رواية اسيرة البدر -7
.:. الحلقة 13 .:.
.:. عند باب بيت بوبدر .:.
فتح البدر الجامه وسال ساندرا بتعجب : اشفيج يا الشيخه ؟؟ شنو هالحركه السخيفه ؟؟ اشله وقفتي بسيارتج جدامي ؟؟ اشتبين ؟؟
ابتسمت وقالت : بادي احكي معاك يا البدر
استغرب بدر : لبنانيه ؟؟
وبعدها سال : ومنو انتي عشان اتسولفين معاي ؟؟
.:. تضايقت ساندرا من هالرد الثقيل اللي حسته سخيف .:.
وقالت بقلبها : هيدا البدر من بالبدايه وهايك !!
.:. وبعدها .:.
سال البدر : خير الشيخه ؟؟ بغيتي شي ؟؟
ساندرا : يعني انت اولاك السياره مكان للحكي ؟؟
سال بدر مستفهم : عيل وين تبينا انسولف يعني ؟؟
ابتسمت ساندر : بمطعم او كوفي مسلان
استنكر البدر : اسف .. اسمحيلي
تضايقت ساندرا : ليه ؟؟
بدر : بختصار لاني ما اعرفج
ساندرا ( تسال ) : ولو اعرفيت من انا ؟؟
استفسر بدر : ومنو انتي ؟؟
ساندرا : انا ساندرا
سال البدر : اي ساندرا ؟؟ ما اخبر اعرف وحده اسمها ساندار ؟؟ الا اذا كنتي من اهل امي هذا شي ثاني
ابتسمت ساندرا : انا ساندرا رفيئتها لسلوى بنت داليا
ما استوعب البدر : اها .. اللبنانيه المتعجرفه ؟؟
انصدمت ساندرا : شو هيدي المتعجرفه ؟؟ شو هيدا الحكي ؟؟
سال البدر : مو انتي اللبنانيه اللي احرجتي الدانه بنت عمي بيوم ؟؟
انصدمت ساندرا شلون وصل هالخبر للبدر : ايه انا
ابتسم بدر : هذا اهو
تضايقت ساندرا : بس هيدا مو معناتو انتي متعجرفه متل ما انتا بتقول !!
ما اهتم بدر : اللي اهو
مسكت ساندرا نفسها من العصبيه : وهلا بعد ما عرفيت من انا .. ابتجي ماعي لمطعم ؟؟
سال البدر : وشنو هالشي الموهم اللي بتقولينه لي بمطعم وما ينقال اهني ؟؟
ساندرا : ولا ايشي .. مجرد ايشي بسيط
بدر : عيل لو بسيط .. ما يخالف وقوليه اهني
تنرفزت ساندرا : ما بينفع هيدا الشي
ضحك البدر : وشنو اللي ما بينفع هذا الشي ؟؟
تضايقت ساندرا من اسلوبه الجاف : انت شنو مالك ؟؟ ليش بتضحك هلا ؟؟ انا اليت ايشي بيضحك ؟؟
بدر : سلامتج
ساندرا : وليه بتضحك ؟؟
تمسخر البدر : الضحكه المسكينه مسجونه بداخلي وبدها تنفجر
عصبت ساندرا على هالاسلوب المتمسخر : انت بتتمسخر ماعي ؟؟
بدر : تقريبا
تعجبت ساندرا : انت شنو ؟؟ ما عانداك اسلوب حلو ؟؟
بدر ( يبي يبط جبدها ) : امبلا عندي اسلوب حلو بس مع الناس المحترمين
انصدمت ساندرا : شو اصداك ؟؟
غمز البدر : انتي تعرفين عدل شنو قصدي بالكلام هذا ؟؟ وشوفي يا بنت الناس انا مو امدمغ او غبي عشان ما افهمها واهي طايره .. وهالسوالف البطاله ما تمشي علي انا .. العبي على غيري يا شاطره .. ولو سمحتي وخري سيارتج هالكجره من جدامي .. ذابت المرسيدس واهي بالشمس
انصدمت ساندرا من قلب : انت .. انت .. انت شنو ؟؟
غمز البدر مره ثانيه بابتسامه : انا البدر
***************
السلام عليكم ورحمة الله .. شلونج ياللي ما اعرف اسمها حتى .. اتمنى انج بخير .. انا كتبت هالرساله بطلب منج انتي .. ما ادري بس حسيت اني محتاج اقول اللي بقلبي لشخص قريب مني .. انا ادري عدل انج بعيده بس بالوقت نفسه عندي شعور يقولي انج قريبه مني .. شلون ما ادري !!
سالتيني عن الخطبه وشلون خطبت فجاه ؟؟ والله ما ادري شاقولج او شلون ابتدي بالسالفه ؟؟ محد يدري بالشي هذا غير الوالد وغدير اختي .. اما الباقي عبالهم اني مستانس وانه هالخطبه صارت ابموافقتي .. اذا تبين الصراحه انا ما ابي اخطب هالانسانه .. الوالد اهو السبب بكل شي .. اهو اللي خطبها لي بالغصب .. وانا للاسف ما تجرات وعاندته .. غدير اتقولي هذا ابونا وانا اقول ان هذي حياتي وبالوقت نفسه ما ابي ازعل ابوي .. والمشكله الكبيره اللي مضايقتي ان هالبنت اللي خطبتها اهي الدانه بنت عمي .. بنت بسيطه وما فيها اي جمال او جاذبيه عشان اوافق عليها .. بعكسي انا .. لا اتحطين ابالج اني مغرور او شي من هالقبيل .. صدقيني هذا ما يسمونه غرور .. بس انا قلبي مو مع الدانه .. ومجرد التفكير انها بتكون مرتي بيوم من الايام يضايقني وهم يذبحني !! انا اتمنى اليوم قبل باجر ان كل شي يتكنسل وبسرعه .. ما تتصورين يا اسيرتي شكثر انا متضايق من هالخطبه .. انا لما ابوي قالي بخطبلك تضايقت بالبدايه بس تقبلت الشي وقلت له انا بختار بنفسي .. لكنه صدمني لما قالي انا اخترت لك الدانه بنت عمك .. وانا الصراحه مستعد اوافق على اي بنت لا الدانه !! مو عشان شي بس لان انا مو متقبلها بالمره !!
اتمنى اني ما طولت عليج برسالتي وهمي بس انتي سالتيني وانا جاوبتج من قلبي .. وانا ادري ان هالحجي ما بيب نتيجه بس نفسيا ارتحت ليش اني قلتلج اللي بقلبي ..
.:. وبعدها .:.
.:. قطت الرساله اللي بيدها بالارض وهي مصدومه ومو مستوعبه هالشي اللي قرته من توها !! الحلم الجميل اللي كان بيتحقق وبيبتدي للاسف مات وتبخر وبدا من بداله كابوس اسود مرير .. كابوس تغلب على كل احلامها الورديه .. انهارت الدانه وطاحت على ركبتها واهي تبجي بحرقه والم كبير .. من بعد ما كانت بطير من الوناسه الحين بتموت من التعاسه .. كانت تتمنى الموت بهاللحظه وتمت تلعن قبحها اللي اهو السبب بكل شي .:.
.:. كانت الرساله طايحه بجنبها وابتلت بالدموع .. حاولت تمسك الرساله وتشقها بس ما اقدرت تتحرك من مكانها وهي اتصيح ميته .. حاولت على كثر ما تقدر انها تتحرك وتكتب للبدر مسج .. قربت من الكمبيوتر واهي تشهق من البجي مثل الياهل .. تمالكت نفسها وكتبت للبدر مسج واهي ترتجف واتصيح بنهيار كبير .:.
.:. بعد ما تخلص البدر من ساندرا وفشلها ليمن اتعبت منه وراحت دخل البيت رايح لداره .. وبعدها بشويه ياله مسج من اسيرته .:.
البدر ( وهو يقرا المسج ) : ان شالله اللي تبيه بيصيير .. انت بس ادع لربك ان كل شي يتكنسل وانا هم بدعي معاك .. لان ما يجوز الوالد يغصبك على شي انت ما تبيه
.:. وبعدها .:.
تنهد البدر : امين ان شالله يتكنسل كل شي
.:. وبعد هالمسج قطت الدانه نفسها من الكرسي وهي اتصيح بنهيار .. بالم .. اتفكر شلون اتكنسل كل شي لخاطر البدر .. ما كانت مهمته لتعاستها على كثر ما كانت مهمته لسعادة البدر .. اهم شي عندها ان البدر يستانس بدنيته .:.
.:. باليوم التالي .:.
.:. كانت سلوى طول اليوم حابسه نفسها بالدار من بعد الموقف الحقير اللي صار من بينها وبين بوبدر ..وما كانت تبي اتشوف ويه غدير وهي اتشوفها بنظرات الحقد والشك .:.
شو ماليك يا سلوى هيك ؟؟ حابسه نفسيك بالدار ؟؟
ماكو شي يمه .. بس حاسه بشوية تعب
تخرعت داليا : شو يا حياتي ؟؟ شو اللي بتحسي فيه ؟؟
ابتسمت سلوى : قلتلج ماكو شي .. مجرد صداع بسيط وان شالله بيختفي
سالت داليا : شو رائيك انروح للطبيب ؟؟
سلوى: اشدعوه طبيب يمه ؟؟ قلتلج كلها مجرد صداع وما يحتاي لطبيب
داليا : وانتي دوم هيك ؟؟ بتعاندي وراسك ناشيف ؟؟
سلوى : مو اني عنيده وراسي ناشف مثل ما اتقولين بس ماله داعي للطبيب والله .. مافيني شي جايد لسمح الله
تنهدت داليا : براحتك
.:. وبعدها .:.
طل بوبدر للدار يسال : اشفيها الدلوعه حابسه نفسها بالدار ؟؟
تضايقت سلوى وسالت بقلبها : وانت هم لك عين تسال ؟؟
وبعدها قالت بضيق : سلامتك عمي ماكو شي .. مجرد صداع بسيط
ابتسم بوبدر : سلامتج حبيبتي
لفت سلوى عنه مستنكره : الله يسلمك
***************
.:. وابيت ساندرا .:.
كانت محترقه ومعصبه : هيدا البدر .. الحئيير .. انا كينيت باعرف انو شخصيتو اويا بس مو بالطريقه البشعه هيدي !!
جوزيف : اليك طولي بالك .. وما همك ايشي
ساندرا ( بعصبيه ) : وانتا هيدا اللي بتئدر عليه ؟؟ انتا ما شفتوا كيف هالحئيير كان بيتمسخر !!
جوزيف : وشو يعني باديك اياني اعمول ؟؟ انا لحالي بادي احكي مع امنه بس ما بئدير
ساندرا : وما بظنك بتئدر
استفهم جوزيف : وشو هو السبب ؟؟
ساندرا : امنه عالسنه الجايه بدها اتسافر لبنان للجامعه هونيك
انحبط جوزيف : وهيدا وئتوا هيا التانيه بتسافر هونيك ؟؟
سالت ساندرا : شو اللي بيعجبك بامنه ؟؟
جوزيف : ما باعريف
ساندرا : شوف جوزيف انا بنصحك تبتعد عن امنه .. ازا اخوها او ابوها او هيدا الحئيير بدر عرفوا بشي انت بتتازا كتير ومو بتنسى انك غريب عن هيدا البلد ومن جنسيه لبنانيه
تخرع جوزيف من هالكلام : اوليك هايك ؟؟
ساندرا : ايه والحال بيختلف بيني وبايناك .. انا صبيا وانت شاب .. يعني انسا امنه لانها ما بتنفعك !!
***************
انصدمت امها وسالت : انتي شقاعده اتقولين ؟؟ شقاعده اتخربطين ؟؟ من بعد ما عطيناهم الموافقه وحددنا معاهم موعد الملجه اتقولين الحين وبكل بساطه انج غيرتي رايج ومو موافقه ؟؟ اشفيج انتي مو صاحيه ؟؟ تبين تحرجينا مع الناس ؟؟ تبين تحرجين ابوج مع عمج ؟؟ تبين تحرجين البدر ؟؟
نطقت الدانه وهي اتصيح : يمه عفيه .. افهميني .. انا .. انا حسيت نفسي بلحظه اني ما ابي البدر !!
عصبت امها : افهمج على شنو ان شالله ؟؟ وشنو هالسخافه اللي اتقولينها ؟؟ توج بس حاسه انج ما تبين البدر ؟؟ وليش بالله ما قلتي هالحجي بيوم الخطبه ؟؟
جاوبت وهي ليمن الحين اتصيح : استخرت كذا مره وحسيت نفسي مو مرتاحه .. وبعدين عادي ما فيها شي لو غيرت رايي تونا ما ملجنا وما استوه شي عشان تنحرجون معاهم
ام الدانه : مو على كيفج يا ابنيه اتقولين لنا هالحجي الحين !! الملجه بعد يومين وماكو امل اتغيرين رايج وبكل هالبساطه .. فيستحسن انج تتعوذين من ابليس وتنسين هالحجي اللي قلتيه من توه .. فاهمه ؟؟
دانه ( تترجى ) : عفيييه يا يمه لا تغصبيني على شي انا ما ابيه .. الله ما يرضى بالشي هذا !!
ام دانه ( معانده ) : قلتلج تعوذي من ابليس وانسي هالحجي اللي قلتيه من توه .. ما تفهمين انتي ؟؟
دانه : بس انا ما ابيه .. ما ابي البدر
ام دانه : بس اهو يبيج ومتمسك فيج وياي بنفسه مع ابوه عشان يخطبج !! انتي على شنو شايفه نفسج ؟؟ هالبدر ما شالله عليه بدر بالسما .. ما يحصلج واحد مثله وانتي تبين تكنسلين كل شي ؟؟ مينونه انتي ؟؟
ماتت الدانه من البجي : بس انتي مو فاهمه شي يا يمه .. مو فاهمه شي .. ريحيني وقوليلي تم .. الله يخليج يا يمه
عصبت امها اكثر : لا تم ولا بطيخ .. انا قلت ماكو يعني ماكو .. للمره المليون اقولج تعوذي يا ابنيه من ابليس !!
.:. وبعدها .:.
دخل ابوها يستفسر : اشفيكم ؟؟ عسى ما شر ؟؟ شنو هالصوت العالي هذا ؟؟
والتفت للدانه يسال : وشفيج يا ابنيتي تبجين ؟؟
.:. قربت الدانه من ابوها ميته بجي وامسكت ايدينه وباستها وهي منهاره .. وهو مو فاهم شي .:.
دانه : عفيييه يبه .. عشاني انا .. كنسل الملجه وكل شي .. الله يخليك يا يبه .. عفيييه افهمني .. انا ما ابي البدر .. ما ابيه
استغرب ابوها : ليش ؟؟ وشصار ؟؟ وشسالفه ؟؟
دانه : انا استخرت اكثر من مره وما ارتحت للبدر .. ادري انه ولد عمي ومن لحمي ودمي بس كل شي بالدنيا قسمه ونصيب وانا وبعد ما فكرت وايييد حسيت اني ما ابيه .. ما ابي البدر يا يبه .. ما ابيه
تعجب ابوها : وهذا كلام اتقولينه لنا الحين ؟؟ بعد ما اتفقنا على الملجه ؟؟
دانه : انا ادري اني غلطتت بس لو اتحبني يا يبه كنسل الملجه .. الله يخليك افهمني وما ابيك اتعاند نفس ما سوت امي
تليقفت امها : وانا شسويت بالله ؟؟ مو هذا كله عشانج وعشان مصلحتج وانتي وين بتحصلين واحد احسن من البدر ؟؟ ها ؟؟
صرخت الدانه بنهيار : بس انا ما ابيه .. ما ابيييييه
وبعدها مسك ابوها ايدها : ان شالله يا ابنيتي .. اللي تبينه ان شالله بيصير .. وانا بكلم عمج الحين وبعتذر له
عصبت ام دانه : انت شقاعد اتقول يا جاسم ؟؟ تبي اتفشلنا مع الناس ؟؟
بو دانه : كل شي قسمه ونصيب واكيد اخوي والبدر بيتفهمون هالشي
ام دانه : بس احنا عطيناهم كلمه !!
بو دانه : ليما الحين ما استو شي ولا ملجنا عشان نتحسر على شي ليمن الحين ما استوه .. وبعدين هذي حياة الدانه واهي اللي اتقررها وما نقدر نغصبها على شي اهي ما تبيه ومثل ما قلتلج كل شي قسمه ونصيب وما اعتقد ان البدر بيزعل من هالشي وهو متفهم
.:. وبعدها سكتت ام دانه منبطه جبدها على الدانه وعلى الشي اللي سوته .. اما بالنسبه لدانه استانست ورتاحت بعد ما وافق ابوها انه يكنسل كل شي وبالوقت نفسه كانت دمعتها على خدها ليش ان حبيبها البدر ما يبيها .:.
***************
وليش بالله ؟؟ انا مو مينون او متخلف عشان يشوفني طبيب نفساني !!
ام فواز ( تحاول تقنعه ) : فواز يمه .. ومنو قالك ان الطبيب النفساني للميانين والمتخلفين بس ؟؟ انا بس ابي اتاكد من انك بخير
ما اقتنع فواز: انا بخير والحمدلله وما فيني شي .. واكاهو جدامج سليم واذا تبين ابوسج عشان تتاكدين هم ما عندي مانع يا حبيبتي انتي
تيننت امه : رجعنا حق حبيبتي والبوس وهالخرابيط ؟؟
سال فواز : وشفيها يعني ؟؟ حرام اقول حق امي حبيبتي وبعطيج بوسه ؟؟ والله ان امرج عجيب يا يمه
ام فواز : انت اللي امرك عجيب .. منو هالولد المتخلف اللي يحب امه ويبي يتزوجها ؟؟ تبي اتينني انت ها ؟؟
ابتسم فواز : ما فيها شي .. واييد اتصير بالدول الاجنبيه
ام فواز:احلف عاد ؟؟ باي قاموس هذا ؟؟ محد يسوي هالشي غير المتخلفين عقليا
الحلقة 14 .:.
عسى ما شر ؟؟ ليش يا بودانه ؟؟ شنو هو سبب هالرفض المفاجئ ؟؟ البدر كلمكم ؟؟ قالكم شي ؟؟
بودانه : لا والله حشى .. لا كلمنا ولا قالنا شي .. بس الدانه تقول لانها استخارت كذا مره وما ارتاحت
بوبدر ( بضيق ) : شنو هالكلام هذا يا بودانه ؟؟ بس البدر يبيها
بودانه : والله ما ادري شاقولك .. كل اللي اقدر اقوله الحين ان كل شي قسمه ونصيب
تنهد بوبدر : معاك حق
بودانه : سامحنا عاد وانا اخوك .. لا تتضايق
بوبدر : مسموحه ان شالله .. وعلى قولتك كل شي قسمه ونصيب
.:. وبسرعه سكر بوبدر من بوالدانه التليفون .. وبسرعه راح لدار بدر وهو معصب حده .:.
فتح عليه الباب بقوه : ما اتقولي انت شقايل للدانه يا الثور ؟؟
.:. تخرع البدر اللي كان توه طالع من الحمام والفوطه بجسمه .:.
وسال مستفهم : شسالفه ؟؟ وشقايل للدانه ؟؟
بوبدر : بدور لا تستهبل معاي وقولي ان شقايل للدانه بنت عمك جاسم ؟؟ عشان تكنسل الملجه ؟؟
استانس بدر وتشقق : يبه انت من صجك ؟؟ الدانه كنسلت الملجه ؟؟
عصب بوبدر : اي كنسلت الملجه .. وبعدين اشفيك مستانس وهم متشقق ؟ ما تقولي انت شقايل للبنت ؟؟
بدر : والله اني ما قلتلها شي .. ومن الاساس ما عندي رقمها
سال ابوه : عيل ليش كنسلت الملجه ؟؟ شنو السبب اللي خلاها اتكنسل الملجه ؟؟ قولي شنو السبب ؟؟
رد البدر مستغرب : انا بروحي ما اعرف السبب ومستغرب مثلك
تنهد بوبدر : حسبي الله عليك من ولد
تعجب بدر : وانا شكو الحين عشان ادعي علي ؟؟
بوبدر : لانك نحس يا بو ويه النحس .. حتى البنت الجيكره ارفضتك وما تبيك
تشقق البدر : اهي الخسرانه
.:. سعادته كانت ما تنوصف .. واخيرا الهم والكابوس المرير انزاح منه .. وبسرعه مسك كرت من الكروت الملونه اللي اشتراها من المكتبه وكتب لاسيرته رساله .:.
البدر ( وهو يكتب ) : واخيرا يا بنت الناس الهم اللي كان كاتم بقلبي مات .. بنت عمي الدانه كنسلت الملجه
.:. وبسرعه بدل ونشف شعره من الماي .. ولبس ثوبه .. وركب المرسيدس .. مسكينه الكروزر هجرها Lol .. ركب المرسيدس رايح للمكتبه عشان يقط هالرساله .:.
وقال لنفسه : ان شالله ما يذلني محدين مره ثانيه
***************
.:. ابدار سلوى .:.
.:. كانت اتفكر بخليفه وعلاقته بساندرا .. ما استحملت هالتفكير ومسكت موبايلها واتصلت لساندرا مصره انها ما اتسكر منها الا واهي عارفه شنو بينهم .:.
.:. كانت ساندرا منسدحه عالسرير وهي ليما الحين متنرفزه على اسلوب البدر معاها .:.
.:. وبعدها .:.
.:. رن موبايلها وشافت ساندرا منو المتصل وردتت .:.
ساندرا : هلا سلوى
سلوى : اهلين .. شلونج ساندرا ؟ ان شالله بخير ؟؟
ساندرا : امنيحا .. نشكر الله
سلوى : ساندرا .. انا متصلتلج عشان اسالج عن شي
ساندرا ( تسال ) : شو ؟؟
سلوى ( بتردد ) : شفتي لما شفتج مع خليفه بالمول من كم يوم ؟؟
ساندرا : ايه
سلوى : بغيت اسالج شنو هو الشي اللي بينج وبين خليفه ؟؟ اكو علاقه من بينكم ؟؟
استغربت ساندرا : ولشنو هيدا السؤال ؟؟
سلوى : ماكو .. بس تقدرين اتسمينه فضول
ساندرا ( بخبث ) : يعني انتي ما بتاعريفي ان خليفه خطيبي ؟؟
انصدمت سلوى : خطيبج ؟؟
ساندرا : ايه خطيبي .. وشو ماليك هايك مو مسدئا ؟؟
سكتت سلوى لثانيه وبعدها سالت : بس نجلا ونور او حتى ام خليفه ما قالت لنا عن هالخطبه ؟؟
ساندرا : هيدا الشي سر بيني وباين خليفه
سالت سلوى : يعني انتوا الاثنين اتحبون بعض ؟؟
ساندرا : شور
تنهدت سلوى بحزن : الله يوفقكم ان شالله
.:. وبعد ما سكرت منها الخط .. حطت راسها عالمخده ودمعت عيونها الم من اللي سمعته من توها .:.
سلوى ( بحزن والم كبير ) : اه يا خليفه .. انا حبيتك وانت حبيت رفيجتي !! مشكلتي ما قدرت اقولك اني احبك مثل ما قدرت ساندرا .. عاداتنا ما اسمحتلي بالشي هذا على امل انك تخطبني بيوم من الايام .. والحين شنو الفايده وانت خاطب ساندرا وتحبها !!
.:. وصل البدر المكتبه ولما دخل ابتسم له محدين .. وكانه يقوله ابي مية ريال ثانيه .. طالع البدر ويه محدين المبتسم اللي ابد ما يبشر بالخير .:.
بدر : هلا محدين .. شلونك ؟؟
محدين : الحمدلله .. انا يشوف ويه مال انته انا يصير تمام
ضحك البدر : ايا العيار .. مو عشاني عشان الفلوس
ابتسم محدين : ما في شي الحين يمشي بدون فلوس
بدر : شوف بقولك .. ابيك تاخذ هالكرت وتخليه عندك لين ما اتيي البنت المكتبه وتعطيها اياه حلو ؟؟ وبعطيك من بدل الميه 500 بس بشرط
تشقق محدين وناسه : انته امر امر .. شنو هذا شرط ؟؟
بدر : ابعطيك رقم موبايلي وابيك لما اتشوف هالبنت يايه للمكتبه بسرعه تتصلي عشان انا هم ابيي .. حلو ؟؟
محدين : بس تليفون انا ماكو رصيد
بدر : لا تخاف يا البخيل .. بشترلك رصيد وفوقهم 500 ريال لو انا شفت البنت .. ها حلو ؟؟
استانس محدين : حلو
***************
خليفه .. تعال يمه ابيك ابموضوع شويه
سال خليفه : هلا يمه .. امري ؟؟
ابتسمت امه : ما يامر عليك عدو .. بس انا ابيك بموضوع الخطبه
ما فهم شي : الخطبه ؟؟ اي خطبه ؟؟
ام خليفه : سلامتك يا يمه .. انا بس كنت افكر اخطبلك ما دامك كنت اتحن علي من كم يوم بسبب هاللبنانيه .. قلت ادور لك بنت الحلال واخطبلك اياها .. ها شرايك ؟؟
.:. سكت خليفه شويه وبعدها ابتسم .:.
خليفه ( يسال ) : اللي اتشوفينه يا يمه .. بس ما قلتيلي منو هالبنت اللي حاطه عيونج عليها ؟؟
امه ( بابتسامه ) : غدير بنت عمك بوبدر .. ما شالله عليها بنت حلوه طيبه وهم خلوقه .. ها شرايك ؟؟
.:. سكت خليفه وقعد يفكر بكلام امه .:.
سالت امه : اشفيك سكت ؟؟ ترا هالخطبه مو غصب يا يمه .. انا بس اقترحت عليك هالشي .. وانت مو مجبور من انك اتوافق .. واذا ما تبيها ادور لك على غيرها
ابتسم خليفه : بالعكس يمه .. انا سكت لاني كنت افكر بكلامج .. وبما انج اخترتي غدير ليش لا ؟؟ وانا هم اشوفها مثل ما انتي اتشوفينها
استانست امه : يعني خلاص ؟؟ اقول حق ابوك يخطبها من عمك ؟؟
خليفه : توكلي عالله وقولي حق ابوي .. انا ما عندي اي مانع وغدير بنت عمي والنعم فيها = )
***************
.:. بعد اقناع دام ساعتين تقريبا اخيرا اقتنع فواز انه يروح مع امه لطبيب نفساني .. امه كانت جديه بالسالفه والشيخ فواز ماخذ الامور ببساطه وكان قاعد يلعب لعبة الدكتور .:.
.:. بيوم الموعد .:.
.:. يعني بعد يومين .. فواز ويه امه كانوا قاعدين ينتظرون الدور ليمن يدخلون عالطبيب .:.
فواز ( يسال ) : اقول يمه .. شسمه هالطبيب هذا ؟؟ وشنو جنسيته ؟؟
ام فواز : اسمه حنفي وهو مصري
فواز ( ابعبط ) : اها .. اسمعه يذكرني بحنفية الماي
وبعدها سال : انزين هالطبيب شكله حلو ؟؟
استغربت امه : وانت اشتبي ابشكله ؟؟ ابتخطبه للميا يعني ؟؟
فواز : امم .. الشكل موهم .. شلون تبيني اسولف مع واحد جيكر وانا وسيم ؟؟
تنهدت امه : والله ما ادري عنه لو كان جيكر او وسيم .. انتظر دقايق ليمن دورنا وانشوف شكله
.:. وبعدها بشويه .:.
ظهر الرقم بالجهاز : الرقم 12غرفة 22
نقز فواز : ياهوو دورنا
ام فواز : اشفيك انت ؟؟ مو شايف خير ؟؟ فشلتنا ؟؟ من كم يوم كنت رافض انك اتيي للطبيب والحين مستانس
فواز ( بابتسامه ) : انا بس متشوق ابي اشوف شكل الطبيب
.:. وبعدها دخل فواز ومعاه امه للطبيب .. قعد فواز بكرسي مجابل الطبيب .:.
شاف فواز ملامح الطبيب وقال : اممم مو وسيم بس مو جيكر
ما فهم الطبيب شي : انته بتؤل ايه ؟؟
ابتسم فواز : سلامتك بس كنت اشوف ملامحك المصريه
هم ما فهم شي وسال : ايييه ؟؟
تدخلت امه وهي تشوف فواز بعصبيه يعني انجب واسكت : ما عليك منه يا دكتور اهو يخربط بس .. خبرك مينون
عصب فواز : يمه انا مو مينون
الطبيب : احنا ما اولناش حاجه دلوئتي .. انا حسألك كم سؤال وعاوز منك الجواب .. بتتعاون معايا ؟؟
تذمر فواز : شكلنا مطولين يعني ؟؟
الطبيب : هوا على حسب حالتك
استسلم فواز للامر :ok شنو هالاسئله ؟؟
***************
والله هذي الساعه المباركه يا بوخليفه .. وغدير ابنيتكم وما اعتقد بتحصل احسن من ولدك خليفه
بوخليفه : تسلملي والله .. بس هم لازم اتشاور البيت وتاخذ رايها بالاول .. مو يمكن يكون لها رايي ثاني لسمح الله
بوبدر : شي اكيد بسالها وان شالله اتوافق .. والله ان خليفه خوش ريال وما ينرد
بوخليفه : خلاص عيل انت شاور البنت ورد علي
بوبدر : على خير ان شالله
.:. وبعدها سكر بوبدر من اخوه وراح لدار غدير عشان ياخذ رايها بالخطبه .. كانت غدير قاعده تقرا مجلات والا سمعت ابوها يسال من ورا الباب .:.
بوبدر : غدور حبيبتي .. مشغوله ؟؟
غدير : هلا يبه .. حياك بالدار .. ابد مو مشغوله
.:. وبعدها دخل بوبدر الدار .:.
استفسرت غدير : خير يبه ؟؟ بغيت شي ؟؟ اذا على سالفة سلوى يوم شفتك معاها فمو مهم لاني نسيت هالشي
ابتسم ابوها : الحين شكو هذا بذاك ؟؟
استفهمت غدير : عيل شسالفه ؟؟
سال بوبدر : يعني لازم اتكون هناك سالفه عشان اكلمج ؟؟
غدير : انا ما قلت جذي بس اممم انا حاسه ان اكو شي
بوبدر : اهو اي اكو شي .. او تقدرين اتقولين ابي اخذ رايج بشي واتمنى انج اتوافقين عليه لانه وبكل صراحه شي ما ينرد والله
سالت غدير مستفهمه : اللي اهو ؟؟
***************
***************
شنو هالاسئله السخيفه ؟؟ ما هو الشي الذي تحبه ؟؟ هلالعائله تعاملونك جيدا ؟؟ هل تحب القراءه والنت ؟؟ كم ساعه تحب ان تنام باليوم ؟؟ ما هو الشي الذي تتمناه ؟؟ ما هو شرابك المفضل ؟؟شنو هذا ؟؟ ها ؟؟
رد الطبيب عليه : وانته مالك ؟؟ انته ما عليك الا انك بتجاوب عالاسئله
سال فواز : انت متاكد انك طبيب ؟؟
تعجب الطبيب : اومال ايه ؟؟
تليقفت ام فواز : فواز يمه عيب عليك والله .. انت بس جاوب عالاسئله اللي بالورقه وخلصنا
تذمر فواز : احسه امتحان صف اول ابتدائي والله
ام فواز : معليش يمه .. استحمل عشاني انا
تنهد فواز : ok
***************
ما استوعبت غدير : شنو ؟؟ خليفه ولد عمي خاطبني انا ؟؟
بوبدر : اي والله .. وتوه عمج مسكر مني .. وانا اسالج الحين ها اشرايج ؟؟
.:. سكتت غدير .:.
سال ابوها : اشفيج شكتي ؟؟ افهم من سكوتج انج موافقه يعني ؟؟
.:. وبعدها .:.
غدير ( تسال ) : يبه انت متاكد ان خليفه مو مغصوب علي ؟؟
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك