله من الشيطان وصارت تقرا على حالها .. تذكرت جوالها
اللي كان من بدر عشان يكلمها .. تذكرت انو الشاحن مخلص ومافي امل يفتح .. بس ما يأست
شدت على حالها وراحت للادراج تدور شاحن ..بس ما لقت
حست رجولها ماهي قادره تشيلها وقعدت عالارض .. وصارت تكمل تدوير
لقت بطارية جوال .. مسكتها وكنها الامل الوحيد لها
وقفت بصعوبه وتوجهت للدولاب ... وصارت تنزل الملابس كلها على الارض تطلع جوالها لين ما لقته
صارت تدعي ربها انو البطاريه تكون مشحونه ..شغلت الجوال واشتغل
حمدت ربها .. وصارت تدور بالارقام لين وصلت للرقم اللي تبيه
شذى بتعب : الووو
بيت ابومشعل
مشعل واثير كانوا قاعدين بالحديقه يسولفون
مشعل: حبيبي ماتبين نسافر
اثير: لا مو الحين عاد ابي اركز بدراستي لاني اهملتها الفتره الاخيره
مشعل : اسبوع مارح يضرك
اثير: الا بيضر .. مارح اغيب انتظر لين ما تجي الاجازه
مشعل : بس الاجازة مطوله
اثير: مايخالف ننتظر شوي ماهو ضارنا
مشعل يمسك يدها:وين حابه نروح ؟
اثير: اي مكان معك انا راضيه اروح له
مشعل حضنها: يابعد عمري انتي
الهنوف: احم احم ..
مشعل ابتسم: هلا
الهنوف تقعد بينهم : الحين ابوي مخلي لكم جناح كبير عريض ضاقت عينكم على ذا المكان يعني
مشعل: استحي على وجهك ..وبعدين توك راجعه من المدرسه انتي ورا ماتروحين تغيرين ملابسك وتتغدين ؟
الهنوف: مابي بقعد معكم .. والحين انتي يا اخت اثير ماعندك جامعه وانتي مقابله اخوي طول الوقت ؟
اثير ابتسمت : الا عندي .. داومت وخلصت بدري اليوم ماعندي محاضرات كثيره
الهنوف: طيب يللا قوموا نتغدا
مشعل: انا واثيرتي تغدينا بدري
الهنوف: ماتنتظروني يعني ؟ ماتقولون اختنا الصغيره المسكينه بتتغدا لحالها خلونا نستناها
مشعل : تغدينا بره اصلا
الهنوف: كمااااااااااااااااان !!!
مشعل : هههههههههه الهنوف قومي الله يصلحك غيري وتغدي
الهنوف: مااااشي لنا الللله .. انا بكلم دلال واروح لها هي اختي حبيبتي اللي تسأل عني مو مثلكم .. وراحت غرفتها
اثير تضحك : ياحبي لها
مشعل يناظرها بحب : ياحبي لك انتي والله
عند بيت شذى
بدر كان واقف عند باب بيت شذى .. تذكر ايامهم سوا .. ايام لما كانت امها مريضه وكان يجيب لها الاغراض الناقصه والادويه ..وايام لما كان يسافر ابوها ويخليهم لوحدهم وتكون خايفه ويجي لعند باب بيتهم
ولما ولما ولما ...
سند راسه عالكرسي وصوتها يتردد بباله ..
كيف تناديه
كيف تنطق اسمه
كيف تقول له انها تحبه ومشتاقة له
ياليت الايام هذيك ترجع يا شذى .. ياليتك ترجعين لي ولقلبي
اااااه بس
سمع صوت طق على شباك سيارته.. التفت على الشباك ولقى بنت منقبه
بدر فتح الشباك: نعم اختي اي خدمه ؟
اريج بصوت خايف: انت بدر صح ؟
بدر استغرب من هالبنت اللي تعرفه : اي انا بدر
اريج : بدر انا اريج صديقة شذى
بدر وكالعاده زادت دقات قلبه مع طاريها: وش فيك ؟
اريج تبكي : شذى مره تعبانه يابدر
بدر يحس قلبه بيوقف: تعبانه وش فيها
اريج : ما ادري تبكي من التعب ومنهاره توها مكلمتني
بدر : تعرفين وين بيتها ؟
اريج : اي
بدر : اركبي نروح لها
اريج ترددت
بدر: يا اختي عشان شذى مو عشان شي لا تخافين
اريج وقفت ثواني بس يوم تذكرت انو شذى اختها وحبيبتها تعبانه ومحتاجة لها شالت الافكار هذي من بالها وركبت السياره على طول بس ركبت ورا
اريج : روح حي ال....
بدر حرك وهو بباله مليون سؤال : وش فيها شذى تعبانه ؟
اريج: مع الحمل
بدر انصدم وقلبه تقطع مليون قطعه : شذى حامل ؟؟؟
اريج : اي حامل وبالشهر السادس
بدر وهو يبلع غصته: وين زوجها ؟
اريج بحقد :الله لا يرده ان شاء الله مسافر وجعله مايرجع
بدر : وهي بالبيت لحالها
اريج : اي ومقفل عليها غرفتها
بدر مافهم : مقفل عليها ؟
اريج : اي حابسها بالغرفه ومسافر
بدر انصدم من الواقع اللي عايشه فيه حبيبة قلبه : اريج احكي لي عن وضع شذى مع زوجها الله يخليك
اريج من خوفها على شذى صارت تقول له كل شي عن شذى من اول يوم تزوجت احمد فيه لليوم ..
لما كان يضربها ولما كشفها تكلمها ولما درى عن موضوعهم وكلللل شي ..
وبدر قلبه يتقطع على وضع حبيبة قلبه مع كل شي يعرفه عن وضعها مع زوجها الحقير
دبي
مشاعل كانت بالمطعم مع احمد ..
احمد كان ياكل وبشراهه حاس انه اليوم منتعش وايامه بدت تحلا مع مشاعل
اما مشاعل اللي ماكان لها نفس تاكل ابدا .. قاعده تقلب بصحن السلطه وبالها ماهو معها
احمد : حبيبي ليش ماتاكلين ؟
مشاعل : مالي نفس
احمد مسك يدها: فيك شي ؟
مشاعل تهز راسها : لا .. بس ابي ارجع الرياض
احمد : لييييش توها الايام تحلا
مشاعل كذبت عليه :كلمني بدر الصبح وقال لي ارجع
احمد ابتسم : ومن متى مشاعل بنت حمد ال ... تسمع كلام احد
مشاعل: زوجي لازم اسمع كلامه
احمد: الله اكبر بس ..
مشاعل : انا حجزت الصبح وطيارتي الفجر
احمد يشد على يدها : يعني قدامنا ليله كمان
مشاعل تسحب يدها : احمد .. انت عاجبك اللي صار امس ؟
احمد ابتسم
مشاعل: انا ماعجبني ابدا ولا ادري اصلا وش اللي خلاني اطاوعك
احمد : الا انتي كمان كان ودك هذا كله يصير .. ولا ؟
مشاعل : اللي سويناه امس هذا مستحيل يتكرر .. انا اكلم اطلع اقابل اسوي اي شي .. بس برضو عندي حدود
احمد : حبيبتي .. انسي كل الدنيا معي ممكن
مشاعل حطت الشوكه وشبكت يدينها ببعض : احمد .. خلاص
احمد ابتسم وكمل اكله
العياده
ماجد : انتي وش تسوين هنا ؟
رانيا تقعد قدامه وتحط رجل على رجل : وش اسوي يعني ؟ يايه اشوفك
ماجد : انتي ماتفهمين عربي ؟ ما تستوعبين ؟ انا متزوج واحب زوجتي ولا يهمني شي بالدنيا غيرها
رانيا : وحبك لي وين راح ؟
ماجد: حبي لك اصلا ماكان .. انا ماكنت احبك اصلا كنت بس متعلق فيك
رانيا : طيب انا احبك يا ماجد
ماجد عصب: لا تقولين الكلام هذا فاهمه ولا لا
رانيا قامت وقفت قدامه ومسكت يده : انا احبببببك
ماجد بصراخ : انتي ماتحبيني .. انتي خنتيني !!
.......: ايش يعني خانتك ؟
ماجد ورانيا التفتوا لمصدر الصوت ..والدنيا اسودت بعيون ماجد
رنيم يوم سمعت صوت صراخ ماجد دخلت المكتب على طول وسمعت كلامه لرانيا وهي ماهي مستوعبه اللي قاعده تسمعه وتشوفه .. وحده بمكتب خطيبها وماسكه يده وتعترف له بحبها
وهو معصب ويقول لها خنتيني
عقلها ماهو راضي يستوعب المشهد .. تحسه اكبر من انه يدخل مخها اللي هي شايفته
رنيم: وش هذا يا ماجد ؟
ماجد دف رانيا وراح لرنيم : رنيم حبيبي
رنيم: مين هذي ؟
رانيا لقتها فرصه : انا حبيبة ماجد .. حبيبته من ايام دراستنا باستراليا
رنيم التفتت على ماجد: حبيبتك .. استراليا ؟!!!
ماجد : رنيم لا تسمعين للمجنونه هذي الله يسعدك
رنيم : وش قاعد يصير ماني فاهمه شي
رانيا تتغصب الدموع : انا حبيته وهو كمان حبني ..وعدني بالزواج وقال لي بروح افتح الموضوع مع اهلي عشان نجي نخطبك من اهلك بس يوم رجع انغصب على خطبته لك ..
رنيم بدت الامور تتفتح قدامها الحين .. وبدت تستوعب
عشان كذا كان متجاهلها .. ولاكان يدق عليها
اثاريه طلع مغصوب عليها وفوق هذا وذاك يحب
رنيم نزلت منها دمعة قهر : اجل تحبها يا ماجد
ماجد ارتاع من نبرتها: وربي ماحبيت غيرك .. كنت بس معجب فيها كان طيش شباب والله ياعمري احبك انتي وبس.. وانا كشفتها تخوني مع واحد من اصحابي وكرهتها ورجعت لك
رنيم :انا كنت احتياط يعني .. يعني لو ما اكتشفت خيانتها لك كنت الحين معها وراميني صح
ماجد: لا يادنيتي لا .. تكفين لا تقولين كذا ..
رنيم : ماجد لا تكذب علي
ماجد : والله ما اكذب عليك .. لا تصدقين الواطيه هذي ..
راح لمكتبه ورفع السماعه : الحين ادق لك على بندر يجي ويشهد معي ويفهمك كل اللي صار
رنيم مسحت دموعها وشالت الدبله من اصبعها ورمتها على الارض .. غطت وجهها وطلعت من المكتب والعياده وهي ناويه تطلع من حياة ماجد كمان وللابد
ماجد : رنيم .. رنييييم ياروحي انتظري
طلع وراها يبي يلحقها بس اختفت عن عينه
رجع للمكتب حقه وغضبه معميه .. ماهو قادر يشوف شي من قهره من الكلبه رانيا
دخل ومسكها من يدها وصار يضرب فيها وهو يسب ويلعن
ماجد بصراخ: كرهتيها فيني يا حقيره .. حرمتيني منها .. كرهتني والسبه انتي
بندر دخل عليهم لانو وحده من الممرضات نادته بعدما سمعت صوت صراخ من مكتب ماجد ..وانصدم يوم شاف رانيا بين يدين ماجد وهو نازل فيها ضرب
بندر حاول يفك رانيا من يدينه ..
ماجد : فكككككني عليها بنت الذييينا
بندر بصراخ: هدي وش صاييير فهمني
رانيا تبكي : الحقير زعلان لانو المدام طاحت علينا
بندر التفت على ماجد : وش قاعده تقول ذي
ماجد مافيه يحكي ابدا .. قعد عالكنبه حط يده على راسه يفكر بالمصيبه اللي حلت على راسه
سيارة رنيم ..
رنيم من الصدمه كانت ساكته ودموعها تنزل بهدوء ..
ندمت انها عطته فرصه ثانيه ..
ندمت انها حبته ..
ندمت لانها وافقت عليه مع حبها له
ليش يا ماجد تسوي فيني كذا ...
وصلت بيتها .. لقت رجولها توديها لغرفة امها بدون ما تحس
لامها الحنونه اللي ماتزعلها ابدا وكل همها رضاها
دخلت الغرفه بهدووء وهي فاقده كل الاحساس
تبي ترمي حالها بحضن امها وتبكي
رنيم: ماما .. ماما انا تعباااانه
قربت منها وقعدت عالسرير: ماما انا تعبانه وربي.. ماما ؟؟
طاح قلبها .. قربت زياده وصارت تهزها ..
رنيم تبكي : ماما قومي .. ماما لا تروحين مني .. قومي بشكي لك ماجد .. بقول لك وش سوى لي .. بقول لك انه زعلني وخاني ..مااماا
دخل ابورنيم على صراخ رنيم : رنيم وش فيك
رنيم تبكي بقوة : بابا الحقني مدري وش فيها ماما ..
ابورنيم قرب منها وهو ماهو راضي يتقبل الفكره اللي قاعده تدور بباله
فكرة انو اماني رفيقة عمره تكون مفارقته ..
قرب ومسك يدها: اماني .. قومي يا اماني
بكى ابورنيم .. حضن بنته المنهاره المصدومه وصار يبكي
وراحت امانــــــــــــــي
بيت احمد
بدر قلبه يدق : هذا البيت ؟
اريج تنزل من السياره بسرعه : اي هذا هو
بدر : انزلي جيبيها بسرعه بنوديها المستشفى
اريج : وش فيك انت شلون بشيلها لحالي انزل معاي
بدر: وزوجها ؟
اريج : انت صار لعقلك شي ؟ انا ماقلت لك انو زوجها مسافر وهو اللي حابسها بالغرفه
بدر حس انو عقله بدا يشت منه .. نزل مع اريج
اريج رنت الجرس وصارت تطق عالباب بقوة لين جت الشغاله
الشغاله : مييين ؟
اريج : افتحي الباب .. ابي ام احمد
الشغاله : لا مافي
اريج عصبت : اقول افتحي الباب الحين عمك احمد قال لي اجي لامه افتحي الباب
الشغاله فتحت الباب لاريج وبدر ودخلوا
الشغاله تأشر على بدر: مين هذا ؟
اريج تدفها : وخري بس عن وجهي .. تعال معي
دخلوا لنص الفيلا
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك