رواية علميهم ليه احبك حب ما حبه بشر -48
ماجد : وعع الله يقرفك .. اسكت لو سمحت مالي خلق لا احكي ولا اسمع حكي ..
بندر : طيب سكتنا .. صار بندر يقلب بالملفات اللي بيده ويقرا فيها .. شوي وسمع
ماجد: الووووووووو .. هلا والله بالغااااااااااااليه
بندر رفع عينه لماجد .. هذا اللي توه ماله خلق لا يحكي ولا شي .. قام يسولف على الجوال ..
ماجد: هلا حبيبتي .. اي .. لاااااا انا اليوم جايكم عالغدا ان شاء الله .. اي اي ولا يهمك مارح اتأخر .. طيب طيب .. يللا مع السلامه
بندر : اولا كيف تقول لك انو مالك خلق لا تحكي مع احد او تسمع حكي وترد وتسولف قدامي وانت ما صار لك دقيقتين مسكتني ؟ وثانيا على وين يا مهون ومن قال لك اصلا اني بخليك تطلع من العياده ؟
ماجد: معليش عاد هذي رنيم بروح اتغدا عندهم اليوم
بندر: ياشيخ والله لو كان المتصل الملكه ايليزابيث العاشره منت رايح ومخليني اكرف بذا العياده لحالي .. ياما تغاضيت عن هالتسيب اللي انت مسببه على حس زوجتك المصون ولا وبعد انت ووجهك ياليته نافع معك
ليومك وانت تحاول تسترجع حب رنيم لك ..وبدون فايده
ماجد وقف وفصخ البالطو الابيض وحط السماعات على جمب: خلصت محاضرتك انت ووجهك ؟؟
بندر: اي خلصلت
ماجد : اجل فمان الله
بندر بصراخ: ماجد يالثور .. احكي عربي انا منت متحرك من هنا
ماجد : عاد وش اسوي لك انا رايح لها بالطيب او بالغصب احسن لك خلك راضي عشان ماتزعل مني ..
بندر : اقول انا
ماجد قاطعه : باااااااااااااي .. وسكر الباب وراه
بندر يناظر الباب مصدوم : الحيوان سواها وطلع وخلاني لحالي
ماجد صار يمشي بالسيب وهو يدندن ومتحمس يروح لرنيم .. الود وده يطير لها وبثواني يكون عندها .. خلاص اليوم قرر انه يقول لها انو لازم يحددون موعد زواجهم قريب لانو صار لهم حوالي السنه مملكين وهو بدا يحبها من جد ولا يتخيل حياته بدونها
خبط بالسيب بوحده بقوة وطاح منها بوكيه الورد اللي هي كانت شايلته
ماجد شال البوكيه وناوله البنت : اسف ..
البنت المتلثمه وعينها بعين ماجد : لا عادي
ماجد ركز نظره على عيونها شوي ..حس انه مشبه عليها : عن اذنك
البنت : اذنك معك ..
ماجد كمل طريقه لباب المستشفى .. رايح يقابل حبيبته
اما البنت ابتسمت على شفايفها ابتسامة .. هي وحدها تعرف معناها
بيت احمد
احمد: اسمعي انا بطلع الحين انتبهي على امي
شذى ابتسمت بهدوء .. عمره ما اهتم لها ولا للي ببطنها: ان شاء الله
احمد: وكالعاده مابي ..
قاطعته: ادري .. ماتبيني انام قبل لا ترجع .. اوامر ثانيه ؟
احمد بهدوء:لا مابي شي بس وخري عن وجهي ..وطلع
شذى راحت لغرفتها عشان ترتاح شوي ..لانو فرصتها الوحيده بالراحه لما يطلع احمد من البيت ..لانو طول ماهو بالبيت وهو ذابحها بطلباته وطلبات امه .. اللي حتى لو ماكان لامه طلبات هو يتأمر على شذى على حس امه .. سوي لامي وافعلي لامي
وقفت قدام التسريحه شوي وتأملت وجهها .. الحمل غيرها شوي بس خلاها سمينه حبتين .. ضحكت على خدودها اللي تحسها تكبر كل يوم
فجأة حطت يدها على بطنها من الم رفسة البيبي لها
شذى: هههههههههه من الحين بديت ترفس ..شكلك غاوي نكد وعسر ويدك طويله مثل ابوك هههههههه
رفعت شعرها الاسود الطويل ولبست لها بجامه مريحه
وانسدحت على السرير .. عدى الوقت وبدت تتقلب
حاولت تنام مره واثنين وثلاث
بس النوم عيا يجيها ..
قرت المعوذات وغمضت عيونها .. وطرا على بالها ذكرى حلوة خلتها تبتسم
بـــــــــــــــــــــــــــــــدر
كلما ذكرت هالانسان تبتسم غصب عنها حتى لو الدنيا صاكه فيها
وش حالك الحين يابدر ؟
غمضت عيونها وهي تمسح دمعتها .. تحاول تنام بس خيال بدر يلاحقها
بيت ابوبندر
بدر: اففففففففففففففففف قلت لك ماهو وقته ..
مشاعل: وش اللي ماهو وقته .. انا قلت لك وديني ؟ انا قلت لك بروح بيت عمتي وبرجع ..واساسا احمد ربك اني عطيتك خبر تراه ماهو من عادتي اني احكي عن اللي ناوية اسويه
بدر: احلفي انتي بس !! انا زوجك ومن حقي انو يكون عندي خبر قبل ما تطلعين .. انا بحياتي ما منعتك عن شي واعاملك كويس يعني لو سمحتي عامليني بالمثل
مشاعل تناظره بنص عين: تعاملني كويس لكن ماتحبني
بدر انصدم من كلامها وانربط لسانه
مشاعل : اي وش فيك سكت ..
بدر: ممكن اعرف مناسبة الكلام هذا ؟
مشاعل حاقده عليه مره لانه مهملها وهي ماهي متعوده تكون مهمله من احد .. قعد على الكنبه وحطت رجل على رجل : والله مدري عنك .. هذا الظاهر .. بس شكلك مارح تبدا تحبني الا لما ..
بدر يناظرها: لما ايش ؟
مشاعل : لما تنسى شي .. الشي اللي مستحيل يتحقق لك
بدر: ممكن تبطلين حكي بالالغار ؟
مشاعل : تشطر عاد وافهمها .. حاجه تهمك مررره .. امممم شي صار لك قبل 4 او 5 سنين
بدر ماهو مستوعب
مشاعل ابتسمت وقامت لبست عبايتها واخذت شنطتها بيدها وباسته على خده : يللا باي .. وطلعت
بدر سكت .. ايش قصدها بهالكلام هذا ؟!!!
بيت ام عبدالله
ام عبدالله قاعده تلعب حفيدها سعود وتسولف مع امل زوجة ولدها عبدالله
امل: خالتي وش رايك نروح السوق ؟
ام عبدالله : ومتى ؟ الحين ؟
امل: اي الحين وش ورانا .. في كذا شغله ودي اشتريها ومنها نغير جو انتي صار لك فتره ماطلعتي من البيت
ام عبدالله مهمومه : والله مدري وش اللي جاني يابنتي ... مالي خلق ولا شي
امل: عشان كذا انا اقول لك خلينا نطلع شوي نغير جو
ام عبدالله : طيب .. ونادت على الخدامه عشان تجيب لها عبابتها وشنطتها
ام عبدالله : ها يا امل نمشي ؟
امل: يللا
ام عبدالله وقفت بنص الصاله وهي شايفه اللي داخله عليهم
مشاعل: السلام عليكم
ام عبدالله كشرت على الخفيف: وعليكم السلام هلا والله مشاعل
مشاعل قربت من عمتها وسلمت عليها .. وسلمت على امل من بعيد حتى ماكلفت على خاطرها تمد لها يدها
ام عبدالله : منوره .. شلون الوالده الحين ؟
مشاعل: والله على حسب كلام رنيم انها بخير
ام عبدالله : ليش انتي مارحتي لها من متى؟
مشاعل بلا مبالاة: اممم والله ما اذكر بس من فتره
ام عبدالله : الله يصلحك بس .. البيت بيتك عالعموم انا بطلع مع امل الحين .. تفضلي جوه مها فوق
مشاعل وانا وش ابي ببنتك البثره : ان شاء الله
طلعت ام عبدالله مع امل
امل: وش جابها فجأة .. وش الطاري وهي مانورت البيت من سنين وبنين
ام عبدالله: والله مدري عنها .. انا ما احب هالبنت مع انها بنت اخوي من يوم يومها وانا ما ابلعها ولا تعجبني تصرفاتها ابدا
اما مشاعل اول ما توسطت الفيلا راحت للمغاسل تشيك على لبسها وشكلها وشالت عبايتها وعطتها للخدامه اللي وراها
فكرت انها تنتظر تحت لين ماينزل خالد كالعاده .. قعدت
الخدامه: مس مشاعل تشربين شي ؟
مشاعل وهي ما ناظرت فيها حتى: مابي شي انقلعي عن وجهي
انتظرت
وانتظرت
وانتظرت
تنهدت بملل : هذا شكله ماهو ناوي ينزل .. احسن شي انا اطلع له
رقت فوق وصوت كعبها يرن بالبلاط .. مسموع بالفيلا كلها
وصلت لغرفته وطقت الباب اكثر من مره ولا لقت اجابه .. وينه ذا
افففففففففف لايكون طالع كان تكون جيتي على الفاضي
قررت تروح لغرفة مها تسلم عليها وتقعد معها ربع ساعه عشان لو قالت لها عمتها انو مشاعل كانت موجوده بالبيت ولا عدت على مها تسلم عليها بتحس انو في حاجه غلط خصوصا انها على اساس جايه لمها
تأففت : الحين بضطر اقابل ثقيلة الدم السخيفه مها ..
جت بتطق الباب بس سمعت صوت من جوه خلى قلبها يزيد نبضاته
مها: ياخي انت ما تفهمممممممم !!! ابي اذاكر
خالد: المذاكره لاحقه عليها يالدافوره .. قومي اوديك لها
مها: عندي امتحان بكره ومارح اطلع لها الا بعد العشا بروح لها ساعتين وارجع البيت ..ممكن تفارقني الحين ؟
خالد: مارح افارقك الا وانا موديك لها
مها: ليش توديني عندنا عجز سيارات وسواويق يعني ؟
خالد : مها .. ابي اتطمن عليها .. قلبي يعورني وربي على حالها
مها ترمي كتابها على جمب: اففففففف خالد ما نسيت الله يهديك .. البنت تراها على ذمة رجال ومايجوز اللي تسويه بأبنك تفكر فيها
خالد عصب: الرجال هذا اللي تحكين عنه شي واطي .. ولا يعرف قيمتها .. ورب الكون انه جاهل ولا عرف يثمنها ولا يعرف هو وش مالك .. لكن بعون الله رح يطلقها ورح اخذها واعوضها عن اللي راح
مها سكتت ..تعاطفت مع اخوها مره.. كل يوم يزيد حب ريما بقلبه زياده
وكأنه هو الشي الوحيد اللي عايش عشانه
مها: لهالدرجه تحب ريما يا خالد ؟
خالد تنهد وسكت : .............. ياليت هالكلمه بس تقدر تعبر لو عن ربع اللي بقلبي لها .. انا عايش عشان اهواها
مها سكتت شوي ..
مها: طيب يللا انا بجهز عشان توديني لها
خالد نقز من مكانه وباس راسها: عساني ما انحرم منك يارب .. وكالعاده طمنيني عليها
مها : اوكي ..
خالد : الحين انا بنتظرك تحت لين ما تخلصين .. لا تتأخرين عشان ما تتأخرين عليها
مها : طيب اطلع اشوف ولا تصجني لا اوريك الشغل
خالد بابتسامه رووووعه : ولا يهمك ..
طبعا هذا كله سمعته مشاعل من ورا الباب
بغت تموت الا شوي
يعني اللي يحبها خالد هي ريما
ريــــــــــما المعقده .. ريما هي اللي ماخذه قلبه
وماخذته مني
طيب شلون .. ومتى ؟؟
وانا وش مكاني ؟ ليش هي مو انا
انا احلى منها .. انا اجمل منها
ومع هذا كله ذايب فيها
نزلت منها دموع القهرررر .. صارت تحرقها
وتحس كمان انو في شي داخلها قاعد يحترق
اول مره تحس انها شي ماله داعي بالوجود ..
يوم قال لها خالد انه يحب ما انقهرت هالكثر .. بس يوم درت انها ريما وكأن اعصار قاعد يدمرها من جوه ..
ليييييييييييش اكره انسانه لي بالحياة تكون حبيبة حبيبي
اللي ماخذته مني
اخت زوجي الكلبه هي حبيبة حبيبي
زوجي ؟؟ هو اللي ماعبرته ولا جبت خبره على حس حبي لخالد
صحت من افكارها على صوت باب مها اللي انفتح .. ركضت مشاعل وتخبت باقرب الغرف الفاضيه
صارت تراقب خالد وهو يمشي بالممر وعلى شفايفه احلى ابتسامه شافتها
كل هذا عشان حبيبة القلب ؟ هذا وهو بيعرف اخبارها بس ومبسوط كذا شلون عاد لو شافها وصارت زوجته
يبيها تتطلق من زوجها عشان يتزوجها
مسحت دموعها بقوة ..مارح تسمح لنفسها انها تبكي ابدا
لازم تفكر بحل .. مارح تسمح بالهشي انه يصير
نزلت تحت بسرعه وطلعت من الباب الخلفي للفيلا قبل لحد يشوفها
ركبت السياره وهي تفكر بحل للمصيبه اللي حلت على راسها
بيت ام عبدالرحمن
ام زياد كانت قاعده بالصاله كالعاده مع ام عبدالرحمن اللي ابدا معد صارت طايقه وجودها .. واثير اللي كانت تشرب شاهي وتتفرج على التلفزيون
ام عبدالرحمن: انا مسوية كيك بروح اقطعه و اجيبه
ام زياد : خذي وقتك
ام زياد التفتت على اثير: اثير حبيبتي
اثير التفتت لها: هلا
ام زياد: انتي منتي ناوية ترجعين لزوجك؟
اثير انصدمت من السالفه ماتوقعت بيوم انو ام زياد بتحاكيها بشي خاص زي كذا
اثير: ليش؟
ام زياد: بصراحه يابنتي انتي تعرفين انا وش قد احبك واخاف عليك وابي مصلحتك ..
اثير سكتت تنتظرها تكمل كلام
ام زياد : وكل همي بهالدنيا اني اشوفك مبسوطه .. عشان كذا انا اقترح عليك انك تطلبين من مشعل يطلقك عشان تشوفين طريقك ونصيبك مع غيره
اثير صدمتها بدت تزيد
ام زياد: انتي الف من يتمناك ويتمنى لك الرضا ترضين .. وانتي توك صغيره وحلوة والعمر قدامك .. مايصير تقعدين كذا ببيت اهلك بالشهور وانتي معلقه متزوجه ولا انتي متزوجه
اثير الصدمه شلت لسانها ولا عرفت تحكي ولا حتى ترد او تعلق
ام زياد: اسمعيها مني يابنتي واطلبي الطلاق من مشعل ولد ابراهيم .. وانا رح ازوجك شيخ الرجال .. ولدي زياد
اثير من الصدمه طاح منها الكوب وانكسر
ام زياد: ايش فيك يابنتي بسم الله عليك
اثير: خالتي وش قاعده تقولين .. هذا زوجي كيف تطلبين مني ابتعد عنه
ام زياد: زوجك ما سأل فيك ولا جاب لك خبر .. راميك عند اهلك بالشهور ولاهو سائل فيكي .. شوفي ولدي رح يموووت عليك ورافض الزواج عشانك ومسوي المستحيل واللي مايتسوى عشانك
اثير انصدمت: ايش ؟ زياد !!! وكمان مسوي اللي ما يتسوى عشاني ,. خالتي انتي صار لك شي ؟؟ زياد مثل اخوي متربين سوا
ام زياد: بس هو يحبك اكثر من حبه لخواته .. وعمره ما اعتبرك اخت له
..........: اثير لمشعل ومشعل لاثير طال الزمن ولا قصر يا ام زياد
التفتت اثير لمصدر الصوت ولقتها ام مشعل
اثير راحت لام مشعل وضمتها بقوة .. مشتاقة لها موووت ولا شافتها من زمان مره ..سلمت عليها بحراره
ام مشعل : شلونك حبيبتي ؟
اثير وهي تدمع : بخير الله يسلمك
ام مشعل تبوس راسها : ياحبي لك .. حبيبتي خليني شوي مع ام زياد ابي اكلمها
اثير هزت راسها ومشت ..
ام مشعل: الحين ممكن افهم وش هذا اللي انتي قاعده تقولينه لاثير
ام زياد: وش قلت ؟
ام مشعل: كل هذا الكلام وتقولين وش قلت .. مستفرده بالبنت وقاعده تخربينها على زوجها وتقولين لها تطلب منه الطلاق عشان تزوجينها ولدك
ام زياد: والله ياحبيبتي ولدك ماهو مقدرها ولا عارف ثمنها .. وراميها عند اهلها بالايام والشهور ولا هو سائل فيها حتى هذا ماهو كلام
ام مشعل: يعني الكلام اللي انتي قاعده تقولينه .. انا اساسا جايه ارجع اثير لزوجها
ام زياد : هذا اذا وافقت لك امها
دخلت ام عبدالرحمن: وش فيكم وش صاير .. وانصدمت يوم شافت ام مشعل
ام عبدالرحمن: نوره .. هلا والله نورتي
ام مشعل تسلم عليها: هذا نورك حبيبتي .. انا جايه ارجع اثير يام عبدالرحمن
ام عبدالرحمن سكتت لانو مو عاجبها وضع اثير مع زوجها ابدا
ام عبدالرحمن:وفين مشعل ما جا معك ؟
ام مشعل بحزن: مشعل تعبان مرره ياعمري ولاهو قادر يجي ولا يطلع من غرفته والتعب زايد عليه الايام هذي .. قال لي اروح اجيب اثير بالنيابه عنه لانه يرتاح بقربها
ام زياد: وانتي وولدك متوقعين انو عايشه رح تسمح لبنتها ترجع لذل ولدك
ام عبدالرحمن سكتت شوي وبعدين نادت :اثثثثثثثثثثير
اثير جت : سمي
ام عبدالرحمن: حبيبتي جهزي اغراضك وارجعي مع ام مشعل لبيت زوجك
اثير بدت تبكي: هو ماجاني يمه شلون ترضينها علي اروح له ؟
ام مشعل: مشعل تعبان يا اثير ومحتاجك جمبه
اثير : تعبان؟
ام مشعل : اي تعبان وحاله مايعلم فيه الا الله ..ولدي تعبان من بعدك يا اثير ارجوك ارجعي معاي
اثير : ثواني بس اجهز لي كم غرض واجي معك
ام مشعل : طيب حبيبتي انتظرك..طلعت اثير غرفتها
ام مشعل وقدام ام عبدالرحمن : اجل يام زياد قاعده تنصحين اثير انها تطلب الطلاق عشان تزوجينها زياد
ام عبدالرحمن بصدمه : وشو
ام مشعل : الله يسلمك ام زياد قاعده تحاول تقنتع اثير انها تطلب الطلاق من ولدي مشعل عشانه يتزوجها زياد ويعوضها على قولتها
ام عبدالرحمن: طيب ليش يام زياد كذا ؟ ليش تبين تخربين حياة بنتي ؟ فوق ماني معتبرتك اختي اللي ماجابتها امي .. وفاتحة لك بيتي وعادتك الداخله واحنا الطالعين .. تقومين تسوين كذا !!!
ام زياد: انا ابي لبنتك الزين وابي مصلحتها
ام عبدالرحمن: اي مصلحه تحكين عنها ؟ ضاقت عيونك على البنات تبين بنتي المتزوجه .. خسارة بس
ام زياد عصبت: اصلا انا الغلطانه اللي ابي الزين لبنتك .. لو انها ماخذه ولدي كان ما كان هذا حالها وكانت رح تصير اسعد انسانه بالدنيا .. والحين مالي قعده ببيتك كثر ما قعدت .. وراحت تلم اغراضها وتكلم زياد يجي ياخذها
ام عبدالرحمن قعدت:استغفر الله العظيم واتوب اليه
ام مشعل تهديها: استهدي بالله يا عايشه ماصار الا كل خير
ام عبدالرحمن: لا اله الا الله
بيت ابوبندر
مشاعل وصلت البيت وهي ضايقه فيها الوسيعه .. عيونها حمره من البكا دخلت البيت وطلعت الدرج وصادفت ريما قدامها
ريما: مشاعل .. فيك شي ؟
مشاعل بصراخ وحقد: انقلعي عن وجهي مابي اشوفك قدامي
ريما خافت من هالهجوم: مشاعل وش فيك ياقلبي تعبانه ؟
مشاعل : اقول لك انقلعي ما تفهمييييين .. ركضت على غرفتها
ريما انصدمت من ردة فعلها .. عمرها ماشافت مشاعل بالحاله هذي .. بس ما قلقت عليها مره .. توقعتها تخانقت مع بدر كالعاده
بس تذكرت نظرتها الحاده لها .. لا يكون بس مزعلتها بشي وانا مدري
ما اظن لاني اصلا ما احتك فيها .. تنهدت وراحت للحديقه تشوف سلطان
بيت ام فهد
دلال كانت قاعده مع فهد بالصاله اللي تحت يتفرجون على فلم سوا ..
كانوا داخلين جو بالفلم وقاعدين جمب بعض والمكان كله هدووووووء
فهد ياكل فشار ومتحمس بالفلم .. اما دلال كانت تشرب عصيرها
دخلت تهاني وولعت عليهم النور
فهد: تووووووووووته يالسخيفه طفي الانوار خربتي علينا الفلم
تهاني : بأي حق تتفرجون على فلم بدوني .. وشو ما تقول عندك اخت زهقانه وبالبيت لوحدها
فهد: انا ماكنت ادري انك بالبيت ..دلال اقترحت علي نتفرج على فلم سوا وانا وافقتها
تهاني تأففت: طيب طيب .. راحت قعدت جمب فهد ..
دلال حاولت تتجاهلها حتى بنظراتها عشان ما يطلع منها تصرف ممكن يزعلها
تهاني: دلال ابي عصير
دلال انصدمت اول مره تكلمها بالهدوء هذا : ابشري .. صبت لها واخذته منها بدون كلمة شكر .. بس دلال ما اهتمت دامها كافه شرها عنها ماتبي حتى خيرها
فهد : الناس تقول شكرا
تهاني شربت نص كاس العصير وقالت بدون ما تطالعها : شكرا
دلال ابتسمت لها
كملوا الفلم بس تهاني ماخلتهم بحالهم .. كلما تشوف فهد يمسك يد دلال او شي تقوم تقعد تحارشه وكذا عشان ينسى دلال
شوي وتهاني خبطت فهد على راسه بقوة ووقفت
فهد عصب: تهاني يالبثره وش سويت لك انا
تهاني : هههههههههههه ومدت لسانها له
فهد قام لها وصار يلاحقها وهي تصرخ بالبيت وتضحك
راح فهد وخلى دلال لوحدها
عصصصصصصصصصصصصصصصصصصصبت والامبير عندها طق مليوووون .. ماهي اول مره يسوي فيها الحركه هذي ويضايقها بالشكل هذا ويجحدها والسبة تهاني .. قامت من الصاله على غرفتها على طول وخلت الفلم شغال زي ماهو
بيت احمد
شذى قامت من النوم وتحممت وغيرت ملابسها
واستغلت فرصة انو احمد بره وماهو راجع الا وجه الفجر كالعاده
وراحت لتلفون البيت بمكتب احمد .. الفتره الاخيره تعودت تحاكي اريج كلللل يوم طبعا من ورا احمد وبدون مايدري .. وتقول لها كل شي يصير معها بالتفصيل لانو مالها غيرها تفضفض له وتخفف عنها
شذى: والله وهذا حالي
اريج : اااااخ بس يايزن من جت لعندك وسوت كورسات ملاكمه بزوجك البثر هذا مثل ماكنت اسوي بمرت ابوي .. كان والله لا اخليه يتفل العافيه
شذى: ههههههههههه زين اجل انك منتي فيه .. منا ناقصين تسببين عاهات للرجال
اريج : بالللللله اشوفك قمتي تدافعين عنه
شذى: اي اكيد مو زوجي
اريج سكتت :......... هذا كلام جديد
شذى :شلون يعني؟
اريج : يعني وين بدر وحبك له
شذى: انتي اللي تقوليين لي الكلام هذا يا اريج .. هذا وانتي عارفه اخلاقي .. انا متزوجه كيف بفكر ببدر ؟
اريج : يعني تبين تقنعيني انك ماتفكرين فيه وانك نسيتيه
شذى: ...............
اريج : تلعبين على مين ولا مين انتي ؟
شذى: اريج .. انا اللي قاعده اسويه شي مره غلط .. لازم انسى بدر مايصير هذا كله .. انا متزوجه مقدر اخون زوجي حتى لو ماكنت احبه
........: الللللللللللللله الللللللللللللله .. قاعده بمكتبي وتكلميييين ولااا جايبه طاري الحقير بدر !!!!
شذى انشلت من الصدمه .. احمد قدامها ومسكها قاعده بمكتبه وتحي عن بدر ..
وش بيكون مصيرها الحين
العياده
بندر كان معصب من فعايل ماجد فيه جاحده من الصبح ورايح يتغدا مع رنيم
بندر: والله لا اوريه الشغل
ماجد فتح باب المكتب وطل براسه : هيلللووووو.. من ذا اللي بتوريه الشغل ومعصب عليه
بندر رمى عليه علبة الكلينكس بقوة
ماجد :ههههههههههههههههههههه وانت هذا لونك كلما زعلت علي رميت علي علب المنديل .. ياخي فلقتني حرام عليك .. شكلي بصادر منك المناديل وابدلها بخرق ومناشف عالاقل ماتعور اذا رجمتني فيها
بندر: ها ها ها .. يابو دم خفيف انت !!!
ماجد : ها عاد لا تزعل احمد ربك اني رجعت للعياده ولا انا اصلا كنت انوي ارجع البيت واسحبها نومه للصبح
بندر: الله ياااامرك بس .. هذا اللي ناقص بعد !!! كان يمينا بالله لا جي بيتك واسوي فيك العجب
ماجد:ههههههههههههههههه اموت بالمعصبين
بندر: اقول لا يكثر ..روح على مكتبك شوف فيه مرضى هناك محتاجينك ضروري من زمان وهم ينتظرونك
ماجد : طيب .. توجه لمكتبه وشاف الممرضه
الممرضه :دكتور ماجد .. في مريضه جوه تنتظرك من العصر وماهي راضيه تتحرك من هنا .. تقول مابي اتعالج الا عند الدكتور ماجد
ماجد : طيب طيب جيبي لي ملفها
الممرضه: انا فتحت لها ملف لانها جديده اول مره تجي العياده
ماجد استغرب: جديده وجايتني بالاسم .. طيب طيب انا بدخل المكتب الحين
الممرضه: عن اذنك ,.
دخل ماجد المكتب : السلام عليكم .. عفوا على التأخير اختي بس .....
سكت ماجد مصدوم من اللي شافه
ايش اللي شافه ماجد؟؟؟
وايش مصير شذى مع احمد ؟؟
اثير ومشعل ؟
رنيم وماجد ؟
مشاعل ..معقوله ناويه تسكت لخالد وريما ؟
الروايه قربت نهايتها .. ايش توقعاتكم ؟؟
هااااااااجس
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البارت الثاني والثلاثين
بيت ام فهد
فهد بعد ما خلص من مناقرته لاخته .. راح للصاله اللي كان جالس فيها هو ودلال يتابعون الفلم بس ما لقاها
فهد : وين راحت ؟
راح لغرفتهم .. اول مافتح الباب لقى الغرفه باااااارده وظلام ..معقوله نامت؟
قعد على السرير ونادى بهدوء: دلال.. دلو حبيبتي نمتي ؟
دلال: اي نمت
فهد ابتسم: كيف نمتي والحين تردين علي
دلال: فهد ابي انام .. خليني لو سمحت
فهد قرب منها : مو بدري ؟
دلال: لا مو بدري .. انا عندي بكره دوام ولا نسيت ؟
فهد : طيب خلينا نقعد شوي ..
دلال: ماني قاعده .. اقعد لحالك ..ولا اقول لك رح اقعد مع تهاني احسن لك
فهد : حبيبي زعلانه
دلال بعصبيه:ممكن تخليني انام ولا اطلع انام بالصاله ؟
فهد: طيب طيب بخليك .. تصبحين على خير
دلال ماردت
فهد ضاق صدره لانها نامت وهي زعلانه عليه ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك